التسميات

الثلاثاء، ٢٣ ديسمبر ٢٠٠٨

ميدان رأسي ؟!

نو بروميسيز - ايمي بابي - يسري - kemet - ايمان - هاجر زعبل - حبيبه - حاسوباتيه - برنسيس - انغام علام - بنت مصريه - قلب ينبض بالله - نور شاهين - بنت الماضي .
ردودكم فرقت معايا اوي - ربنا يكرمكم ومحدش فيكم يدوق طعم الحزن ابدا .
--------------------------------------------------------------------
ميدان رأسي ... منتهى الزحمه !
-----------------------------------------
ميدان واسع جدا ، انيق جدا ، مزدحم جدا ،
الافكار من كل اتجاه ، البعض ملتزم بالسرعه المقرره ، وآخرون ملتزمون بحزام الامان ،والكثير يسيرون عكس الاتجاه المحدد والسرعه المحدده ولا يخشوا أي شيء .
هكذا تبدو راسي الآن وقبل الآن وربما ايضا بعد الان ،
والامر قد يبدو طبيعي عند البعض ، لكن اصوات تصادم الافكار كل ثانيه ، يجعلني اصرررررخ !
مستنجدا بوزارة (الموسيقى الهاديه) لترييح الاعصاب وازالة التنشنه :)
تاتتارا تاتتارا تاتترا ...
تاتتارا تاتتارا تاتترا ...
تاتترا تتره تاتاتارا ...
تيرارا ... تيرارارا ... تيرارارارا ... تيرارا
بيتهوفن موسيقاه تتحدث بمليون فكره ، وبجانب ما قد اسمعه من افكار ، فالموسيقي توقظ الكثير من الأفكار الميته وتفتح اشارة المرور لعبور مزيد من الأحاسيس لوسط الميدان الكبير ... ميدان رأسي .
الاشاره خضراء ، وبرغم هذا (الذكريات) تقف ساكنه بلا حراك ،
حتى ونش (الزهايمر) لا يستطيع ان يمحوها او يبعدها حتي عن وسط الميدان .
الاشاره خضراء ، والحاضر ينتظر نقطة العبور للمستقبل ، ليترك الجميل والحزين من الاحداث ليذهب بعيد عن هذة الزحمه ويقف هناك عند التمثال العظيم .
التمثال مصنوع من الجرانيت الاسود ، ومنقوش بالآيات القرءانيه والاحاديث النبويه ، تمثال القيم الأعظم شيد منذ ميلادي ، منذ الساعات الاولي ، حينما سمعت الاذان والاقامه والشهادتين بصوت ابي ، وقتها علمت ان هناك الكثير ينتظرني ... وعلمت انه لابد من وقت للصلاه .
بالفعل فهذا هو موعد صلاة الظهر ... وقت الذروه ، حيث تخرج الافكار هاربه من العمل باحثه عن مزيد من الازدحام لتصل الي مسواها الاخير ... ميدان راسي .وحينما يقوم بلال ابن رباح بالآذان فلا مكان لبيتهوفن او غيره ... فلتصمتي ايتها الموسيقى اللعينه ، فليريحنا بها بلال !.
السجود في حد ذاته عظمه ، عظيم ان تصبح عبد لملك الملوك ،ولان اقرب ما يكون العبد من ربه وهو ساجد ، فالمرور يتوقف تماما عند هذه اللحظه ليبدأ سيل الدعاوي ...اااااااااااااااه يا راسي ... كل هذه طلبات اريدها ... كل هذه رغبات وشهوات ... كل هذه احلام وامنيات ... لو طلبتها كلها لاطلت في السجود حتي يظنوا ان روحي ذهبت حيث لا يعلموا ...
ماذا ادعي ؟ … لا يوجد حل سوى هذه الدعوه !
"يارب علمك بحالي يغنيك عن سؤالي ... اللهم اهدنا للخير حيث كان ... يا رحيم يا رحمن "
تنتهي الصلاه ويتواصل الاصطدام بلا توقف ،الجمبري المسلوق ينادي بحماسه "من يلتهمني ؟" ، وعصافير المعده تجيب "انا قادمه" ،
واثناء ذلك لون الاشاره الاخضر يتحول الي لون شربات العروسه ،وتتوقف العصافير عند جيوبي الخاويه وتنتظر الي (اول الشهر) مع اخواتها من عصافير الاحلام الورديه .
الازدحام عند الاشاره الحمراء يفوق بكثير الازدحام عند الاشاره الخضراء ، ورشوة عسكري المرور ذنبها كبير ، ولا يعبر الا رئيس او وزير ... كعادة مياديننا الواسعه ،
حتي وان كان الاسعاف يحمل احلاما كثيره ، اوشكت روحها علي الصعود الي بارئها .هكذا نضحي بالحلام حتى وان كان العيد الكبير قد انتهى والحجاج عادوا من عرفات ،
ولانه لا مفر من الواقع فلتقولي ايتها الأحلام ، "يا عقلي افعل ما تستطيع" ... " يا قلبي افعل ما تؤمر" ... "وانا معكم باذن الله من الصابرين" .
خبر وفاة الاحلام داخل عربية الاسعاف ، اسكت السارينه ووقفت الافكار للحظات دون اصطدام او ارتطام ، وانهمك الجميع في قراءة فاتحة الكتاب ، لعلها تشفع ولعلها تجاب !
بلا دموع كان الوداع ، فالدموع قد نفذت منذ زمن بعيد ، وانتقال الاحلام بجانب الذكريات يدفعها للخروج عن صمتها وتشارك الافكار اصطدامها العنيف .
الوضع في الميدان الآن :
الافكار ... الذكريات ... الاحلام ... التمثال الجرانيتي الأسود ... والاشاره تحولت الي اللون الاخضر مره اخرى .
تسير الشهوات كاسيات عاريات ، تنتظر بشغف ان ياتي من يلتهم لحمها ويتركها فتات لكلاب الشوارع ،الشهوات تنطلق رغم الازدحام ، تلفت نظر الجميع نحوها ،لا تلاحظ وجود التمثال الجرانيتي هناك ، تصطدم به هي الاخري ، صوت الاصدام مروع ، يردها الى صوابها ، وتعلن توبتها صريحه الي الله .
الافكار الصغيره مشغوله بميعاد الامتحان ، والطريق مغلق برغم اخضرار الاشاره ، يثور الصغار هم الاخرون ، ويطالبون بالغاء جميع الامتحانات "حتى اشعار اخر" .
هاتف الوقت المحمول يرن فجأه :
" مبحبكيش وهنفترق ... ودنيتي غير دنيتك ... ما بينا كان قصاقيص ورق ... طابع بريد في غربتك "
اغنية اليأس المفضله ... اهداء من "بشر" الى "دنيته" !
ذبذبات المحمول تشوش بصوره مزعجه علي صوت راديو تاكسي الحياه ... وجدو لا يسمع شعار اذاعة الشرق الاوسط بوضوح :
"شعارنا ... غمض عنيك وامشي بخفه ودلع – الدنيا هيا الشابه وانت الجدع – تشوف رشاقة خطوتك تعبدك – لكن انت لو بصيت لرجليك تقع ... وعجبي "
ينظر جدو بعيدا عن قدميه ويجد شاب ينادي عليه بحراره ... خليك كول يا جدي واسمع شعار الميدل ايست الجديد :
"شعارنا ... احلق للدنيا واديها طناش ... صدقني الدنيا من غيرك ولا تسواش ... وان حسيت انها مش ليك – هتجيك ! ... وان حسيت انها وياك – متسيبهاش! ... وعجبي " "
رباعيات ليكوريكا ج2)
وبرغم ان الحاضر اقرب ... الا ان الحنين للماضي اشد ... هكذا يقول الجد وهو مصدوم ... وهكذا صوت الصدمه يرتفع في الميدان ... ميدان راسي الكبير !
الوضع في الميدان الآن :
الافكار – الذكريات – الأحلام – التمثال الجرانيتي الأسود – الشهوات التائبه والعاصيه على حد سواء – ثورة الافكار الصغيره - وذبذبات محمول الوقت – وحكمة الجد المصدوم بين الحاضر والمستقبل – الكل يصطدم بالكل – ولا يجدي ذكر لون الاشاره الآن ، فالطريق متوقف برغم انف الجميع !
يحاول العقل (عسكري المرور الانيق ) ان ينهي الازمه في اقرب وقت ، الكل يطالبه بحل سريع ، تنهال الرشاوي عليه ، ورائحة دخان الافكار اصابته بالسعال ... وصوت الاصطدام اصابه بالصداع ... وذهب هناك عند التمثال الجرانيتي ... وسند راسه وخلد الي النوم العميق !!!
الاصطدام لا يتوقف ، طريق العين مغلق تماما ، ونفق الاذن انفجرت بداخله ماسورة الافكار ، الانف ممتلئه بجثث الاحلام ، وبرغم كل هذا تدفق الافكار نحو الميدان لا يتوقف ، لتنبيء بان "يا مستعجل عطلك الله" هي الحكمه المثاليه لهذا الوقت.
همهمات غريبه ، نشاط ملحوظ من الجميع ، والاصطدام تزايد بشده ، الافكار الصغيره مع الكبيره ، والأحلام مع الذكريات ، الشهوات ملقاه على الأرض ، والجد يرتدي نظارته الطبيه لينظر بشغف ، عسكري المرور يستيقظ عند تمثالي الجرانيتي الاسود ، المحمول يتوقف ، والراديو يعلن النبأ :
" يعلن قلبي عن انه قرر زيارة ميدان رأسي ، وان الحب قادم الى وسط الميدان ،فليتنحى الجميع جانبا ، ولتلقي الافكار بورود الاحلام علي جثث الذكريات ، ولترتدي الشهوات الثوب الابيض الجميل ، وليصبغ الجد راسه ليصبح في العشرينيات ، وليلغي عسكري المرور كل المخالفات ، ويستعد لتأمين الطريق مع قوات السعاده الخاصه ... ليستطيع الحب ان يضع اكليل الزهور علي تمثال الجرانيت الأسود ويحتفل بميلاده امام الجميع ... "
والله الموفق ...
السيد الرئيس "قلبي روحي عمري" .
اخيرا توقف الاصطدام مؤقتا ... وعاد الهدوء الي ميدان رأسي الواسع ... وخلدت الي النوم العميق :) .
تمت : محمد نبيل الدمرداش
22-12-2008

الأحد، ١٤ ديسمبر ٢٠٠٨




مبقتش حاسس بالحياه
مبقتش عايش دنيتي
والآه بقت ألف آه
والحزن مالي خطوتي !

اما السبب
يادي العجب !
مليون سبب
مقدرش اقول منهم سبب !!!

احساسي اني
ضعيف قاتلني
وهعمل ايه ؟

دنا حتى بفرح
غصب عني
وفرحتي مُرّه ليه ؟

بحلم ببكره
وخوفي خلى الحلم وهم
والفرح ذكرى
ومعدشي فاضل الا همّ.

اما السبب
يادي العجب !
مليون سبب
مقدرش اقول منهم سبب !!!

حتى لأخويا
حتي لحبيبي
حتي لأقرب حد ليا ...
اصل السكوت قدري ونصيبي .

واديني عايش وسطكم
بفرح عشان فرحكم
وازعل لحزني وحزنكم
واشتاق لنومه فحضنكم
ومسيري ابعد عنكم
واروح بعيد ...
وانساني وانسي اسمكم .

اما السبب
يادي العجب !
مليون سبب
مقدرش اقول منهم سبب !!!

:(
(مقدرش اقول ... ليكو 2008 )




---------------------------------------------------

سالني واحد زميلي

لأ مش زميلي --- اكتر بكتير من اخويا ---

ايه اللي مضايقك ؟

معرفتش ارد عليه

سالني عن حاجات كتير ... فعلا مضايقاني

بس مش كانت هيا سبب الحاله اللي انا فيها

والسبب الحقيقي مينفعش اقوله لاي بني آدم علي وجه الارض

حسيت انه اتضايق مني ... وعنده حق

خصوصا لما قاللي خليك براحتك وسالني يعني انت عاوز الناس يكونوا معاك ازاي ؟

بصراحه مش عارف

بس كل اللي محتاجه ان الناس اللي بتحبني بجد تكون جمبي

وتدعيلي ربنا يقضيلي حاجتي اللي ميعرفهاش غيره

اتمني كلنا ندعي لبعض من قلبنا

واتمني محدش يزعل مني بجد .

ليكوريكا


14-12-2008

الجمعة، ٥ ديسمبر ٢٠٠٨

عوده للتدوين ... كل سنه وانتو طيبين :)

مش عارف اشكر ازاي الناس الجميله اللي ردت في الموضوع اللي فات ازاي

بجد الواحد لما بيبقى تعبان اي كلمه حلوه بتقويه اوي

كل سنه وانتو طيبين وعيد سعيد عليكم

يارب تكون الايام اللي جايه احسن من اللي فاتت

وميكتبش علي حد الحيره او الحزن ابدا

شكرا مره تانيه وكل سنه وانتو طيبين

--------------------------------------------

انا رجعت للتدوين بقصقوصه علي بلوجي التاني

مجرد مشاعر

http://just-afeeling.blogspot.com/

اتمني تنوروني

السبت، ١ نوفمبر ٢٠٠٨

الجرح اللي بجد !


الجرح اللي بجد ... هوا اللي مينفعشي تحكيه لحد :(

بس ده مش معناه ان دي النهايه لاي حاجه

اكيد في نهايات كتير لحاجات كتير ابتدت من زمان ولسه منتهتش

او حتي حاجات تانيه لسه مبتدتش
Align Left Align Center Align Right Justify Full

جيت اكتب سكت ... وجيت اهرب كتبت

لكن صممت انزل البوست برغم اني متأكد انه مش هيفرق كتير

الحمد لله عدد خلقه وزنة عرشه ومداد كلماته ورضا نفسه

يارب وفقنا لما تحبه وترضاه


الاثنين، ٦ أكتوبر ٢٠٠٨

الحاره ... !


الحاره

***

قالولي شايف ؟
قلت شايف ...
قالولي حاسس ؟
قلت يمكن ...
قالولي ايه رايك في دنيا ؟
قلت حاره ... وفيها نسكن !

***

روح اقرى موضوع
الحــــــــاره
علي مجرد مشاعر وبس
اضغط هنا

http://just-afeeling.blogspot.com/

-------------------------------------

انا اسف جدا لو مبردش عالناس بس انشاء الله هحاول اتابع ردود الناس اول باول
وشكرا لكل واحد قال كل سنه وانت طيب
واتمنالكم حياه كلها اعياد وافراح باذن الله
ليكوريكا

الثلاثاء، ٣٠ سبتمبر ٢٠٠٨

عيد سعيد ... فكر جديد !

كل سنه وانتو طيبين وبالحب عايشين ... كل سنه والدنيا حلوه فعنيكم ، كل سنه وانتو محققين كل امانيكم ، كل سنه وانتو بخير وسلام وامان ، كل سنه واحلامكم جميله ونفوسكم صافيه ونبيله ، كل سنه وانتو ناجحين في حياتكم ، كل سنه وانت محققين ذاتكم وقريبين من كل اللي بتتمنوه ...

العيد السنادي بالنسبالي مختلف عن كل الاعياد اللي قبل كده ، حاسس اني قادر أكون اللي انا بحلم بيه ، حاسس انه عيد زي كل يوم بيعدي عليا بعد مقدرت اخرج من اصعب فترات
حياتي ، بعد مبقيت اقوي بكتير من الأول ، بعد مبقت شهرتي ليكوريكا الكئيييييييب ، بعد مخلصت الجزئين بتوع الرباعيات بتوعي (دعوه للحياه) ... الحياه اللي علي قد مهيا بقت صعبه اوي علي قد مهيا مبقتش فارقه معايا خالص .

انا حاسس براحه الحمد لله لاني لأول مره قريب من ربنا صحيح محتاج مساعدة ربنا اني اكون اقرب واقرب ومحتاجه جدا انه يثبتني علي اللي انا فيه .
العيد عيد بجد لاني قدرت أحب ، أحب نفسي واحب كل اللي حواليا ، حتي اللي ظلموني حتي اللي مكنوش قد ثقتي فيهم ، حتي اللي فعز مكنت بموت مكنوش حاسيين بيا ، حتي اللي كنت بحبهم وهما ولا هنا ، بحب الكل لاني عرفت ان الحب هوا الحياه وان الحياه هتبقي سعيده بس لو فيها حب !

انا محتاج ربنا يساعدني في الفتره الجايه خصوصا اني في اصعب سنه في كلية صيدله والامتحانات صعبه والعملي بتاعي كان وحش الحمد لله ، ووللأسف انا مش مذاكر كويس ولا مستعد كويس ، بس انا بدعي ربنا يقدرني اعمل اللي عليا واتمني من ربنا انه يهديني للصح ويوفقني في اصعب شهر هيمر بحياتي ، لاني متخيل اني لو عديت الشهر ده علي خير ، هبقي فعلا قدرت اني اقف علي رجلي من تاني ، وابقي فعلا (ليكوريكا متفائل ايديشن) عن جداره واستحقاق :)

انا النهارده كتبت الموضوع ده عشان افضفض ليكم وعشان اغير الفكره اللي الناس خدتها عني خصوصا ان العيدين اللي فاتو كتبت موضوعين اكئب من بعض (عيد بأي حال عدت يا عيد) ... (حد شاف عيد) ... واللي لما بصيتلهم النهارده ابتسمت بسمه حزينه ... بسمه مستغربه ، مستغربه من حالي زمان ، ومن حالي دلوقتي !


انا النهارده بقول لكل واحد حاسس ان في فقلبه حزن ، حاسس انه خايف ، او حتي قلبه مجروح ، كل واحد البسمه بعيده عن عينيه ، كل واحد مش حاسس ان بكره عيد ، وبيقول زي المتنبي – عيد بأي حال عدت يا عيد - ، واللي بيندم علي حاجات جميله ماتت في الناس من حواليه ، كل واحد قافل نفسه علي ذكريات الماضي ، كل واحد يأسه قتله وخلاه عايش ميت ، كل واحد حزين علي امته وعلي الحال اللي وصلت ليه ، كل واحد بعيد عن ربنا وبعيد عن الحياه وعن الحب ...

بقولهم بكره فرصتكم ... فرصتكم انكم تقربوا من نفسكم أكتر، انكم تحيوا قلوبكم اللي ماتت ، وتقتلوا ياسكم بصبركم وكرهكم بحبكم ... بكره فرصتكم عشان تجددوا رخصة حياتكم وتقولوا لأ للشيطان ولأ للكره ولأ للياس ولأ للضعف ولأ لأي حاجه بتسرق الفرحه ولأ لأي حاجه خلتنا منقدرش نحقق أحلامنا ... بكره فرصتكم انكم تحبوا بجد ...

بكره الصبح اصحي مع الشمس وروح صلي العيد ، قول الله أكبر كبيرا والحمد لله كثيرا ، قولها بقلبك ، وافتكر قد ايه نعم ربنا عليه وقد ايه انت بقالك كتير مشكرتهوش علي اي نعمه من نعمه وعلي الرغم من كده هوا بيرزقك ويساعدك ويقف جنبك ، سلم علي جيرانك قرايبك اصحابك ، حتي اللي حسيت انهم سبب تعاستك وسبب كل الجراح اللي انت فيها ، روح وابتسم في وشهم من قلبك ، حبهم ... ايوه حبهم ، جايز اللي مقدرش يصلحه كرهك ليهم يصلحه الحب :)

ولو هتروح تزور قرايبك اعرف انك كدا بتعمل شيء عظيم وبتصل رحمك وخلي مرواحك ليه بنية انك تقرب اكتر من ربنا وصدقني انت متعرفش الفرحه اللي بتدخل في قلب اي مسلم لما بيزوره قرايبه ... وافتكر انت بتبقي حزين قد ايه لما بتبقي قاعد في البيت ومحدش بيسأل عليك ...

لو عندك اخوات صغيرين يبقي لازم تجيبلهم هدايا ، صدقني مجرد نزولك الشارع وفرجتك علي الالعاب وتقعد تنقي لاختك الصغيره عروسه واخوك مسدس او بمب ، كده انت مش بتقلل من نفسك ولا بتعمل حاجه هايفه ... انت بتهدي ليهم الفرحه ... واذا كان طباخ السم بيدوقه ... ايش حال بقي اللي بيهدي الفرحه للناس ؟!

متنساش تصلي ركعتين شكر لله علي كل شي ، ركعتين شكر علي انك بتشكره دلوقتي ، علي انه ادالك الفرصه انك تفرح ، واداك قلب تحب بيه غيرك ، شكر علي نعمه الكتير عليك ، وادعي ربنا يقويك علي مصاعب الحياه ، وادعيله ينسيك الهموم والدنيا من حواليك ، ادعيله يغفرلك ذنوبك واتأكد انه هيغفرهالك مهما كانت كبيره او عظيمه ، بس اهم حاجه انك تسجدله بقلبك ولو قدرت تبكي ابكي وصدقني هتحس براحه ما بعدها راحه ...

ولو لسه والدك ووالدتك موجودوين ، روح وعيد عليهم ، وميكنش كل همك انك تاخد العيديه وبس ، روح وهززر معاهم ولو مكسوف تهزر ، روح واقعد معاهم وبص فعنيهم ، لان مجرد نظرك ليهم صدقه ... تخيل ؟! ... صدقني الاب والام نعمه مبنحسش بيها الا بعد مبتضيع مننا ، ربنا يخليهملك وميحرمكش منهم ابدا ...


آخر حاجه لو خرجت مع اصحابك حاول تبعد عن اي حاجه تبعدك عن ربنا ، حاول يكون شكرك لربنا علي الفرحه اللي وهبها ليك بطاعته والبعد عن معاصيه ... وربنا يهدي شباب المسلمين ويبعدهم عن الحرام والضلال ...

في النهايه انا هكتبلكم جزء من الرباعيات اللي انا كاتبها واتمني انها تكون هديه مقبوله مني ليكم كلكم في العيد ويارب اكون قدرت اقول حاجه في الموضوع ده تغير في اي حد فينا اي حاجه ...

إحلم يكون الخير في الدنيا من حواليك
وارسم سما للطير وسحابه راح ترويك
واما القلوب تدبل ... اسقيها كلمة حب
ده الحب لو كلمه ... لوحدها تكفيك !

الضحكه ليه تخبيها مع انها بتحييك
والدمعه ليه مخليها محبوسه جوا عنيك ؟!
مالحب ليه خايف ده الحب خلاني ...
أعرف خبايا الكون وآجي اقولها ليك !

ارسمني وش ... وخلي فيه البسمه باينه
واهديني ليك ... واحضني لو حتي ثانيه
ولو السعاده جت فقلبك ... يبقي تقدر
ترسمني ... كل يوم رسمه تانيه !

غني يا قلبي كمان ... سمعني غناويك
واهدي لكل الكون ... الحب لو فيك
وان كان في حبة حزن ... اوعاك تغنيلي
ده الحزن لو غنوه ... تبقي الجراح مزازيك !

نصيحتي ليا وليك ... متخفش من بكره
ولو الدموع فعنيك ... خلي الدموع ذكرى
وحب كل الناس ... الدنيا هتحبك
ده اللي يدوق الحب ... مستحيل يكره !


من رباعيات ليكوريكا ج1 & ج2
------------------------------------------

الموضوع ده يا جماعه هوا هوا الموضوع اللي كتبته العيد اللي فات ، مختلفش كتير عن دلوقتي ، يمكن حصل السنادي زي السنه اللي فاتت بس بجرعات مكثفه ، وزي مقلتلكم قبل كده خلاص بقيت باخد الصدمه واسكت في انتظار اللي بعدها ... لكن في نفس الوقت بعيش اللحظه واما بفرح بحاول افرح بجد

يارب يبقي عيد سعيد علي كل المسلمين ، وكل واحد حابب انه يفرح بجد

كل سنه واحنا كلنا بنحب بعض ... كل سنه واحنا كلنا بنحب بجد :)


ليكوريكا

الجمعة، ١٢ سبتمبر ٢٠٠٨

زمن ملخبط !



مانيكان وفي الباترينه ... لابسه هدوم غاليه

والناس عراه في الشارع والارض مش داريه

مش قلتلك ده زمان ملخبط ...

فيه الجيوب تتملي ... بس القلوب خاليه ؟!

من رباعيات ليكوريكا (الجزء الأول)


------------------------------------------------------------------

فاضلي باذن الله حوالي 10 رباعيات واكمل الجزء التالت من الرباعيات

معرفشي ايه اللي خلاني افتكر الرباعيه دي واكتبها دلوقتي

اتمني تعجبكم ...

ويارب اخلص الرباعيات كلها عشان ابتدي انزلهم كلهم

تحت عنوان حكايات الرباعيات !

ادعولي :)


اه صحيح ...

نزلت موضوع علي مجرد مشاعر اسمه

(خلاص خلاص هكون بطل)

رد علي الناس اللي كانوا معارضين موضوع

( مش مستعد اكون بطل )

اضغط هنا

الجمعة، ٥ سبتمبر ٢٠٠٨

انت غبي ؟ ... ايووووووون :)




جميله المصارحه مع النفس

والأجمل علي فكره المصارحه مع الغير

يعني مثلا لو واحد جالك وقالك :

انت غبي

!!!!!!!!!!!!!!!!

متقلبش التمانيه وتمانين وتعمل الميه وحداشر

ومتجزش علي سنانك وتقول

(اني صائم ... اني صائم ... اني صائم )

اما شوفك يا ............ بعد الفطار

---------------------------------

ركز بس معايا حبتين

انا اعرف من وانا صغنن (صغير بالاطفالي ) :))

ان لما واحد يشتمني او يقول حاجه عليا

(اقوله اولا ربنا يسامحك )

وبعد كده احاول انفي التهمه او الصفه اللي اتوصفت بيها

طيب انفيلي يا سيدي انك موش غبي

طب هاتلي حد في البلد دي معترف بغير كده

(البلد مجاز مرسل لاي بلد غير بلدنا)

وآدي الادله :

1- تفسر بايه انك تاخد العلاوه باليمين وكل حاجه تزيد الضعفين بالشمال ؟

2-طب تفسر بايه ان التعليم بالمجان ؟

3-طب تفسر بايه ان الحكومه (حكومة البلد اللي هيا موش بلدنا) تصرف المرتبات قبليها ب15 يوم ... ويبقي ده حل جوهري لازمة رمضان والمدارس ... ربنا يكون فعوننا عالتعليم المجاني :)))

4-طب تفسر بايه قانون ليكوريكا للمرور الجديد ؟ ... وخصوصا الشنطه الطبيه اللي انا كصيدلي يعني علي الاقل واخد كي جي وان وكي جي تو ... معرفش اتعامل معاها ؟؟!!!!!!!!!!!!

5-طب تفسر بايه البلد بتتحرك ... واركب القطر ؟ ---------- والله علي مدار شهر ونص بركب القطر بس البلد مبتتحركش :(((

طب خدوا دي ..............

تامر حسني واشاراته المقززه في كليبه الاخير (اللهم اني صائم)

ايه سفن ايه ... خد فطيرك وغيره وغيره من المصطلحات الفزيييييييعه اللي بقت زي اللبانه فبق الكل وبتتقال بمنتهي الفخر وكأنهم جابو التوك توك من عند منصور شيفورليه !!!!!

الرقابه سمحت بالالفاظ بحجة انك غبي !!!!!!!!!!!!!!!!

ايييييييييييووووووووووووون

قالت انها الفاظ غير مفهومه

بالنسبه للعامه (الاغبياء)

واخيرا ومن شبكة موبينيل الجديده ... ومن التيليفزيون العربي ... ومني شخصيا

ومن ريحة الغباء المشعه اللي بقت فكل حته

اقولك كل سنه وانت طيب يا غبييييييييييي (بشتم نفسي علي فكره)

ليكوريكا من منظمة الغباء العالمي

انتظرونا ...
----------------------------------
(مش مستعد اكون بطل)
الآن
علي مجرد مشاعر
اضغط هنا

السبت، ٢٣ أغسطس ٢٠٠٨

محتار !




اضحك ...

متضحك يبني :))

يا حول الله يارب

طب يا اخي جاملني واضحك

انجغا انجغا يا كلبوظه

اضحححححححححححححححك

laugh

كركركرككرككركركركككركرككررررررررررر

هههههههههههههههههههههه

هه هه هه هه هه هه هه هه

هي هي هي هي هي هي هي

هو هو هو هو هو هو هو هو

يعني مصمم تقلبها نكد يا سي ليكو

طيب انزل بوش الكئابه واديها عيااااااااط

وااااااااااااااااااااااااااااااااااااااااااااااااااااااااااااااااااااااااااااااااااء :(((

وكمان وااااااااااااء

وااااااااااااااااااااااااااااااااااااااااااااااااااااااااااااااااااااااااااااااااااااااااااااء :(((

ايون

بالظبط يا جماعه

انا اتجننت وخلاص برج الحمام الي في دماغي طار وشبع طير

مبقتش فاهم اي حاجه في اي حاجه

ومبقتش عارف انا عاوز ايه ولا مش عاوز ايه

مرتاح ولا تعبان ... زعلان ولا فرحان ... مشغول ولا فاضي

مش بس واقف علي السلم ومش بس بلف فدواير

الأدهي والامر اني بقيت حاسس بلامبالاه فظيعه

احساس يخنق بجد لما متبقاش فارقه معاك حاجه

مش مسألة مش فارقه :(

بس يمكن معدش في حاجات مهمه

لا لا لا ...

يمكن كل الحاجات بقت مهمه ؟!!!

محتاااااااااااااااااااااااااار

خايف حيرتي ترجعني لحالة الحزن المزمن اللي كانت عندي

وفنفس الوقت مش عاوز ابقي زي الجماد مبيحسش حتي بنفسه

--------------------------------------

سفر كل يوم وبسافر وبغير جو

لعب مع زمايلي وبلعب وبخرج وبتفس

دوره تدريبيه وبروح وباجي كل يوم

نت وبقعد نت

اسكندريه وسافرت وقضيت وقت جميل لمدة اسبوع كامل

بس في حاجه غلط

حاسس اني بعيش علي مراحل

يعني لما اخرج دي مرحله

ولما اسافر مرحله تانيه وشخصيه تانيه

ولما اكون في الدوره شخص تالت واحساس تالت

مفيش روح واحده بتربطني بكل الاحداث

ومفيش احساس واحد امشي وراه او اخاف عليه

----------------------------------------

وفي حاجه كمان ...

مثلا عندي امتحان مرور يوم الاربع الجاي باذن الله

كل الناس قلقانه ... وعندهم حق

لكن انا وبمنتهي البرود رديت علي زميلي النهارده وهوا بيحذرني من الامتحان

"يا محمد متوجعليش دماغي ... لو مكتوبلك تسقط هتسقط "

صحيح كل حاجه بايد ربنا ... وصحيح اللي شفته في السنتين اللي فاتت من ناس بتموت فلحظه يخليني اقول كده واكتر

بس ده مش انا

مش ليكوريكا اللي كان بيعمل لكل حاجه الف حساب ...

وبيشتغل ويتعب ويسيب الباقي علي ربنا

ده مش تواكل يا جماعه ... صدقوني موصلش للمرحله دي

جملة ( لو مكتوبلك ............. هيحصلك ...................... )

اتكررت كتير في قاموسي ... وبيها بحس براحه شديده بان مفيش حاجه تستاهل نزعل عشانها او نهتم بيها

صحيح ارتحت كتير ... وصحيح خرجت من مشاكل كتير بيها الحمد لله

لكن انا حاسس ان في حاجه غلط

-----------------------------------------------------

عموما الحمد لله انا احسن من غيري بكتير

ومش محتاج منكم غير دعوه صغيره في الايام الجميله اللي احنا فيها دي

وباذن الله رمضان يهل علينا بالخير والراحه والطمأنينه

وجايز اللي انكسر ... ببركة رمضان يتصلح

قولوا آمين ...

كل رمضان وانتو طيبين :)




السبت، ٩ أغسطس ٢٠٠٨

واجب واجب الرد عليه !

في البدايه انا بشكر كل الناس اللي ردوا في البوست اللي فات ، ويارب يتقبل منا الدعاء ويجمعنا باحمد وبكل اللي بنحبهم في الجنه يارب .

وانا كالعاده مقصر في الردود حتي علي الناس اللي عندي في البلوج

وجالي تاجات وواجبات وبرضو مقصر فيها

وهحاول ارد علي اخر حاجات جتلي

واتمني محدش يزعل ... وده عشمي فيكم دايما


الواجب الاول :

اذكر اسم من طلب منك حل هذا الواجب



Marionette


سفروته



مبدئيا انا هدمج الواجبات والتاجات في بعض وهجاوب بقي

هما كانوا المفروض ست اسرار وتقريبا 16 صفه

حد يجمعهم بقي ويبقي يقوللي النتيجه

بس عموما انا هتكلم علي قد مقدر ...

وفي النهايه لازم كلنا نبقي متفقين

(تعرفه ؟ ... أه --- عاشرته ؟ ... لأه --- يبقي متعرفوش )

نبتدي الكلام

1- اسمي محمد نبيل الدمرداش ... بقيت دلوقتي بفضل ربنا وحده في بكالوريوس صيدله

النتيجه ظهرت بس الظروف والاحداث اللي مرت في الفتره اللي فاتت خليتني مخدش بالي من حدث مهم زي ده

الحمد لله نجحت والاجمل من كده ان كل صحابي فدفعتي نجحنا ... الا حد واحد ... هوا مش فدفعتي بس لما عرفت انه نزل زعلت جدا ... ربنا يوفق الجميع يارب .

2-21 سنه ... يارب يكون الحسنات فيهم اكتر من السيئات ... واتمني العمر اللي جاي ميبقاش زي العمر اللي فات .

3-من مواليد الزقازيق ... وبحب فيها انا صغننه وتتلف في ربع ساعه ... وبعشق مكان اسمه اسكندريه ... وبكره حاجه اسمها القاهره ... وبموت في حاجه اسمها ايطاليا .

4-اهلاوي جدا ... وبحب الكوره وبتفرج كتير عالماتشات ... وكمان بحب العب كوره بس اعتزلت من سنتين تقريبا ... واحترفت البلاي ستاشن :)

5- بحب الالوان كلها ... بموت في الاسود والابيض ... بشوف فيهم نقاء غريب ... ومبحبش الالوان الباهته ... وبعشق السما والخضره والبحر .

6-اللي يشوفني لاول مره ممكن يتردد كتير انه يكلمني ... يمكن لاني جد شويتين ...

كتير ممكن يقول انطوائي ... البعض بيقول خنيق ... واخرون يتهموني بالغرور

بس هوا الموضوع اني بحتاج لفتره اعرف فيها اللي قدامي ...

سلوكه اخلاقه افكاره ... من الآخر دماغه ماشيه ازاي

وبعد كده لو لقت دماغه ماشيه مع دماغي هيشوف الوش التاني

من الرغي والكلام الكتير

(وشهادة معاملة العيال اللي معايا)

وصدقوني مبحاولش افقد اي صداقه بسهوله ... وممكن توصل اني احارب عشان متنتهيش

بس ساعات كتير بتبقي الظروف اقوي من كل شي :(

7-ابتديت اقرا من سنتين تقريبا ... القرايه حاجه حلوه اوي ... وفعلا ممكن تنسي الواحد حاجات كتير وتعرفه حاجات اكتر واكتر ...
بس للاسف الواقع دايما بيصحينا من الحلم ... واللي في الكتب لو معشناهوش يبقي اكننا مقريناهوش .

8-بحب اكتب ... شعر قصه مقال اغاني رباعيات عامي فصحي ... بكتب عشان ارتاح ... بفرح لو حد عجبه كلامي ... لكن مبزعلش لو حد معجبهوش ...
لاني زي مقلت ... بكتب عشان اقول الي جوايا واستريح مش عشان ابقي شاعر او غيره .

9-اتمني اكون فعلا ملتزم دينيا زي مالناس بتقول ... ومحتاج اوي اني اروح احج او حتي اعمل عمره ... بجد بجد انا في اشد الاحتياج ليها دلوقتي ... اوعدنا يارب

10-ليا صحاب كتير اوي الحمد لله ... يارب نفضل دايما مع بعض وبلاش النهايه تبقي تقليديه ممله زي النهايات الي قبل كده .

11- احلامي بسيطه وطموحي كبير بس للاسف كله مع ايقاف التنفيذ ... ادعولي

12-بحب عيلتي الصغيره -بابا ماما اخويا اختي وولاد اختي - لكن علاقتي بعيلتي الكبيره عليها علامات استفهام كتير ... يمكن عشان مفيش فيها حد قدي او حتي قريب مني في السن حتي يمكن اخويا اكبر مني ب 7 سنين... وعشان كده بعتبر صحابي هما اخواتي ويمكن اكتر.

13- بعشق الهدوء وخصوصا في الاماكن المفتوحه ... ومبحبش الافراح وفي الغالب بروح مضطر عشان الواجب ... لكن لما بكون مع زمايلي او مع ناس بحبهم الهدوء ساعتها مبيبقاش ليه وجود ... والساعات بتعدي ثواني .

14-اوقات كتير بحب ابقي لوحدي ... وفي حاجات كتير محدش يعرفها عني غير ربنا ... وفي حاجات ببقي نفسي اقولها لكل الناس بس مبقدرش ... وحاجات تانيه بكتبها ... وحاجات مينفعش تتقال حتي لاقرب الناس ليا.

15-بتعامل بطبيعتي مع الناس كلها ... جايز في ناس كتير ممكن تفهمني غلط لكن مش مستعد اغير من نفسي .

16- كئييييييب زي مناس كتير بتقول وزي منا سامع ناس منكم دلوقتي بتقوللي ...
بس زي مقلت قبل كده كتير ... عيبي اني لما بفرح بفرح بجد ولما بزعل برضو بزعل عشان في حاجه جرحتني اوي ... لكن دلوقتي اللي نفرح عشانه بقس قليل قوي ...
يارب فرحنا كلنا يارب
وانصرنا وفك كربنا وهمنا وغمنا يارب

(ربي إَنِّي مَسَّنِيَ الضُّرُّ وَأَنتَ أَرْحَمُ الرَّاحِمِينَ)


اتمني اكون جاوبت علي قد مقدر ... ومكنش طولت عليكم

والواجب ده هيتحول لسته مدونين حسب القوانين وهما اول سته ردو في اخر ست مواضيع (3 من البلوج ده و 3 من البلوج التاني (مجرد مشاعر) عندي :

نعكشة

enjy

لست أدرى


اما بلوج مجرد مشاعر :

فارس بلا جواد

رئـــــيسـة حزب الأحلام

ولان رئيسة حزب الاحلام كانت برضو الاولي في تالت موضوع

هناخد الاولي في رابع موضوع وهيا

احلام اليقظة

وكل واجب وانتو طيبين ...
------------------------------------
يرحلون من اجل الحياه

علي بلوج ...

مجر
د مشاعر
ليكوريكا

الخميس، ٣١ يوليو ٢٠٠٨

طلب شخصي

بسم الله الرحمن الرحيم



احمد ابوزيد

كلية هندسة الزقازيق

قسم كهرباء

دخل الكليه بمجموع اكبر من 99 %

وكل سنه من الاوائل بتقدير اي حد يتمناه

دماغه كل الناس بتشهدلها بالعبقريه

واللي بيبعدوا عنه ... بيعبدوا عنه لمجرد انه دحيح

وكأنها تهمه ممكن الانسان يتدارى منها


احمد ابوزيد

قمة الادب والاخلاق

ليه اخ فكلية صيدله واخت لسه مدخلتش جامعه

ووالده ووالدته بيعشقوه

لانه الابن البار المتفوق اللي اي حد يتمني يكون عنده ابن زيه

ابتسامته دايما كانت علي وشه

واحلامه ملهاش حدود


احمد ابو زيد

كان معايا في ثانويه عامه لمدة 3 سنين

كان معايا في كل حاجه

فصل اولي تاني متفوقين

وبعد كده كل دروس ثانويه عامه

وكل خروجتنا وفسحنا كانت لفتره كبيره مع بعض

وشهاده لله عمري مشفت منه حاجه وحشه

وعمره مكان غير واحد من انقي الناس اللي عرفتهم في حياتي

صحيح دخلت انا صيدله وهوا دخل هندسه

وظروف الدراسه بعددتنا عن بعض شويه

لكن من وقت للتاني كنا بنسأل علي يعض

وبنعرف اخبار بعض

خصوصا ان اخوه دخل معايا صيدله

وكان بيعتبره امانه فرقابتي


احمد ابوزيد

اخر مره شفته فيها من حوالي اسبوعين

كنا في الجامعه

ولقيت حد بيقرب عليا بعربيته

وعرفت انه هوا

كانت اول مره اعرف انه جاب عربيه

باركتله عليها وقلتله وانا وهوا بنضحك

(اللاب توب والعربيه جم يا ابو زيد ... مبقاش فاضل غير العروسه )

بصلي وضحك كعادته وقاللي منتا عارف بقي اني معرفش حد ... همتك معانا بقي

بس للاسف

ملحقش يحقق حلمه الجميل

وحلمه مكنش مجرد حلم مع ايقاف التنفيذ

حلمه للاسف مات للابد

وماتت معاه ذكريات جميله عمري مهنساها ابدا

كان فيها نعم الاخ والصاحب والصديق

اتمني ربنا يبدله حلمه ده ، ويزوجه باجمل الحور العين باذن الله


باشمهندس احمد ابوزيد مات في حادثه بعربيته

العربيه اللي كان كتير ممكن يحسدوه عليها

مات بعد منتيجته ظهرت وكان كالعاده من المتفوقين

مات وهوا لسه عنده 21 سنه

يعني قد كتير مننا او اصغر كمان


كل اللي بطلبه منكم انكم تدعوله بالرحمه

وتدعوا لاهله بالصبر

محدش متخيل قد ايه اهله وهوا دلوقتي محتاجين دعانا كلنا

حطوا نفسكم مكانه او مكان اهله

ومتبخلوش عليه بدعاء ولو بسيط

اعتبروه طلب شخصي منكم

ويارب ميحكم علي حد ابدا بحاجه زي دي

------------------------------------------------------

اللهم اغفر له وارحمه واعفوا عنه واكرمه

اللهم وسع مدخله وادخله الجنه وغسله بالثلج والماء والبرد

اللهم يمن كتابه وهون حسابه ولين ترابه وثبت اقدامه والهمه حسن الجواب

اللهم طيب ثراه واكرم مثواه واجعل الجنة مستقره ومأواه

اللهم نور مرقده وعطر مشهده وطيب مضجعه

اللهم آنس وحشته وارحم غربته وقه عذاب القبر وعذاب النار

اللهم ان كان قد احسن فزد في حسناته ، وان كان قد اساء فتجاوز عن اساءته يا رحمن يا رحيم

اللهم كن له بعد الحبيب حبيبا ، ولدعاء من دعا له سامعا ومجيبا واجعل له من فضلك ورحمتك وجنتك حظا ونصيبا



واسألكم قراءه الفاتحه له ولأموات المسلمين


الأربعاء، ٢٣ يوليو ٢٠٠٨

بيان عاجل



ردا علي البيان الصادر من بلوجات ليكوريكا في الموضوع السابق

واهتماما بمصالح الشعب وحرصا علي مصالح المواطنين

اصدرت الحكومه البيان التالي :
لقد قرأنا وتمعّنا في السطور التي كتبها ليكوريكا افندي وكذلك اطلعنا علي التعليقات علي الموضوع (وعرفنا مين معانا ومين مع الناس التانيين) وعرفنا برضو مين اللي هيقف بمزاجه ومين اللي هنوقفه غصب عنه واليكم ما توصلنا اليه من القرارات الاتيه : (ركزي معانا يا ام ندي :) )

1- لست قدري (بالقاف موش بالالف) :)))

لست أدرى يقول...

(عارف
لما كنت من اسبوعين فى قاهره المعز كنت هتشل بجد
كل 5 سم الاقى وقفه مصريه
وقفه مصريه
وفى التليفزين
يا بلدينا وقفه مصريه
يا دكتور واقفه مصريه
يا انسه واقفه مصريه

وبكون نفسى اقولهم ان الناس اصلا على طول واقفه واقفه مش مصريه خالص
واقفين طول اليوم على طوابين العيش
واللى واقفين فى طوابير المرور
واللى واقفين فى كب حته
يا عالم الناس واقفه
كنتم توفرو فلوس الاعلانات دى
فى ناس vip محتاجه الفلوس دى
ماتخافوش الناس كمان بتجرى وهى واقفه
بتجرى علشان تلحق الاوتوبيس
اللى بتقف وقفه مصريه فيه طبعا
وبتجرى علشان تلحق تكون نفسها
وبتجرى وبتجرى

مش هتكلم خلاص كفايه كده
على رأيك انا بقى عندى 22 سنه والضغط بقى والسكر

بس تفتكر اقعد استريح
ولا هيقولولى اقفى انتى كمان وقفه مصريه؟؟؟؟؟؟؟

معلومه
-----
انا كنت هعمل موضوع عن الوقفه العظيمه دى بس انت الحمد لله لحقتنى
لانى لو كنت عملته ولا بلاش)

----------------------------------------------------

وكما ترون فان لها افكار شيوعيه متطرفه وداخل ردها رموز ارستقراطيه ووجهة نظر شموليه ضد الحكم والحكومه بشكل عام
ولذلك قررنا بانها اول الواقفين معانا واخترنا لها مكان تمثال رمسيس (في عز الشمس)
عشان تكتب الموضوع بتاعها براحتها ...
:))

----------------------------------------------------
اما عن الاخوين زفته وقطران :

زفته وقطران يقول...

بلاش تشاؤم
خلي في امل
يعني حنفترض
ان الوقفه حتجيب نتيجه
اهوه نقف وخلاص
جابت جابت
مجبتش
يبقي الحال علي ما هو عليه
عاااااااااااااااااااااااادي
الشعب المصري مش حيتاثر
ياخويا حيتاثر اكتر من كده ايه

-------------------------------------------------------

فنظرا لافكارهما البنائه ولا مبالتهما الواضحه

فقد قررنا ان يتم تعيينهما محافظين لمدينة حلايب وشلاتين
زفته تمسك حلايب ... وقطران يعيش حياته مع شلاتين
وسلمولي عالحدود :)

--------------------------------------------------

اما محمد داوود :

Mohamed Dawod يقول...

يااااااااه هو الموضوع وصل لكده دلوقتى.....المشكله بقى ان الحكومه الفاضله بتاعتنا من واقع كل التصريحات والكلام اللى بيتسرب بيداروا خيبتهم قدام الراجل الكبير بحجة الزياده....يجى يسألهم يا عم الوزير الفلانى ليه الخطه العلانيه ماجبتش نتيجه يقولوه اصل الزياده السكانيه أفشلتها ياريس.....الله أعلم هو مصدقهم بمزاجه ولا مش بمزاجه بس فى الاخر التوجيهات العليا لأجهزة البلد كلها انها تحارب الزياده فى السكان(قال يعنى بنزيد بجد) مع ان لو حد عنده عقل فكر شويه حيلاقى الهند أكتر مننا والصين اكتر بكتيييييييير والاتنين زى الفل. فى الخليج مثلا الناس فاهمه قوى يعنى ايه ثروه بشريه وبيحسدونا على ثروتنا البشريه. بس نقول ايه بقى اهى ثروه من ضمن الثروات اللى فى مصر ومش لاقيه حد يستغلها. حد يبقى عنده شعب بالأجتهاد ده والصبر ده والذكاء ده والفهلوه دى وخفة الدم دى وميعرفش يستفيد منه......بجد يبقى العيب فيهم مش فينا ومسير يوم يجى حد يعرف يستفيد من الثروه دى.....رأيى اننا نفضل نزيد براحتنا لجد ما الحد ده يجى......تحياتى وشكرا


------------------------------------------------
فللاسف الشديد رغم جرأته الشديده وافكاره المتطرفه والتي كنا نتمني ان نستفيد منها جميعا الا انه القدر لم يمهلنا ذلك حيث انه لقي حتفه في حادث مطروح الأليم ... رغم تأكيد الجميع انه كان بيصيف في شرم الشيخ !


-------------------------------------------------


enjy يقول...

انا ماشفتش اليفط لانى مش من القاهرة لكن سمعت عنها فى كل حتة بس انا رايى ان احنا اتعودنا على يفط التهجيص يعنى يفط الوقفة ويفط الحزب الوطنى ويفط الدعاء للريس فى عيد ميلاده ويفط انتخابات المحليات ويفط الاخوان المسلمين ...........كل دى يفط فشينك واحنا عارفين انها فشينك يبقى كمان يفط الحملة فشينك بس هم لقوا معاهم شوية فلوس زيادة قالوا يعملوا بيهم يفط .............مسخرة حقيقية

اما انجي ولانها اسكندرانيه ..... يعني الهوا والميه وشط اسكندري
ه
فليها وقفه خصوصي عندنا خصوصا بعد ورود الفاظ (تهجيص وفشينك ومسخره)
في تعليقها
وقررت الحكومه انها تحرمها من هوا اسكندريه لمدة شهر كامل وهيبعتوها العراق تدعوا للوقفه المصريه بين المغتربين هناك (خدي بالك علي نفسك يا انجي ... وسلميلي علي بوش لو عمل مفأجئه وزاركم :((( )
-------------------------------------------------

دعوة للأمل يقول...

اهداف الوقفة عجبتنى اوى و مؤترة جدا و انا اللى هعييط هههههه
بوست جميل و ربنا يوفقك

-------------------------------------

ولان مصر دايما عمرانه بولادها وبناتها

فكانت دعوه للأمل مثال للشباب الجدع وروقان الدماغ المصريه وعشان كده قررت الحكومه انها هتبقي وزيرة ليكوريكا لشئون الشرق الاوسط :) بس طبعا بعد متحفظ الاهداف عن ظهر قلب وتقسم اليمين كمان ...

---------------------------------------------------------------------

فارس بلا جواد يقول...

السلام عليكم ورحمة الله وبركاته
دى اول زياره ومش هتكن الاخيره ان شاء الله
مدونتك حلوه بجد
تحياتى

اما فارس بلا جواد ، فاكتفي بالاطراء والاشاده ومعلقش عالوقفه دليل طبعا انه مع ليكوريكا ، وليكوريكا طبعا بقي راجلنا يبقي اكيد فارس بجواد بقي معانا ها يا فارس ... معانا ولا مع الناس الوحشين ؟

-------------------------------------------------

كيكى يقول...

عووووووووووووووووووووووووو
انا جيت اتخديت
.........................
وقفة مصرية
......................
احلى نكتة بجد...........
بجد..مش عايزة اكلم اكترررررررررررر من كدة
لاننا كدةكدة مفروسين
........................
وسلاااااااااام علشان الحق احجز فى مدنتىىى
........................
عوووووووووووووووووووو

-----------------------------------------------

اما كيكي فمكانها طبعا معروف في الوقفه اكيد في دريم لاند او سندباد قدام بيت الرعب :))) علي فكره متخديييييتش برضو بعد الجرعه المكثفه :)

-----------------------------------------------------------------

Oss يقول...

ليكوريكا
آه
لازم كلنا نقف وقفه ونطبع مفروشات
ازاى مش عارف
طب هما بيقفوا فين ؟؟

وردا علي تساؤل اسامه فلو عاوز تقف بجد راجع رد باشمهندس لست (قدري) واعرف اماكن الوقفه الي بجد :)

--------------------------------------------------------------

Blogger
Blue Nile يقول...

انا ول ما شفت الاعلانات في الشارع افتكرتها حركة جديدة زي كفاية كده
متوقعتش انها تكون من الحكومة

كفايه ؟ تؤ تؤ تؤ تؤ هعتبرك قولتيها من غير متقصدي يا بلو نايل يا جماعه مكنتش تقصد صدقوني مكنتش تقصد خلاص خلاص هما هيسيبوكي مقابل 3 مليون جنيه سيبيهم في التعليق وهخليهم يفرجوا عنك :)
---------------------------------------------------------

Eman يقول...

انا نفسي أفهم فعلا زيادة سكانية

مستمرة ازاي وأصلا الناس مش لاقية تاكل؟؟؟؟؟؟؟؟؟؟؟؟؟؟

تحياتي علي البوست


اما بالنسبه لتساؤل ايمان

فاحنا شعب جدعان وبناكل الظلط في حد عمره مشي في الشارع وملقاش ظلط ؟ :)

---------------------------------------------------------------

نوره الخشن ــ آي و كفاية يقول...

نياهاهاهاهاهاااااااااااا

عن اذنك بئى رجلي وجعتني اقعد شوية

بس في وقفه نسيتها .. الوقفه اللي بتكون في المحاضرات عمري مابقعد خالص بالكتير ربنا بيكرمني والائي حتة فاضية فالحيطة اسند عليها وكمان ساعات اسمع كلمة عجيبة
لأ الحتة دي محجوزة

حتى الوقوف بئى بالحجز

لألألألأ هعيط انا كمان

عاااااااااااااااااااااااااااااااا



ويتضح من تعلييق نورا انها

(دحيييييييييييييييييييييييييييييييييييييحه) ومبتفوتش محاضره بس حلو اقتراحك يا نوره هندمجه في الاهداف :)
----------------------------------------------------------------

احمد زهران يقول...

حلوة حكاية الواقفة دى .. انتا بلورت كل الوقفات بس نسيت وقفة الخميس .. بتكون واقفة جامدة .. وخاصا للناس اللى فتحوا بيوت واتجوزوا ..
__________________________________
والله يا ليكوا يبنى انتا عندك حق .. بس كنت عايز اقول حاجة لكل الشباب والشبات اللى بيموتوا دول ..
لية بنفكر فى المستقبل واحنا اساسا مضيعين حاضرنا ..
يعنى مثلا يا عم ليكوا يرضيك الشاب من دول او البنت من دول يسقطوا كل سنة .. بلاش دى علشان هتقولى الدكترة والامتحانات وبلاوى تانية ..
طيب والشباب اللى مستغلش وقتة واعد على القهاوى .. هتقولى مزاج .. بلاش دى
البنات اللى ليل نهار سرحنين فى الحب والهيام .. بلاش دى
النت اللى احنا اعدين علية ؟؟ علشان نخرج همنا .. ندون بكلام وبس ..
تعرف ؟؟ صدق كلمات الشاعر وهو بيقول نعيب فى زماننا والعيب فينا ..
انا كنت خايف برضو وقرفان برضو من اليفط والكلام دة .. بس لقيتنى بقول لية هربط نفسى بمستقبل بلدى .. لية مربطش نفسى بمستقبل نفسى واعرف قدرات نفسة واوجها فى الطرق الصح ...
احنا كشباب بحس ان احنا مستنين غلط من اى حتة فى مصر علشان نقول : اهوة .. اهوة .. ناس بتاكل فى البلد .. يعنى من الاخر مستنين اى حاجة نرمى عليها عيوبنا ...
__________كلمة اخيرة ..
رد مرة علية واعمل معجزة وخش مدونتى ..
وانا هروح على طول مفرق ساقع على كل الوقفين


وطبعا باشهندس افندي احمد زهران مش عاجبه حاجه في البلد

وهنبعته مارينا الظاهر (ملحوظه مارينا فندق بجوار امن الدوله في الزقازيق) :)))
-------------------------------------------------------

radwa يقول...

لخبطتنى يا ليكو

هقرأ تانى يمكن اللى اتلخبط يتصلح



تؤ تؤ

اللي اتلخبط عمره ميتصلح يا رضوى

سيبيه متلخبط جايز متفهميش حاجه :)
----------------------------------------------------------

دعاء مواجهات يقول...

والله ياد ياليكو

انت زى العسل زى ما بقول من يوم ماعرفتك بجد

بتلف اة وبتدور بس عندك عمق معمووق اخر معمقة فى تناول لا مش اكل تناول اى عرض

المواضيع وتفنيطها

ومع كل دة بتضحكنا وتغمنا كمااااااااان


لالا بصراحة انت مبقيتش مخلينا محتاجين حاجة خاااالص

بييييييس

واضح يا جماعه من كلام دودي مواجهات انها بتدعو لرساله ساميه وهيا السلام (بيييس) وبعا لانها لسه راجه من عند النبي فخلاص الحكومه هتعتبر مواجهاتها مجرد مناوشات ونيران صديقه :) منوره مصر يا دودي ... فين السبحه والجلابيه :)
--------------------------------------------------------------

imagine يقول...

ربنا مع كل المصريين،ربنا يكون في عونكم
سلام
إسراء

هيا دي الروح يا جماعه اسراء من لبنان جايه تقف معانا اكيد مكانك محجووووووز في ميدان الشحروره يارب متزهقيش منا .....
--------------------------------------------------------

كاميليا يقول...

هههههههه

إنت ناسى إن أشهر أغنية هى

قوم يا مصرى .. مصر دايما بتناديك

اهو من ساعة ما قام وهو مش عارف يقعد خالص

المهم
نتكلم جد

انا عاوزة أبدأ بشعار

وقفة ضمير ..

بعدها كل حاجة هاتكون ممكنة


احييك على هذه التدوينة
اخدتنا وجبتنا بين الجد والضحك
ووضعتنا أمام المعاناه بمنتهى الرقة واللطف


تحياتى واحترامى

------------------------------------------------
اما كاميليها في تدعونا للوقوف ولكن وقفه ضميريه مصريه بس للاسف يا كاميليا الضمير دلوقتي بقي made in china هتقفي مع المصريين ولا نبعتك الصين ؟
--------------------------------------------------------

أحسن تـستاهـل يقول...

محدش يجيب سيرة الوقفة،، كفاية اللي بشوفه في المترو
المترو يا ناس المترو،، ارحموني بأه
انت عمال تتكلم وتقول الوقفة ونقف ووقفوا وانا عمالة افكر في واقفة المترو والزحمة والناس اللي بتركن على الناس آااااااااااااااه على خناقتي في المترو النهارده
اسكت اسكت خليني ساكتة

حححححححححححح
وانت ازيك كده يا سي عبعال؟؟
:)

مها ميهوووو



اما مها ميهو اللي ضاع منها موبايل الشهر الي فات

فواضح من كلامكها انها مش معانا خالص وواضح برضو انها شبعانه من كتر الواقفه بس وماله يا مها (احسن تستاهلييييييييييي) :)
--------------------------------------------------------------

عيله مفتريه سابقا يقول...

بص يا ليكو

انا اتخنقت اساسا

وانا اقول الاعلان بتاع وقفه ده برنامج جديد؟

اتبن الوقفه دى مش وقفة العيد دى واقفه بس لأيه ؟

هل بالوقفه دى هيأكلونا؟
هل هيجوزونا؟
هل هيشغلونا؟
ماحنا اهو ...مش كفاية ساكتين
كمان بيقلبوا المواجع

والله يا شيخ معارفه ارد

ربنا لا تؤاخذنا بما فعله السفهاء منا

وانت اكيد عارف مين السفهاء

سلامى

-------------------------------------------------------
مين السفهاء يا اعقل عيلات البلوجرز ؟ قولي قولي عشان نعرف مكانك في الوقفه :)

-------------------------------------------------------

دودى يقول...

انا من رايى ان احنا لازم نصلح نفسنا الاول وبعدين نقف مع بعض كلنا وبعدين نصلح انما شغل الرسميات والرسم والكلام اللى مش جايب همه ده مبحبوش

ولان دودي ملهاش بلوج لحد دلوقتي فجاري تجميع معلومات عن كل الناس اللي ممكن يتدلعوا بدودي خدي بالك علي نفسك يا عبدالله ......

-----------------------------------------------------------

عروسة ننوسة يقول...

انتى ما حصلتش بجد....ايه البوست التحفة ده....لا دمك سكر واللهى

وزي منتو شايفين عروسه ننوسه ، ولكلامها الجميل واطرائها اللي كان لابد منه علي ليكوريكا راجلنا في الفتره الجايه عشان كده الحكومه كلها هتيجي تقف في فرح عروستنا الننوسه بس ايه يا عروستنا ؟ هتخلفوا ولا هتقفوا معانا :)))
----------------------------------------------------------
بسنت يقول...

تصدق بقى يا ليكو انا اول مره اعرف هما هيقفوا ليه
مش متابعه التى فى تقريبا خالص
بسمع وقفه مصريه بس ما بكمل الاعلان
بس كويس بردوا الوقوف كله نشاط فعلا
وعادى اوى حكايه اليفط دى لو تفتكر موضوع او مشروع الضرايب والاعلانات اللى وصلت للقنوات الفضائيه الغير مصريه اصلا
عادى جدا فلوس ومش عارفين يرموها ولا يعملوا اعلانات ويفط
اكيد اليفط احسن ولا ايييه؟
بس فكره الاعداد الكبيره للمواليد دى حقيقه انا شيفاها تقريبا نادرا ما بشوف اسره سواء شباب لسه متجوزيين من 3 سنين مثلا وكبار شويه عندهم اقل من 3
دا فعلا حقيقى بيشتكوا من المصاريف وبردوا ما فيش فايده
الموضوع دا فكرنى بمحو الاميه قدامنا الجيل التالت على رأيك علشان المتعلمين
مش الجهله يفهوا اصلا الرساله
ليكو مدونتك دمها اخف دم شفته فى التدوين الصراحه
سلمت

اما بسنت فقد اشادت بمجهودات الحكومه في صرف الفلوس المرطرطه

وكذلك ايدت الوقفه بجميع اهدافها

وايدت رجلنا الاول (ليكوريكا) وقالت انه دمه خفيف

برغم انه دائما يؤكد (انه معندوش دم خالص :) )

ولذلك احنا وصينا عليها جوجل ...

ومش هتنزل في السيرش تانيييي :)))

-------------------------------------------------------------
كلام وخلاص يقول...

دمك خفيف جدااااااااااااا
احلى حاجة انك تكبر دماغك ماتركزش معاهم كتير التركيز يجيب الضغط والسكر والوقفة الكتير تجيب الدوالى وبعدين كل واحد ومصره هما بيكلموا عن مصر تانية غير بتاعتنا
بالنسبة لاحلام وقف التنفيذ اتعودنا عليها
no expectation no disopiontment
سلام

اما كلام وخلاص فقال الخلاصه بصراحه

no expectation no disopiontment


انت مدونتك اتقفلت .... صحيح الكلام ده ولا ايه :)))

----------------------------------------------------

سفروتة يقول...

انا قرفت من الاعلانات دي خلاص


طب يعني طالما هما نيتهم حسنة كده وعندهم النية انهم يصلحوا...مش يشوفوا اس البلاوي دي كلها ايه وبعد كده يبقوا يخلونا نقف براحتهم ..


كلنا بندور في دايرة مغلقة

ومش هنوصل لمركز الدايرة دي الا بتغيير من كل النواحي وفي وقت واحد


...................

ليكو الواجب بتاعك عندي روح خده من مملكة السفاريت عشان تحله

يللا انت لسة مروحتش؟؟؟؟

اما سفروته فسابت جواب وبتقول انه فيه واجب

ونظرا ان ليكوريكا بقي راجل مهم

فهنضطر نحجز الجواب اللي فيه الواجب ده لحد بس منكشف عليه

جايز يكون فيه متفجرات سفروتيه ولا حاجه :)))


--------------------------------------------

حذف
Blogger Do not Press F1 يقول...

السلام عليكم
بص دا ظلم بين بقى وتفرقة عنصرية بين المحافظات اشمعنى بقى قارهة المعز هى اللى فيها اليافطات دى والوقفات دى اشمعنى احنا مش عندنا غير يافطتين فى بلدى واحده على اول البلد والتانية على اخر البلد اللى على اول البلد لبابا حسنى وهو بيرحب بالزوار زى مايكون بيقولهم شايفكوا والتانيه على اخر البلد لبابا حسنى بردو بيشاور زى ما يكون بيقولهم فى داهبة


.........
نجى بقى للجد زى مانت قايل
هل اليافطات دى ممكن تأثر فى حد وايه اقصى نتيجة ممكن تجيبها يافطة على ما اظن اليافطات دى كانت ممكن تجيب نتايج رهيبة لو الناس شايفة نتايج ملموسة فى الواقع لكن الناس محطبة ومش عندها ثقة فى اى حاجه
..............

والنبى حد من بتوع قاهرة المعز يتبرع بانه يبعت لينا كام يافطة من دول وفى المقابل هنديه الصورتين اللى عندنا:ي

سلاموز

ماله بابا حسني يا دونت بريس ؟
وكمان عاوز تتخلي عن اليافتطين ؟
ده حتي ياراجل لولاهم مكانتش بلدنا بقت عالخريطه :)
اقولك ...
press f1 بسرعه
قبل ميبعتوك مارينا :)))

--------------------------------------------




اما عن ليكوريكا فقد ظهرت عليه علامات الغنا الفاحش واستقل سياره بي ام دابليو 2008
ويذكر انه مبقاش بيرن علي حد و(بيتصل) وبيتكلم وخلاص رااااااااااااح زمن الميسدات
كما انه بدأ يتنكر لأم ندي
وام أويييييء وام ابراهيم
هذا ونسوافيكم بباقي الاخبار في الموجز القادم باذن الله

ليكوريكا من امام تمثال لست(قدري) رمسيس سابقا

------------------------------------------------------


معلش بقي يا جماعه قلت ارد عليكم وبالمره انقلكم بيان الحكومه

اعذروني وابقو زوروني

معلش لو انا مقصر بس غصب عني

مش معقول هسيب البي ام دابليو وآجي اقعد معاكم :)

ليكوريكا

السبت، ١٢ يوليو ٢٠٠٨

وقفه مصريه !


في البدايه بس يا جماعه انا عاوز اعتذر للناس كلها علي اني مقصر في الزيارات والردود ، بس بجد والله يا جماعه بسافر كل يوم وظروف قعادي في البيت بقت مش بايدي خالص ، اتمني تعذروني وباذن الله هحاول علي قد مقدر اكون عندكم في اقرب وقت

ليكوريكا




سمعتوا اخر خبر ؟

اعلنت دار الافتاء المصريه

عن ان غدا الموافق مش عارف كام

هو متتم شهر اي حاجه

وان غدا برضو هو وقفه عيد معرفش ايه

وهيقف كل المصريين علي رجليهم طول النهار والليل

هذا وننقل اليكم تهاني السيد الرئيس للشعب المصري علي وقفته الجامده

مؤكدا علي ان الوقفه احسن من القعده ، وان الجلوس مضر جدا بالصحه ويسبب الوفاه

شعارنا :

ليه تقعد لما ممكن تقف ؟

اهداف الوقفه :

1- الوقفه رياضه (مش احياء ولا تاريخ ) واخدينلي بالكم انتو ؟ :)

2-يا بخت من وقف رجلين في الحلال .

3-آل يا واقفين يكفيكم شر القاعدين :)

4- وقفت فوق السطوح هز الهوا كمي ... كل العيال اتجوزوا وانا (واقفه) جنب امي

5-يا واقفه علي باب الحمام وكل خد عليه (ميك اب) ... ميك اب ميك اب ميك اب

6- ياعالم بكره يا قاعد مخبيلنا ايه ... يا خوفي بكره يا قاعد متقفشي فيه (اليسا)


الراعي الرسمي للوقفه :

سيراميكا كليوباتر ... معمول عشان (تقف) عليه !

سبرايت : وقـــــــــــــــــف عطشك !

تكاتك المحروسه --- انت تشاور واحنا (نقفلك) --- :)

كفايه بقي مقدمات يا اوسطي ليكو

انزل بالتتر يا ولد :

وقفه مصريه ... made in egypt

***** قبل منزيد مولود ... نتأكد ان حقه علينا موجود ******

-------نحكم عقلنا ... نشبع كلنا (يا شعب جعانين) ----------

-------نحكم عقلنا...نتعلم كلنا (يا شعب ........ ) -----------

-------نحكم عقلنا...نشرب كلنا(ميه ساقعه مشبره ... ) -------

-------نحكم عقلنا...نشتغل كلنا (اكيد مش هنشتغل نفسنا)-------


يا سلام يا بلوجرز يا ولادي

شايفين الكلام الدافي

شايفين السجع والجناس والكنايات والاستعارات

حاسيين معايا المجازات المرسله

(مع ان الشبكه واقعه اثاثا )

والله هعيط ... لا لا سيبونيييييييييي اعيييييييييييييط

انا عيتط خلاص

واااااااااااااااااااااااااااااااااااااااااااااااااااااااااااااااااااااااااااااااااااااااء

وكمااااااااااااااااان

واااااااااااااااااااااااااااااااااااااااااااااااااااااااااااااااااااااااااااااااااااااااء

وبما اني بقيت رايح جاي علي بنت المعز افندي

لاحظت وجود اللافتات الجميله دي في كل حته في مصر المحروسه

وقفه مصريه

ولان زي منتو عارفين

ان زيكا بلد ليكوريكا

انا شفت اليفط دي انبهرت

امال ايه بس ...

احنا حدانا (حلوه حدانا ديه)

في بلدنا مفيش غير وقتين

وقفة العيد الصغنن ووقفه العيد الكبير

انا عارف ان لسه الجيل التالت من الاعياد لسه موصلش بلدنا

مع اني بحوش من وانا عندي عشر سنين عشان اجيب موبايل 3G وموش عارف :((

بس مش ذنبنا يا مصر ... من حقنا نقف معاكم

اه والله من حقنا نقف معاكم ... وبعدين الكلام اثر فيا اوي

حتي الدموع عماله تنزل اهو ... :(((

وبما اني لساني طويل ... وبما ان التدوين حق مكفول لكل المواطنين

تعلن مدونات ليكوريكا البيان التالي :

ندين ونشجب ونطعن في الوقفه المصريه ، لانها وقفه عنصريه لابناء القاهره بنت المعز افندي

ولانها ايضا تثير الضغائن وتؤرق السرائر وتنشر الفتن

ولاننا (رجاله) وجدعان اووووووووووووي ونقدر نقف في الحديد زي مبيقولوا

ونهيب بالساده المسئولين احد الامريين التاليين :

اما تعميم الوقفه علي جميع بلدان كفر مصر المحروسه

واما تدوني قرشين امشي بيهم حالي وانا اوعدكمن هسسسسسسسسسسكت خالص ومش هدون تاني

ومتقلقوش الناس اللي بيدخلوا عندي (هيتشردوا هيتشردوا)

امال ايه ... ليكوريكا بيبيع في اول ورقه خضرا :)


--------------------------------------------------------------

نتكلم بجد شويه

مش عارف اقول ايه ، وقفه مصريه للمصريين ، عاوزين نحد من المشكله السكانيه

عشان نشتغل ونتعلم وناكل ونشرب

كلام جميل ...

بس الاجمل منه نشوف احنا بقينا فين دلوقتي

ونشوف هل فعلا حمله زي دي هيا الحل لمشاكل كتير زي اللي مكتوبه عاليفط ؟

هل فعلا الشباب دلوقتي لاقي يأكل نفسه عشان يتجوز ويخلف مره واتنين وتلاته ؟

يااااااااااااااه علي الشقق المرميه فكمل حته وعالوظايف اللي بقت مغرقانا

نسيتوا (الحق القطر ... البلد بتتحرك ؟ )

يعني هوا الناس هتخلف وهيا في القطر ؟

انا مش عارف والله التفكير بقي ازاي

طب معندكوش احصائيات العنوسه ؟

اه العنوسه ...

يعني بمتهي البساطه بنت حلمها الاول والاخير انها تلاقي راجل يحبها ويحميها ،

ويحققلها حلمها انها تكون ام بحلال ربنا

لكن للأسف مفيش راجل وميش حب ومفيش ام ... بس الحمد لله لسه فيه ربنا الحمد لله .

انا خجلان اوي من نفسي ومن بلدي والاحصائيات دي بقت فكل حته

وبقي كل همنا اننا نقل ... مش نستغل ثروتنا البشريه

بس انا عاوز اوجه رساله لكل اللي يهمه الامر

متقلقوش الموضوع مش محتاج يفط وحملات ودعايا

للأسف خلاص غصب عننا هنشوف بناتنا وولادنا مش قادرين يتجوزوا ولا يخلفوا

وحتي لو الاحصائيات بتقول غير كده وبتقول ان مواليدنا بيزيدوا

فانا بقول علي الي شايفه ولامسه بايديا

الاحصائيات مبتأكلش عيش ، ولا اليفط بتغير حاجه

وقفه مصريه يمكن

تجيب نتيجه جايز

لكن تبقي هيا الحل ... مستحيل !

------------------------------

ليكوريكا

من قاهرة المعز

تحت يفط وقفه مصريه

(احلام مع ايقاف التنفيذ)

------------------------------------

روح شوف

(كلمه واحده)

اكيد في بلوج المشاعرجيه

من ليكوريكا وبثـــــــ

http://just-afeeling.blogspot.com/

الجمعة، ٤ يوليو ٢٠٠٨

ليكوريكا بايظ ايديشن !



ليكوريكا (بايظ) ايديشن!!

بتاريخ 24-6-2007

---------------------------------------------------

تنويه : احداث القصه غير حقيقيه ، والاسماء كلها وهميه ولا علاقه لها بالواقع ...

انزل بالتتر يا ليكو ...

ليكوريكا بايظ ايديشن !
-------------------------------------

(امشي عنه ... روح للدبه نانو ... وابعد عن حبيبي ، وكل اللي فسنه ، امشي يا برد طوبه ، للدبه الدبدوبه ، وابعد عن حبيبي ، وكل اللي فسنّه)
اوف ايه ده .. كل يوم جامعه ... كل يوم صحيان بدري ...
(امشي عنه ... روح للدبه نانو ... وابعد عن حبيبي ، وكل اللي فسنّه )

اسكت انت راخر ... موبايل خنيق ورنه أخنق ... آل امشي عنه آل ..
والله لشايلها وحاتط

(نام يا ليكو نام وهجيبلك موبايل( إن 95 ) )

... لما أقوم بقي آخد شاور لزوم الباور ...


*أنا زي أي بنت في الدنيا كلها ... بدوب من كلمه حلوه ... تلمسني واحسها ... وافضل فاكراها دايما وفحضني اضمها*

ايه يا عم الموبايل ... انت ناوي تتقفل عالصبح ولا ايه ... امنا نشوف مين اللي بيتصل ...


(أنا زي أي بنت في الدنيا كلها ... بدوب من كلمه حلوه)


youssry calling :

أنا زي أي بنت ... ويسري ؟! ... طب تركب ازاي دي ؟!

أه أه افتكرت ... (دينا يسري) بتاعة سكشن المايكرو ... عاوزه ايه ياربي دي عالصبح ... اما ارد واشوف ...

ليكوريكا : الو دينا ازي الثحه؟
دينا يسري : الحمد لله ... ازيك انت يا ليكو
ليكوريكا : طمام الحمد لله
دينا يسري : ايه مش جاي السكشن ولا ايه ؟!
ليكوريكا : سكشن ؟! ... سكشن ايه عالصبح...
دينا يسري : سكشن المايكروا ... الساعه 9 الا ربع وفاضل ربع ساعه !
ليكوريكا : أه المايكروا ان شاء الله جاي .. انا في الطريق اهو ...
دينا يسري : انت في التاكسي ولا بتوفر وراكب ميكروباص ؟!
ليكوريكا : ايه الظرافه دي يا بت يا دينا ... متيجي تلمي الأجره بالمره أحسن ...
لا يا ستي انا لسه في الطريق للحمام ...

دينا يسري : يعني استناك ولا ادخل انا ...
ليكوريكا : لا لا ادخلي وانا عشر دقايق وجاي باذن الله
دينا يسري : طايب مستنياك سلام
ليكوريكا : اوك سلاموكا :)

ربنا يعدي اليوم ده علي خير ، البت دينا دي مبتفائلش بيها خالص ، من ساعة مخدت منها اللوب بتاع المايكرو وهيا لازقه بسلوتب ، زي ميكون طمعانه فيا ،
طبعا ده كفايه ان عيد ميلادي فيه ستتين (6/6/1987)-
بمناسبة عيد ميلادي تقبل الهدايا في كل شهور العام نقدا او بشيكات :)


المهم دخلت الحمام ولبيت نداء الطبيعه ، وطلعت وحتطيت الجيل وخدت الموبايل واللوب والبالطو ونزلت ...

الساعه 9 الا خمسه وفاضل 5 دقايق والسكشن يبدأ ، شكلي هاخد تاكسي .....
تاكسي ايه بس ياواد يا ليكو ، أعقل وخد مايكروباص ووفر 1.75 قرش ،

ولا اقولك مش خسارف في المايكرو .. تاكسي تاكسي
تاكس ... الجامعه لو سمحت .. وشهل وحياة ابوك عشان ورايا سكشن ...

لقيت الراجل بيبصلي بقرف زي ميكون بيبص لمراته وقاللي
( أولا انا أبويا الله يرحمه .. يبقي متقولش وحياة ابوك ، ثانيا منتا شايف الطريق واقف اعمل ايه انا ، أطير بالتاكسي فوق العربيات يعني ؟!)

خلاص يا عمونا متزعلش نفسك اوي كده ، ربنا يرحم الوالد وعلي اقل من مهلك ، محدش واخد منها حاجه ،

وحدووووووووووووووووووه ...

مقلنا خد ميكروباص يا اسطي ليكو ، طب والله منا دافعله غير جنيه ونص ، وابقي خليه يوزع بيهم قرص علي روح الوالد !

ايوه بس هنا يا اسطي *

ليكوريكا : معاك فكة 50 جنيه ؟!
السواق : لا والله انا لسه طالع بالعربيه ، شوف معاك اي فكه كده
ليكوريكا : ثواني هشوف ... هما جنيه ونص اللي معايا ... حلال عليك
الراجل خد الجنيه ونص وكان عاوز ياخد روحي بدل النص جنيه الباقي ... وآدي جزاة اللي ميسمعشي كلمه ليكو يقولها...

ملحوظه : دي الاسعار القديمه قبل مالبنزين يغلي ... وعشان بس تاخدوا بالكم ... المشوار اساسا مش مستاهل يتدفع فيه ربع جنيه :))

الساعه 9.05 ، لما امد عشان الحق السكشن ، معرفش ايه السكاشن اللي في السما دي ،
أنا ليكوريكا
( سنتين كي جي وان وكي جي تو ، و خمس سنين ابتدائي ، و تلاته اعدادي ، وزيهم ثانوي ، وواحده اعدادي مع الضفاديع والاسكارس في علوم ، و اتنين صيدله )
أطلع 4 ادوار عشان سكشن مايكرو ...
يللا سجلي يا لبني واشهدي يا سيهام ، المهم وصلت الدور الرابع بسلام ،
ولقيت عالسلم مزتين تمام ،
يارب يعني الواحد يسيب القمر والشمس قاعدين بره ويدخل مع البكتيريا والفيروسات ، عشان بس تقدروا حجم التضحيات الليكوريكيه في سبيل العلم ...


السكشن طبعا بدأ وأنا عملت زي عبده الاهبل ودخلت ، ووقفت جنب دينا واديتها اللوب بتاعها ، وهيا قعدت تعمل فيها أصيله وخليه ومش خليه وكلام البنات اياه ده ،
لحد مصاحبتها
(رانيا تنده) مجت وقالتلها جبتي اللوب بتاعي ، انا قلتلها اتفضلي اهو وكنت هفطس علي روحي من الضحك علي دينا ... لولا الدكتور دخل !
...

لقيته بيزعق وبيقول ... فين البيه اللي لسه داخل ...
طبعا دينا هانم متتوصاش راحت بصه عليا وضاحكه قام هوا عارفني مش محتاجه ذكاء يعني ...

المهم سلمت امري لله وقلتله ايوه يا كتور ، راح قايللي ايه اللي أخرك
طب والنبي اقوله ايه ده ، أقوله كنت نايم ... ابسط حاجه هيقوللي كمل نوم في بيتكم ...
خلاص مش هيحل المايكرو الا المايكرو ، واهي كذبه (فوشيا) يعني ...

رديت عليه وقلتله : معلش يا دكتور كنت في المايكرو
رد وقاللي : نعم يا خويا وصلت بيك البجاحه انك تقول انك بتاخد كورس وكمان في السكشن
رديت عليه بسرعه : يا دكتور انا مقلتش اني باخد كورس
الدكتور : اومال ايه يا افندي ؟!
ليكوريكا : أنا قلت انا كنت في المايكرو ... المايكروباص يعني ... :)
الدكتور : نعم يا افندي ، كمان جاي متأخر وكمان بتهرج ... اتفضل اطلع بره
ليكوريكا : يا دكتور معلش اخر مره
الدكتور : بره قلتلك
ليكوريكا : يا دكتور (سماح) المرادي
وشكل مراته طلعت اسمها سماح ، اول مسمع الكلمه دي بقي معلق علي بره بره ، ويهديك يرضيك يولع فيك حتي ، برضو مصمم اني اطلع بره ... ...

المهم طلعت وقعدت ادعي علي دينا الفقر ، لازم يعني تفكرني بالسكشن وفي الاخر اتطرد بره ،
يجري ايه لو الاعلام خد خبر ، سمعتي تبقي ايه وسط المزز المتحده ؟!

منا قلتلكم دينا دي فقر ، حاجه تنرفز ، حاجه تتنشن ، حاجه تشيب ، حاجه تهوس ، حاجه زي لهطة القشطه ، لا لا قشطة ايه بس ، دي ولا البقره بتاعة لبنيتا اللي بتيجي في اعلانات رمضان :)

شفتها فين قبل كده دي بس ، آه دي شبه البت اللي كانت طالعه في كليب عبد الحميد حافظ اللي كان عامله سنة 69 وهوه بيغني لحبيبته في المطبخ
( أنا هففطر فووول موش طعميه ... تيرارا ... وهحلي بموز

مالغربيه ... تيرارا ... وعماد بعرور يشمت فيا ... والاقيه بكره يرد عليا ... ويثور ويقووووووول
( العنب العنب العنب ... ينفع في شتا او صيف )

يا عم ايه الاغنيه دي ، انت شكلك جعان ، منها لله دينا نزلتني من غير مفطر ، المهم انا عاوزك تبين مواهبك الليكوريكيه وتلضم معاها ...

اممممم ابتدي بايه يا تري ؟! ... محمد منير كويس ... يللا استعنا عالشقا بالله

نزلت وراها عالسلم ، انتي يا ... تعرفي محمد منير ؟!

تبصلي بقرف ومتردش ...
محمد منير ... اخو اسامه منير ... بالذمه في حد ميعرفش محمد منير ؟!
برضو مبتردش ...
محمد منير ... اللي بيغني ...
(لا يهمني اسمك ... لا يهمني عنوانك ... لا يهمني لونك ... ولا بلادك ... مكانك ... يهمني من الآخر ... انت فودافون ولا موبينيل يا جميل :) )

ههههههه (بقرف) ايه الخفه دي ، وبعدين انا اتصالات ريح نفسك بقي ... وسابتني مكبوس علي عيني ونزلت
ايه الكبسه دي ياربي بس ،
ازاي بس انسي ان اتصالات وصلت :)


------------------------------------------------------------------

فاصل اعلاني :

الراعي الرسمي لبلوجات ليكوريكا

* حديد عز : هتشتروه هتشتروه !

* بامبرز : هديتنا للشعب المصري !

* فودافون : شعارنا ---خليك غبي--- (متفكرش لحظه :) ) !

------------------------------------------------------------------

نزلت وانا مكبوس علي عيني ، وعمال ابرطم ... اكيد البت دينا دي عاملالي عمل ، من يوم معرفتها ومفيش مزه راضيه تلضم معايا ... اما تنزلي يا دينا ،ان مخليتك تعزميني علي كريب تمن البهدله اللي اتبهدلتها دي.

المهم نزلت لقيت واحد صاحبي (مش هقول علي اسمه لحسن يرفع عليا قضية خلع ... اقصد سب وقذف يعني )
المهم لقيته قاعد مع مزز من الشعب البنهاوي الشقيق ... وبنتهز الفرصه وببعت سلامي لكل مزز بنها ، ولكوبري بنها يا نور عيني ، ولمنديل كوبري بنها يا نور عيني ، وللسمك اللي تحت كوبري بنها يا نور عيني ... وللعربيات اللي بتمشي فوق كوبري بنها يا نور عيني ... وسمعني آحلي سلام ليكوريكي آخر وصايه !

المهم بما ان العلاقات الشرقاويه البنهاويه متدهوره للغايه ، لدرجة انهم بيقولوا ان الف شاب زقازيقي بس اتجوزا من بنها السنه اللي فاتت ، قلت لازم اروح اشوف صاحبي وحبيبي بيعمل ايه ، وأهو بالمره نوتطد العلاقات بين الشعبين الشقيقين :)

نزلت عليهم زي مالمارينز نزلوا علي العراق ، وازيكم وعاملين ايه ونظام البراشوتتات الاصلي (فينك يا ميسو - ميسو ده واحد صاحبي واخد دكتوراه من استكهولم في البرشطه عقبالكم جميعا :) )

لكن علي مين ، اخينا اللي قاعد معاهم راح قايم ، وقالهم طايب يا جماعه ، اشوفكم بعدين بقي ، وراح واخدني من ايدي وماشي بعيد عنهم ، ايه يا ناس جرا ايه في الدنيا دي ، ايه الصحاب اللي مبتحبش الخير لصحابها دول !

واضح فعلا ان ديننا عاملالي عمل محترم ، حتي البرشطه مش نافعه ، ماشي يا دينا ، اما اشوفك بثـــ !

خدت نفسي ورحت طالع علي طب ، ولما نقول طب ، يعني متحف التشريح ، يعني المزز اللي بصحيح ،
ولحسن الحظ لقيت اتنين صحابي قاعدين ناحية الملعب ، قلت اما اروح اقعد معاهم ، يمكن نلضم في 3 مزز ونعزمهم علي كابوتشينو (موش بتاع أحمد حلمي :) )

قعدت أنا وهما مستنيين الفرج ، وواضح ان الفرج اتأخر في المواصلات شويه ... يبقي ايه الحل ؟! ... الحل ان احنا نروحله برجلينا (مش محتاجه فكاكه دي) ،

لمحنا 3 بنات قاعدين ناحية متحف التشريح ، قلت تشريح تشريح ، المهم اكسر حاجز الفقر الي انا فيه ، رحنا قعدنا وراهم ومنعرفش حتي شكلهم ايه ولا وشوشهم عامله ازاي ، تعملوا ايه بقي في شباب واقع ، هيفا واليسا خلوهم يعاكسو بنات حتي موش شايفين وشهم ، كانوا اتنين بشعرهم وواحده محجبه ، لقيت الاتنين زمايلي هيموتوا علي اللي بشعرهم ، سبتهم يموتوا وقررت انشن علي المحجبه !

وبدأت ملحمة المعاكسه ، اممممممممم نبدأ بالاسامي
كل واحد من زمايلي قال اسمه وجه الدور عليا ، قلت ليكوريكا ، لقيت واحده من اللي بشعرهم ضحكت زي ميكون افتكرته (داندورمه ... جيلاتي بالكوستاريكي :) ) ، بس مش دي اللي انا عاوزها ...

تاني حاجه الوظيفه ، واحد قال صيدلي تحت الانشاء ، وواحد قال صيدلي فوق الانشاء ، وأنا قلت طالما القعده قلبت علي ريحة دوا كده هقولكم نكته
" مره واحد صيدلي اتجوز ... يوم الصباحيه لقوه مرجع مراته لأهلها ، يا ترى ليه ؟! ............. بيقول انه اكتشف ان مفيهاش نشره داخليه تبين طريقة الاستعمال :) "
لقيت التانيه ام شعر فطست علي روحها من الضحك ... بس برضو موش دي اللي انا عاوزها ... ...

لمحت من بعيد كتاب كيميا مكتوب عليه كلية العلوم ، قلتلهم بقي يهون عليكم عشرة الضفاديع والاسكارس ، ايش حال ان مكناش جيران وقعدنا عندكم 365 وربع يوم ، وبعدين علي رأي المثل الليكوريكي القديم ( مراية الحب كيميا ) وما شاء الله كل كليه فينا عندها بدل الكيميا اتنين وتلاته ، ولازم نوتطد العلاقات ، ولا ايه رايكم ؟!

لقيت اللي انا عامل الدوشه دي كلها علشانها ، ابتدت تتحرك وناويه تقول حاجه ، مره واحده لقيتها طالعه فيا ، اظن كده كفايه أوي يا دكتور ؟!

اتمسمرت في مكاني ، وحسيت ان درجة حرارتي بقت 45 واني بقيت زي القلم الرصاص المقصوف ... لا بسمع ولا حتي بشوف!
ورحت قايل مين ... ندى ؟!

هيا راحت واخده صاحبتها الاتنين ومشيوا ، وأنا قاعد مش عارف انطق بكلمه ،
ندي الانسانه الوحيده اللي كنت اتمني صورتي قدامها تفضل كويسه ، شفتها مرتين ايام مكنا في كلية علوم ، ولحد دلوقتي كل يوم لما بغمض عيني مبشوفش غيرها ، الموضوع كان مجرد صدفه ، وكان حلم جميل في نفس الوقت بالنسبالي ، كنت لسه عامل كارنيه الكليه وفرحان بيه ، وطلعت من صيدله علي علوم عشان كان ورانا محاضره ، وفجأه بدور علي الكارنيه ، ملقيتهوش ، قلبت الدنيا عليه ، ومره واحده لقيتها بتندهلي وبتسأل ... الكارنيه ده بتاعك؟!
قلتلها مش عارف اشكرك ازاي ، انا كنت لسه عامله وضاع مني ... شكرا يا ...........
ردت وقالت ، ندي ... اسمي ندي ، ادتني الكارنيه ومشيت ، ولسه لحد دلوقتي من يومها ، وانا مروح لازم اعدي علي علوم جايز اشوفها تاني او اعرف اي حاجه عنها ، مش عارف ممكن يكون فعلا حب من اول نظره ، بس كل اللي فاكره اني اول مشفتها ، اخينا اللي فصدري الشمال فط من مكانه ونزل عشان يسمعها وهيا بتقول اسمها ، لكن يا خساره ، لما تتحقق امنيتي واشوفها ، اشوفها وانا فوضعي ده ...

شاب صايع تافه ، كل اهتماماته انه يعاكس دي ، ويمشي ورا دي ، ويعرف رقم موبايل دي ، شفتها لتالت مره ولآخر مره وضاع مني حلم جميل بسبب استهتاري وسوء تصرفي ، بس صدقوني الموضوع مش بايدي...

انا شاب زي اي شاب ، طاقه مدفونه ، دخلت كليه المفروض انها من احسن الكليات ، حلمي اني كنت اتعلم فيها صح ، اتصدمت بواقع قلة الامكانيات واكتشفت ان اللي عانيته في ثانوي هعاني زيه وأكتر في الجامعه ،
شاب لو فكر في السياسه و راح مع المعارضه هيقولوا ارهابي متطرف ، ولو بقي مع الحزب الحاكم هيقولوا ده وطني وعميل ،
، لو فكرت في الفن هلاقي حواليا عنب وسمك وحناطير وافلام اباحيه تحت مسمي الفيديو كليب ،
شاب لو سمعت نشره هثور واجول واقول عاوز احارب ، بس هحارب مين وفين وازاي ... اعدائنا بقو كتير وبعد مكانت فلسطين بقت فلسطين والعراق ولبنان وسوريا وافعانستان والسودان والدور علينا جاي جاي ،
لو قلت احب واتجوز ، هحب ازاي وليه اظلم معايا واحده ملهاش ذنب تقعد تستناني 10 سنين اجيب شقه واشتغل واخلص جيشي ودراستي ،
شاب مخنوق من امبارح وبيتمني النهارده يخلص ومبيخفش من حاجه أكتر من بكره ، عاوزنّي بعد كل ده افكر أنا بعمل ايه ... عاوزيني بعد كله ده ابقي شاب طبيعي قادر اقيم تصرفاتي واعرف انا بعمل ده ليه ومبعملش ده ليه ،
تقدروا تقولوا اني خسرت نفسي ، بس خسارتي لنفسي جت بعد مخسرت كرامتي مع كل طفل بيستشهد في كل بلد مسلم عربي ،
تقدروا تقولوا اني خسرت نفسي بس بعد مخسرت تاريخ بلدي وسط مسخره وانحلال في كل مكان ،
تقدروا تقولوا اني خسرت كل حاجه حلوه ربنا خلقها فيا ،
بقيت (انساني) بقيت متبلد المشاعر ، بقيت زي اسطوانه بدل مكنت مصنوع عشان افيد الناس واعمر الكون ، بقيت كلي فيروسات وتروجنز ،
... مبقاش ينفع معيا لا مكاقي ولا نورتون ...
بقيت باد سيكتور في زمن ربنا وحده هوه اللي عالم بيه ، اتمني ميجيش يوم عليكم وتبقوا زيي ،
لاني من الآخر بقيت
ليكوريكا بايظ ايديشن :) !!!

تمت
ليكوريكا

----------------------------------
شوف بلوج مجرد مشاعر

جوا منك ... جوا مني !

http://just-afeeling.blogspot.com/

مستني تعليقاتكم
ليكوريكا



مش مهم اللي فات - سيبوني احلم باللي جاي