اسمه : ملل !

اسمه :
ملل !

عنوانه :
نفس عنوان الحياه
زي اللي ماشي ... لكنه تاه
وملوش عمل .

اسمه ... ملل !

لونه :
رمادي ...
زي التراب

ريحته بتخنق ...
زي الهباب

وملوش طريق
نروحله بيه
او نيجي منه

موجود بكيفه
او غصب عنه

وكأنه بيت ...
ملهشي باب !

وكانه حلم
من غير أمل !

اسمه : ملل !



الدنيا بتلف الدواير
فوق سطورنا ...
نقف طابور
نستنى دورنا ...

فرصه تيجي
فرصه تمشي
حلم ضاع ...
لكن صبرنا !

دايره واسعه وضيقه
زي حياتنا وعمرنا
قلوبنا ليه عايزه لؤى
والفراق بيضمنا


اول السطر
حِلمنا

آخر السطر
حِلمنا

والحقيقه تايهه

بين حلم قادر ينتصر
وحلم مش قادر يعافر
وحلم قاعد ينتظر
وحلم تاني خلاص مسافر

وحلم عالسطر اتقتل

جاله ملل !

طريق طويل
وكاننا ...
فمكاننا من مليون سنه

بين ليل وليل
قمرنا خايف يترسم
والقلب خايف يبتسم
والدنيا عماله بتضحك
وكانها ...
فرحانه في اللي حصلنا

وفي النهار
نفس الحوار
الشمس لسه حر نار
والبحر بيبوس المحار
والارض دايما تحتنا

شباب
فحضنه نفسه تنام وتحلم ...
اجمل حوريه

نفسها منه
دفاها منه
وحته منها
وحته منه ...
تكون فيوم شباب جديد
فحضنه نفسه تنام وتحلم ...
اجمل حوريه !

والدايره برضو هيا هيا
في الوسط شاب ... معاه حوريه
طريق طويل
بين ليل وليل
في النهار نفس الحوار
الشمس لسه حر نار
والبحر بيبوس المحار
والارض دايما تحتنا

في الدنيا ايه هيهمنا ?

غير بكره يبقى لسه نونو
الفرحه والحب فجفونه
والشوق بشوق يملا عيونه
وكانه بدر واكتمل !

اسمه : أمل !

محمد نبيل الدمرداش .
20-12-2009

مش هتكلم :(

هسكت خالص
مش هتكلم
مش هتألم
مش هصرخ
مهما يكون ...
الجرح معلّم !

بس اوعدني
متسالشي ...
ساكت ليه ؟
اصل انا حالف
اللي تاعبني ...
مقولشي عليه !

اصل انا عارف
انك عارف
ايه فيا ؟
وقلبي فيه ايه :(

مش هتكلم
بس هتسمع
آهه بتخرج ...
مني وتوجع

مش هبكي
بس دموعي هتوصلك
هتقولك ...
تعالى امسحني :(
اياك تسمع !


متجيش !

وان جيت اوعاك تسألني
غيرك ايه ؟

اصل انا حالف
اللي تاعبني ...
مقولشي عليه !

اصل انا عارف
انك عارف
ايه فيا ؟
وقلبي فيه ايه :(

خليني اموت وانا مش جنبك
خايف علي قلبي وعلى قلبك
خايف لما تقرب ليا
تبقى ضحيه
ابعد عني ... عن احزاني
قلبي مسامحمك :(



خليني اموت وانا مش جنبك
خايف على قلبي وعلى قلبك
خليني وحيد
مش هبكي ولا هبقى سعيد
مش هتكلم
مش هتألم
مش هصرخ
مهما يكون ...
الجرح معلّم !

محمد نبيل
24-11-2009

يا مصر قرفنا -بس- بنحبك !

لا اعرف اهو شعور جميل ام شعور باللا شعور !

فبعد عملية "استصال قلبك"

كيف يمكنك ان تقول

"انا زعلان "

او حتي

"انا هطير من الفرحه"


مجرد استهلال -

او فلتسميه ان شئت : استهبال :)


----------------------------------------------

حينما يسألك احدهم سؤالاً ... حتى وان كان غبياً "اقصد السؤال طبعا" :)

فلابد ان يكون هناك اجابه ... وطالما ان هناك اجابه ... فعلى ما اعتقد ... لابد ان تقال !

تخيلوا معي ان مقابله شخصيه مع دكتور محترم في شركة ادويه كبيره

ويسألني ... انت الانجليزي بتاعك كويس ؟

"طبعا محدش ضامن حاجه اليومين دول ومن حقه يطمن عليه ليكون عنده انفلونزا الحروف ولا حاجه"

ارد في ثقه : الحمد لله .

يستطرد وبكل برود : طب سبيل "تهجي" ... بايسيكيل "عجله" !!!

تهجيت الكلمه المذكوره بكل ثقه مبرهنا بان انفلونزا الحروف كلها اشاعات واهيه هدفها "بلبلة" الرأي العام

بل وبعد ان انتهيت قلت له وبكل لماضه " علي فكره يا دكتور ... بيدلعوها وبيقولولها "بايك" :)

-----------------------------------------------------------

معلش يا جماعه دول كلمتين كنت مزنوق فيهم ولازم كنت اقولهم قبل مبتدي الموضوع

الموضوع موضوعي - واللي مش عاجبه يشتكي للفيفا ... هه بقى !

------------------------------------------------------------

انا متضايق !

اه والله العظيم متضايق !

مهو يا اما احنا شعب عنده شيزوفرينيا

لاما ولا مؤاخده احنا شعب اهبل

لاما بقى هيا تكون عاملالنا عمل !

مهو مش معقول بعد كل اللي بيحصل ده

من اول الحدث الاكبر طبعا وهوا كوني لحد دلوقتي بشتغل"عاطل"

لحد بقى طابور العيش

وانفلونزا الخنازير اللي اول مجتلنا خفنا عالخنازير فموتناهم ... عموما هما اكيد استريحوا من القرف اللي هما كانوا عايشين فيه !

وانفلونزا الطيور "ولا عزاء للبغبغانات اللي بينشوفهم في الفضائيات"

ولا القطارات اللي لو ناوي تركب واحد مهم يبقي لازم لازم ... تبعت ماسج للجيرل فريند بتاعتك وتقولها انك كنت بتخونها مع مراتك !

معلش يا جماعه محدش ضامن عمره :)

ومحكيلكمش بقى عالمواصلات ولا علي ازمة الزبالين

ولا على ساعة "البلاي ستاشن" - تخيلوا ساعة البلاي ستاشن في "اكشن" علي الاجهزه الجديده بقت ب "خمسه جنيه"

يعني عادل امام كان عنده حق لما قال "الساعه بخمسه جنيه والحسابه بتحسب"

طب بزمة اهاليكم اللي قرفانين من شكلكم

واحد عاطل "غير مدخن" زيي يعمل ايه ؟

يروح يقعد في شيل اوت "كافيتيريا فيها دور لغير المدخنين"
ويدفع في القهوه خمسه جنيه ... ولا يروح يلعب بلاي ستاشن برضو بخمسه جنيه !

اكيد دلوقتي عرفتوا سر الجروب اللي عالفيس بوك الي اسمه "الخمسه جنيه معدن ليه؟! "

اقولكم انا ليه :

فاكرين الربع جنيه ؟

اول منزل كان لسه ليكوريكا مولود ... واول مليكوريكا اتولد مقلش واء زي باقي البني آدمين

تؤتؤ ...

كان نازل بيغني وبيقول :

انا اسمي ليكوريكا متقولشي يعني ايه
دنا ولّدت الفرخه وخرمت الربع جنيه !

"ملحوظه الفرخه بتبيض :) "

بس واضح ان في مؤامره ضد ليكوريكا

بدأت بالجنيه المعدن والنص جنيه المعدن برضو

بس انا من هنا ... من علي الكي بور ببعت تهديد رسمي

ان لو الخمسه جنيه بقت معدن "هخرمها" ايوووون "هخرمها"

وقد اعذر من انذر بقى !

----------------------------


انا عارف اني رغاى

وانتو كمان عارفين اني رغاي

وبرغم كده انا مستمر في الرغى

وبرغم كده انتو مستمرين في القرايه

"قمة الرخامه المتبادله :) "


---------------------------------

المهم نرجع لموضوعنا

هوا كان ايه بس الموضوع ؟

اه ساعة البلاي ستاشن اللي بقت بخمسه جنيه ؟

وشيل اوت اللي القهوه فيه بخمسه جنيه برضو ؟

وشاب غير مدخن زيي ... عمره مدخن في حياته غير "غير السحابه السودا" يعمل ايه دلوقتي ؟

يتمشي في الشارع مثلا ؟

يا جماعه مينفعش

والله ياناس مينفع

مهو متحطش البنزين جنب النار وتقول غض بصر

وبعدين دحنا لو قلنا نظره اولي مش هنخلص ... زائد اساسا معدش في بنات وحشين !

ولو قلنا يا جواز "وبرغم ان العنوسه كترت" تلاقي الاب من دول بيتأمر علي ولاد الناس

طب ياعم الحاج وهوا هيجيب منين

يا اخي قدروا ظروف الناس

بقولكم ساعة البلاي ستاشن في اكشن ب"خمسه جنيه"

اصوت يا خلق زي الولايا ولا اعمل ايه ؟

طب فداهيه الشاب ده !

---------------------------

طب ايه الحل بقى في حصار المسلسلات التركي اللي ورانا ورانا

ونفسي الاقي مسلسل تركي بيخلص !

ومقولكوش بقى عالعواطف والمشاعر والاحاسيس والعياط والرومانسيه اللي بتبقى في كل مسلسل

حاجه تقطع القلب :( !

تخيلوا اطفال بيتفرجوا علي نور ومهند

ولا لميا وكينان !

ومش عارف في تقريبا مسلسل اسمع عاصم او جاد -مش فاكر الصراحه-

كتيييييييييييييير والله كتيييييييييييييييير :(

-----------------------------------------

طب بلاش التركي

خلينا في المصري ومشاكله اللي ملهاش حدود

خلينا في السكر ابو اربعه جنيه

خلينا في الاعلان اللي قريته في الجرنان

"اسكان الشباب"

سعر المتر يبدأ من 8000 جنيه !

نعم يا روح طنط ... يعني شقه 100 متر ب 800.000 الف جنيه ؟

ليه ... ده لو باع ترامادول عند المحطه عيني عينك مش هيجيب الفلوس دي !


-----------------------------------

المهم نيجي بقى للسؤال اللي مش لاقيله اجابه ؟

برغم اننا كلنا عايشين في ده

ودايقين المر مع كل كوباية ميه بنشربها من نيل "ماما مصر"

الا اننا بنحبها !

واما بنتنيل نسمع اغنيه وظنيه جسمنا بيقشعر !

واما كانت بتلعب كان هيجرالي حاجه لو متعب مجابش الجون التاني !

واما بيحصلها حاجه او بتخسر

بنموت من الاه لحد متقف علي رجليها تاني



ايييييييييييييييييييييييييييييه السر ؟

حد يفهمني ايه سبب انفلونزا الوطنيه اللي عندنا دي ؟

مش لكل فعل رد فعل مساوي له في الاكشن ومضاد له في الديركشن ؟

هتقولولي مصر ملهاش ذنب !

هقولكم امال مين السبب ؟

امي ؟

مهما قالولنا برضو واحنا عيال "مصر هيا امي"

-

-

-
يا مصر قرفنا -بس- بنحبك !

انت كمان ايه رايك ؟

يا ترى ايه السر ؟

وياترى لسه بتحبها ...

ولا خلاص قرفت ؟ :)
----------------------------


محمد نبيل 18-11-2009

هوا انا فعنيك ليه مش حلوه ؟

اللحن حزيــــــن
وايدينا بتعزف
وبيسمع مين ؟
غير قلب بينزف !

فوق الاوتار
عايشه الاحلام
وبصوت العود
بنداري آلام

نصرخ بالغنوه
فِوٍشّ الحلم اللي بيهرب
وغريبه الحلم ...
برضو بيهرب !

نضغط عالوتر المشدود
وبنسمع آه مدبوحه ...
تخرج مالعود !

تسأل ...

فين راح الحلم يا ناس
وامتى الحلم ...
لينا يعود ؟

نبدأ نتكلم ونغني
والفرح بيبكي على الغنوه

والدنيا جايه بتسألني
هوه انا فعنيك ...
ليه مش حلوه ؟

معلش يا دنيا
اصل الاحزان ...
بتزغلل عيني
وبتخليني ...
مش شايف
غير حلم زمان
اللي فثانيه ...
اصبح هربان !

مع اني بصرخ بالغنوه
وبضغط عالوتر المشدود
ويرد عليا العود
بنفس الآهه المدبوحه

وبكل برود ...
تسألني الدنيا ؟
هوا انا فعنيك ...
ليه مش حلوه ؟!



محمد نبيل

14-11-2009

هيهات !

سيدي / سيدتي :

توقفت كثيرا عن مراسلتك ، ولم تصلني اي رساله منك

يبدو انك ارتحت مني ومن هروبي

او ربما رسائلي السابقه تكفيك

ولكن سافترض انك تنتظرني

وتريد ان تصحبني

في هروبي الى هناك !

------------------------------------------

سيدي :

حياتنا كالمعطف

نرتديها وترتدينا

احيانا تجعلنا اجمل

وكثيرا ما تجعلنا اقبح

وانا اشعر بالبرد الآن

القشعريره لا تففارقني ابدا

ودموعى الساخنه لا تكفي لتدفئتي

معطف حياتي كلما ارتديه يزداد احساسي بالبروده

احساس الهروب الى ذلك الحضن الدافىء يتملكني ...

السجود يريحني

التفكير يقتلني

ومن حولى يتفننون في طعن جسدي النحيل

النور الذي يسميه البشر "روح" يشعر بالاختناق

يريد الفرار ...

لكنه لا يستطيع .

انا ايضا لا استطيع ان اصرخ

ومرارة الصمت تجعلني اتكلم

ولانه لا يسمعنى سوى خالقك وخالقي

فاعود للصمت مره اخرى

فهو يسمعني بلا كلمات .

-------------------------------------

سيدي :

الحمد لله

كلمه لها الف طعم

وكل طعم اجمل من الاخر

وكل مره اقولها استريح

لعلها تقبل ...

منى اولا ومنك ان شئت ان تقول .

----------------------------------
سيدي :

حسبي الله ونعم الوكيل

حقا مره ...

ولكنها تجعلك اكثر صلابه

اكثر يقينا

واكثر كبريائا

جربها وانت مظلوم

وجربها وانت غير ذلك

فمعناها ...

"الله يكفيني"

ومن بعد الله يهمك رضاه ؟

-----------------------------------

انتهت رسالتي

اتمنى ان تقرأها

ولو لم تفعل ...

فيكفي انها خطوه

في طريق "هروبي الى هناك"

2-11-2009

حضرة الافندي المحترم !

حضرة الافندي المحترم
استاذ قلم ...

من غير مقولك
بلقى اللي بحس بيه
فوق شفايفك

واما تعاكس
صفحه بيضه من حياتي
ببقى شايفك !

ترسم الوهم الجميل
فوق الورق

والحقيقه
والأماني
والقلق !


تكتب الكلمه الجميله
تتسمع غنوه وحكايه

وتقول "بحبك"
من ورايا !

تقراها موجه
تعشق جمالها

وتدوخ وتسكر
معرفش مالها !

دوامه تكبر ...
وتاخدني ليها
وندوب ونغرق
في النهايه !


والاقيك كتير قاعد بتبكي
وبحراره ...
وادوق كلامك
ملقاش في حلقي
غير مراره !

واسكت وتتكلم بدالي
تقعد معايا بالليالي
تشكيلي همي ...
تحكيلي عاللي تاعبني
واللي ... حارقلي دمي

واللي لما راح بعيد
مفرقش لحظه
واللي حتى وهوا جنبي
شغلّي بالي !

حضرة الافندي المحترم
مبقتش قادر احكمك

مبقتش طوعي
من بين ضلوعي
تسرق الكلمه
اللي خايفه تتسمع

توجعلي قلبي
واللي يقرا ...
واللي يسمع ...
برضو زيي يتوجع !

طب ليه تقول ؟
خليك خجول ...
زي قلبي
واكتفي بالسكات

وبلاش تبوح بالاهات
والحاجات ...
اللي لما بتصحى فينا
بنلاقينا ...
صفحه صفرا
في كشكول الحياه
مكتوب عليها ...
ذكريات !


حضرة الافندي المحترم
تسمح لقلبي يسألك ؟

اسمك قلم ...
ولا ألم ؟

محمد نبيل
11/10/2009

رعشه !

عدت مره اخري ...
وعادت معى قشعريرة الشتاء في عز الصيف
بلا تعب ... بلا مرض ... بلا خوف :(
انطلقت مهرولاً الي محراب الحزن الحزين ،
وابواب القلب مفتوحه علي مصرعيها منتظره ساكنها الثقيل .
"صاحب الوجه العبوس"
القلم ابى ان يكتب حرف في غيابه ...
وكأنه يعشق السواد . !

سيدي :

ارجوك لا تغضب مني اذا عبثت بجاجياتك مره اخرى ،
فالطفل بداخلي هو اخر شيء اعتز به ،
واخر شيء نقي قد تراه بعيداً ...
عن كل ما في هذه الدنيا
وبعيدا حتى عن انفلونزا البشر .

ارجوك لا تغضب وتحرك احبالك الصوتيه بعنف في وجهي
فبرغم الشارب المحفور فيه ...
الا ان للدمع مجرى لا يزال مبتلا حتى الآن !


سيدي :

انا لا اجيد الرقص فوق مشاعر الآخرين ...
وبرغم انك من يستحق ان يتوارى بفعلته
الا انني من يبحث عن الرحيل !
فما اصعب ان تقول للوقح البذيء ...
انت وقح ... انت بذيء .

سيدي :

وانا طفل تعلمت كيف امشي واروح ...
كيف العب واتعب ...
كيف ارسم واكتب ...

لكن ابدا ما علموني ...

الانتظار !

سيدي :

ابداً لن تتغير ... وانا كذلك
وشيء غريب ...
انك تعرف ... وانا اعرف كل ذلك
ونواصل مسلسلنا الهزلي ...
لا ليضحك الآخرون ...
ولكن ربما ... لنبكي نحن !

سيدي :

سيجارتي ستظل مغلفه ابد الدهر
فقدرتها علي الاختراق ...
اقل بمراحل ...
من نار تسري من سنين في نهر من الدم يعبر كل دقيقه ونصف
في شرياني الكبير !

سيدتي :

عذرا ...
انا "لا احبك"
ويبدو انني لن افعل ...

لا احبك كما تريدين
ولا حتى كما اريد !

ولن افعل ...
لاني اذا احببتك كما تريدين
فلست انا من يحبك .
واذا احببتك كما اريد ...
فلست انا من تحبيه !

معادله صغيره ...
اذا حسبتها بعقلي
ناتجها فراق
واذا حسبتها بقلبي ...
التمست لكلينا العذر
واذا لم احسبها وحاولتي انتي ...
فانا على يقين ...
انك ستختارين ...
"الفراق بعذر" !

سيدتي :

سئمت الانتظار
وغيابك غير مبرر
وان كان مبرر ...
فانا ارفض اي مبرر

ارجوكي ...
موتي ... او تعالي
فاذا متّي لن انتظرك
واذا جئتي لن انتظرك

واذا جئتي ثم رحلتي ...
فارجوكي لا تموتي ...
ولا تجيئي ...
فالانتظار اهون بكثير من الوداع !

محمد نبيل
21-9-2009

خطوه وفاضل الف ميل ... :)

خطوه ...

وفاضل الف ميل !

حلمي الجميل ...

مشوار طويل ...

بتقول سنين هتغيره ؟

بتقول آهات هتكسره ؟

لأأأأأأأه ..... مستحيل !





خطوه

ونقدر نمشي الف

ده الحلم مهما يتوصف

مستحيل يتعرف

لازم تدوقه بفرحتك ...

لما تشوفه فدنيتك ...

برواز جميل ...

في معبد الامنيات

شهاده ان عمر فات

بقى طوق نجاح

مش وقت راح

وعدى عادي ...

نهار وليل !






خطوه

ولسه الصعب جاي

والسهل جاي

والحب جاي ...

والقلب مفروش بالامل

وهلال غرامنا هيكتمل

يبقى قمر ...

ملهش زي

يبقى قمر ...

جمال وضي !

وروح تروح ...

علي ورده تشرب الندى

ونحس شيء فينا ابتدى

باينه حب ...

باينه احساس بالرضا !

احساس يداوي جرحنا

ومهما ضاع من عمرنا

يكتب وداع ...

وبعد الوداع

يكتب بدايه ...

ونبتدي من جديد

طريق يارب يكون سعيد

اقدر بحبي امشي نصه ...

وبحبك انت امشي نصه ...

وعمر تعبي فيوم محسه

مهما كان ...

مشوار طويل !





ثانيه

وفاضل الف عام ...

وسط الزحام ...

ماشيين طريقنا مكملين

في حلم واضح عاليمين

وحلم مرسوم عالشمال ...

وعنينا تسأل 100 سؤال ...

هنروح لفين ؟

لانهي حلم ؟

مهما هيحصل ...

لا بد نوصل ...

بالحلم يكمل ...

احساس جميييييل !





نقطه

وفاضل الف حرف

كلام ولازم يتكتب

ويتنطق ...

نشوفه طفل عالورق ...

مره يضحك

مره يبكي

ومره خايف ...

ونفسه كلمه تطمنه

ومره محبوس ...

حالف سكوتنا ليسجنه

ودفتر العمر الكبير

مكتوب علي سطره الاخير

لسه كتيييير !

لسه أمل ...

لسه حاجات ومحتاجات

و100 سؤال هيتسئل

ولسه ...

هلال غرامنا هيكتمل

يبقى قمر ...

ملهش زي

يبقى قمر ...

جمال وضي !

وروح تروح ...

علي ورده تشرب الندى

ونحس شيء فينا ابتدى

باينه حب ...

باينه احساس بالرضا !

احساس يداوي جرحنا

ومهما ضاع من عمرنا

يكتب وداع ...

وبعد الوداع

يكتب بدايه ...

ونبتدي من جديد

طريق يارب يكون سعيد

اقدر بحبي امشي نصه ...

وبحبك انت امشي نصه ...

وعمر تعبي فيوم محسه

مهما كان ...

مشوار طويل !


------------------------------

نهاية مشوار كنت فاكر انه طويل ... 16 سنه دراسه ومذاكره ... فيهم الحلو وفيهم الوحش ... الحمد لله :).

دلوقتي الواحد في مفترق طرق ... نهايه وبدايه ... ربنا يوفقنا ويوفق الجميع لما يحبه ويرضاه

واتمنى ليا ولكل زمايلي اللي اتخرجوا او اللي لسه متخرجوش التوفيق في حياتهم

وربنا ميوري اي حد " الجيــــش " ابدا :) !

ص / محمد نبيل الدمرداش .

14-7-2009

سالمه يا سلامه !

ســالمة يا سلامة مقام بياتى
كلمات بديع خيرى ألحان سيد درويش

ســــالمة يا ســـلامة رحنا وجينا بالسلامة
صفر يا وابور واربط عندك نزلنــــى فى البــــــلد دى
بلا أمـــــيركا بلا أوربـــــــا مافى شئ أحسن من بلدى
دى المركب اللى بتجيــــــب احســن من اللى بتــــودى
يا اسطى بشندى

سـالمة يا سلامة

سـلطة ما سلطة كله مكسب حوشــــنا مــال وجيــــــنا
شفنا الحرب وشفتا الضرب وشــــفنا الديناميت بعنــينا
ربك واحـــد عمرك واحــد ادى احنا رحـــنا وجيــــنا
ايه خس عليــنا

سالمة يا سلامة

صلاة النيى ع الشخص منا فرصـــة ميه بلا قافيــــــة
اللى ف جـــيبه يفنجــــر به والبركة فى العين والعافية
ح تـــاخد ايه م الدنيــا غيـر الستر يا شيخ خليها ماشـية
دنيـــا فانيــــــة

سالمة يا سلامة

دى الغربـــــــة ياما بتــــــــــورى بتخــــــلى الصــــنايعى بيـــرطن
مطـــــرح ما يـــروح المصــــرى برضــه طـــول عمــره ذو تفنــن
وحيـــــــاة ربنـــــــــا المعبـــــــود وى آر فرى جود ياسطى محمود
قــدها وقــدود

سالمة ياسلامة

------------------------------------------------

الوصول يعني رحيل وعوده

وجميل ان نعود بالسلامه :)

باك بس هناك

بشكر كل الناس اللي هنوني في عيد ميلادي

وبعتذر عن فترة الغياب الكبيره اللي غبتها

وبعتذر لكل الناس عن غيابي عن مدوناتهم

وبعتذر عن اغلاق مدونة مجرد مشاعر للزوار المدعوويين فقط

وباذن الله اقدر اتابع الناس كلهم الفتره الجايه ...

مع ان الظروف لا تزال "ملخبطه"

انا نزلت بوست علي بلوج "يارب فرحه"

وباذن الله التزم برباعيه كل جمعه .

مستنييكم هناك ...


http://yarb-farha.blogspot.com/

يوم سته سته - الزرار والجاكته !

كل سنه في برواتوكول ليكوريكي معروف

في يوم 6-6- تقبل الهدايا الماديه والعينيه ولا تقبل الهدايا المعنويه على الاطلاق

وعشان كده انا بدي لنفسي هديه عشان انعنش روحي المعنويه وافكر نفسي ان العمر عدى ... واني لسه اعذب واعول ... :(

السنه اللي فاتت كانت قصيده

"واحد وعشرين سنه ... عمري انا "

وده اللينك بتاعها

http://just-afeeling.blogspot.com/20...g-post_23.html

ياريت تقولولي رايكم فيها ...

-----------------------------------------------------

نيجي بقى لقصيده السنادي بمناسبة عيد ميلادي ...


القصيده اسمها ...

الزرار والحاكته !

----------------------------------------------------

الزرار والجاكته !

من تاني جايين يسألوني

ويفكروني ...

بالبدايه والنهايه واللي بينهم ...

واللي ضاع مني ومنهم

واللي باقي في الايدين !

وبيفتحوا ...

دفتر العمر الحزين

ويقلبوا ...

وبيضحكوا وبيهربوا ...

وبيحسبوا

وفي النهايه بيكتبوا ...

العمر كام من السنين !

خلاص حسبتوا ...

واوام كتبتوا ...

عمر المواطن ...

استاذ : فُلان

ابن المواطن ...

استاذ فلان

نفس التاريخ ...

نفس المكان

يوم سته / سته

****************

22

نفس الرقم كل سنه

بيزيد سنه ...

مع اني حاسس ان انا

هوا انا ...

ولا زدت حته !

والحكايه دي ياناس حيرتني

وفكرتني ...

بالزرار والجاكته !

هوا ايه قيمة الزرار من غير جاكته ؟

ولا ايه قيمة الجاكته من غير زرار ؟

اصل الحوار

لما كان الواد محمد

شبرين ونص ...

وكان ملوش

غير في الكلام

واللعب بس !

كان حلمه بكره يكون كبير

ويكون قوي

ويكون شجاع

ويكون بطل

ويكون سفير

ويكون وزير

ويكون مغني

دكتور وظابط

استاذ مهندس

فنان خطير ...

وان جت فيوم سندريللا

زي الحكاوي ...

فوق الحصان

لسندريللا يكون أمير !

ايام مكان القلب ابيض

زي السحاب ...

زي القمر ...

زي احلامه البريئه

زي الحقيقه

زي المطر !

ده الواد محمد بتاع زمان

ايام مكان شبرين ونص ...

وكان ملوش

غير في الكلام ...

واللعب بس !

دلوقتي شوف الواد محمد

وشّه بقى بالشَعر طارح

والحزن فيه ...

بقى ليه مطارح ...

والقلب الابيض اتجرح

والهم غطى عالفرح

قلبه قسي

واوام نسي

حلمه الكبير ...

تشوفه تايه

مجنون وعاقل

ساكت بيصرخ

عيل وراجل !

شايف مغمض

شجاع بيهرب

محتار وعارف

صادق بيكدب !

والخوف بيقتل ...

لكنه عايش

وبرضو خايف !

والصبر مرر ...

لكنه صابر ...

علي صبره واقف !

وتحس انه

مجروح قوي ...

مشتاق أوي ...

فرحان أوي ...

زعلان أوي ...

محتار أوووووووووي ...

مهو سيندريللا ...

عاوزه حصان ...

والحصان فزمننا ده

محتاج امير ...

والواد محمد ...

مسكين ... فقير

الواد محمد ... مش أمير !

ومستحيل

يكون ده هوا

الواد محمد بتاع زمان

ايام مكان ...

شبرين ونص !

وكان ملوش

غير في الكلام

واللعب بس !

وده كان كلامي عن الزرار ...

أما الجاكته ...

دي ست "دنيا" ...

اللي بتيجي فشهر يونيه ...

من كل عام ...

يوم سته / سته .

وتفكره ...

ان زاد في العمر حته

وان الرقم كل سنه

هيزيد سنه ...

مع اني حاسس

ان الزرار ...

الواد محمد ...

مزادشي حته !

6/6/2009

عيد ميلاد الواد محمد "الزرار"

كل سنه وانا طيب :)))

يارب يخليني ليا يارب :)))))))

هابي بيرث داي تو مي :)))

شكرا على كل شي

أشعر الآن بهدوء نسبي ...
يتملكني احساس بالراحه ... أو فلنقول احساس باللا احساس
هذا الاحساس الذي تشعر به بعد مجهود طويل ...
أو حفله صاخبه اجبرت علي حضورها وانت الان ملقى علي سريرك تحمد الله على نعمة الهدوء ....
الحمد لله على كل حال ...
واتمنى الا تكون العاصفه قادمه في الطريق .


-----------------------------------------------------

بدأ كل شيء في الانتهاء

5 سنين هم كل الحياه تقريبا ...
فتره سنوات الدراسه الجامعيه
صداقات كثيره
أحلام تحققت ...
احلام اخرى وأدتها الظروف ...
أو حتى قتلت حتي قبل أن تولد


أمس كان اخر امتحان عملي "باذن الله" لكل طلاب بكالوريوس

يوم وداع اعيش فيه منذ اكثر من شهر تقريبا
كم تمنيت هذا اليوم وسعيت لأن اصل اليه ...
والان ولما اقترب ...
وجدته من اصعب الايام التي قد تمر علي انسان في حياته


البعض قد يكون دخل الجامعه وخرج منها ، ولم يشعر باي تغيير
البعض تمثل له هذه الفتره مجرد +5 في عداد العمر ...
البعض ربما يكون قد خرج من الجامعه بصاحب واحد أو اثنين على الاكثر ... يكون التواصل معهم ممكن بعد التخرج


الأمر ولا ادري أقول"للاسف" أم "لحسن الحظ" مختلف تماما ...
وقد تلاحظ هذا ... اذا تجولت ولو لدقيقه واحده بين كشكول الذكريات "الاوتوجراف"
لما قرأت الكلمات المكتوبه ... انهرت ولا شك ... فالامر اصعب مما تتخيل ومما يتخيل اي انسان علي وجه الارض
وانا الآن اقدم للجميع شكر علي كل شيء ...
اتمنى ان يصلهم واتمنى ان تكون الذكرى التي تركتها في نفوسهم ...
جميله كذكراهم التي لن تمحى الى الأبد ...
---------------------------------------

كلام عمري متخيلت اني اقراه في يوم من الايام
كلام مش مصدق انه مكتوب عشاني
لحظه وداع انا اللي طلبتها
حبيت ميبقاش وداع صامت
حبيت انا اللي اشتري صخرة الزكريات عشان اروحلها وقت محب
واخبط دماغي فيها واقول ... "يااااه كانت اجمل ايام حياتنا "
وابتسم ... وتنزل الدمعه من غير حتى متستأذن ...

شكرا بجد ليكم ...
شكرا لكل لحظه قضيتها معاكم ...
شكرا لكل لحظه تعاطف حسيتها منكم ...
شكرا لكل موقف جدعنه وقفتوا فيها جنبي
شكرا لكل مره سامحتوني علي حاجه عملتها وضايقتكم ...
شكرا علي 5 سنين من عمري ... عشت فيهم عمري كله
شكرا علي الاحلام اللي اتحققت
شكرا علي الحاجات اللي ابتدت ولسه منهتش
شكرا علي الحاجات اللي ابتدت وانتهت
شكرا لكل بسمه رسمتوها علي وشي ...
شكرا لكل كلمه حلوه سمعتها منكم ...
شكرا لكل عيش وملح كلناه مع بعض ...
شكرا لكل خير عملناه مع بعض ...
شكرا لكل نصيحه نصحتوهالي ...
شكرا لكل خروجه خرجناها مع بعض ...
شكرا لكل مكان رحناه ...
شكرا علي الهدايا اللي عمرها مهتتنسي ...
شكرا علي "حياه" كنتوا انتو اهم ما فيها
وايام كانت من غيركم "وحده" وفضا ملهوش حدود ...
بجد مش قادر اوصف شعوري دلوقتي ...
بس مقداميش غير اني اتمنى ... وربنا قادر علي كل شيء :(
. يمكن كان في حاجات اتمنى كنت احققها في السنين اللي قضيتها معاكم
بس كان وجودكم معايا بيقويني وبينسيني اني ناقصني حاجه ...
ربنا يعيني بعديكم ...
ويارب اما تفتكروني ... يكون بالخير .

بجد شكرا .

-------------------------------------------------------

جه دلوقتي علي بالى اغنيه سمعتها في فيلم you have got a mail

اسمها remember ...

Long ago, far away
Life was clear
Close your eyes

Remember is a place from long ago
Remember filled with everything you know
Remember when you're sad and feelin' down
Remember turn around

Remember life is just a memory
Remember close your eyes and you can see
Remember think of all that life can be
Remember

Dream love is only in a dream
Remember--
Remember life is never as it seems
Dream

Dream love is only in a dream
Remember
Remember life is never as it seems
Dream

Long ago, far away
Life was clear
Close your eyes

-----------------------------------------------------------

معلش طولت عليكم ...

تقريبا مش هنزل باذن الله مواضيع عالبلوج ده طول فترة الامتحانات ...

اتمنى تتابعوني على بلوج يارب فرحه كل جمعه ...

http://yarb-farha.blogspot.com/

اشوفكم بخير وادعولي اعدي الامتحانت على خير

وربنا يوفقنا ويوفكم للخير والنجاح والفرحه باذن الله .

8-5-2009

نشرة الاخبار الليكوريكيه - عدنا :)

انطلاقا من المبدأ القائل :

" يا حامل همك وهم غيرك ... بكره تموت وانت واقف علي حيلك"


ولأن الموته دي مش "ستايل" ... قررت مشيلش الهم ولو لفتره واجرب الفرح حتي ولو "Demo"


عارف ان الموضوع صعب حبتين ... بس بدأت باني احاول ارسم البسمه على وشوش الناس

وانطلاقا من مبدأ "طباخ الكشري بيدوقه"

مابالك بقى اللي بيهدي الفرحه للناس ؟؟؟

-----------------------------------------------------------------------

كان هذا موجز للانباء ...

شويه وهننزل بالتفاصيل :)


------------------------------------------------------------------------

اشاعات تحوم حول السلوك الغريب لليكوريكا هذه الأيام ...
وليكو يؤكد دي مش كدبه "ابريل"


انباء عن اعتصامات واضرابات من "المتشائمين" تجتاح عاصمه التفاؤل الجديده "ريكا"
والشرطه "المنزوعة السلاح" شوهدت وهي رافعه لافتات مكتوب عليها :
"والنبي تبسم" :)

النظام الليكوريكي يهدد باعتقالات واسعة النطاق لأي حد هيشوفه "مكشر" في الشارع
والشعب حالف ليكشر في "بيته"

الأزمه الماليه العالميه تجتاح دولة ليكوريكا وتهدد اقتصادها ... والبنك الليكوريكي المركزي يرد "واحنا من امتى وكان معانا فلوس ؟ "

والرئيس ليكوريكا يخاطب العالم قائلا "هنيالك يا فاعل الخير والثواب" :)

والمعارضه تقول " ازرعوا "الريسيبشن" قمح !


انباء عن تنظيم جديد مناهض لحركة ليكوريكا التفاؤليه ...
واعلن منظموه انهم سيطلقون عليه اسم " كلضم وشك "


بعد ان تبسم الشعب الليكوريكي ، زاد الانتاج وظهر ابداع ابناء وبنات جمهورية ليكوريكا العظيمه
وقد قامت شركه مساهمه ليكوريكيه باختراع ماسنجر جديد ، لا يسمح باضافة أي صوره حزينه ، وكل السمايلز فرحانه ومزقططه ، كما لا يسمح باي عبارات أو نيك نيمات حزينه ، وأي حد يفكر انه يزعل ... يروح يزعل في القوضه التانيه واما يخلص زعل ييجي يقعد براحته :)

واطلق عليه مخترعوه اسم " من القلب للقلب -ماسنجر- " :)


توصل باحثون ليكوريكيون لقطره جديده تمنع البكاء أو حتي التفكير فيه ، واطلقوا عليها اسم "متدمعيش يا عين" :)


وقامت جماعه من المعارضه بعمل عقار مضاد للبكاء المتواصل وسموه "كتر الحزن يعلم البكا" :(



نظمت مباراه تفاؤليه بين فريق الأهلي والزمالك ...
وكانوا متفقين ان " محدش هيغلب حد "
وان الفريقين هيلبسوا "بمبي"
وان الحكم مش هيشيل " كروت حمرا"
وأي جون هيجيبه فريق ... هيتحسب للفريقين :)

بس برضو المعارضه دخلت وحاولت تهيج الجماهير وقعدوا يهتفوا :

"الشبشب والقبقاب ... دلوقتي بقو صحاب :( "


انباء عن اتجاه الحكومه الليكوريكيه المتفائله لخصخصة "النيل" للمتقائلين فقط...

متحججين بأن "الزعلان يشرب من البحر" :)


أما عن حالة الطقس فده علي حسب مزاجك :

عاوز تشوف الدنيا ربيع والجو بديع ... غمض عنيك وابتسم :)

عاوز تشوف الدنيا شتا وتتدفى تحت الغطا ... غمض عنيك واسمع اليسا :)

عاوز تشوف الدنيا صيف والجو ظريف ... اشرب سبرايت :)

عاوز تشوف الدنيا خريف والجو لطيف ... امسك ورده وقول : هفرح - هنبسط - هزقطط - هفرح - هنبسط - هزقطط - هفرح - هنبسط - هزقطط :))


كان معكم ليكوريكا مراسل قناة "سمايل" تي في ... نشرة الأخبار اليكوريكيه .


----------------------------------------------------------------


صحيح دخولي الفتره الجايه هيقل شويه عشان الإمتحانات

ابقو تابعوني باذن الله كل جمعه علي بلوج يارب فرحه

اضغط هنا

http://yarb-farha.blogspot.com/

يارب فرحه !

الايام الي فاتت خدت قرارات كتير

غيرت حاجات وبعدت عن حاجات وقربت من حاجات

وفي النهايه انا قررت ابتدي ... وبتمنى تبقى النهايه

"فرحه"

-------------------------------------------

انا سجلت الرباعيات بتاعتي أخيرا

وثقتها في الشهر العقاري امبارح ، مش عشان الحقوق وخلافه

بس عشان ده أول عمل ابدأ فيه واكمله

وكان ليه جزء أول وتاني وتالت

واللي في الاخر بقو 132 رباعيه والحمد لله

واختارت ليهم اسم

"يارب فرحه"

------------------------------------------

النهارده خدت قرار تاني

وعملت بلوج عشان تنزل عليه كل الرباعيات باذن الله

يعني رباعيتين كل اسبوع ومعاهم كومينت بسيط

اتمنى تعجبكم وتزوروني هناك كل شويه ...

وآدي اللينك :

http://yarb-farha.blogspot.com/

اضغط هنا

10-4-2009

لعلها تكون كلماتهم !

سيدي / سيدتي :

أعجبك سخطي علي الحزن الرساله السابقه ...

اتمنى من الله الا يعجبك سخرية الحزن مني الآن !


سيدي / سيدتي :

أن تقلب في كشكول ذكرياتك ... شيء جميل بالفعل ، أن تتجول في ماضيك مع قدرتك علي السرد والتحليل ... شيء يستحق التقدير ،
ولكن أن تجبرك بعض الذكريات علي الحديث عنها ، بل وعنها فقط دون غيرها ... فهو شيء مؤلم جدا .

كشكولي مدون فيه الكثير والكثير ...

لا اتذكر المناسبه حقا لكتابة كل هذا ، ولكني سآخذك معي بين حواري الكلمات الضيقه ، لعلك تعرف شيء ولو بسيط عني ، أو لعلك لا تعرف اي شيء ويزداد الغموض ، أو ربما تعرف كل شيء ... !

ولعلك تقولها مثلي الآن ... انها ليست كلماتي ... ولعلها تكون كلماتهم !

------------------------------------------------------
الغبار شيء ممل

يتراكم بصوره مثيره للاشمئزاز على كل الأشياء الجميله

اعجاب ... انبهار ... غبار ... ثم ملل !

حتى الأحلام حمراء الوجنتين ...

اصابها بعض من الغبار ، وكثير من الملل !

أتأمل حالي الآن ،

ولاشك انني أكاد اختنق ...

فانا غريق في الغبار ...

وتجذبني دوامات الملل !

يارب ...

اطمع في ان تزيل هذه الغشاوه وهذا الغبار

وتستبدلهما بمزيد من (الندى) و(والأمل) !

20-2-2009

-------------------------------------------------

ترى من أين ياتي هذا الغبار ، ترى من يستطيع ازالته واعادة الحياه للاشياء الجميله ،

انا لا أدري ... لعلك تكون !

--------------------------------------------------
الناس

البشر

الأعين المتلصصه

الآذان المتجسسه

الأيادي والمشاعر المبعثره

احساسنا بانهم يتدخلون في كل شيء

حتى ولم نطلب رايهم

جمعية الآراء الخيريه

وكذلك قوات الأوامر المسلحه !

المسلحه بالقوه

بالظلم

بالحقد والحسد

بغطاء الدين

بالتطفل وبكل شيء يقتل ...

ويقتل فقط !

آه لو أن حياتنا بلا ناس

بلا بشر ...

بالطبع لن تكون هناك حياه !

فالحياه (دنيا)

والناس سبب ذلك !

15-12-2008

----------------------------------------------------
خطوات متخاذله

وبقع رماديه على خلفيه سوداء قاتمه !

بريق النور يحاول اقتحام صمت الأشياء ...

وصوت ضعيف يتحدث بما نكرهه ...

يزداد الصوت رويدا رويدا ...

ونحاول (الهروب) ...

لكنها الحقيقه ولا مفر

لكنها الحياه !

15-11-2008

---------------------------------------------------


وهناك الكثير والكثير سارسله اليك باذن الله في رسائلي القادمه ،

لكنك لن تصدقني اذا قلت لك اني اتعجب من هذه الحروف المظلمه مثلك تماما ...

وكأنها ابن غير شرعي جاء في غفله من الزمان ...

وكلما انكرته بكل قوه ،

جائني صارخا ،

انت ابي ولا بد ان نعيش معا ابد الدهر ...

فما بيننا لا ينهيه الا الموت ،

وحتى الموت قد لا ينهيه ...

فما خرج من العقل ليعيش في جلباب الحروف ،

فانه يبقي طالما بقيت لغة الكلام ...


رسالتي انتهت ، والنهايه لم تأتي بعد ،

في هروبي الى هناك !

محمد

28-3-2009

أم ندى --- ان شاء الله !

سيدي / سيدتي :

منعت نفسي كثيرا من الكتابه ، وحبست الكثير من الكلمات داخل احشائي ،

حتى لا تكون رسالتي هذه كسابقيها ، لعل الحزن القابع بالداخل يسكن للحظه ، وساعتها تبدا البسمه في الصراخ على وجه الحروف .

اتمنى الا تلومني اذا فشلت ، وان تقدر لي شرف المحاوله ...

سيدي / سيدتي :

ربما كان التفوق الدراسي سمه مميزه لمن يكتب هذه الحروف السوداء ويرسلها اليك ،

وهذا التفوق قد منحني الكثير من المميزات وحرمني من الكثير ايضا ...


انا طالب في بكالوريوس صيدله ، منذ نعومة اظافره كان يقول للجميع "انا طبيب اسنان"

وحينما ظهرت نتيجة الثانويه العامه ... بارادتي التامه ... كتبت الرغبه الاولى صيدلة الزقازيق

برغم ان اداب انجليزي والسن وسياسه واقتصاد كانوا يراودوني عن مجموعي وكنت افكر فيهم بجديه...

سبحان الله تقبلت اي كليه ساعتها الا طب اسنان ...

ولم اكتبها الا بعد كل صيدله في كل المحافظات

دخلتها بارادتي التي لا اعرف كيف كانت ارادتي

سعيد بهذا الاجبار علي الاختيار ... وسعيد بحياتي القادمه باذن الله في هذه المهنه .


سيدي / سيدتي :

في المرحله الابتدائيه كان يسعدني جدا اختيار زملائي لي رائد للفصل

والاذاعه المدرسيه كانت تستهويني جدا

وفي اوراقي القديمه قد تجد مقدمات الاذاعات التي كنت اقدمها منذ سنين طويله

اعشق القياده ، "كنت" احب السلطه ، كل هذا برغم اني اتعامل بسجيتي ، ولا زلت هاديء الصوت !


في الجامعه برغم ان الهدف كان واضح ، وهو مزيد من التفوق ، الا ان السنه الاولى وبرغم الاستذكار الشديد ، الا ان النتيجه كانت مجرد جيد جدا لا تسمن ولا تغني من جوع ...

نقطه تحول جديده ، قرار بتغيير المسار ، من مجرد آله للمذاكره ، الي شيء اخر يتواصل ويتفاعل مع الجميع ...

نظرت الي النشاط الطلابي ، فوجدت نوعين اثنين ...

النوع الأول : طلاب الاخوان المسلمون ، وسبحان الله برغم صداقاتي بكثير منهم ، الا اني علي خلاف كلي وجزئي معهم في كثير من القضايا ...
وكانت انشتطتهم تقتصر علي مذكرة الامتحانات القديمه جدا ، والادوات المعمليه ، والملصقات الدينيه .

النوع الاخر : اتحاد الطلاب
مجرد شباب تافه لا يعرف شيء عن النشاط ، وصوره سيئه للطالب الجامعي .

بين هذا وذاك وقفت صامتا ...

وقررت وقتها بالا اقف مكتوف الايدي ...

البدايه اسرة شبابنا "شباب اليوم" وموقع shababna.net

والنهايه منصب امين لجنة الاسر وامين عام مساعد الاتحاد ، وصداقات لا تقدر بثمن ، ومحبه من الجميع ، وكفاك ان تنزل كلية الصيدله وتسال عن محمد نبيل ومصطفي النجار ويسري
وستجد الف من يدلك بكل الحب ...
جميل ان تكسب احترام الجميع في منصب كان يحتقره الجميع .. واولهم انت !

ولن تتخيل كم الصعوبات التي تواجه من يحاول تغيير اي شيء ، ولن تتخيل ايضا مدى توفيق وعون الله في الحق والحق فقط .

لا اريد الدخول فالتفاصيل حتي لا تغرق الكلمات مره ثانيه في وحل الاحزان والاكتئاب ...


سانتشلني سريعا الان واذهب بك الي شيء اخر بعيد عن الحزن ...

"ام ندى"

للوهله الاولى قد تظنها امي ، واذا قلت لك اني قد اكون" ابو ندى " باذن الله .

قد تظن ان ندى هي حبيبتي الاولى ...


ولكن مهلا سيدي ، فندى بطله قصه كانت المفروض ان تكون سلسه قصص ساكتبها انا

ندى مخلوق ولد علي الورق واخشي ان تموت ايضا علي الورق

ندى وصف لاجمل شيء في الوجود ...

واسمع معى ما قاله توفيق الحكيم عن الندى :


ايها الخالق الأزلي ... لك انت وحدك الخلود والجبروت

أما نحن فلا نريد ان نكون سوى بشر

لنا جسم مرتو وقلب متقد وعقل متئد ...


ايتها الطبيعه الرحيمه ... لك عمر الأبد

أما نحن فلا نريد سوي عمر (الندى)

نهبط من السماء عند الفجر

ونصعد الى السماء عند الضحى ...


ليست ندى وحدها ، بل ندى وسلمى وفاطمه ويوسف وعمر وابراهيم

اسماء كثيره قد لا يوجد منها احد ...
ولكنها مجرد احلام ... مع ايقاف التنفيذ
اتمنى ان يعينني الله ان انفذها ، واذا لم تحدث لا قدر الله
فاتمنى من الله الصبر عليها كما صبرت علي الضائع من غيرها .

سابتعد بك عن هذه النبره المشائمه مره ثانيه وثالثه وساقول لك ما قلته انا عن أم ندى :


"ام ندى"

يا ام ندى
الشعر خايف يتكتب
احسن ميوصفش الدلال

ويقول كلام ...
مهوش حقيقه ...
ولا خيــــــــــال !
عارفه الخيال يا ام ندى ؟

الخيال فيكي حقيقه
والحقيقه ...
انتي أجمل مالخيال !

يا ام ندى
انتي الندى فوق الورود
يا ام ندى
انتي الحياه ... انتي الخلود!
يا أم ندى ...
انتي الايدين الطيبه
اللي بلمسه صغيره
تقدر تنسيني الوجود !

يا ام ندى
انتي الخطاوي الفرحانين
انتي الغرام ...
انتي الحنين !
انتي الهلال اللي بيضحك عالنجوم
ويقولهم ...
مالكم كده غيرانين ...
مني ومن بنتي ندى ؟!

يا ام ندى
القلب وياكي ابتدى
يعرف طريقه
ويفك ضيقه
ويبل ريقه
ويقول كلام رقيق أوي ...
زيك كده ... يا أم ندى !

أمّا ندى ...
بنتك وبنتي
خدت جمالها منك انتي
والقلب الابيض
والنني الاسود
والشقاوه والدلع
والشطاره في الحساب

والضحكه اللي ...
الكون بيضحك بعدها
حتي القمر ...
يموت ويسمع ضحكها
وقدمها خير زي السحاب !

يا أم ندى ...
احكي لندى ...
حدوته الشاطر "أنا"
وازاي انا ... بقيت هنا
ويا الايدين الطيبه ...
اللي بلمسه صغيره ...
تقدر تنسيني الوجود !

واما تنام ...
غطيها حب ...
واقري تملي فودنها
"الله أكبر"
"الله أكبر" من كل شيء
يئذيها أو يئذي أمها ...
ام ندى !

يا ام ندى ...
خليكي جنبي
في الحياه المتعبه
محتاج أوي ...
للإيدين الطيبه
اللي بلمسه صغيره ...
تقدر تنسيني الوجود

يا ام ندى
انتي الحياه
انتي الخلود

يا أم ندى ...
انتي الوجود
انتي الوجود !

-------------------------------------------------------

ارجو الا تكون سئمت هذه الرساله كما اتوقع انا ، واعتبرها مجرد محاوله فاشله للسعاده ،

لعل المحاولات القادمه تصيب ، ولا يزعجك الهروب من الحروف قاتمة اللون ، فالذكريات المؤلمه تكاثرت امام عيني الان ...
ولكني ارفض ان ترى النور ، لعلي اجد في انتصاري عليها لذه بسيطه حتى وان كانت مؤلمه !

المرسل اليك "هارب" .

محمد نبيل