التسميات

السبت، 18 أبريل، 2009

نشرة الاخبار الليكوريكيه - عدنا :)




انطلاقا من المبدأ القائل :

" يا حامل همك وهم غيرك ... بكره تموت وانت واقف علي حيلك"


ولأن الموته دي مش "ستايل" ... قررت مشيلش الهم ولو لفتره واجرب الفرح حتي ولو "Demo"


عارف ان الموضوع صعب حبتين ... بس بدأت باني احاول ارسم البسمه على وشوش الناس

وانطلاقا من مبدأ "طباخ الكشري بيدوقه"

مابالك بقى اللي بيهدي الفرحه للناس ؟؟؟

-----------------------------------------------------------------------

كان هذا موجز للانباء ...

شويه وهننزل بالتفاصيل :)


------------------------------------------------------------------------

اشاعات تحوم حول السلوك الغريب لليكوريكا هذه الأيام ...
وليكو يؤكد دي مش كدبه "ابريل"


انباء عن اعتصامات واضرابات من "المتشائمين" تجتاح عاصمه التفاؤل الجديده "ريكا"
والشرطه "المنزوعة السلاح" شوهدت وهي رافعه لافتات مكتوب عليها :
"والنبي تبسم" :)

النظام الليكوريكي يهدد باعتقالات واسعة النطاق لأي حد هيشوفه "مكشر" في الشارع
والشعب حالف ليكشر في "بيته"

الأزمه الماليه العالميه تجتاح دولة ليكوريكا وتهدد اقتصادها ... والبنك الليكوريكي المركزي يرد "واحنا من امتى وكان معانا فلوس ؟ "

والرئيس ليكوريكا يخاطب العالم قائلا "هنيالك يا فاعل الخير والثواب" :)

والمعارضه تقول " ازرعوا "الريسيبشن" قمح !


انباء عن تنظيم جديد مناهض لحركة ليكوريكا التفاؤليه ...
واعلن منظموه انهم سيطلقون عليه اسم " كلضم وشك "


بعد ان تبسم الشعب الليكوريكي ، زاد الانتاج وظهر ابداع ابناء وبنات جمهورية ليكوريكا العظيمه
وقد قامت شركه مساهمه ليكوريكيه باختراع ماسنجر جديد ، لا يسمح باضافة أي صوره حزينه ، وكل السمايلز فرحانه ومزقططه ، كما لا يسمح باي عبارات أو نيك نيمات حزينه ، وأي حد يفكر انه يزعل ... يروح يزعل في القوضه التانيه واما يخلص زعل ييجي يقعد براحته :)

واطلق عليه مخترعوه اسم " من القلب للقلب -ماسنجر- " :)


توصل باحثون ليكوريكيون لقطره جديده تمنع البكاء أو حتي التفكير فيه ، واطلقوا عليها اسم "متدمعيش يا عين" :)


وقامت جماعه من المعارضه بعمل عقار مضاد للبكاء المتواصل وسموه "كتر الحزن يعلم البكا" :(



نظمت مباراه تفاؤليه بين فريق الأهلي والزمالك ...
وكانوا متفقين ان " محدش هيغلب حد "
وان الفريقين هيلبسوا "بمبي"
وان الحكم مش هيشيل " كروت حمرا"
وأي جون هيجيبه فريق ... هيتحسب للفريقين :)

بس برضو المعارضه دخلت وحاولت تهيج الجماهير وقعدوا يهتفوا :

"الشبشب والقبقاب ... دلوقتي بقو صحاب :( "


انباء عن اتجاه الحكومه الليكوريكيه المتفائله لخصخصة "النيل" للمتقائلين فقط...

متحججين بأن "الزعلان يشرب من البحر" :)


أما عن حالة الطقس فده علي حسب مزاجك :

عاوز تشوف الدنيا ربيع والجو بديع ... غمض عنيك وابتسم :)

عاوز تشوف الدنيا شتا وتتدفى تحت الغطا ... غمض عنيك واسمع اليسا :)

عاوز تشوف الدنيا صيف والجو ظريف ... اشرب سبرايت :)

عاوز تشوف الدنيا خريف والجو لطيف ... امسك ورده وقول : هفرح - هنبسط - هزقطط - هفرح - هنبسط - هزقطط - هفرح - هنبسط - هزقطط :))


كان معكم ليكوريكا مراسل قناة "سمايل" تي في ... نشرة الأخبار اليكوريكيه .


----------------------------------------------------------------


صحيح دخولي الفتره الجايه هيقل شويه عشان الإمتحانات

ابقو تابعوني باذن الله كل جمعه علي بلوج يارب فرحه

اضغط هنا

http://yarb-farha.blogspot.com/



هناك 24 تعليقًا:

kemet يقول...

السلام عليكم ورحمة الله وبركاته

حمد الله ع السلام
واللهي وحشتني يابني
ربنا يوفقك
وتعدي الامتحنات بالتقدير اللي يرضيك
يادكتور

:)

تحياتي
الى اللقاء

دورشيت يقول...

البوست حلو اوي بس يارب تفضل متفائل علطول كدا اصل انا عارفه الدخله الجامده دي اخرتها مش تمام خالص واسال مجربه
ربنا يرزقك بالتفاؤل دا علطول ويوفقك في الامتحانات

نـــــــــــــور يقول...

اخيرا ياليكو
يارب الفرحه دايما يارب
بس ماتكونش كدب :)

اكتر حته عجبتنى دى
"
نظمت مباراه تفاؤليه بين فريق الأهلي والزمالك ...
وكانوا متفقين ان " محدش هيغلب حد "
وان الفريقين هيلبسوا "بمبي"
وان الحكم مش هيشيل " كروت حمرا"
وأي جون هيجيبه فريق ... هيتحسب للفريقين :)"

:)

شمس النهار يقول...

اخيرا في حد عامل سبيل هنا في البلوجر ده
ونبي يابني ضحه قليله تمنع تكشيره كتيره
وهنيالك يامضحك غيرك

محاولة لكسر الصمت يقول...

إذن هي يوتوبيا محمد نبيل..
هنيئا لك مدينتك الفاضلة, لكن أتراها واقع أم من نسج الخيال!!!......
أتمنى لك وللجميع دوام الفرحة...
ووفقك الله في معركتك الموشكة..
تحياتي.....

نجمة قمر حبيب و بعيد يقول...

السلام عليكم
اول مرة اعلق عندك
ايه الكلام الحلو ده
نشرة اخبارك تجنن
ده كل 24 ساعة و لا ناوى تخليها حسب الطقس برضه
المهم
كلامك لطيف وواضح انك مبسوط يا رب دايمن
على فكرة ادخل مدونتى و قولى رايك ؟
و انا هرجع تانى لمدونة و اقرأكويس اللى فات
و عايزين نكون اصدقاء
نجمة قمر بعيد و حبيب من اعلى كوكب حبى و من خلال نافذتى على كوكب الارض
سلام

اصحى يا مصر : اسلام ديو يقول...

الكلام جميل
والأجمل ... انك شرقاوى زىى
ومدونة اخــــــــر جمال
تحياتى يا جميل وبالتوفيق دائماً انشاء الله

دعوة للأمل يقول...

حلوة النشرة دية و على فكرة انا هعمل بيها انشاء الله
و يارب تبقى ايامنا كلها سعيدة
تحياتى لك

Saydalanya Mat7oona يقول...

:)

النشرة و الكلام والفكرة حلوة

ربنا يسعدك كمان و كمان

و عقبالى أنا كمان

تحياتى

:)

enjy يقول...

طب ربنا يسعد كل اوقاتك ياااااااااااااااااااااااارب

كيكى يقول...

ههههههههههههههههههه
اهلى وزمالك هيلبسوا بمبى ومفيش كروت حمراء والجون هيتحسب للاتينين
والمعارضة بتقول الى اييييية مش عارفة لم الشبشب والقباب
ههههههههههههههههههههه
زمانك بتقول اية البت الى معندهاش دمى دى يعنى سايبة البوست وماسكة فى دى
مش تقول ربنا يسعدك على طول
ويوفقك فى الامتحانات
خلاص ياسيدى ادينى قولت اهوا!!!
عووووووووووووووووووو

انسان وبس ! يقول...

ايه الجمال ده ؟
ده انت حكايه
والله جميله
انت تنفع تقدم نشرة اخبار السادسه والعشرين

ليكوريكا يقول...

كيميت

الله يسلمك

هانت اهو باذن الله

دعواتك :)

ليكوريكا يقول...

دورشيت

شكرا عالدعوه والمرور "الغامض" ده

بس بجد ردودكم بتفرق معايا

ربنا يوفق الجميع

ليكوريكا يقول...

نور "حبيبه"

منوره البلوج والله

الفرحه حلوه اوي

بس كتير مرارة حزننا بيخلينا منعرفش ندوق اي حاجه

ربنا يبعد عنك الحزن يارب

ودايما فرحه ففرحه

ليكوريكا يقول...

لن تصدقيني سيدتي اذا قلت لكي

انها حتى لو من نسج الخيال فهي اجمل بكثير من الواقع

----------------------

المعركه الوشيكه بدأت
والاستعداد للاسف اقل من المطلوب

ربنا يعيننا .

ليكوريكا يقول...

شمس النهار يقول...

اخيرا في حد عامل سبيل هنا في البلوجر ده
ونبي يابني ضحه قليله تمنع تكشيره كتيره
وهنيالك يامضحك غيرك

---------------------------------

يارب بس ميبقاش مجرد كلام في الهوا

ويارب الفرحه لكل الناس

قولي آمين

ليكوريكا يقول...

نجمه :

الشرف لينا ان النجوم تنزل ارضنا وتعلق في بلوجنا

اتمنى تزورينا ولو كل سنه مره

مستنيكي :)

ليكوريكا يقول...

اسلام

منور يا ابن بلدي

مستنيك تاني ...

متغيبش كتير

ليكوريكا يقول...

دعوه للامل :

جميله دعوتك وكلها فرحه

يارب تعملي بالنشره بجد ...

والفرحه تزورك كل يوم .

ليكوريكا يقول...

صيدلانيه مطحونه

يارب يحقق لكل واحد اللي بيتمناه

ويوفقنا كلنا لما يحبه ويرضاه ...


اتمنى متكونش آخر زياره .

ليكوريكا يقول...

انجي ...

يارب :)

ليكوريكا يقول...

كيكي

وحشني فيلم الرعب بتاعك ...

متغيبيش عننا كتير

ردودك المفزعه اكيد بنفتقدها


مستني عوووووووووووووووو دايما :)

ليكوريكا يقول...

انسان وبس :

مش مهم نقدم نشرة الساعه كام

المهم متكونش دمها تقيل زي حياتنا

اتمنالك الفرحه دايما ...

شكرا ليك :)

مش مهم اللي فات - سيبوني احلم باللي جاي