التسميات

الخميس، ٣١ يوليو ٢٠٠٨

طلب شخصي

بسم الله الرحمن الرحيم



احمد ابوزيد

كلية هندسة الزقازيق

قسم كهرباء

دخل الكليه بمجموع اكبر من 99 %

وكل سنه من الاوائل بتقدير اي حد يتمناه

دماغه كل الناس بتشهدلها بالعبقريه

واللي بيبعدوا عنه ... بيعبدوا عنه لمجرد انه دحيح

وكأنها تهمه ممكن الانسان يتدارى منها


احمد ابوزيد

قمة الادب والاخلاق

ليه اخ فكلية صيدله واخت لسه مدخلتش جامعه

ووالده ووالدته بيعشقوه

لانه الابن البار المتفوق اللي اي حد يتمني يكون عنده ابن زيه

ابتسامته دايما كانت علي وشه

واحلامه ملهاش حدود


احمد ابو زيد

كان معايا في ثانويه عامه لمدة 3 سنين

كان معايا في كل حاجه

فصل اولي تاني متفوقين

وبعد كده كل دروس ثانويه عامه

وكل خروجتنا وفسحنا كانت لفتره كبيره مع بعض

وشهاده لله عمري مشفت منه حاجه وحشه

وعمره مكان غير واحد من انقي الناس اللي عرفتهم في حياتي

صحيح دخلت انا صيدله وهوا دخل هندسه

وظروف الدراسه بعددتنا عن بعض شويه

لكن من وقت للتاني كنا بنسأل علي يعض

وبنعرف اخبار بعض

خصوصا ان اخوه دخل معايا صيدله

وكان بيعتبره امانه فرقابتي


احمد ابوزيد

اخر مره شفته فيها من حوالي اسبوعين

كنا في الجامعه

ولقيت حد بيقرب عليا بعربيته

وعرفت انه هوا

كانت اول مره اعرف انه جاب عربيه

باركتله عليها وقلتله وانا وهوا بنضحك

(اللاب توب والعربيه جم يا ابو زيد ... مبقاش فاضل غير العروسه )

بصلي وضحك كعادته وقاللي منتا عارف بقي اني معرفش حد ... همتك معانا بقي

بس للاسف

ملحقش يحقق حلمه الجميل

وحلمه مكنش مجرد حلم مع ايقاف التنفيذ

حلمه للاسف مات للابد

وماتت معاه ذكريات جميله عمري مهنساها ابدا

كان فيها نعم الاخ والصاحب والصديق

اتمني ربنا يبدله حلمه ده ، ويزوجه باجمل الحور العين باذن الله


باشمهندس احمد ابوزيد مات في حادثه بعربيته

العربيه اللي كان كتير ممكن يحسدوه عليها

مات بعد منتيجته ظهرت وكان كالعاده من المتفوقين

مات وهوا لسه عنده 21 سنه

يعني قد كتير مننا او اصغر كمان


كل اللي بطلبه منكم انكم تدعوله بالرحمه

وتدعوا لاهله بالصبر

محدش متخيل قد ايه اهله وهوا دلوقتي محتاجين دعانا كلنا

حطوا نفسكم مكانه او مكان اهله

ومتبخلوش عليه بدعاء ولو بسيط

اعتبروه طلب شخصي منكم

ويارب ميحكم علي حد ابدا بحاجه زي دي

------------------------------------------------------

اللهم اغفر له وارحمه واعفوا عنه واكرمه

اللهم وسع مدخله وادخله الجنه وغسله بالثلج والماء والبرد

اللهم يمن كتابه وهون حسابه ولين ترابه وثبت اقدامه والهمه حسن الجواب

اللهم طيب ثراه واكرم مثواه واجعل الجنة مستقره ومأواه

اللهم نور مرقده وعطر مشهده وطيب مضجعه

اللهم آنس وحشته وارحم غربته وقه عذاب القبر وعذاب النار

اللهم ان كان قد احسن فزد في حسناته ، وان كان قد اساء فتجاوز عن اساءته يا رحمن يا رحيم

اللهم كن له بعد الحبيب حبيبا ، ولدعاء من دعا له سامعا ومجيبا واجعل له من فضلك ورحمتك وجنتك حظا ونصيبا



واسألكم قراءه الفاتحه له ولأموات المسلمين


الأربعاء، ٢٣ يوليو ٢٠٠٨

بيان عاجل



ردا علي البيان الصادر من بلوجات ليكوريكا في الموضوع السابق

واهتماما بمصالح الشعب وحرصا علي مصالح المواطنين

اصدرت الحكومه البيان التالي :
لقد قرأنا وتمعّنا في السطور التي كتبها ليكوريكا افندي وكذلك اطلعنا علي التعليقات علي الموضوع (وعرفنا مين معانا ومين مع الناس التانيين) وعرفنا برضو مين اللي هيقف بمزاجه ومين اللي هنوقفه غصب عنه واليكم ما توصلنا اليه من القرارات الاتيه : (ركزي معانا يا ام ندي :) )

1- لست قدري (بالقاف موش بالالف) :)))

لست أدرى يقول...

(عارف
لما كنت من اسبوعين فى قاهره المعز كنت هتشل بجد
كل 5 سم الاقى وقفه مصريه
وقفه مصريه
وفى التليفزين
يا بلدينا وقفه مصريه
يا دكتور واقفه مصريه
يا انسه واقفه مصريه

وبكون نفسى اقولهم ان الناس اصلا على طول واقفه واقفه مش مصريه خالص
واقفين طول اليوم على طوابين العيش
واللى واقفين فى طوابير المرور
واللى واقفين فى كب حته
يا عالم الناس واقفه
كنتم توفرو فلوس الاعلانات دى
فى ناس vip محتاجه الفلوس دى
ماتخافوش الناس كمان بتجرى وهى واقفه
بتجرى علشان تلحق الاوتوبيس
اللى بتقف وقفه مصريه فيه طبعا
وبتجرى علشان تلحق تكون نفسها
وبتجرى وبتجرى

مش هتكلم خلاص كفايه كده
على رأيك انا بقى عندى 22 سنه والضغط بقى والسكر

بس تفتكر اقعد استريح
ولا هيقولولى اقفى انتى كمان وقفه مصريه؟؟؟؟؟؟؟

معلومه
-----
انا كنت هعمل موضوع عن الوقفه العظيمه دى بس انت الحمد لله لحقتنى
لانى لو كنت عملته ولا بلاش)

----------------------------------------------------

وكما ترون فان لها افكار شيوعيه متطرفه وداخل ردها رموز ارستقراطيه ووجهة نظر شموليه ضد الحكم والحكومه بشكل عام
ولذلك قررنا بانها اول الواقفين معانا واخترنا لها مكان تمثال رمسيس (في عز الشمس)
عشان تكتب الموضوع بتاعها براحتها ...
:))

----------------------------------------------------
اما عن الاخوين زفته وقطران :

زفته وقطران يقول...

بلاش تشاؤم
خلي في امل
يعني حنفترض
ان الوقفه حتجيب نتيجه
اهوه نقف وخلاص
جابت جابت
مجبتش
يبقي الحال علي ما هو عليه
عاااااااااااااااااااااااادي
الشعب المصري مش حيتاثر
ياخويا حيتاثر اكتر من كده ايه

-------------------------------------------------------

فنظرا لافكارهما البنائه ولا مبالتهما الواضحه

فقد قررنا ان يتم تعيينهما محافظين لمدينة حلايب وشلاتين
زفته تمسك حلايب ... وقطران يعيش حياته مع شلاتين
وسلمولي عالحدود :)

--------------------------------------------------

اما محمد داوود :

Mohamed Dawod يقول...

يااااااااه هو الموضوع وصل لكده دلوقتى.....المشكله بقى ان الحكومه الفاضله بتاعتنا من واقع كل التصريحات والكلام اللى بيتسرب بيداروا خيبتهم قدام الراجل الكبير بحجة الزياده....يجى يسألهم يا عم الوزير الفلانى ليه الخطه العلانيه ماجبتش نتيجه يقولوه اصل الزياده السكانيه أفشلتها ياريس.....الله أعلم هو مصدقهم بمزاجه ولا مش بمزاجه بس فى الاخر التوجيهات العليا لأجهزة البلد كلها انها تحارب الزياده فى السكان(قال يعنى بنزيد بجد) مع ان لو حد عنده عقل فكر شويه حيلاقى الهند أكتر مننا والصين اكتر بكتيييييييير والاتنين زى الفل. فى الخليج مثلا الناس فاهمه قوى يعنى ايه ثروه بشريه وبيحسدونا على ثروتنا البشريه. بس نقول ايه بقى اهى ثروه من ضمن الثروات اللى فى مصر ومش لاقيه حد يستغلها. حد يبقى عنده شعب بالأجتهاد ده والصبر ده والذكاء ده والفهلوه دى وخفة الدم دى وميعرفش يستفيد منه......بجد يبقى العيب فيهم مش فينا ومسير يوم يجى حد يعرف يستفيد من الثروه دى.....رأيى اننا نفضل نزيد براحتنا لجد ما الحد ده يجى......تحياتى وشكرا


------------------------------------------------
فللاسف الشديد رغم جرأته الشديده وافكاره المتطرفه والتي كنا نتمني ان نستفيد منها جميعا الا انه القدر لم يمهلنا ذلك حيث انه لقي حتفه في حادث مطروح الأليم ... رغم تأكيد الجميع انه كان بيصيف في شرم الشيخ !


-------------------------------------------------


enjy يقول...

انا ماشفتش اليفط لانى مش من القاهرة لكن سمعت عنها فى كل حتة بس انا رايى ان احنا اتعودنا على يفط التهجيص يعنى يفط الوقفة ويفط الحزب الوطنى ويفط الدعاء للريس فى عيد ميلاده ويفط انتخابات المحليات ويفط الاخوان المسلمين ...........كل دى يفط فشينك واحنا عارفين انها فشينك يبقى كمان يفط الحملة فشينك بس هم لقوا معاهم شوية فلوس زيادة قالوا يعملوا بيهم يفط .............مسخرة حقيقية

اما انجي ولانها اسكندرانيه ..... يعني الهوا والميه وشط اسكندري
ه
فليها وقفه خصوصي عندنا خصوصا بعد ورود الفاظ (تهجيص وفشينك ومسخره)
في تعليقها
وقررت الحكومه انها تحرمها من هوا اسكندريه لمدة شهر كامل وهيبعتوها العراق تدعوا للوقفه المصريه بين المغتربين هناك (خدي بالك علي نفسك يا انجي ... وسلميلي علي بوش لو عمل مفأجئه وزاركم :((( )
-------------------------------------------------

دعوة للأمل يقول...

اهداف الوقفة عجبتنى اوى و مؤترة جدا و انا اللى هعييط هههههه
بوست جميل و ربنا يوفقك

-------------------------------------

ولان مصر دايما عمرانه بولادها وبناتها

فكانت دعوه للأمل مثال للشباب الجدع وروقان الدماغ المصريه وعشان كده قررت الحكومه انها هتبقي وزيرة ليكوريكا لشئون الشرق الاوسط :) بس طبعا بعد متحفظ الاهداف عن ظهر قلب وتقسم اليمين كمان ...

---------------------------------------------------------------------

فارس بلا جواد يقول...

السلام عليكم ورحمة الله وبركاته
دى اول زياره ومش هتكن الاخيره ان شاء الله
مدونتك حلوه بجد
تحياتى

اما فارس بلا جواد ، فاكتفي بالاطراء والاشاده ومعلقش عالوقفه دليل طبعا انه مع ليكوريكا ، وليكوريكا طبعا بقي راجلنا يبقي اكيد فارس بجواد بقي معانا ها يا فارس ... معانا ولا مع الناس الوحشين ؟

-------------------------------------------------

كيكى يقول...

عووووووووووووووووووووووووو
انا جيت اتخديت
.........................
وقفة مصرية
......................
احلى نكتة بجد...........
بجد..مش عايزة اكلم اكترررررررررررر من كدة
لاننا كدةكدة مفروسين
........................
وسلاااااااااام علشان الحق احجز فى مدنتىىى
........................
عوووووووووووووووووووو

-----------------------------------------------

اما كيكي فمكانها طبعا معروف في الوقفه اكيد في دريم لاند او سندباد قدام بيت الرعب :))) علي فكره متخديييييتش برضو بعد الجرعه المكثفه :)

-----------------------------------------------------------------

Oss يقول...

ليكوريكا
آه
لازم كلنا نقف وقفه ونطبع مفروشات
ازاى مش عارف
طب هما بيقفوا فين ؟؟

وردا علي تساؤل اسامه فلو عاوز تقف بجد راجع رد باشمهندس لست (قدري) واعرف اماكن الوقفه الي بجد :)

--------------------------------------------------------------

Blogger
Blue Nile يقول...

انا ول ما شفت الاعلانات في الشارع افتكرتها حركة جديدة زي كفاية كده
متوقعتش انها تكون من الحكومة

كفايه ؟ تؤ تؤ تؤ تؤ هعتبرك قولتيها من غير متقصدي يا بلو نايل يا جماعه مكنتش تقصد صدقوني مكنتش تقصد خلاص خلاص هما هيسيبوكي مقابل 3 مليون جنيه سيبيهم في التعليق وهخليهم يفرجوا عنك :)
---------------------------------------------------------

Eman يقول...

انا نفسي أفهم فعلا زيادة سكانية

مستمرة ازاي وأصلا الناس مش لاقية تاكل؟؟؟؟؟؟؟؟؟؟؟؟؟؟

تحياتي علي البوست


اما بالنسبه لتساؤل ايمان

فاحنا شعب جدعان وبناكل الظلط في حد عمره مشي في الشارع وملقاش ظلط ؟ :)

---------------------------------------------------------------

نوره الخشن ــ آي و كفاية يقول...

نياهاهاهاهاهاااااااااااا

عن اذنك بئى رجلي وجعتني اقعد شوية

بس في وقفه نسيتها .. الوقفه اللي بتكون في المحاضرات عمري مابقعد خالص بالكتير ربنا بيكرمني والائي حتة فاضية فالحيطة اسند عليها وكمان ساعات اسمع كلمة عجيبة
لأ الحتة دي محجوزة

حتى الوقوف بئى بالحجز

لألألألأ هعيط انا كمان

عاااااااااااااااااااااااااااااااا



ويتضح من تعلييق نورا انها

(دحيييييييييييييييييييييييييييييييييييييحه) ومبتفوتش محاضره بس حلو اقتراحك يا نوره هندمجه في الاهداف :)
----------------------------------------------------------------

احمد زهران يقول...

حلوة حكاية الواقفة دى .. انتا بلورت كل الوقفات بس نسيت وقفة الخميس .. بتكون واقفة جامدة .. وخاصا للناس اللى فتحوا بيوت واتجوزوا ..
__________________________________
والله يا ليكوا يبنى انتا عندك حق .. بس كنت عايز اقول حاجة لكل الشباب والشبات اللى بيموتوا دول ..
لية بنفكر فى المستقبل واحنا اساسا مضيعين حاضرنا ..
يعنى مثلا يا عم ليكوا يرضيك الشاب من دول او البنت من دول يسقطوا كل سنة .. بلاش دى علشان هتقولى الدكترة والامتحانات وبلاوى تانية ..
طيب والشباب اللى مستغلش وقتة واعد على القهاوى .. هتقولى مزاج .. بلاش دى
البنات اللى ليل نهار سرحنين فى الحب والهيام .. بلاش دى
النت اللى احنا اعدين علية ؟؟ علشان نخرج همنا .. ندون بكلام وبس ..
تعرف ؟؟ صدق كلمات الشاعر وهو بيقول نعيب فى زماننا والعيب فينا ..
انا كنت خايف برضو وقرفان برضو من اليفط والكلام دة .. بس لقيتنى بقول لية هربط نفسى بمستقبل بلدى .. لية مربطش نفسى بمستقبل نفسى واعرف قدرات نفسة واوجها فى الطرق الصح ...
احنا كشباب بحس ان احنا مستنين غلط من اى حتة فى مصر علشان نقول : اهوة .. اهوة .. ناس بتاكل فى البلد .. يعنى من الاخر مستنين اى حاجة نرمى عليها عيوبنا ...
__________كلمة اخيرة ..
رد مرة علية واعمل معجزة وخش مدونتى ..
وانا هروح على طول مفرق ساقع على كل الوقفين


وطبعا باشهندس افندي احمد زهران مش عاجبه حاجه في البلد

وهنبعته مارينا الظاهر (ملحوظه مارينا فندق بجوار امن الدوله في الزقازيق) :)))
-------------------------------------------------------

radwa يقول...

لخبطتنى يا ليكو

هقرأ تانى يمكن اللى اتلخبط يتصلح



تؤ تؤ

اللي اتلخبط عمره ميتصلح يا رضوى

سيبيه متلخبط جايز متفهميش حاجه :)
----------------------------------------------------------

دعاء مواجهات يقول...

والله ياد ياليكو

انت زى العسل زى ما بقول من يوم ماعرفتك بجد

بتلف اة وبتدور بس عندك عمق معمووق اخر معمقة فى تناول لا مش اكل تناول اى عرض

المواضيع وتفنيطها

ومع كل دة بتضحكنا وتغمنا كمااااااااان


لالا بصراحة انت مبقيتش مخلينا محتاجين حاجة خاااالص

بييييييس

واضح يا جماعه من كلام دودي مواجهات انها بتدعو لرساله ساميه وهيا السلام (بيييس) وبعا لانها لسه راجه من عند النبي فخلاص الحكومه هتعتبر مواجهاتها مجرد مناوشات ونيران صديقه :) منوره مصر يا دودي ... فين السبحه والجلابيه :)
--------------------------------------------------------------

imagine يقول...

ربنا مع كل المصريين،ربنا يكون في عونكم
سلام
إسراء

هيا دي الروح يا جماعه اسراء من لبنان جايه تقف معانا اكيد مكانك محجووووووز في ميدان الشحروره يارب متزهقيش منا .....
--------------------------------------------------------

كاميليا يقول...

هههههههه

إنت ناسى إن أشهر أغنية هى

قوم يا مصرى .. مصر دايما بتناديك

اهو من ساعة ما قام وهو مش عارف يقعد خالص

المهم
نتكلم جد

انا عاوزة أبدأ بشعار

وقفة ضمير ..

بعدها كل حاجة هاتكون ممكنة


احييك على هذه التدوينة
اخدتنا وجبتنا بين الجد والضحك
ووضعتنا أمام المعاناه بمنتهى الرقة واللطف


تحياتى واحترامى

------------------------------------------------
اما كاميليها في تدعونا للوقوف ولكن وقفه ضميريه مصريه بس للاسف يا كاميليا الضمير دلوقتي بقي made in china هتقفي مع المصريين ولا نبعتك الصين ؟
--------------------------------------------------------

أحسن تـستاهـل يقول...

محدش يجيب سيرة الوقفة،، كفاية اللي بشوفه في المترو
المترو يا ناس المترو،، ارحموني بأه
انت عمال تتكلم وتقول الوقفة ونقف ووقفوا وانا عمالة افكر في واقفة المترو والزحمة والناس اللي بتركن على الناس آااااااااااااااه على خناقتي في المترو النهارده
اسكت اسكت خليني ساكتة

حححححححححححح
وانت ازيك كده يا سي عبعال؟؟
:)

مها ميهوووو



اما مها ميهو اللي ضاع منها موبايل الشهر الي فات

فواضح من كلامكها انها مش معانا خالص وواضح برضو انها شبعانه من كتر الواقفه بس وماله يا مها (احسن تستاهلييييييييييي) :)
--------------------------------------------------------------

عيله مفتريه سابقا يقول...

بص يا ليكو

انا اتخنقت اساسا

وانا اقول الاعلان بتاع وقفه ده برنامج جديد؟

اتبن الوقفه دى مش وقفة العيد دى واقفه بس لأيه ؟

هل بالوقفه دى هيأكلونا؟
هل هيجوزونا؟
هل هيشغلونا؟
ماحنا اهو ...مش كفاية ساكتين
كمان بيقلبوا المواجع

والله يا شيخ معارفه ارد

ربنا لا تؤاخذنا بما فعله السفهاء منا

وانت اكيد عارف مين السفهاء

سلامى

-------------------------------------------------------
مين السفهاء يا اعقل عيلات البلوجرز ؟ قولي قولي عشان نعرف مكانك في الوقفه :)

-------------------------------------------------------

دودى يقول...

انا من رايى ان احنا لازم نصلح نفسنا الاول وبعدين نقف مع بعض كلنا وبعدين نصلح انما شغل الرسميات والرسم والكلام اللى مش جايب همه ده مبحبوش

ولان دودي ملهاش بلوج لحد دلوقتي فجاري تجميع معلومات عن كل الناس اللي ممكن يتدلعوا بدودي خدي بالك علي نفسك يا عبدالله ......

-----------------------------------------------------------

عروسة ننوسة يقول...

انتى ما حصلتش بجد....ايه البوست التحفة ده....لا دمك سكر واللهى

وزي منتو شايفين عروسه ننوسه ، ولكلامها الجميل واطرائها اللي كان لابد منه علي ليكوريكا راجلنا في الفتره الجايه عشان كده الحكومه كلها هتيجي تقف في فرح عروستنا الننوسه بس ايه يا عروستنا ؟ هتخلفوا ولا هتقفوا معانا :)))
----------------------------------------------------------
بسنت يقول...

تصدق بقى يا ليكو انا اول مره اعرف هما هيقفوا ليه
مش متابعه التى فى تقريبا خالص
بسمع وقفه مصريه بس ما بكمل الاعلان
بس كويس بردوا الوقوف كله نشاط فعلا
وعادى اوى حكايه اليفط دى لو تفتكر موضوع او مشروع الضرايب والاعلانات اللى وصلت للقنوات الفضائيه الغير مصريه اصلا
عادى جدا فلوس ومش عارفين يرموها ولا يعملوا اعلانات ويفط
اكيد اليفط احسن ولا ايييه؟
بس فكره الاعداد الكبيره للمواليد دى حقيقه انا شيفاها تقريبا نادرا ما بشوف اسره سواء شباب لسه متجوزيين من 3 سنين مثلا وكبار شويه عندهم اقل من 3
دا فعلا حقيقى بيشتكوا من المصاريف وبردوا ما فيش فايده
الموضوع دا فكرنى بمحو الاميه قدامنا الجيل التالت على رأيك علشان المتعلمين
مش الجهله يفهوا اصلا الرساله
ليكو مدونتك دمها اخف دم شفته فى التدوين الصراحه
سلمت

اما بسنت فقد اشادت بمجهودات الحكومه في صرف الفلوس المرطرطه

وكذلك ايدت الوقفه بجميع اهدافها

وايدت رجلنا الاول (ليكوريكا) وقالت انه دمه خفيف

برغم انه دائما يؤكد (انه معندوش دم خالص :) )

ولذلك احنا وصينا عليها جوجل ...

ومش هتنزل في السيرش تانيييي :)))

-------------------------------------------------------------
كلام وخلاص يقول...

دمك خفيف جدااااااااااااا
احلى حاجة انك تكبر دماغك ماتركزش معاهم كتير التركيز يجيب الضغط والسكر والوقفة الكتير تجيب الدوالى وبعدين كل واحد ومصره هما بيكلموا عن مصر تانية غير بتاعتنا
بالنسبة لاحلام وقف التنفيذ اتعودنا عليها
no expectation no disopiontment
سلام

اما كلام وخلاص فقال الخلاصه بصراحه

no expectation no disopiontment


انت مدونتك اتقفلت .... صحيح الكلام ده ولا ايه :)))

----------------------------------------------------

سفروتة يقول...

انا قرفت من الاعلانات دي خلاص


طب يعني طالما هما نيتهم حسنة كده وعندهم النية انهم يصلحوا...مش يشوفوا اس البلاوي دي كلها ايه وبعد كده يبقوا يخلونا نقف براحتهم ..


كلنا بندور في دايرة مغلقة

ومش هنوصل لمركز الدايرة دي الا بتغيير من كل النواحي وفي وقت واحد


...................

ليكو الواجب بتاعك عندي روح خده من مملكة السفاريت عشان تحله

يللا انت لسة مروحتش؟؟؟؟

اما سفروته فسابت جواب وبتقول انه فيه واجب

ونظرا ان ليكوريكا بقي راجل مهم

فهنضطر نحجز الجواب اللي فيه الواجب ده لحد بس منكشف عليه

جايز يكون فيه متفجرات سفروتيه ولا حاجه :)))


--------------------------------------------

حذف
Blogger Do not Press F1 يقول...

السلام عليكم
بص دا ظلم بين بقى وتفرقة عنصرية بين المحافظات اشمعنى بقى قارهة المعز هى اللى فيها اليافطات دى والوقفات دى اشمعنى احنا مش عندنا غير يافطتين فى بلدى واحده على اول البلد والتانية على اخر البلد اللى على اول البلد لبابا حسنى وهو بيرحب بالزوار زى مايكون بيقولهم شايفكوا والتانيه على اخر البلد لبابا حسنى بردو بيشاور زى ما يكون بيقولهم فى داهبة


.........
نجى بقى للجد زى مانت قايل
هل اليافطات دى ممكن تأثر فى حد وايه اقصى نتيجة ممكن تجيبها يافطة على ما اظن اليافطات دى كانت ممكن تجيب نتايج رهيبة لو الناس شايفة نتايج ملموسة فى الواقع لكن الناس محطبة ومش عندها ثقة فى اى حاجه
..............

والنبى حد من بتوع قاهرة المعز يتبرع بانه يبعت لينا كام يافطة من دول وفى المقابل هنديه الصورتين اللى عندنا:ي

سلاموز

ماله بابا حسني يا دونت بريس ؟
وكمان عاوز تتخلي عن اليافتطين ؟
ده حتي ياراجل لولاهم مكانتش بلدنا بقت عالخريطه :)
اقولك ...
press f1 بسرعه
قبل ميبعتوك مارينا :)))

--------------------------------------------




اما عن ليكوريكا فقد ظهرت عليه علامات الغنا الفاحش واستقل سياره بي ام دابليو 2008
ويذكر انه مبقاش بيرن علي حد و(بيتصل) وبيتكلم وخلاص رااااااااااااح زمن الميسدات
كما انه بدأ يتنكر لأم ندي
وام أويييييء وام ابراهيم
هذا ونسوافيكم بباقي الاخبار في الموجز القادم باذن الله

ليكوريكا من امام تمثال لست(قدري) رمسيس سابقا

------------------------------------------------------


معلش بقي يا جماعه قلت ارد عليكم وبالمره انقلكم بيان الحكومه

اعذروني وابقو زوروني

معلش لو انا مقصر بس غصب عني

مش معقول هسيب البي ام دابليو وآجي اقعد معاكم :)

ليكوريكا

السبت، ١٢ يوليو ٢٠٠٨

وقفه مصريه !


في البدايه بس يا جماعه انا عاوز اعتذر للناس كلها علي اني مقصر في الزيارات والردود ، بس بجد والله يا جماعه بسافر كل يوم وظروف قعادي في البيت بقت مش بايدي خالص ، اتمني تعذروني وباذن الله هحاول علي قد مقدر اكون عندكم في اقرب وقت

ليكوريكا




سمعتوا اخر خبر ؟

اعلنت دار الافتاء المصريه

عن ان غدا الموافق مش عارف كام

هو متتم شهر اي حاجه

وان غدا برضو هو وقفه عيد معرفش ايه

وهيقف كل المصريين علي رجليهم طول النهار والليل

هذا وننقل اليكم تهاني السيد الرئيس للشعب المصري علي وقفته الجامده

مؤكدا علي ان الوقفه احسن من القعده ، وان الجلوس مضر جدا بالصحه ويسبب الوفاه

شعارنا :

ليه تقعد لما ممكن تقف ؟

اهداف الوقفه :

1- الوقفه رياضه (مش احياء ولا تاريخ ) واخدينلي بالكم انتو ؟ :)

2-يا بخت من وقف رجلين في الحلال .

3-آل يا واقفين يكفيكم شر القاعدين :)

4- وقفت فوق السطوح هز الهوا كمي ... كل العيال اتجوزوا وانا (واقفه) جنب امي

5-يا واقفه علي باب الحمام وكل خد عليه (ميك اب) ... ميك اب ميك اب ميك اب

6- ياعالم بكره يا قاعد مخبيلنا ايه ... يا خوفي بكره يا قاعد متقفشي فيه (اليسا)


الراعي الرسمي للوقفه :

سيراميكا كليوباتر ... معمول عشان (تقف) عليه !

سبرايت : وقـــــــــــــــــف عطشك !

تكاتك المحروسه --- انت تشاور واحنا (نقفلك) --- :)

كفايه بقي مقدمات يا اوسطي ليكو

انزل بالتتر يا ولد :

وقفه مصريه ... made in egypt

***** قبل منزيد مولود ... نتأكد ان حقه علينا موجود ******

-------نحكم عقلنا ... نشبع كلنا (يا شعب جعانين) ----------

-------نحكم عقلنا...نتعلم كلنا (يا شعب ........ ) -----------

-------نحكم عقلنا...نشرب كلنا(ميه ساقعه مشبره ... ) -------

-------نحكم عقلنا...نشتغل كلنا (اكيد مش هنشتغل نفسنا)-------


يا سلام يا بلوجرز يا ولادي

شايفين الكلام الدافي

شايفين السجع والجناس والكنايات والاستعارات

حاسيين معايا المجازات المرسله

(مع ان الشبكه واقعه اثاثا )

والله هعيط ... لا لا سيبونيييييييييي اعيييييييييييييط

انا عيتط خلاص

واااااااااااااااااااااااااااااااااااااااااااااااااااااااااااااااااااااااااااااااااااااااء

وكمااااااااااااااااان

واااااااااااااااااااااااااااااااااااااااااااااااااااااااااااااااااااااااااااااااااااااااء

وبما اني بقيت رايح جاي علي بنت المعز افندي

لاحظت وجود اللافتات الجميله دي في كل حته في مصر المحروسه

وقفه مصريه

ولان زي منتو عارفين

ان زيكا بلد ليكوريكا

انا شفت اليفط دي انبهرت

امال ايه بس ...

احنا حدانا (حلوه حدانا ديه)

في بلدنا مفيش غير وقتين

وقفة العيد الصغنن ووقفه العيد الكبير

انا عارف ان لسه الجيل التالت من الاعياد لسه موصلش بلدنا

مع اني بحوش من وانا عندي عشر سنين عشان اجيب موبايل 3G وموش عارف :((

بس مش ذنبنا يا مصر ... من حقنا نقف معاكم

اه والله من حقنا نقف معاكم ... وبعدين الكلام اثر فيا اوي

حتي الدموع عماله تنزل اهو ... :(((

وبما اني لساني طويل ... وبما ان التدوين حق مكفول لكل المواطنين

تعلن مدونات ليكوريكا البيان التالي :

ندين ونشجب ونطعن في الوقفه المصريه ، لانها وقفه عنصريه لابناء القاهره بنت المعز افندي

ولانها ايضا تثير الضغائن وتؤرق السرائر وتنشر الفتن

ولاننا (رجاله) وجدعان اووووووووووووي ونقدر نقف في الحديد زي مبيقولوا

ونهيب بالساده المسئولين احد الامريين التاليين :

اما تعميم الوقفه علي جميع بلدان كفر مصر المحروسه

واما تدوني قرشين امشي بيهم حالي وانا اوعدكمن هسسسسسسسسسسكت خالص ومش هدون تاني

ومتقلقوش الناس اللي بيدخلوا عندي (هيتشردوا هيتشردوا)

امال ايه ... ليكوريكا بيبيع في اول ورقه خضرا :)


--------------------------------------------------------------

نتكلم بجد شويه

مش عارف اقول ايه ، وقفه مصريه للمصريين ، عاوزين نحد من المشكله السكانيه

عشان نشتغل ونتعلم وناكل ونشرب

كلام جميل ...

بس الاجمل منه نشوف احنا بقينا فين دلوقتي

ونشوف هل فعلا حمله زي دي هيا الحل لمشاكل كتير زي اللي مكتوبه عاليفط ؟

هل فعلا الشباب دلوقتي لاقي يأكل نفسه عشان يتجوز ويخلف مره واتنين وتلاته ؟

يااااااااااااااه علي الشقق المرميه فكمل حته وعالوظايف اللي بقت مغرقانا

نسيتوا (الحق القطر ... البلد بتتحرك ؟ )

يعني هوا الناس هتخلف وهيا في القطر ؟

انا مش عارف والله التفكير بقي ازاي

طب معندكوش احصائيات العنوسه ؟

اه العنوسه ...

يعني بمتهي البساطه بنت حلمها الاول والاخير انها تلاقي راجل يحبها ويحميها ،

ويحققلها حلمها انها تكون ام بحلال ربنا

لكن للأسف مفيش راجل وميش حب ومفيش ام ... بس الحمد لله لسه فيه ربنا الحمد لله .

انا خجلان اوي من نفسي ومن بلدي والاحصائيات دي بقت فكل حته

وبقي كل همنا اننا نقل ... مش نستغل ثروتنا البشريه

بس انا عاوز اوجه رساله لكل اللي يهمه الامر

متقلقوش الموضوع مش محتاج يفط وحملات ودعايا

للأسف خلاص غصب عننا هنشوف بناتنا وولادنا مش قادرين يتجوزوا ولا يخلفوا

وحتي لو الاحصائيات بتقول غير كده وبتقول ان مواليدنا بيزيدوا

فانا بقول علي الي شايفه ولامسه بايديا

الاحصائيات مبتأكلش عيش ، ولا اليفط بتغير حاجه

وقفه مصريه يمكن

تجيب نتيجه جايز

لكن تبقي هيا الحل ... مستحيل !

------------------------------

ليكوريكا

من قاهرة المعز

تحت يفط وقفه مصريه

(احلام مع ايقاف التنفيذ)

------------------------------------

روح شوف

(كلمه واحده)

اكيد في بلوج المشاعرجيه

من ليكوريكا وبثـــــــ

http://just-afeeling.blogspot.com/

الجمعة، ٤ يوليو ٢٠٠٨

ليكوريكا بايظ ايديشن !



ليكوريكا (بايظ) ايديشن!!

بتاريخ 24-6-2007

---------------------------------------------------

تنويه : احداث القصه غير حقيقيه ، والاسماء كلها وهميه ولا علاقه لها بالواقع ...

انزل بالتتر يا ليكو ...

ليكوريكا بايظ ايديشن !
-------------------------------------

(امشي عنه ... روح للدبه نانو ... وابعد عن حبيبي ، وكل اللي فسنه ، امشي يا برد طوبه ، للدبه الدبدوبه ، وابعد عن حبيبي ، وكل اللي فسنّه)
اوف ايه ده .. كل يوم جامعه ... كل يوم صحيان بدري ...
(امشي عنه ... روح للدبه نانو ... وابعد عن حبيبي ، وكل اللي فسنّه )

اسكت انت راخر ... موبايل خنيق ورنه أخنق ... آل امشي عنه آل ..
والله لشايلها وحاتط

(نام يا ليكو نام وهجيبلك موبايل( إن 95 ) )

... لما أقوم بقي آخد شاور لزوم الباور ...


*أنا زي أي بنت في الدنيا كلها ... بدوب من كلمه حلوه ... تلمسني واحسها ... وافضل فاكراها دايما وفحضني اضمها*

ايه يا عم الموبايل ... انت ناوي تتقفل عالصبح ولا ايه ... امنا نشوف مين اللي بيتصل ...


(أنا زي أي بنت في الدنيا كلها ... بدوب من كلمه حلوه)


youssry calling :

أنا زي أي بنت ... ويسري ؟! ... طب تركب ازاي دي ؟!

أه أه افتكرت ... (دينا يسري) بتاعة سكشن المايكرو ... عاوزه ايه ياربي دي عالصبح ... اما ارد واشوف ...

ليكوريكا : الو دينا ازي الثحه؟
دينا يسري : الحمد لله ... ازيك انت يا ليكو
ليكوريكا : طمام الحمد لله
دينا يسري : ايه مش جاي السكشن ولا ايه ؟!
ليكوريكا : سكشن ؟! ... سكشن ايه عالصبح...
دينا يسري : سكشن المايكروا ... الساعه 9 الا ربع وفاضل ربع ساعه !
ليكوريكا : أه المايكروا ان شاء الله جاي .. انا في الطريق اهو ...
دينا يسري : انت في التاكسي ولا بتوفر وراكب ميكروباص ؟!
ليكوريكا : ايه الظرافه دي يا بت يا دينا ... متيجي تلمي الأجره بالمره أحسن ...
لا يا ستي انا لسه في الطريق للحمام ...

دينا يسري : يعني استناك ولا ادخل انا ...
ليكوريكا : لا لا ادخلي وانا عشر دقايق وجاي باذن الله
دينا يسري : طايب مستنياك سلام
ليكوريكا : اوك سلاموكا :)

ربنا يعدي اليوم ده علي خير ، البت دينا دي مبتفائلش بيها خالص ، من ساعة مخدت منها اللوب بتاع المايكرو وهيا لازقه بسلوتب ، زي ميكون طمعانه فيا ،
طبعا ده كفايه ان عيد ميلادي فيه ستتين (6/6/1987)-
بمناسبة عيد ميلادي تقبل الهدايا في كل شهور العام نقدا او بشيكات :)


المهم دخلت الحمام ولبيت نداء الطبيعه ، وطلعت وحتطيت الجيل وخدت الموبايل واللوب والبالطو ونزلت ...

الساعه 9 الا خمسه وفاضل 5 دقايق والسكشن يبدأ ، شكلي هاخد تاكسي .....
تاكسي ايه بس ياواد يا ليكو ، أعقل وخد مايكروباص ووفر 1.75 قرش ،

ولا اقولك مش خسارف في المايكرو .. تاكسي تاكسي
تاكس ... الجامعه لو سمحت .. وشهل وحياة ابوك عشان ورايا سكشن ...

لقيت الراجل بيبصلي بقرف زي ميكون بيبص لمراته وقاللي
( أولا انا أبويا الله يرحمه .. يبقي متقولش وحياة ابوك ، ثانيا منتا شايف الطريق واقف اعمل ايه انا ، أطير بالتاكسي فوق العربيات يعني ؟!)

خلاص يا عمونا متزعلش نفسك اوي كده ، ربنا يرحم الوالد وعلي اقل من مهلك ، محدش واخد منها حاجه ،

وحدووووووووووووووووووه ...

مقلنا خد ميكروباص يا اسطي ليكو ، طب والله منا دافعله غير جنيه ونص ، وابقي خليه يوزع بيهم قرص علي روح الوالد !

ايوه بس هنا يا اسطي *

ليكوريكا : معاك فكة 50 جنيه ؟!
السواق : لا والله انا لسه طالع بالعربيه ، شوف معاك اي فكه كده
ليكوريكا : ثواني هشوف ... هما جنيه ونص اللي معايا ... حلال عليك
الراجل خد الجنيه ونص وكان عاوز ياخد روحي بدل النص جنيه الباقي ... وآدي جزاة اللي ميسمعشي كلمه ليكو يقولها...

ملحوظه : دي الاسعار القديمه قبل مالبنزين يغلي ... وعشان بس تاخدوا بالكم ... المشوار اساسا مش مستاهل يتدفع فيه ربع جنيه :))

الساعه 9.05 ، لما امد عشان الحق السكشن ، معرفش ايه السكاشن اللي في السما دي ،
أنا ليكوريكا
( سنتين كي جي وان وكي جي تو ، و خمس سنين ابتدائي ، و تلاته اعدادي ، وزيهم ثانوي ، وواحده اعدادي مع الضفاديع والاسكارس في علوم ، و اتنين صيدله )
أطلع 4 ادوار عشان سكشن مايكرو ...
يللا سجلي يا لبني واشهدي يا سيهام ، المهم وصلت الدور الرابع بسلام ،
ولقيت عالسلم مزتين تمام ،
يارب يعني الواحد يسيب القمر والشمس قاعدين بره ويدخل مع البكتيريا والفيروسات ، عشان بس تقدروا حجم التضحيات الليكوريكيه في سبيل العلم ...


السكشن طبعا بدأ وأنا عملت زي عبده الاهبل ودخلت ، ووقفت جنب دينا واديتها اللوب بتاعها ، وهيا قعدت تعمل فيها أصيله وخليه ومش خليه وكلام البنات اياه ده ،
لحد مصاحبتها
(رانيا تنده) مجت وقالتلها جبتي اللوب بتاعي ، انا قلتلها اتفضلي اهو وكنت هفطس علي روحي من الضحك علي دينا ... لولا الدكتور دخل !
...

لقيته بيزعق وبيقول ... فين البيه اللي لسه داخل ...
طبعا دينا هانم متتوصاش راحت بصه عليا وضاحكه قام هوا عارفني مش محتاجه ذكاء يعني ...

المهم سلمت امري لله وقلتله ايوه يا كتور ، راح قايللي ايه اللي أخرك
طب والنبي اقوله ايه ده ، أقوله كنت نايم ... ابسط حاجه هيقوللي كمل نوم في بيتكم ...
خلاص مش هيحل المايكرو الا المايكرو ، واهي كذبه (فوشيا) يعني ...

رديت عليه وقلتله : معلش يا دكتور كنت في المايكرو
رد وقاللي : نعم يا خويا وصلت بيك البجاحه انك تقول انك بتاخد كورس وكمان في السكشن
رديت عليه بسرعه : يا دكتور انا مقلتش اني باخد كورس
الدكتور : اومال ايه يا افندي ؟!
ليكوريكا : أنا قلت انا كنت في المايكرو ... المايكروباص يعني ... :)
الدكتور : نعم يا افندي ، كمان جاي متأخر وكمان بتهرج ... اتفضل اطلع بره
ليكوريكا : يا دكتور معلش اخر مره
الدكتور : بره قلتلك
ليكوريكا : يا دكتور (سماح) المرادي
وشكل مراته طلعت اسمها سماح ، اول مسمع الكلمه دي بقي معلق علي بره بره ، ويهديك يرضيك يولع فيك حتي ، برضو مصمم اني اطلع بره ... ...

المهم طلعت وقعدت ادعي علي دينا الفقر ، لازم يعني تفكرني بالسكشن وفي الاخر اتطرد بره ،
يجري ايه لو الاعلام خد خبر ، سمعتي تبقي ايه وسط المزز المتحده ؟!

منا قلتلكم دينا دي فقر ، حاجه تنرفز ، حاجه تتنشن ، حاجه تشيب ، حاجه تهوس ، حاجه زي لهطة القشطه ، لا لا قشطة ايه بس ، دي ولا البقره بتاعة لبنيتا اللي بتيجي في اعلانات رمضان :)

شفتها فين قبل كده دي بس ، آه دي شبه البت اللي كانت طالعه في كليب عبد الحميد حافظ اللي كان عامله سنة 69 وهوه بيغني لحبيبته في المطبخ
( أنا هففطر فووول موش طعميه ... تيرارا ... وهحلي بموز

مالغربيه ... تيرارا ... وعماد بعرور يشمت فيا ... والاقيه بكره يرد عليا ... ويثور ويقووووووول
( العنب العنب العنب ... ينفع في شتا او صيف )

يا عم ايه الاغنيه دي ، انت شكلك جعان ، منها لله دينا نزلتني من غير مفطر ، المهم انا عاوزك تبين مواهبك الليكوريكيه وتلضم معاها ...

اممممم ابتدي بايه يا تري ؟! ... محمد منير كويس ... يللا استعنا عالشقا بالله

نزلت وراها عالسلم ، انتي يا ... تعرفي محمد منير ؟!

تبصلي بقرف ومتردش ...
محمد منير ... اخو اسامه منير ... بالذمه في حد ميعرفش محمد منير ؟!
برضو مبتردش ...
محمد منير ... اللي بيغني ...
(لا يهمني اسمك ... لا يهمني عنوانك ... لا يهمني لونك ... ولا بلادك ... مكانك ... يهمني من الآخر ... انت فودافون ولا موبينيل يا جميل :) )

ههههههه (بقرف) ايه الخفه دي ، وبعدين انا اتصالات ريح نفسك بقي ... وسابتني مكبوس علي عيني ونزلت
ايه الكبسه دي ياربي بس ،
ازاي بس انسي ان اتصالات وصلت :)


------------------------------------------------------------------

فاصل اعلاني :

الراعي الرسمي لبلوجات ليكوريكا

* حديد عز : هتشتروه هتشتروه !

* بامبرز : هديتنا للشعب المصري !

* فودافون : شعارنا ---خليك غبي--- (متفكرش لحظه :) ) !

------------------------------------------------------------------

نزلت وانا مكبوس علي عيني ، وعمال ابرطم ... اكيد البت دينا دي عاملالي عمل ، من يوم معرفتها ومفيش مزه راضيه تلضم معايا ... اما تنزلي يا دينا ،ان مخليتك تعزميني علي كريب تمن البهدله اللي اتبهدلتها دي.

المهم نزلت لقيت واحد صاحبي (مش هقول علي اسمه لحسن يرفع عليا قضية خلع ... اقصد سب وقذف يعني )
المهم لقيته قاعد مع مزز من الشعب البنهاوي الشقيق ... وبنتهز الفرصه وببعت سلامي لكل مزز بنها ، ولكوبري بنها يا نور عيني ، ولمنديل كوبري بنها يا نور عيني ، وللسمك اللي تحت كوبري بنها يا نور عيني ... وللعربيات اللي بتمشي فوق كوبري بنها يا نور عيني ... وسمعني آحلي سلام ليكوريكي آخر وصايه !

المهم بما ان العلاقات الشرقاويه البنهاويه متدهوره للغايه ، لدرجة انهم بيقولوا ان الف شاب زقازيقي بس اتجوزا من بنها السنه اللي فاتت ، قلت لازم اروح اشوف صاحبي وحبيبي بيعمل ايه ، وأهو بالمره نوتطد العلاقات بين الشعبين الشقيقين :)

نزلت عليهم زي مالمارينز نزلوا علي العراق ، وازيكم وعاملين ايه ونظام البراشوتتات الاصلي (فينك يا ميسو - ميسو ده واحد صاحبي واخد دكتوراه من استكهولم في البرشطه عقبالكم جميعا :) )

لكن علي مين ، اخينا اللي قاعد معاهم راح قايم ، وقالهم طايب يا جماعه ، اشوفكم بعدين بقي ، وراح واخدني من ايدي وماشي بعيد عنهم ، ايه يا ناس جرا ايه في الدنيا دي ، ايه الصحاب اللي مبتحبش الخير لصحابها دول !

واضح فعلا ان ديننا عاملالي عمل محترم ، حتي البرشطه مش نافعه ، ماشي يا دينا ، اما اشوفك بثـــ !

خدت نفسي ورحت طالع علي طب ، ولما نقول طب ، يعني متحف التشريح ، يعني المزز اللي بصحيح ،
ولحسن الحظ لقيت اتنين صحابي قاعدين ناحية الملعب ، قلت اما اروح اقعد معاهم ، يمكن نلضم في 3 مزز ونعزمهم علي كابوتشينو (موش بتاع أحمد حلمي :) )

قعدت أنا وهما مستنيين الفرج ، وواضح ان الفرج اتأخر في المواصلات شويه ... يبقي ايه الحل ؟! ... الحل ان احنا نروحله برجلينا (مش محتاجه فكاكه دي) ،

لمحنا 3 بنات قاعدين ناحية متحف التشريح ، قلت تشريح تشريح ، المهم اكسر حاجز الفقر الي انا فيه ، رحنا قعدنا وراهم ومنعرفش حتي شكلهم ايه ولا وشوشهم عامله ازاي ، تعملوا ايه بقي في شباب واقع ، هيفا واليسا خلوهم يعاكسو بنات حتي موش شايفين وشهم ، كانوا اتنين بشعرهم وواحده محجبه ، لقيت الاتنين زمايلي هيموتوا علي اللي بشعرهم ، سبتهم يموتوا وقررت انشن علي المحجبه !

وبدأت ملحمة المعاكسه ، اممممممممم نبدأ بالاسامي
كل واحد من زمايلي قال اسمه وجه الدور عليا ، قلت ليكوريكا ، لقيت واحده من اللي بشعرهم ضحكت زي ميكون افتكرته (داندورمه ... جيلاتي بالكوستاريكي :) ) ، بس مش دي اللي انا عاوزها ...

تاني حاجه الوظيفه ، واحد قال صيدلي تحت الانشاء ، وواحد قال صيدلي فوق الانشاء ، وأنا قلت طالما القعده قلبت علي ريحة دوا كده هقولكم نكته
" مره واحد صيدلي اتجوز ... يوم الصباحيه لقوه مرجع مراته لأهلها ، يا ترى ليه ؟! ............. بيقول انه اكتشف ان مفيهاش نشره داخليه تبين طريقة الاستعمال :) "
لقيت التانيه ام شعر فطست علي روحها من الضحك ... بس برضو موش دي اللي انا عاوزها ... ...

لمحت من بعيد كتاب كيميا مكتوب عليه كلية العلوم ، قلتلهم بقي يهون عليكم عشرة الضفاديع والاسكارس ، ايش حال ان مكناش جيران وقعدنا عندكم 365 وربع يوم ، وبعدين علي رأي المثل الليكوريكي القديم ( مراية الحب كيميا ) وما شاء الله كل كليه فينا عندها بدل الكيميا اتنين وتلاته ، ولازم نوتطد العلاقات ، ولا ايه رايكم ؟!

لقيت اللي انا عامل الدوشه دي كلها علشانها ، ابتدت تتحرك وناويه تقول حاجه ، مره واحده لقيتها طالعه فيا ، اظن كده كفايه أوي يا دكتور ؟!

اتمسمرت في مكاني ، وحسيت ان درجة حرارتي بقت 45 واني بقيت زي القلم الرصاص المقصوف ... لا بسمع ولا حتي بشوف!
ورحت قايل مين ... ندى ؟!

هيا راحت واخده صاحبتها الاتنين ومشيوا ، وأنا قاعد مش عارف انطق بكلمه ،
ندي الانسانه الوحيده اللي كنت اتمني صورتي قدامها تفضل كويسه ، شفتها مرتين ايام مكنا في كلية علوم ، ولحد دلوقتي كل يوم لما بغمض عيني مبشوفش غيرها ، الموضوع كان مجرد صدفه ، وكان حلم جميل في نفس الوقت بالنسبالي ، كنت لسه عامل كارنيه الكليه وفرحان بيه ، وطلعت من صيدله علي علوم عشان كان ورانا محاضره ، وفجأه بدور علي الكارنيه ، ملقيتهوش ، قلبت الدنيا عليه ، ومره واحده لقيتها بتندهلي وبتسأل ... الكارنيه ده بتاعك؟!
قلتلها مش عارف اشكرك ازاي ، انا كنت لسه عامله وضاع مني ... شكرا يا ...........
ردت وقالت ، ندي ... اسمي ندي ، ادتني الكارنيه ومشيت ، ولسه لحد دلوقتي من يومها ، وانا مروح لازم اعدي علي علوم جايز اشوفها تاني او اعرف اي حاجه عنها ، مش عارف ممكن يكون فعلا حب من اول نظره ، بس كل اللي فاكره اني اول مشفتها ، اخينا اللي فصدري الشمال فط من مكانه ونزل عشان يسمعها وهيا بتقول اسمها ، لكن يا خساره ، لما تتحقق امنيتي واشوفها ، اشوفها وانا فوضعي ده ...

شاب صايع تافه ، كل اهتماماته انه يعاكس دي ، ويمشي ورا دي ، ويعرف رقم موبايل دي ، شفتها لتالت مره ولآخر مره وضاع مني حلم جميل بسبب استهتاري وسوء تصرفي ، بس صدقوني الموضوع مش بايدي...

انا شاب زي اي شاب ، طاقه مدفونه ، دخلت كليه المفروض انها من احسن الكليات ، حلمي اني كنت اتعلم فيها صح ، اتصدمت بواقع قلة الامكانيات واكتشفت ان اللي عانيته في ثانوي هعاني زيه وأكتر في الجامعه ،
شاب لو فكر في السياسه و راح مع المعارضه هيقولوا ارهابي متطرف ، ولو بقي مع الحزب الحاكم هيقولوا ده وطني وعميل ،
، لو فكرت في الفن هلاقي حواليا عنب وسمك وحناطير وافلام اباحيه تحت مسمي الفيديو كليب ،
شاب لو سمعت نشره هثور واجول واقول عاوز احارب ، بس هحارب مين وفين وازاي ... اعدائنا بقو كتير وبعد مكانت فلسطين بقت فلسطين والعراق ولبنان وسوريا وافعانستان والسودان والدور علينا جاي جاي ،
لو قلت احب واتجوز ، هحب ازاي وليه اظلم معايا واحده ملهاش ذنب تقعد تستناني 10 سنين اجيب شقه واشتغل واخلص جيشي ودراستي ،
شاب مخنوق من امبارح وبيتمني النهارده يخلص ومبيخفش من حاجه أكتر من بكره ، عاوزنّي بعد كل ده افكر أنا بعمل ايه ... عاوزيني بعد كله ده ابقي شاب طبيعي قادر اقيم تصرفاتي واعرف انا بعمل ده ليه ومبعملش ده ليه ،
تقدروا تقولوا اني خسرت نفسي ، بس خسارتي لنفسي جت بعد مخسرت كرامتي مع كل طفل بيستشهد في كل بلد مسلم عربي ،
تقدروا تقولوا اني خسرت نفسي بس بعد مخسرت تاريخ بلدي وسط مسخره وانحلال في كل مكان ،
تقدروا تقولوا اني خسرت كل حاجه حلوه ربنا خلقها فيا ،
بقيت (انساني) بقيت متبلد المشاعر ، بقيت زي اسطوانه بدل مكنت مصنوع عشان افيد الناس واعمر الكون ، بقيت كلي فيروسات وتروجنز ،
... مبقاش ينفع معيا لا مكاقي ولا نورتون ...
بقيت باد سيكتور في زمن ربنا وحده هوه اللي عالم بيه ، اتمني ميجيش يوم عليكم وتبقوا زيي ،
لاني من الآخر بقيت
ليكوريكا بايظ ايديشن :) !!!

تمت
ليكوريكا

----------------------------------
شوف بلوج مجرد مشاعر

جوا منك ... جوا مني !

http://just-afeeling.blogspot.com/

مستني تعليقاتكم
ليكوريكا



مش مهم اللي فات - سيبوني احلم باللي جاي