التسميات

الجمعة، 4 يوليو، 2008

ليكوريكا بايظ ايديشن !



ليكوريكا (بايظ) ايديشن!!

بتاريخ 24-6-2007

---------------------------------------------------

تنويه : احداث القصه غير حقيقيه ، والاسماء كلها وهميه ولا علاقه لها بالواقع ...

انزل بالتتر يا ليكو ...

ليكوريكا بايظ ايديشن !
-------------------------------------

(امشي عنه ... روح للدبه نانو ... وابعد عن حبيبي ، وكل اللي فسنه ، امشي يا برد طوبه ، للدبه الدبدوبه ، وابعد عن حبيبي ، وكل اللي فسنّه)
اوف ايه ده .. كل يوم جامعه ... كل يوم صحيان بدري ...
(امشي عنه ... روح للدبه نانو ... وابعد عن حبيبي ، وكل اللي فسنّه )

اسكت انت راخر ... موبايل خنيق ورنه أخنق ... آل امشي عنه آل ..
والله لشايلها وحاتط

(نام يا ليكو نام وهجيبلك موبايل( إن 95 ) )

... لما أقوم بقي آخد شاور لزوم الباور ...


*أنا زي أي بنت في الدنيا كلها ... بدوب من كلمه حلوه ... تلمسني واحسها ... وافضل فاكراها دايما وفحضني اضمها*

ايه يا عم الموبايل ... انت ناوي تتقفل عالصبح ولا ايه ... امنا نشوف مين اللي بيتصل ...


(أنا زي أي بنت في الدنيا كلها ... بدوب من كلمه حلوه)


youssry calling :

أنا زي أي بنت ... ويسري ؟! ... طب تركب ازاي دي ؟!

أه أه افتكرت ... (دينا يسري) بتاعة سكشن المايكرو ... عاوزه ايه ياربي دي عالصبح ... اما ارد واشوف ...

ليكوريكا : الو دينا ازي الثحه؟
دينا يسري : الحمد لله ... ازيك انت يا ليكو
ليكوريكا : طمام الحمد لله
دينا يسري : ايه مش جاي السكشن ولا ايه ؟!
ليكوريكا : سكشن ؟! ... سكشن ايه عالصبح...
دينا يسري : سكشن المايكروا ... الساعه 9 الا ربع وفاضل ربع ساعه !
ليكوريكا : أه المايكروا ان شاء الله جاي .. انا في الطريق اهو ...
دينا يسري : انت في التاكسي ولا بتوفر وراكب ميكروباص ؟!
ليكوريكا : ايه الظرافه دي يا بت يا دينا ... متيجي تلمي الأجره بالمره أحسن ...
لا يا ستي انا لسه في الطريق للحمام ...

دينا يسري : يعني استناك ولا ادخل انا ...
ليكوريكا : لا لا ادخلي وانا عشر دقايق وجاي باذن الله
دينا يسري : طايب مستنياك سلام
ليكوريكا : اوك سلاموكا :)

ربنا يعدي اليوم ده علي خير ، البت دينا دي مبتفائلش بيها خالص ، من ساعة مخدت منها اللوب بتاع المايكرو وهيا لازقه بسلوتب ، زي ميكون طمعانه فيا ،
طبعا ده كفايه ان عيد ميلادي فيه ستتين (6/6/1987)-
بمناسبة عيد ميلادي تقبل الهدايا في كل شهور العام نقدا او بشيكات :)


المهم دخلت الحمام ولبيت نداء الطبيعه ، وطلعت وحتطيت الجيل وخدت الموبايل واللوب والبالطو ونزلت ...

الساعه 9 الا خمسه وفاضل 5 دقايق والسكشن يبدأ ، شكلي هاخد تاكسي .....
تاكسي ايه بس ياواد يا ليكو ، أعقل وخد مايكروباص ووفر 1.75 قرش ،

ولا اقولك مش خسارف في المايكرو .. تاكسي تاكسي
تاكس ... الجامعه لو سمحت .. وشهل وحياة ابوك عشان ورايا سكشن ...

لقيت الراجل بيبصلي بقرف زي ميكون بيبص لمراته وقاللي
( أولا انا أبويا الله يرحمه .. يبقي متقولش وحياة ابوك ، ثانيا منتا شايف الطريق واقف اعمل ايه انا ، أطير بالتاكسي فوق العربيات يعني ؟!)

خلاص يا عمونا متزعلش نفسك اوي كده ، ربنا يرحم الوالد وعلي اقل من مهلك ، محدش واخد منها حاجه ،

وحدووووووووووووووووووه ...

مقلنا خد ميكروباص يا اسطي ليكو ، طب والله منا دافعله غير جنيه ونص ، وابقي خليه يوزع بيهم قرص علي روح الوالد !

ايوه بس هنا يا اسطي *

ليكوريكا : معاك فكة 50 جنيه ؟!
السواق : لا والله انا لسه طالع بالعربيه ، شوف معاك اي فكه كده
ليكوريكا : ثواني هشوف ... هما جنيه ونص اللي معايا ... حلال عليك
الراجل خد الجنيه ونص وكان عاوز ياخد روحي بدل النص جنيه الباقي ... وآدي جزاة اللي ميسمعشي كلمه ليكو يقولها...

ملحوظه : دي الاسعار القديمه قبل مالبنزين يغلي ... وعشان بس تاخدوا بالكم ... المشوار اساسا مش مستاهل يتدفع فيه ربع جنيه :))

الساعه 9.05 ، لما امد عشان الحق السكشن ، معرفش ايه السكاشن اللي في السما دي ،
أنا ليكوريكا
( سنتين كي جي وان وكي جي تو ، و خمس سنين ابتدائي ، و تلاته اعدادي ، وزيهم ثانوي ، وواحده اعدادي مع الضفاديع والاسكارس في علوم ، و اتنين صيدله )
أطلع 4 ادوار عشان سكشن مايكرو ...
يللا سجلي يا لبني واشهدي يا سيهام ، المهم وصلت الدور الرابع بسلام ،
ولقيت عالسلم مزتين تمام ،
يارب يعني الواحد يسيب القمر والشمس قاعدين بره ويدخل مع البكتيريا والفيروسات ، عشان بس تقدروا حجم التضحيات الليكوريكيه في سبيل العلم ...


السكشن طبعا بدأ وأنا عملت زي عبده الاهبل ودخلت ، ووقفت جنب دينا واديتها اللوب بتاعها ، وهيا قعدت تعمل فيها أصيله وخليه ومش خليه وكلام البنات اياه ده ،
لحد مصاحبتها
(رانيا تنده) مجت وقالتلها جبتي اللوب بتاعي ، انا قلتلها اتفضلي اهو وكنت هفطس علي روحي من الضحك علي دينا ... لولا الدكتور دخل !
...

لقيته بيزعق وبيقول ... فين البيه اللي لسه داخل ...
طبعا دينا هانم متتوصاش راحت بصه عليا وضاحكه قام هوا عارفني مش محتاجه ذكاء يعني ...

المهم سلمت امري لله وقلتله ايوه يا كتور ، راح قايللي ايه اللي أخرك
طب والنبي اقوله ايه ده ، أقوله كنت نايم ... ابسط حاجه هيقوللي كمل نوم في بيتكم ...
خلاص مش هيحل المايكرو الا المايكرو ، واهي كذبه (فوشيا) يعني ...

رديت عليه وقلتله : معلش يا دكتور كنت في المايكرو
رد وقاللي : نعم يا خويا وصلت بيك البجاحه انك تقول انك بتاخد كورس وكمان في السكشن
رديت عليه بسرعه : يا دكتور انا مقلتش اني باخد كورس
الدكتور : اومال ايه يا افندي ؟!
ليكوريكا : أنا قلت انا كنت في المايكرو ... المايكروباص يعني ... :)
الدكتور : نعم يا افندي ، كمان جاي متأخر وكمان بتهرج ... اتفضل اطلع بره
ليكوريكا : يا دكتور معلش اخر مره
الدكتور : بره قلتلك
ليكوريكا : يا دكتور (سماح) المرادي
وشكل مراته طلعت اسمها سماح ، اول مسمع الكلمه دي بقي معلق علي بره بره ، ويهديك يرضيك يولع فيك حتي ، برضو مصمم اني اطلع بره ... ...

المهم طلعت وقعدت ادعي علي دينا الفقر ، لازم يعني تفكرني بالسكشن وفي الاخر اتطرد بره ،
يجري ايه لو الاعلام خد خبر ، سمعتي تبقي ايه وسط المزز المتحده ؟!

منا قلتلكم دينا دي فقر ، حاجه تنرفز ، حاجه تتنشن ، حاجه تشيب ، حاجه تهوس ، حاجه زي لهطة القشطه ، لا لا قشطة ايه بس ، دي ولا البقره بتاعة لبنيتا اللي بتيجي في اعلانات رمضان :)

شفتها فين قبل كده دي بس ، آه دي شبه البت اللي كانت طالعه في كليب عبد الحميد حافظ اللي كان عامله سنة 69 وهوه بيغني لحبيبته في المطبخ
( أنا هففطر فووول موش طعميه ... تيرارا ... وهحلي بموز

مالغربيه ... تيرارا ... وعماد بعرور يشمت فيا ... والاقيه بكره يرد عليا ... ويثور ويقووووووول
( العنب العنب العنب ... ينفع في شتا او صيف )

يا عم ايه الاغنيه دي ، انت شكلك جعان ، منها لله دينا نزلتني من غير مفطر ، المهم انا عاوزك تبين مواهبك الليكوريكيه وتلضم معاها ...

اممممم ابتدي بايه يا تري ؟! ... محمد منير كويس ... يللا استعنا عالشقا بالله

نزلت وراها عالسلم ، انتي يا ... تعرفي محمد منير ؟!

تبصلي بقرف ومتردش ...
محمد منير ... اخو اسامه منير ... بالذمه في حد ميعرفش محمد منير ؟!
برضو مبتردش ...
محمد منير ... اللي بيغني ...
(لا يهمني اسمك ... لا يهمني عنوانك ... لا يهمني لونك ... ولا بلادك ... مكانك ... يهمني من الآخر ... انت فودافون ولا موبينيل يا جميل :) )

ههههههه (بقرف) ايه الخفه دي ، وبعدين انا اتصالات ريح نفسك بقي ... وسابتني مكبوس علي عيني ونزلت
ايه الكبسه دي ياربي بس ،
ازاي بس انسي ان اتصالات وصلت :)


------------------------------------------------------------------

فاصل اعلاني :

الراعي الرسمي لبلوجات ليكوريكا

* حديد عز : هتشتروه هتشتروه !

* بامبرز : هديتنا للشعب المصري !

* فودافون : شعارنا ---خليك غبي--- (متفكرش لحظه :) ) !

------------------------------------------------------------------

نزلت وانا مكبوس علي عيني ، وعمال ابرطم ... اكيد البت دينا دي عاملالي عمل ، من يوم معرفتها ومفيش مزه راضيه تلضم معايا ... اما تنزلي يا دينا ،ان مخليتك تعزميني علي كريب تمن البهدله اللي اتبهدلتها دي.

المهم نزلت لقيت واحد صاحبي (مش هقول علي اسمه لحسن يرفع عليا قضية خلع ... اقصد سب وقذف يعني )
المهم لقيته قاعد مع مزز من الشعب البنهاوي الشقيق ... وبنتهز الفرصه وببعت سلامي لكل مزز بنها ، ولكوبري بنها يا نور عيني ، ولمنديل كوبري بنها يا نور عيني ، وللسمك اللي تحت كوبري بنها يا نور عيني ... وللعربيات اللي بتمشي فوق كوبري بنها يا نور عيني ... وسمعني آحلي سلام ليكوريكي آخر وصايه !

المهم بما ان العلاقات الشرقاويه البنهاويه متدهوره للغايه ، لدرجة انهم بيقولوا ان الف شاب زقازيقي بس اتجوزا من بنها السنه اللي فاتت ، قلت لازم اروح اشوف صاحبي وحبيبي بيعمل ايه ، وأهو بالمره نوتطد العلاقات بين الشعبين الشقيقين :)

نزلت عليهم زي مالمارينز نزلوا علي العراق ، وازيكم وعاملين ايه ونظام البراشوتتات الاصلي (فينك يا ميسو - ميسو ده واحد صاحبي واخد دكتوراه من استكهولم في البرشطه عقبالكم جميعا :) )

لكن علي مين ، اخينا اللي قاعد معاهم راح قايم ، وقالهم طايب يا جماعه ، اشوفكم بعدين بقي ، وراح واخدني من ايدي وماشي بعيد عنهم ، ايه يا ناس جرا ايه في الدنيا دي ، ايه الصحاب اللي مبتحبش الخير لصحابها دول !

واضح فعلا ان ديننا عاملالي عمل محترم ، حتي البرشطه مش نافعه ، ماشي يا دينا ، اما اشوفك بثـــ !

خدت نفسي ورحت طالع علي طب ، ولما نقول طب ، يعني متحف التشريح ، يعني المزز اللي بصحيح ،
ولحسن الحظ لقيت اتنين صحابي قاعدين ناحية الملعب ، قلت اما اروح اقعد معاهم ، يمكن نلضم في 3 مزز ونعزمهم علي كابوتشينو (موش بتاع أحمد حلمي :) )

قعدت أنا وهما مستنيين الفرج ، وواضح ان الفرج اتأخر في المواصلات شويه ... يبقي ايه الحل ؟! ... الحل ان احنا نروحله برجلينا (مش محتاجه فكاكه دي) ،

لمحنا 3 بنات قاعدين ناحية متحف التشريح ، قلت تشريح تشريح ، المهم اكسر حاجز الفقر الي انا فيه ، رحنا قعدنا وراهم ومنعرفش حتي شكلهم ايه ولا وشوشهم عامله ازاي ، تعملوا ايه بقي في شباب واقع ، هيفا واليسا خلوهم يعاكسو بنات حتي موش شايفين وشهم ، كانوا اتنين بشعرهم وواحده محجبه ، لقيت الاتنين زمايلي هيموتوا علي اللي بشعرهم ، سبتهم يموتوا وقررت انشن علي المحجبه !

وبدأت ملحمة المعاكسه ، اممممممممم نبدأ بالاسامي
كل واحد من زمايلي قال اسمه وجه الدور عليا ، قلت ليكوريكا ، لقيت واحده من اللي بشعرهم ضحكت زي ميكون افتكرته (داندورمه ... جيلاتي بالكوستاريكي :) ) ، بس مش دي اللي انا عاوزها ...

تاني حاجه الوظيفه ، واحد قال صيدلي تحت الانشاء ، وواحد قال صيدلي فوق الانشاء ، وأنا قلت طالما القعده قلبت علي ريحة دوا كده هقولكم نكته
" مره واحد صيدلي اتجوز ... يوم الصباحيه لقوه مرجع مراته لأهلها ، يا ترى ليه ؟! ............. بيقول انه اكتشف ان مفيهاش نشره داخليه تبين طريقة الاستعمال :) "
لقيت التانيه ام شعر فطست علي روحها من الضحك ... بس برضو موش دي اللي انا عاوزها ... ...

لمحت من بعيد كتاب كيميا مكتوب عليه كلية العلوم ، قلتلهم بقي يهون عليكم عشرة الضفاديع والاسكارس ، ايش حال ان مكناش جيران وقعدنا عندكم 365 وربع يوم ، وبعدين علي رأي المثل الليكوريكي القديم ( مراية الحب كيميا ) وما شاء الله كل كليه فينا عندها بدل الكيميا اتنين وتلاته ، ولازم نوتطد العلاقات ، ولا ايه رايكم ؟!

لقيت اللي انا عامل الدوشه دي كلها علشانها ، ابتدت تتحرك وناويه تقول حاجه ، مره واحده لقيتها طالعه فيا ، اظن كده كفايه أوي يا دكتور ؟!

اتمسمرت في مكاني ، وحسيت ان درجة حرارتي بقت 45 واني بقيت زي القلم الرصاص المقصوف ... لا بسمع ولا حتي بشوف!
ورحت قايل مين ... ندى ؟!

هيا راحت واخده صاحبتها الاتنين ومشيوا ، وأنا قاعد مش عارف انطق بكلمه ،
ندي الانسانه الوحيده اللي كنت اتمني صورتي قدامها تفضل كويسه ، شفتها مرتين ايام مكنا في كلية علوم ، ولحد دلوقتي كل يوم لما بغمض عيني مبشوفش غيرها ، الموضوع كان مجرد صدفه ، وكان حلم جميل في نفس الوقت بالنسبالي ، كنت لسه عامل كارنيه الكليه وفرحان بيه ، وطلعت من صيدله علي علوم عشان كان ورانا محاضره ، وفجأه بدور علي الكارنيه ، ملقيتهوش ، قلبت الدنيا عليه ، ومره واحده لقيتها بتندهلي وبتسأل ... الكارنيه ده بتاعك؟!
قلتلها مش عارف اشكرك ازاي ، انا كنت لسه عامله وضاع مني ... شكرا يا ...........
ردت وقالت ، ندي ... اسمي ندي ، ادتني الكارنيه ومشيت ، ولسه لحد دلوقتي من يومها ، وانا مروح لازم اعدي علي علوم جايز اشوفها تاني او اعرف اي حاجه عنها ، مش عارف ممكن يكون فعلا حب من اول نظره ، بس كل اللي فاكره اني اول مشفتها ، اخينا اللي فصدري الشمال فط من مكانه ونزل عشان يسمعها وهيا بتقول اسمها ، لكن يا خساره ، لما تتحقق امنيتي واشوفها ، اشوفها وانا فوضعي ده ...

شاب صايع تافه ، كل اهتماماته انه يعاكس دي ، ويمشي ورا دي ، ويعرف رقم موبايل دي ، شفتها لتالت مره ولآخر مره وضاع مني حلم جميل بسبب استهتاري وسوء تصرفي ، بس صدقوني الموضوع مش بايدي...

انا شاب زي اي شاب ، طاقه مدفونه ، دخلت كليه المفروض انها من احسن الكليات ، حلمي اني كنت اتعلم فيها صح ، اتصدمت بواقع قلة الامكانيات واكتشفت ان اللي عانيته في ثانوي هعاني زيه وأكتر في الجامعه ،
شاب لو فكر في السياسه و راح مع المعارضه هيقولوا ارهابي متطرف ، ولو بقي مع الحزب الحاكم هيقولوا ده وطني وعميل ،
، لو فكرت في الفن هلاقي حواليا عنب وسمك وحناطير وافلام اباحيه تحت مسمي الفيديو كليب ،
شاب لو سمعت نشره هثور واجول واقول عاوز احارب ، بس هحارب مين وفين وازاي ... اعدائنا بقو كتير وبعد مكانت فلسطين بقت فلسطين والعراق ولبنان وسوريا وافعانستان والسودان والدور علينا جاي جاي ،
لو قلت احب واتجوز ، هحب ازاي وليه اظلم معايا واحده ملهاش ذنب تقعد تستناني 10 سنين اجيب شقه واشتغل واخلص جيشي ودراستي ،
شاب مخنوق من امبارح وبيتمني النهارده يخلص ومبيخفش من حاجه أكتر من بكره ، عاوزنّي بعد كل ده افكر أنا بعمل ايه ... عاوزيني بعد كله ده ابقي شاب طبيعي قادر اقيم تصرفاتي واعرف انا بعمل ده ليه ومبعملش ده ليه ،
تقدروا تقولوا اني خسرت نفسي ، بس خسارتي لنفسي جت بعد مخسرت كرامتي مع كل طفل بيستشهد في كل بلد مسلم عربي ،
تقدروا تقولوا اني خسرت نفسي بس بعد مخسرت تاريخ بلدي وسط مسخره وانحلال في كل مكان ،
تقدروا تقولوا اني خسرت كل حاجه حلوه ربنا خلقها فيا ،
بقيت (انساني) بقيت متبلد المشاعر ، بقيت زي اسطوانه بدل مكنت مصنوع عشان افيد الناس واعمر الكون ، بقيت كلي فيروسات وتروجنز ،
... مبقاش ينفع معيا لا مكاقي ولا نورتون ...
بقيت باد سيكتور في زمن ربنا وحده هوه اللي عالم بيه ، اتمني ميجيش يوم عليكم وتبقوا زيي ،
لاني من الآخر بقيت
ليكوريكا بايظ ايديشن :) !!!

تمت
ليكوريكا

----------------------------------
شوف بلوج مجرد مشاعر

جوا منك ... جوا مني !

http://just-afeeling.blogspot.com/

مستني تعليقاتكم
ليكوريكا



هناك 42 تعليقًا:

لست أدرى يقول...

عارف
دى اول حاجه اقراها ليك على المنتدى وبجد كنت هموت من الضحك
وبيتهيألى انها احلى حاجه كتبتها يعنى بخلاف الشعر

ادي ردى فى المقصوره اهه كالعاده

سفروتة يقول...

لا بجد انا فطست علي روحي من الضحك


اسلوبك حلو جداااااااااااااااااااااااااااااااا

السخرية اللي فيه متخليش اللي بيقرا ينفر من الكلام

اما بقي بالنسبة لاخر مقطع فانت تقريبا وصفت معظم الشباب مش هقول كلهم ، بس دول هما اللي طفوا علي السطح وبقوا ظاهرين اكتر وللاسف الناس فاكرة ان كل الشباب كده مستهترين وضايعين ،مع انه في شباب بجد نموذج رائع للكفاح والاجتهاد

لك كل التحية

:)

MeMe يقول...

والله يادكتور وكالعادة ...
الأسلوب ...أكثر من رائـــع وكالعادة برضه مابطلتش ضحك ...
بس الحبة اللى فى الاخر دول بقى ...هما
المشكــلة انهم حال الكتير ...منـــنا
بس ماهو فى ناس تانية كويسيــن اشمعنــى هما؟؟
انا شايفة يادكتور ان العيب فينا أحنا .. وربنا يستر ..
ويعديها على خير ...
تقبل مرورى يافندم...
بس بجد بغض النظر عن الضحك والاسلوب الجامد موت ده
انما فعلا المووضوع مهم .. وبيلمسنا كلنــا ,وزعلت لما افتكرت حالنا وحال اخواتنا :(
سلااااااااااااامز

Nostor Azzuro يقول...

صباح العبث
جامد طحن
وحلوة أوى حكاية الفاصل الأعلانى
مستنى جديدك

عيله مفتريه سابقا يقول...

ليكو

انا اتصدمت !!!

بعد مضحكت للركب ، الكلام اللى قولته صدمنى

صدمنى لانى انا وانت وهو واللى هناك بنمر بيه

صدمنى لاننا مبقاش فى ايدينا حاجه

حتى اللى معترضين على الكلام اللى كتبته

وموقع الزواج

مش عارفين ان ده موجود وبالعكس البنات بتجرى عليه والشباب اللى شايف يعنى نفسه شاب بيحرك فيها زى العروسه

اوف
انا زهقت وطهقت من يأسنا وتعبنا وقرفنا

ليكو

قولت حاجات جووايا قوى مش عارفه عملت كده ازاى

بجد

يارب يكون فى ايدينا اكتر من الكلام وبس يارب


سلامى

Eman يقول...

بصراحة أنا في بداية القصة

قولت هو في ايه بالظبط .. المفروض انه

ايه الرسالة اللي عايز يوصلهامن ده

كله

بس بجد لما قرأت القصة للآخر عاجبني أوي

نهايتها، تحس فعلا فيها بثورة وسخط من

الوضع اللي احنا عايشينه

بجد بجد أحييك علي أسلوبك الرائع

سارة علي يقول...

اول مرةازور مدونتك عارف انت ناقشت موضوع مهم اوى "تخبط الهوية"بين انك تكون شخص كويس ودة فى ظل تقييد الحريات مش متاح وبالتالى الطريق التانى مفتوح وتحت مسميات الروشنة والتنفيض ومصطلحات معاجم الهروب
الصراحة بقى انت دمك خفبف اوى وانا مبطلتش ضحك ومدونتك جميلةاوى
تقبل مرورى
تحياتى

Mohamed Dawod يقول...

بجد بجد بجد بوست يجنن....يخرب عقلك...نقلتنى فى لحظه واحده من البسمه اللى كل شويه تبقى ضحكه للوجوم اللى كان خلاص حيخلينى أبكى على حال شبابنا....حقيقى تحيه كبيره ليك ولمقدراتك الأبداعيه ولخفة دمك المصريه الحقيقيه مش استظراف . على فكره أجمل حاجه فى البوست انه رجعنى لأبام الكليه اللى انا بعتز بيها جدا. شكرا ليك وتحياتى

سنووايت يقول...

هو الموضوع دمه خفيف
واسلوبه يجذب اي حد انه يكمله للاخر
بجد باحييك عليه

بس بالنسبة للاخر
صدقني انت في ايدك انت تبقي انت
وفي ايدك بردو تبقي زي اي شاب
الدنيا فرص واللي بيقدر يدور علي فرصته ويلاقيها هو دا اللي بيسيب اثر وبيقدر يعمل حاجة
انا معاك في الوضع السيء والانحدار الي وصلناله في كل حاجة في حياتنا وفي قلة الامكانيات والصدمات اللي الواحد اخدها
بس انت مش لوحدك زي ما قلت بس فيه اللي بيقدر يغير نفسه ويغير حياته كلهاوفي اللي بيستسلم وبيفضل قاعد مستني ان الدنيا تتغير من حواليه ودا مش هيحصل
اتمني ان الايديشن الجديد تنزل قريب وتكون فيها اوبشنز جديدة وداتا جديدة وليكوريا جديد

تحياتي علي الموضوع المميز

بنوتة من وسط البلد يقول...

والله يا دوك ..
تسلم الدماغ المتكلفة .. بغض النظر عن دمك الخفيف واخلاقك المنحلة ولامؤاخذة :)

الباراجراف الى فى الاخر ده لخصت فيه كلام كتيير اوى ممكن يتقال فى سنين

بس الى يحسر فيه انه من طالب فى كلية الصيدلة .. يعنى وش قفص مكتب التنسيق


امال العيال الى معاهد تكنولوجيا الغاز الطبيعي .. ممكن تبقى بصه لنفسها ازاى .. ودول الى غنالهم سعيد صالح فى مدرسة المشاغبين

طريقك مسدودون مسدودون يا ولدى

ما الاقيش معاك سلااكة للبلاعة علشان السدد غرق العفشة :)

بجد سعيدة جدا بقراة مدونتك اللطيفة :)

تحياتى

mostafa rayan يقول...

بص يا نجم طول ماحنا عايشين في الدنيا لازم يكون عندنا امل في بكرة
اذا كانو سرقوا مننا النهاردة فبكرة اكيد بتاعنا
جاي وكله امل وهنعوض كل اللي فاتنا

بسنت يقول...

الصراحه يا ليكو دمك خفيف جدا على عكس كل الصيادله مهم فظيع
زمايل مهنه وعارفاهم كويس
مدونتك جميله فعلا خلتنى اضحك من قلبى والله وبجد
ربنا يسعدك دايما
ويكون الاديشن الجاى -- تمام

انا قريت كل البوستات اللى فاتت وهرد عليهم منفردين وهرجع للى فات كمان
فرصه الواحد يضحك وينبسط وسط الزعل والاكتئاب المزمن

سلمت دايما
اختك
بسنت

دعوة للأمل يقول...

بوست جميل و مضحك و الصراحة دلوقتى كل حاجة بقت مش نافعة و لا تعليم و لا اى حاجة مش عارفة امتى البلد دية هتتعدل
بس لازم يكون عندنا امل فى بكرة و اشكرك

كلام على بلاطة يقول...

ايه يا عم الابداع ده كلة
كوميدى طحن
بوست رائع
تحياتى

دودى يقول...

بجد حلو شويه الكلام اللى فى الاخر دول تصدق بالله انا كنت عماله افتح مدونات اول مره افتحها واقرا الموضوعات اللى فيها بس دى المدونه الوحيده اللى شدتنى وخلتنى اقرا الموضوع بالكامل بالرغم من انى بمل من القراءه اسلوبك رائع انا منتظره القادم باذن الله

أحسن تـستاهـل يقول...

يا ابن الذينا ،، تصدق في الاول انا كنت بقرأ البوست عادي كده انما في الاخر انبسطت اوي بكلامك

بقيت متبلد المشاعر،، الجملة دي أثرت فيا اوي عشان مش لوحدك بتفكر كده لأ كتير مننا ع الاقل الكلمة جت فيا خبطت رشقت

مش عارفة اقول حل للي احنا فيه أد ما انا عندي تعايش مع مشكلتك واحساس بيها

ليكوريكا،، عجبني كلامك اوي المرة دي بجد

مها ميهوووو

amal يقول...

البوست جامد اوى على فكره

بجد عجبنى جدا

ما شاء الله على اسلوبك

دمه خفيف بجد

Darsh يقول...

يا عيني عليك يا منحوس يا متعوس يا موكوس

حتى دلوقتي ما بقاش فيه أم ندا

عادي يا ليكو بيه

كلنا في الهوا سوا

بس بإذن الله هنلاقي لوجودنا قيمة

هنحاول و هنلاقي القيمة دي

صدقني يا ليكو

....

اه على فكرة المعيد اللي طردك م السكشن غالبا هو كمان جاي متأخر و يدوب قبلك بثواني

enjy يقول...

هى قلبت دراما ليه كدة بس؟؟؟؟؟؟
انت ضحكتنى قوى جدا خالص فى الاول وبعدين عكننتنى اوى جدا خالص فى الاخر
بس الخلاصة يعنى ان اسلوبك كالعادة شدنى لحد ما قريت اخر كلمة

imagine يقول...

سلام
الللللللللللله، البوست جميلة جدا جدا، هذه زيارتي الأولى للمدونة بتاعتك.أنا في الأول إفتكرت إن كل البوست كده،هزار فهزار بس في الآخر إتصدمت بصراحه، أسلوبك في الإنتقال حلو جدا ومفاجئ، حقا حقيقة مضحكة مبكية في ذات الوقت،ونرجو حقاً بأن أحوالنا تنصلح،،،خلليها على الله. فلنتوكل عليه.
أتمنى منك زيارة مدونتي أيضاً
إسراء
لبنان.

ليكوريكا يقول...

المقصوره نورت بصاحبتها

اللي بقي عندها 22 وعشرين سنه بحالهم :))

كتييييير كتير يعني :)

نورتي مره تانيه ومش هتفرق احلي حاجه او موش احلي حاجه

المهم انها تعجب الناس ...

ليكوريكا يقول...

سفروتة يقول...

لا بجد انا فطست علي روحي من الضحك


اسلوبك حلو جداااااااااااااااااااااااااااااااا

السخرية اللي فيه متخليش اللي بيقرا ينفر من الكلام

اما بقي بالنسبة لاخر مقطع فانت تقريبا وصفت معظم الشباب مش هقول كلهم ، بس دول هما اللي طفوا علي السطح وبقوا ظاهرين اكتر وللاسف الناس فاكرة ان كل الشباب كده مستهترين وضايعين ،مع انه في شباب بجد نموذج رائع للكفاح والاجتهاد

لك كل التحية

:)

----------------------------

منوراني يا سفروته :))

وعندك اتنين واحد عضير بطاطس لاول سفروته تزول بلوجات ليكوريكا :)

اتمني يكون الكلام عجبك فعلا

ومتبقاش اخر زياره ...

ليكوريكا

ليكوريكا يقول...

MeMe يقول...

والله يادكتور وكالعادة ...
الأسلوب ...أكثر من رائـــع وكالعادة برضه مابطلتش ضحك ...
بس الحبة اللى فى الاخر دول بقى ...هما
المشكــلة انهم حال الكتير ...منـــنا
بس ماهو فى ناس تانية كويسيــن اشمعنــى هما؟؟
انا شايفة يادكتور ان العيب فينا أحنا .. وربنا يستر ..
ويعديها على خير ...
تقبل مرورى يافندم...
بس بجد بغض النظر عن الضحك والاسلوب الجامد موت ده
انما فعلا المووضوع مهم .. وبيلمسنا كلنــا ,وزعلت لما افتكرت حالنا وحال اخواتنا :(
سلااااااااااااامز
-----------------------------

سعيد بتعليقك بجد

الحال مبقاش يسر للاسف

بس دي حقيقه

كان نفسي البسمه تدنها علي وشوش كل اللي قروا الموضوع

بس هنعمل ايه ... قسمه ونصيب بقي

منوره البلوج دايما باذن الله

ليكوريكا يقول...

Nostor Azzuro يقول...

صباح العبث
جامد طحن
وحلوة أوى حكاية الفاصل الأعلانى
مستنى جديدك

---------------------------

عبث :)

موش للدرجادي

نورتني واكيد مستني زيارتك الجايه

ليكوريكا يقول...

عيله مفتريه سابقا يقول...

ليكو

انا اتصدمت !!!

بعد مضحكت للركب ، الكلام اللى قولته صدمنى

صدمنى لانى انا وانت وهو واللى هناك بنمر بيه

صدمنى لاننا مبقاش فى ايدينا حاجه

حتى اللى معترضين على الكلام اللى كتبته

وموقع الزواج

مش عارفين ان ده موجود وبالعكس البنات بتجرى عليه والشباب اللى شايف يعنى نفسه شاب بيحرك فيها زى العروسه

اوف
انا زهقت وطهقت من يأسنا وتعبنا وقرفنا

ليكو

قولت حاجات جووايا قوى مش عارفه عملت كده ازاى

بجد

يارب يكون فى ايدينا اكتر من الكلام وبس يارب


سلامى

---------------------------

مش عارف ارد اقل ايه بجد

بس اكيد في ايدينا اكتر

والا حياتنا كلها تبقي ملهاش لازمه

اسف لو خرجتكم من مود انبساط لمود كآبه

وتتعوض باذن الله

منوره البلوج طبعا من غير كلام

ليكوريكاذ

ليكوريكا يقول...

Eman يقول...

بصراحة أنا في بداية القصة

قولت هو في ايه بالظبط .. المفروض انه

ايه الرسالة اللي عايز يوصلهامن ده

كله

بس بجد لما قرأت القصة للآخر عاجبني أوي

نهايتها، تحس فعلا فيها بثورة وسخط من

الوضع اللي احنا عايشينه

بجد بجد أحييك علي أسلوبك الرائع

---------------------------

شكرا يا ايمان علي ردك

في كتير مصبروش لحد الاخر وخدوا فكره غلط من البدايه بس

هوا ده عيبنا ... محتاجين شوية صبر

سعيد انك صبرتي علي طول الموضوع

وسعيد بردك مره تانيه

ليكوريكا يقول...

سارة علي يقول...

اول مرةازور مدونتك عارف انت ناقشت موضوع مهم اوى "تخبط الهوية"بين انك تكون شخص كويس ودة فى ظل تقييد الحريات مش متاح وبالتالى الطريق التانى مفتوح وتحت مسميات الروشنة والتنفيض ومصطلحات معاجم الهروب
الصراحة بقى انت دمك خفبف اوى وانا مبطلتش ضحك ومدونتك جميلةاوى
تقبل مرورى
تحياتى

------------------------

اكيد سعيد بالزياره دي

واتمني متكونش الاخيره

بس صدقيني لا تخبط هويه ولا معاجم هروب

الموضوع كله مجرد احلام

بس احلام مع ايقاف التنفيذ :(

ليكوريكا

ليكوريكا يقول...

Mohamed Dawod يقول...

بجد بجد بجد بوست يجنن....يخرب عقلك...نقلتنى فى لحظه واحده من البسمه اللى كل شويه تبقى ضحكه للوجوم اللى كان خلاص حيخلينى أبكى على حال شبابنا....حقيقى تحيه كبيره ليك ولمقدراتك الأبداعيه ولخفة دمك المصريه الحقيقيه مش استظراف . على فكره أجمل حاجه فى البوست انه رجعنى لأبام الكليه اللى انا بعتز بيها جدا. شكرا ليك وتحياتى

--------------------------

اي يوم بيعدي للاسف بقي احلي من اللي جاي

اتمني القاعده تتكسر وتبقي كل ايامك الجايه اكتر سعاده

سعيد بتشريف وردك الجميل

ليكوريكا

ليكوريكا يقول...

سنووايت يقول...

هو الموضوع دمه خفيف
واسلوبه يجذب اي حد انه يكمله للاخر
بجد باحييك عليه

بس بالنسبة للاخر
صدقني انت في ايدك انت تبقي انت
وفي ايدك بردو تبقي زي اي شاب
الدنيا فرص واللي بيقدر يدور علي فرصته ويلاقيها هو دا اللي بيسيب اثر وبيقدر يعمل حاجة
انا معاك في الوضع السيء والانحدار الي وصلناله في كل حاجة في حياتنا وفي قلة الامكانيات والصدمات اللي الواحد اخدها
بس انت مش لوحدك زي ما قلت بس فيه اللي بيقدر يغير نفسه ويغير حياته كلهاوفي اللي بيستسلم وبيفضل قاعد مستني ان الدنيا تتغير من حواليه ودا مش هيحصل
اتمني ان الايديشن الجديد تنزل قريب وتكون فيها اوبشنز جديدة وداتا جديدة وليكوريا جديد

تحياتي علي الموضوع المميز

--------------------------------

نخلي الكلام موجه لبطل القصه وبلاش ليا انا :)

يعني انا حاولت اوصف حال شريحه كبيره من الشباب الي حواليا

بس اكيد في نسخ جديده من ليكوريكا

انتظرونا :))

واكيد سعيد بردك وزيارتك

اتمني تكراركها

ليكوريكا

ليكوريكا يقول...

بنوتة من وسط البلد يقول...

والله يا دوك ..
تسلم الدماغ المتكلفة .. بغض النظر عن دمك الخفيف واخلاقك المنحلة ولامؤاخذة :)

الباراجراف الى فى الاخر ده لخصت فيه كلام كتيير اوى ممكن يتقال فى سنين

بس الى يحسر فيه انه من طالب فى كلية الصيدلة .. يعنى وش قفص مكتب التنسيق


امال العيال الى معاهد تكنولوجيا الغاز الطبيعي .. ممكن تبقى بصه لنفسها ازاى .. ودول الى غنالهم سعيد صالح فى مدرسة المشاغبين

طريقك مسدودون مسدودون يا ولدى

ما الاقيش معاك سلااكة للبلاعة علشان السدد غرق العفشة :)

بجد سعيدة جدا بقراة مدونتك اللطيفة :)

تحياتى

-------------------------------

منا كاتب التنويه اللي في الاول علشان كده

ليكوريكا ده واحد تاني ... معرفوووووووش :)))

سعيد بزارتك الاولي ...

يارب متكونش الاخيره

وميكونش الكلام ده مجرد مجامله

ليكوريكا

يوووه

اقصد موش ليكوريكا :)

ليكوريكا يقول...

mostafa rayan يقول...

بص يا نجم طول ماحنا عايشين في الدنيا لازم يكون عندنا امل في بكرة
اذا كانو سرقوا مننا النهاردة فبكرة اكيد بتاعنا
جاي وكله امل وهنعوض كل اللي فاتنا

----------------------------

طب لو سرقوا بكره قبل النهارده ؟

انت شايف بكر ازاي يا مبدعنا الثائر ؟

ليكوريكا يقول...

بسنت يقول...

الصراحه يا ليكو دمك خفيف جدا على عكس كل الصيادله مهم فظيع
زمايل مهنه وعارفاهم كويس
مدونتك جميله فعلا خلتنى اضحك من قلبى والله وبجد
ربنا يسعدك دايما
ويكون الاديشن الجاى -- تمام

انا قريت كل البوستات اللى فاتت وهرد عليهم منفردين وهرجع للى فات كمان
فرصه الواحد يضحك وينبسط وسط الزعل والاكتئاب المزمن

سلمت دايما
اختك
بسنت

-------------------------

شكرا لوجودك هنا يا دكتورتنا

وعلي ردك اللي اكيد اسعدني جدا جدا جدا

ولو انك لو قعدتي تقلبي هتلاقي مواضيع كئيبه كتيره

اتمني بجد متكونش اخر زياره

ليكوريكا ...

ليكوريكا يقول...

دعوة للأمل يقول...

بوست جميل و مضحك و الصراحة دلوقتى كل حاجة بقت مش نافعة و لا تعليم و لا اى حاجة مش عارفة امتى البلد دية هتتعدل
بس لازم يكون عندنا امل فى بكرة و اشكرك

----------------------------

اكيد الامل موجود

باذن الله طبعا :)

اتمني يكون البلوج عجبك

ومتكونش اخر زياره ...

ليكوريكا

ليكوريكا يقول...

كلام على بلاطة يقول...

ايه يا عم الابداع ده كلة
كوميدى طحن
بوست رائع
تحياتى

-----------------------

منورني يا بوب

اتمني تكون ضحكت ولو ضحكه واحده

بس تكون من قلبك

ليكوريكا

ليكوريكا يقول...

دودى يقول...

بجد حلو شويه الكلام اللى فى الاخر دول تصدق بالله انا كنت عماله افتح مدونات اول مره افتحها واقرا الموضوعات اللى فيها بس دى المدونه الوحيده اللى شدتنى وخلتنى اقرا الموضوع بالكامل بالرغم من انى بمل من القراءه اسلوبك رائع انا منتظره القادم باذن الله

----------------------------

اكيد دي شهاده اعتز بيها

واتمني فعلا تكوني منراني البوست الجاي

ليكوريكا

ليكوريكا يقول...

يا ابن الذينا ،، تصدق في الاول انا كنت بقرأ البوست عادي كده انما في الاخر انبسطت اوي بكلامك

بقيت متبلد المشاعر،، الجملة دي أثرت فيا اوي عشان مش لوحدك بتفكر كده لأ كتير مننا ع الاقل الكلمة جت فيا خبطت رشقت

مش عارفة اقول حل للي احنا فيه أد ما انا عندي تعايش مع مشكلتك واحساس بيها

ليكوريكا،، عجبني كلامك اوي المرة دي بجد

مها ميهوووو

--------------------------

افهم بقي انه كان قبل كده مجامله

عموما المهم انه عجبك المرادي :)

منوره كالعاده وربنا ميقطعها عاده

ليكوريكا

ليكوريكا يقول...

amal يقول...

البوست جامد اوى على فكره

بجد عجبنى جدا

ما شاء الله على اسلوبك

دمه خفيف بجد

--------------------

شكرا ليكي علي ردك وزيارتك

ابقي زورينا كل شويه :)

ليكوريكا يقول...

Darsh يقول...

يا عيني عليك يا منحوس يا متعوس يا موكوس

حتى دلوقتي ما بقاش فيه أم ندا

عادي يا ليكو بيه

كلنا في الهوا سوا

بس بإذن الله هنلاقي لوجودنا قيمة

هنحاول و هنلاقي القيمة دي

صدقني يا ليكو

....

اه على فكرة المعيد اللي طردك م السكشن غالبا هو كمان جاي متأخر و يدوب قبلك بثواني

---------------------------

امممممممممممم تفتكر يا صلصه

يعني اشكي للفيفا علي ضمانتك :))

منورني يا واد ...

انت مبتجيش كتير ليه ؟

ليكوريكا يقول...

enjy يقول...

هى قلبت دراما ليه كدة بس؟؟؟؟؟؟
انت ضحكتنى قوى جدا خالص فى الاول وبعدين عكننتنى اوى جدا خالص فى الاخر
بس الخلاصة يعنى ان اسلوبك كالعادة شدنى لحد ما قريت اخر كلمة

----------------------------------

معلش بقي لو كانت البسمه راحت

بس اتمني فعلا يكون الاسلوب شدك وزهقتيش مننا في اخر البوست

مستني زيارتك دايما

ليكوريكا

ليكوريكا يقول...

imagine يقول...

سلام
الللللللللللله، البوست جميلة جدا جدا، هذه زيارتي الأولى للمدونة بتاعتك.أنا في الأول إفتكرت إن كل البوست كده،هزار فهزار بس في الآخر إتصدمت بصراحه، أسلوبك في الإنتقال حلو جدا ومفاجئ، حقا حقيقة مضحكة مبكية في ذات الوقت،ونرجو حقاً بأن أحوالنا تنصلح،،،خلليها على الله. فلنتوكل عليه.
أتمنى منك زيارة مدونتي أيضاً
إسراء
لبنان.

*---------------------*

يا هلا فيكي

بجد ببقي سعيد باخواننا من كل الدول العربيه

خصوصا ان البوست بالعاميه المصريه الشبابيه

واكيد في حاجات كتير ممكن يصعب فهمها

اكيد ليا زيارهخ لمدونتك

بس عذرا اليومين دول لو انا مقصر عشان كل يوم سفر

ربنا يوفق باذن الله

ليكوريكا

غير معرف يقول...

بيقولو هم يضحك و هم يبكي

بس أنتا جمعت الاتنين مع بعض يا دكتور

ضحكت شوية في الاول بس بعد كام سطر

كنت حعيط علش شباب و بنات بقوا كلهم

بايزين أدشنز أكيد فيه أسباب كتير و حجات كتير حولينا بتزقنا للهاوية

بس لو عايز تعمل حاجه مبتوديش في داهية لا للمعتقل و لا لاي داهية تانيه
هي التفاؤل الجهاد لعدم الاستسلام للاجباط

will يقول...

情趣用品,情趣,情色,成人,A片,自拍,情趣用品,情趣,色情,成人影片,色情影片,免費A片,情趣用品,情趣,成人網站,A片下載,日本AV,做愛,情趣用品,情趣,美女交友,A片,辣妹視訊,情色視訊,情趣用品,情趣,色情聊天室,聊天室,AV,成人電影,A片,情趣用品,情趣用品,情趣商品,情趣,情趣

情色,A片,AIO,AV,日本AV,色情A片,AV女優,A漫,免費A片,A片下載,情色A片,哈啦聊天室,UT聊天室,聊天室,豆豆聊天室,色情聊天室,尋夢園聊天室,080視訊聊天室,080聊天室,080苗栗人聊天室,免費視訊聊天,上班族聊天室,080中部人聊天室,視訊聊天室,視訊聊天,成人聊天室,一夜情聊天室,辣妹視訊,情色視訊,成人,成人影片,成人光碟,成人影城,自拍

情趣用品,A片,AIO,AV,AV女優,A漫,免費A片,日本AV,寄情築園小遊戲,情色貼圖,色情小說,情色文學,色情,色情遊戲,一葉情貼圖片區,色情網站,色情影片,微風成人, 嘟嘟成人網,成人,成人貼圖,18成人,成人影城,成人圖片,成人影片,UT聊天室,聊天室,豆豆聊天室,尋夢園聊天室,080聊天室,080苗栗人聊天室,080視訊聊天室,視訊聊天室

情趣用品,A片,aio,av,av女優,a漫,免費a片,aio交友愛情館,a片免費看,a片下載,本土自拍,自拍,愛情公寓,情色,情色貼圖,色情小說,情色文學,色情,寄情築園小遊戲,色情遊戲,嘟嘟情人色網,一葉情貼圖片區,色情影片,情色網,色情網站,微風成人,嘟嘟成人網,成人,18成人,成人影城,成人圖片,成人貼圖,成人圖片區,成人小說,成人電影

情趣用品,情趣,情趣商品,自拍,UT聊天室,聊天室,豆豆聊天室,哈啦聊天室,尋夢園聊天室,080聊天室,080苗栗人聊天室,H漫,A片,AV,AV女優,A漫,免費A片,愛情公寓,情色,情色貼圖,色情小說,情色小說,情色文學,色情,寄情築園小遊戲,色情遊戲,SEX,微風成人,嘟嘟成人網,成人,18成人,成人影城,成人圖片,成人貼圖,成人圖片區

情趣用品,情趣用品,情趣,情趣,情趣商品

مش مهم اللي فات - سيبوني احلم باللي جاي