التسميات

الأحد، ٣٠ مارس ٢٠٠٨

رغيف العيش




ازيكم يا جماعه

طبعا كلنا سمعنا عن مشكلة رغيف العيش في مصرنا الحبيبه

هوا حقيقي واحد من المشاكل المزمنه في ارض النيل

بس اصلنا كمصريين منقدرش نعيش من غير موضوع نقعد نتكلم فيه

شعب بيكررررررره الملل

وبيمووووووووت في الرغي

بس دمه زي السكر :)

اها بالمناسبه هوا كيلو السكر بقى بكام ؟

المهم عشان منخرجش عن بطل حلقة النهارده وهوا

رغـيـــف العـــــيــــــش

------------------------------
أولا رغيف العيش حبيب الشعب لأنه ارخص ما يباع في ارض النيل دلوقتي
المفروض انه بيتباع ب 5 قروش فقط لا غير
ده المفروض !

ثانيا رغيف العيش مش للبني آدمين وبس ، لا ده للفراخ والديوك والديوك الرومي
يعني صديق الانسان والحيوان على حد سواء!

ثالثا رغيف العيش اللي احنا مستهونين بيه ده هوا سبب اننا والحمد لله بنحب ماما امريكا ... لانه منن القمح اللي احنا لحد دلوقتي معندناش كفايه منه !

رابعا رغيف العيش مش بس مصدر دخل للفران وللي بيبيعوه لأول مره وتاني مره وتالت مره ، لا ده كمان مصدر دخل للحراميه اللي بيسترزقوا كويس اوي في طوابير العيش !

خامسا رغيف العيش علي الرغم من عمره الطويل علي ارض النيل ، الا انه مظهرتش عليه الشيخوخه لحد دلوقتي ، لا ده بالعكس ... لانه كل ميمر عليه الزمن (بيصغر :) )

دي كانت شوية معلومات صغننه عن رغيف العيش
وطبعا عشان انا عارف اني رغاي ولو دنتني اتكلم هيبقي مصيري زي أجدع مطرب في السيده وهتزقل بالطماطم
بالمناسبه قولتولي كيلو الطماطم بقي بكام ؟

دلوقتي هاخد رأي المهتمين بالموضوع من كبار الساسه والمثقفين في مصرنا الحبيبه

ايه رأيك في مشكلة العيش ؟

الفنان عماد بعرور مغني العب الشهير : والله احنا كان عندنا مشكله أكبر وهيا العنب ... وحليناها والحمد لله
اما بالنسبه لمشكلة العيش فقريب هنزل بأغنيه هتأكل الدنيا دي كلها

(العيش العيش العيش ... يا ناس ده غيره مفيش
هوا ايه ؟
ابيض
اسمر
فينو
بردّه
من غيره مش هنعيش ... هوا ايه ؟)

الحضري : والله يا جماعه العيش في بيت (أهلي) زي الفل وكتير ... بس قالولي ان العيش في سويسرا بيتاكل لواحده قلت اما نروح ونشوف .

فيفي عبده : والله انا عامله دايت وبقالي كتير مكلتش عيش ... بس عموما العيش مهم وعلي رأي المثل
(أكل العيش بيحب الهز)

حركة كفايه : كفايه بقي ... الحكومه واخده العيش بتاع الشعب ومقسماه لقم لقم ... وحاتطه (لقمه) فزور كل مواطن ... مش حرام كده ده حتي ممكن المواطنين يزوروا ... واحنا مش هنسكت ... في برنامجنا الانتخابي الجاي هندي ازازة ميه معدنيه جايه من امريكا لكل مواطن ، عشان يبلع !

نانسي عجرم : المصري طول عمره راجل جدع وشهم وابن حلال وبيعدي الأزمات
انا : طب ايه حل المشكله ياست نانسي
نانسي : ممكن ناكل شوكولاته ... ايه رايك ؟

الشيخ في صلاة الجمعه : يجوز اخراج زكاة الفطر من العيش !


شيرين : انا عندي ليك مفاجئه يا ليكو
ايه يا ست شيرين انتي كمان
شيرين : ايه رايك اغير اغنيتي بتاعت مشربتش من نيلها واعملها مكلتش من عيشها ؟

مكلتش من عيشها ؟
طب جربت حشيشها؟
جربت فعز الحر
تقف في طابور وانت مروشها

وهتاخد علي راسك
من اهلك من ناسك
وكمان جيبك يتنفض
مالجنيهات اللي محوشها

طب اقولك على حاجه
خزن عيش في التلاجه
وبلاش تقعد تتأمر
وكٌله مأمّر واحمد ربك

في غيرك مش طايل
اسكت عالحال المايل
وبلاش تصرخ تتبتر
كان غيرك اشطر ... خبي فقلبك

مكلتش من عيشها ؟
طب جربت حشيشها؟
جربت فعز الحر
تقف في طابور وانت مروشها

وهتاخد علي راسك
من اهلك من ناسك
وكمان جيبك يتنفض
مالجنيهات اللي محوشها

-------------------

ليكوريكا

ومازال البحث جاريا عن رغيف العيش

السبت، ٢٩ مارس ٢٠٠٨

البلوج خلف يا جماعه

بسم الله الرحمن الرحيم

لكل الي متابعينني في البلوج سواء اعرفهم او معرفهمش

لاني حسيت ان البلوج ملخبط هنا اوي

قررت اعمل كذا بلوج واحط في كل بلوج حاجه عشان متحصلش لخبطه وعشان اللي داخل عشان حاجه معينه يلاقيها

باذن الله البلوج هنا هيبقي فيه الموضوعات العامه والفضفضات العاديه

ولينكه هوا

http://lekorika.blogspot.com/

وبلوج

(مجرد مشاعر)

هيتحط فيه كل حاجه تصنف علي انها ادبيه

سواء قصص او شعر او رباعيات وغيره

وده مؤقتا لحد ميتعمل بلوج للرباعيات لما تخلص باذن الله

ولينكه

http://just-afeeling.blogspot.com/

اما البلوج التالت وهوا

(صيدلالالاه)

وهيبقي فيه كل حاجه متعلقه بكلية صيدله

مواضيع
مواقف
برامج
أخبار
حتي الاغاني هتبقي برضو عن صيدله

ولينكه

http://saydalala.blogspot.com/

واخر بلوج هوا

Lekorika game park

وهيبقي فيه أحدث الالعاب واشهرها

وفيه شات بوكس عشان طلبات الزوار

ولينكه

http://lekooo.blogspot.com/

باذن الله علي الاجازه او في اي وقت قريب هبقي فاضي فيه

هيتعمل بلوج خاص بالبرامج زي بلوج الألعاب

والتقسيم ده كان اقتراح واحد زميلي وبصراحه عجبني وقلت لازم انفذه في اقرب وقت

والحمد لله نفذته وربنا يقويني واقدر اكون عند حسن ظنكم

ليكوريكا

نجحححححت الحمد لله

من امام مبني المعامل بكليه الصيدله جامعة الزقازيق

ومن الكشوف المعلقه ... (عفوا اللي كانت متعلقه) ... علي معامل العضويه والتي تخص الفرقه التالته قديم

جاءنا البيان التالي

الطالب محمد نبيل محمد الدمرداش

الشهير بليكوريكا

وساعات بيقولوله ليكو وبيدلعوه بريكا

واللي كان فاقد الامل في كل المواد

والضفدعه بتاعته نامت بعد محقن الفار

واللي دخل للدكتور (السويدي) واتكلم معاه بالعربي

واللي دخل لدكتور (سامي خبره) وسأله وجاوب عليه وكمان نقصه خمسه وعشرين درجه (منتهى الكرم)

ناهيكم عن التخريف في الفيتو وصدمة الميديسنال وكارثة السيوتكس

يذكر ان هذا الطالب خرج من امتحان الميديسنال

وألف قصيدته الشهيره

(احنا كلاب)

وهو المؤسس الشرعي لجماعة كلابكو المتطرفه

كما ان له مؤلفات سياسيه اخري ك

(كل يوم بذاكر) تامر عاشور ...

حاسس اني متنشن (تامر حسني) ...

طول الليل الكيميا وانا (هيثم شاكر)

برغم كل هذا وبفضل الله وحده

جاءت الينا أنباء موثوق في مصدرها

بانه

نجججججججججججججججججججحححححححححححححححححححححححح

بفضل الله وحده

هذا وقد أعلن الطالب المذكور

بانه

(لن يعزم أحد علي الاطلاق)

لانه وعلى حد قوله

مفلللللللللللللللس!

وبيقول يعني الواحد يذاكر وينجح وكماااااااااان يعزم ؟

هذا وحين سألوه عن انتخابات المحليات القادمه وهل سيرشح نفسه للانتخابات بعد نجاحه الغير متوقع بالمره

رد قائلا : بالتأكيد سأرشح نفسي ... (دي -سبوبه - زي الفل) ... وقال انا السنادي مش هنزل بشعار الهلال والنجمه الذهبيه زي كل مره

انا هنزل بشعار هيكسر الدنيا

وحينما سألناه عن شعاره رد قائلا :

شعاري هيبقي (رغيييييييييييف العيش) ... وسلمولي عالقوات المسلحه :)

----------------------------------------

انا فرحان أوي يا بشر وآسف عالتأخير الطويل ده ، بس بجد كنت مخنوووووووووووق جدا والحمد لله عدت علي خير

عقبال الترم التاني وننجح كلنا وبتقديرات باذن الله

ليكوريكا :)

الأحد، ١٦ مارس ٢٠٠٨

انا مش محتاج حد




نفسي اغمض عيني واسرح لبعييييييييييييد
انسي كل شيء ... اي شيء
نفسي انام عشرين سنه ... احلم عشرين سنه ... افرح عشرين سنه
نفسي اصرخ ... وفنفس الوقت مش عاوز حد يسمعني
نفسي اعيط كتييييييييير علي كل حاجه راحت :(
بحلم انام واصحي ملاقيش حد في الدنيا دي غيري ... انا والشمس والبحر والنجوم ... وابني مملكه علي شكل قلب كبييير
لحد متيجي اميرته وتسكنه :(
لا لا مش هبني المملكه ومش هستني الاميره ومش هحلم بالمستحيل
كل اللي هحلم بيه اني الاقي حد انا مهم بالنسباله .. بيزعل علي زعلي وبيفرح علي فرحي ... حد ميهمهوش مصلحته قد منا اهمه ... حد يفهمني وعمره فيوم ميظلمني :(
وبرضو لأ ... مش عاوز الاقي حد ومش عاوز اعلق نفسي بحد مهماً كان ...
علي قد منا محتاج الناس كلها تبقي جنبي
علي قد اني مش محتاج حد :((


مش محتاج لحنان من حد
مش محتاج لايدين تتمد
تمسح دمعي وتوعد قلبي
ويجي يوم وتنسي الوعد

مش محتاج لدموع بتخفف
جرح وتجرح قلبي جراح
مش محتاج الخاين يحلف
مش محتاج حتي الأفراح

مش محتاج لصحاب خاينين
لما بعوزهم بشكي لمين ؟!
بشكي لنفسي عشان مش لاقي
حد بيمسح دمع العين

مش محتاج اغنيه حزينه
ابكي عليها ساعات وساعات
اصل كفايه اسمع قلبي
مهو بيغني يوماتي اهات

مش محتاج حلم جميل ...
بيه وعشانه بعيش ايامي
منا مش هقدر اشوفه بيبعد ..
عني وبيضيع من قدامي

مش محتاج لكلام بيريح ...
احكيه ليكو متسمعنويش
بعد حكايتي عنيكو بتفرح
ويموت قلبي ... وقلوبكو تعيش :(

مش محتاج حضن دافي
فيه تتطيب كل جراحي...
اصل الحضن ده ممكن يبقي
شوكه بتجرح قلبي وروحي


مش محتاج لحنان من حد
مش محتاج لايدين تتمد
تمسح دمعي وتوعد قلبي
ويجي يوم وتنسي الوعد

مش محتاج لدموع بتخفف
جرح وتجرح قلبي جراح
مش محتاج الخاين يحلف
مش محتاج حتي الأفراح

انا اصلي بخاف من فرحه
بعديها دموع واهات
دي عروسه ولابسه الطرحه
وقالولها عريسك مات

مش محتاج لحنان من حد
مش محتاج لايدين تتمد
تمسح دمعي وتوعد قلبي
ويجي يوم وتنسي الوعد

انا مش محتاج حد :(



السبت، ١٥ مارس ٢٠٠٨

شمس ولكنها مختلفه


الشمس كل صباح بتقتل ليل

بين السحاب ... تهرب تدوب وتميل

والحمره فوشها يعني الخجل

أما الغروب يعني وداع ورحيل !

من رباعيات ليكوريكا (الجزء الاول)

الجمعة، ١٤ مارس ٢٠٠٨

يمكن الحق همومي قبلكم



الناس بتجري ليه ورا همهم

لأ والعجيب اني بجري زيهم

شافتني بنت الجيران وقالت بتجري ليه ؟!

قلتلها يمكن ... ألحق همومي قبلهم !


دي كانت اول رباعيه اكتبها ...

من رباعيات ليكوريكا (الجزء الاول)

اليسا بتغنيلي !



كل اسبوع وانتو طيبين

النهارده صاحي رايق شويه وقلت اما ادخل انقل ليكم حالة الروقان اللي انا فيها

معرفش انا رايق ليه بصراحه علي الرغم من الكوابيس المتتتاليه عن النتيجه وخوفي وحالة الرعب والملل من الانتظار

بس اهو اديني رايق وخلاص ويارب حالة الروقان دي تدوم انشاله لحد آخر اليوم :)

المهم نبتدي البوست ...

--------------------------------------


واحنا فاواخر الشتا قبل اللي فات ، زي اليومين دول قبل ميبقي الحديد بالالوفات ، انا كنت لما بنزل الجامعه ... كنت بحضر محاضرات !

عادي جدا ان الواحد يروح الجامعه ... وعادي جدا انك تحضر سكاشن ... لكن مش من المسموح انك تحضر محاضرات ... محاضرات ايه يبني ... محنا كنا بنحضر زيك وبرضو شيلونا بدل الماده اتنين ... ولا انت ناسي الكيميتين ؟

-----------------------------

المهم نكمل مع اوسطى اليسا

وصحابي فاكرينني يا ناس دحيح وشاطر ... مع اني بحضر المحاضره ومش بذاكر ... ولحد آخر الليل انا عالنت ... قاعد بشارك فمنتديات !

يعني من الاخر الواحد محسود علي خيبته ... الناس دول يا اخي مبيسيبوش حد فحاله ... الرحمه يا بشر :((

---------------------------

وتواصل اليسا

عند النتيجه ناس كتير متجمعين ، وناس حزينه وناس يا ناس فرحانين ، وانا ماشي بتلفت وبسال اللي اشوفه ... نجحت ولا شيلوك مادتين ؟

عندنا في الكليه مقاييس غريبه ، لا حضور المحاضرات ولا الكورسات ولا المذاكره مقياس انك تنجح في ماده او لأ ... عشان تنجح في الكليه دي انت محتاج حاجه من اتنين (حظ فظيع شنيع مريع) ، لاما تتحول لآله من البيت للسكشن ومن السكشن للبيت وساعتها هتخسر حاجات كتير عمر التقدير مهيعوضك عنها .....

----------------------------

كملي يا اليسا يا اختي ... محدش واخد منها حاجه

خد بالك عليا ، دي مش معامله تعاملني بيها ... وابقي افتكر ليا ... ايام كتيره عزمتك فيها

ياريتك كنت تعزمني ومتستخصرش ... ده الواحد بطنه بتصوصو ومبيقولش ... الواحد قد مبيصبر ويتحمل ... اول مبيفكر ياكل مبيستأذنش ... آآآه

بقالي كتير وبحكم الارتباطات الكتير اوي اللي دخلت نفسي فيها ويارب اطلع منها علي خير بقي ، بقيت باكل بره البيت اكتر من جوا البيت ... وكتير بعزم زمايلي ... وعشان كده اليسا غنت على لساني الاغنيه دي لكل صحابي ... وخصوصا يسري وصلصه :)

------------------------------

وتواصل اليسا العزف علي اوتار مشاعري

اديك عرفت اللي مكنتش عاوزه انك تعرفه ... اللي بقاله كتير فقلبي محيره ومخوفه

من كتر حبي فيك خلاص انا قربت اكرهك ،عشان مش عارف اكتر من اللي عملته اعمل ايه ،

مش بس عيني وروحي كل مافيا بيندهك ، كل القلوب سمعتني ... (طب انت اطرش ليه) ؟

اهداء لأم ندى لما ابقي احبها حب من طرف واحد بجي :)

-------------------------------

كملي يا اليسا هانم

ياعالم بكره يا حبيبي ... هيغلى ايه ؟

ده الهوا من بكره يا حبيبي ... راح تشتريه !

دي الحاجه الي كانت بجنيه ... بقت ايوه بعشره جنيه وبكره تبقي بعشرين!
والعيش من بكره هغليه ... اكتر ماللي بتحلم بيه وكمان هيصغر مرتين !

تيرارارا

يانعيش مع بعض حبيبي ... لتموت انت لوحدك

هفضل على طول يا حبيبي ... زي الهم فقلبك

(الحكومه حينما ناقشت معي مشكلة ارتفاع الاسعار ! )

--------------------------------------

بعيد او جمبي انا (فاكراك) ... ولو انت فين انا (شايفاك) ... وانا لو مع مين ... يا حبيبي ... بقلبي (معاك )!

شفتو امريكا بتحبنا قد ايه ؟

يوووه ... اقصد اليسا بتحبكم قد ايه ؟!
--------------------------------------

مش كتير عليك ، لو اعيش سنين يا حبيبي ليك ، دنا حلم عمري لقيته فيك ، وهلاقي فين زيك حبيب ؟

اهداء الي التوك توك (الحل العبقري لكل مشاكل المرور المصريه ) !

---------------------------------------

نسيب اليسا بقي يا جماعه عشان هيا راحت تستريح شويه في غرف خلع الملابس اللي هيا كانت خالعاها اساسا ... ونعود الي مطرب الزمن الجميل (مدحت صالح)

قلب واحد مش كفايه لكرهي ليك ... دنتا محتاج الف قلب يسبوا فيك

قلب يكره بس صوتك

قلب يلعن فيك سكوتك

و قلب يتحسين عليك !

شوفوا بقي انتو اي حد تحبوا تهدوله الاغنيه دي ... واهدوهاله ... لان للأسف الظلم كتير اليومين دول !

----------------------------

ربنا يهديكي يا نانسي وتفهمي الدنيا صح

(الدنيا وحشه يا نانسي)

(الدنيا وحشه يا نانسي)

(الدنيا وحشه يا نانسي)

الدنيا وحشه واحلى سنين ... بنعشها واحنا مغفلين
وقفانا يورم جايز نحرم ... نكون ساعات عاقلين

اهبل!

اهداء لينا ...

--------------------------

يللا بقي كفايه كده دلوكيت ... اشوفكم علي خير

واسالكم الدعاء

ليكوريكا ...

الاثنين، ١٠ مارس ٢٠٠٨

سطور لا تعرف الفرح


يا سطر مايل والحروف مَـلّـتك

كاره كلامي ... قوللي ايه حجتك ؟

دنا كل مكتب كلمه فيها الفرحه

بتقوللي شيل ... الفرحه من كلمتك ؟!؟


من رباعيات ليكوريكا ج1

الجمعة، ٧ مارس ٢٠٠٨

منتهى الكرم




هل لديك طيور في سطح منزلك ؟

اكرر ...

بتربو فراخ علي سطوح بيتكم ؟

نقول كمان ...

العشه اللي فوق دواركم فيها فراخ ؟

ايه يا بني آدم ... مترد عليا ...

اممممممممممممممممم

تكونش خايف اكون من وزارة الصحه وجاي عشان انفلوانزا الطيور؟

لا لا انا ليكوريكا ... واحد كده لسه في تالته صيدله ... اعذب ويعول ... ولن يشارك في الاساس

وجاي اسألك كام سؤال كده عمالين يتفططوا جوا راسي ...

ها اتطمنت ولا لسه ؟

تحب اجيبلك شهادة معاملة العيال بتاعتي ؟

تويب طالما انت اتطمنت بقي ... قولي يا سيدي ... الفراخ اللي فوق سطوح دواركم فيهم ديوك ؟

ايون ديوك من اللي بتقول كوكو كوكو في الفجر دي ؟

مش عارف انت مستغرب ليه ... حاسس اني بكلمك يوغوسلافي ... خليك مصحصح كده وجاوب وانت ساكت ...

المهم يا سيدي الديوك دي ايه اخبار علاقتها مع المزز ؟

يعني مثلا الديك ابو شعر كنيش والديك اللي بيحط جيل علي دماغه والديك العجوز اللي بيصبغ شعره مين اللي موقف فيهم المزز علي رجل ؟

بتقول الديك ابو شعر كنيش هوا اللي مسيطر عالعشه والعشش المجاوره ؟

طب ايه رد فعل الديوك الاخري ... ؟

عارف ان الاسئله غريبه بس جاوب بس وهجيبلك مصاصه في آخر اللقاء ...

وبعد ابتسامه عريضه قاللي :

الديك من دول يقف بعيد ويصرخ بعلو صوته ... كوكو كوكو كوكو ... لكن علي مين ... هما يقولوا كوكو كوكو من هنا والديك ابو شعر كنيش شغال تظبيط من هنا ... حقه ياعم ... يعني هيا كوكو كوكو بتاعتهم دي يعني هتعمله ايه ... مهو لو كل ديك منهم مسكه واداله ضربه فراسه بمنقاره كان قال ان الله حق ... وساب لكل واحد كام فرخه يمشي بيهم حاله :))

امممممممممم ... تشكر يا عمونا ... وآدي المصاصه اللي وعدتك بيها ...

المهم خرجت من عند آخينا وقلت اطلع اعاين العشه بنفسي ... اشوف الديك المفتري ده ...

ووانا طالع عالسلم بقي الاقيلكم خناقه لرب السما بين راجل ومراته ...

معلش يا جماعه انا عارف ان البيوت اسرار بس لازم احكيلكم عليها عشان نتعظ ونعرف ان الجواز هيا الغلطه الوحيده اللي الراجل بيدنه يدفع تمنها لحد ميموت ...

الراجل صوته كان مودي لاخر العماره والعمارات المجاوره ... واليكم نص الخناقه :

الراجل : جرا ايه يا هانم ... ميت مره اقولك متاخديش فلوس من جيبي من غير متقوليلي
مراته : صمت تام ...
الراجل : مبترديش ليه هوا انا بكلم الحيطه ؟
مراته : لا تزال صامته :)
الراجل : متجننينيش وردي عليا ، خدتي الفلوس ليه من جيبي
مراته : واضح انها بتلعب يوجا في القوضه وقفلت علي نفسها بالمفتاح ...
الراجل : لقيته طالع من باب البيت وعفاريت الدنيا بتتنطط قدامه ...

وآدي جزاة اللي يحط فلوس فجيبه !

المهم طلعت العشه ونزلت وقلت اما اروح بقي واقعدلي شوية نت

فتحت الكمبيوتر واديتها مواقع وبلوجات ومنتديات

الكل بيتكلم عن الرسوم المسيئه ، الكل بيقول الا رسول الله ، الكل بيصرخ بعلو صوته زيه زيه الديوك وزي الراجل اللي مراته حكماه بالظبط

حاجه غريبه فعلا ، احنا فعصر عجيب بجد ... فعصر من حقك تكوكو زي متحب ولو حبيت تكوكو حتي في التيليفزيون فده حقك ودي حريتك

من حقك انك تاخد علي دماغك ... وبرضو من حقك تقول أي وكمان تبوس الواوا

من حقك تشجب وتدين ومن حقك تعمل مظاهره ... ومن حقهم يسمعوا وينفضوا

زمان كان الوضع غير كده ... مكنش في فضائيات نصوت فيها ... ومكنش في زوم ومزيكا عشان نعمل الضمير العربي ... ومكنش في صحف قوميه ومعارضه بعدد شعر راس الديوك حبايبنا ... مكنش في كل ده

زمان كانت صرختنا مكتومه جوانا ، كانت دموعنا بتدبحنا قبل متنزل ، وعشان كده كنا بنقدر نثور وكنا بنقدر نحارب وكنا بنقدر نقف قدام اي ظلم ، لاننا مش قادرين نستحمل صوت الصراخ اللي جوانا ، مش قادرين نكوكو زي اليومين دول .

هوا ده وضعنا دلوقتي ، اساءه لاغلى حاجه عندنا ... واحنا نقول لا ... ونصرخ ... ونعمل مظاهرات ... ونستريح ... وبعدين ننتشتم تاني ... ونصرخ ... ونعمل مظاهرات ... ونستريح !

هوا ده وضغنا دلوقتي ، احنا حاكمين بيوتنا زي الراجل اللي فوق ، بنزعق وبنثور ... لكن عدونا ودن من طين وودن من عجين ... وعمال يلعب يوجا في قواعده العسكريه في ارضنا !

دلوقتي اعدائنا بيقولولنا

احنا بنهينكم ، احنا بنكرهكم ، وبنكره نبيكم ، وبنكره دينكم ، وبنكره اخلاقكم

احنا محتلينكم ... وبنقتل اولادكم ... وبنسرق ارضكم

عاوزينكم تضعفوا ، عاوزينكم تقتلوا فبعض ، عاوزينكم وعاوزينكم وعاوزينكم ...

بس ده كله مع العلم انكم تقدروا تكرهونا ... وتقدروا تدينونا ... وتقدروا تصرخوا وتصوتوا وتولولوا وتعملوا مظاهرات واغاني وتقاطعونا كام شهر وترجعوا تشتروا حاجاتنا تاني ، وتبيعولنا بترولكم وكمان نديكم معونه !

اعدائنا اليومين دول سبور علي الاخر ... عارفين ان ادوية الاكتئاب غاليه فمش مخليين حد فنفسه حاجه ... اللي عاوز يقول حاجه بيقولها طالما ده هيريحه ويبعد عنه الاكتئاب الوحش :(

هما دول اعدائنا ... وهيا دي خيبتنا ... من حقنا نتضرب علي قفانا ... وكمان نقول أي ... منتهى الكرم :(



الأربعاء، ٥ مارس ٢٠٠٨

يرحلون من اجل الحياه

مقدرتش اغيب اكتر من كده وحسيت اني محتاج اكتب القصه دي اوي ، سبب القصه دي اني بقالي فتره ادخل كذا موقع والاقيه اتحول سرادق عزا ... ومثال على كده
http://shikoonline.blogspot.com/
ودخلت بلوج بالصدفه واكتشفت انه بلوج حد اعرفه ومعانا في الجامعه وبرضو كان في حالتين وفاه واحده كان اخو صاحبة البلوج والتانيه صديقتها
ومش ده اللي خلاني اخرج عن صمتي واقرر اكتب ، لكن كان السبب الرئيسي اني حلمت على غير عادتي ...
وعشان كده حسيت اني لازم اكتب ، ويمكن دي اول قصه ليا بعد صيام من
6/6/2007
القصه عنوانها :


يرحلون من اجل الحياه




طفله بلا ملامح ... ربما تشبهني وربما اشبهها ... ربما تعرفني وربما لا ...
احبها ... نعم احبها ... وكم تمنيت ان أراها قبل ان ترحل ... وكم تمنيت ان ارحل كي أراها ...

ولكن لماذا جاءتني اليوم في حلمي ... وانا لا اجيد احلام النيام ؟
ولماذا هى ، وهي بالذات وفي هذا التوقيت ؟

هل جاءت لتذكرني بحقيقة دنيانا الوحيده ؟ ، ام جاءت لتخبرني انها تعرفني ؟ ، ام هو مجرد حلم خالي من التفسيرات ... كمعظم الاحلام التي لا احبها ولا حتى هي تحبني ؟

جبلٌ رمادي اللون ، في بلاد بعيده ، يظل صامت سنوات وسنوات ، لا يتكلم الا بهزات ارضيه عنيفه تنذر كل من حوله بان الصمت لن يطول ، وانه سوف يقول كل ما بداخله مره واحده ، وما بداخله ليس مجرد كلمات ، انها حمم بركانيه حمراء ساخنه ، كدمائنا التى تجري فينا ، هي الغضب الذي تحمله الارض لكل من عليها ، هي ثورة الصمت او لنقول هي صمتنا الثائر في اعيننا ... فلا نحن نطقناه ، ولا هو ظل صامتا كما عهدناه ...
تخرج الحمم في عنف وتزحف علي الاراضي الاخضر منها واليابس ، تزيل كل ما عليها وتبقى هي ، تزيل الكراهيه والحب على حد سواء ... تزيل الهموم والسعاده في وقت واحد ...
انها لحظة سكون لا تملك الا ان تسكت فيها ... لحظه تُمحى فيها الحياه ... !

ولكن ماذا بعد كل هذا ؟
يعود الصمت الى المكان والارض ليست كما هي ... فقد عادت الي البدايه ... عادت كما خلقت اول مره ، عادت لتبدأ الحياه ... عادت الي الحياه ... !
البركان جعلها من اخصب الاراضي وترك لها ارثا ثمينا من العناصر والمركبات تتمناه كل الاراضي الاخري ، فالحمم البركانيه قتلتها لتحييها ... فالموت فيها هو سر الحياه !

ومن الصمت السائد في ارضي الوليده الي صخب وصراخ ، الي لهفه وترقب ، الي امل نتمنى ان يولد وننتظر ان نعانقه كما نعانق من نلقاهم بعد طول غياب ...
رجل عهدناه ان يلبس بالطو ابيض ويتمتع ببرود قطبي لا مثيل له في ارضنا العربيه الدافئه ، يخرج ويضع لنا معادله رياضيه رغم انه لا يجيد الرياضه ولا يعرف عنها الا القليل ...
معادله طرفيها متساويين ولكنهما متضادين تمام التضاد ، يخيرنا بين الموت والحياه ... او بمعني ادق ... جعل الموت شرطا للحياه !
فهو يخيرينا بين الام ووليدها ... حلمها الذي لم تراه ... يخيرينا بين المستقبل والحاضر ... يقتل الامل ليبقي علي غيره ... انه يقول ان
(الموت هو شرط الحياه) !

وبعد ان يسود صمت آخر ... نعود ولكننا الان علي جبهه من نار ... نار تحرق كل شيء ... مدافع موجهه نحو الموت ... وطائرات اقلعت من اجل الموت ... شباب يخرجون من ديارهم ... يودعون احلامهم من اجل احلام الاخرين ، حرب لا تتوقف ... من اجل الحريه ، من اجل الحق ، من اجل الكرامه ... حرب الموت فيها ليس ببعيد ... ولكنه موت من أجل الحياه !

اما عن طفلتي ... فهي نهى ... اختى التى لم اراها ... ولم اعانقها واعاندها ... ولم اعلم عنها شيء سوى انها من اهم اسباب وجودي ... لقد رحلت قبل ان اولد ... رحلت بعد حياه لم تستمر أكتر من اسبوع ... رحلت لتترك الدنيا لطفل آخر ، لو لم ترحل لكانت فرص وجوده في هذه الحياه ضئيله او شبه معدومه ...
رحلت ككل من رحلوا ... لنتذكرهم ... لنحزن علي فراقهم ونتمني ان نكون جوارهم ، رحلت كمعظم من يرحلون ويتركوننا ، لنشعر بالوحده من بعدهم ونتألم بدونهم ... يرحلون ليذكروننا باننا سنرحل الي حيث لا نعلم ... وحيث كانوا لا يعلمون !

رحلت وتركت ابتسامه على وجهها فهي في الجنه حيث الهدوء والامان ، حيث تستقر احلامنا حينما نمل من الدنيا وما فيها ، هي في الجنه حيث نتمنى ان نكون !

هي ككل من رحلوا ... حمم بركانيه تتركنا اكثر نقاءا وصلابه ... تتركنا وحدنا بلا حياه ... تتركنا من اجل الحياه !
هي ككل من رحلوا ... يذكرونا باننا داخل دائره مغلقه ... معادله محسوبه ... طرفها الايمن هو الموت ... وطرفها الايسر هو الحياه !
هي ككل من رحلوا ... يرحلون من اجل استمرار الوجود ... يحاربون من اجل الموت ... ويرحلون من أجل الحياه !


بقلم : محمد نبيل الدمرداش .

مش مهم اللي فات - سيبوني احلم باللي جاي