التسميات

الأحد، 30 مارس، 2008

رغيف العيش




ازيكم يا جماعه

طبعا كلنا سمعنا عن مشكلة رغيف العيش في مصرنا الحبيبه

هوا حقيقي واحد من المشاكل المزمنه في ارض النيل

بس اصلنا كمصريين منقدرش نعيش من غير موضوع نقعد نتكلم فيه

شعب بيكررررررره الملل

وبيمووووووووت في الرغي

بس دمه زي السكر :)

اها بالمناسبه هوا كيلو السكر بقى بكام ؟

المهم عشان منخرجش عن بطل حلقة النهارده وهوا

رغـيـــف العـــــيــــــش

------------------------------
أولا رغيف العيش حبيب الشعب لأنه ارخص ما يباع في ارض النيل دلوقتي
المفروض انه بيتباع ب 5 قروش فقط لا غير
ده المفروض !

ثانيا رغيف العيش مش للبني آدمين وبس ، لا ده للفراخ والديوك والديوك الرومي
يعني صديق الانسان والحيوان على حد سواء!

ثالثا رغيف العيش اللي احنا مستهونين بيه ده هوا سبب اننا والحمد لله بنحب ماما امريكا ... لانه منن القمح اللي احنا لحد دلوقتي معندناش كفايه منه !

رابعا رغيف العيش مش بس مصدر دخل للفران وللي بيبيعوه لأول مره وتاني مره وتالت مره ، لا ده كمان مصدر دخل للحراميه اللي بيسترزقوا كويس اوي في طوابير العيش !

خامسا رغيف العيش علي الرغم من عمره الطويل علي ارض النيل ، الا انه مظهرتش عليه الشيخوخه لحد دلوقتي ، لا ده بالعكس ... لانه كل ميمر عليه الزمن (بيصغر :) )

دي كانت شوية معلومات صغننه عن رغيف العيش
وطبعا عشان انا عارف اني رغاي ولو دنتني اتكلم هيبقي مصيري زي أجدع مطرب في السيده وهتزقل بالطماطم
بالمناسبه قولتولي كيلو الطماطم بقي بكام ؟

دلوقتي هاخد رأي المهتمين بالموضوع من كبار الساسه والمثقفين في مصرنا الحبيبه

ايه رأيك في مشكلة العيش ؟

الفنان عماد بعرور مغني العب الشهير : والله احنا كان عندنا مشكله أكبر وهيا العنب ... وحليناها والحمد لله
اما بالنسبه لمشكلة العيش فقريب هنزل بأغنيه هتأكل الدنيا دي كلها

(العيش العيش العيش ... يا ناس ده غيره مفيش
هوا ايه ؟
ابيض
اسمر
فينو
بردّه
من غيره مش هنعيش ... هوا ايه ؟)

الحضري : والله يا جماعه العيش في بيت (أهلي) زي الفل وكتير ... بس قالولي ان العيش في سويسرا بيتاكل لواحده قلت اما نروح ونشوف .

فيفي عبده : والله انا عامله دايت وبقالي كتير مكلتش عيش ... بس عموما العيش مهم وعلي رأي المثل
(أكل العيش بيحب الهز)

حركة كفايه : كفايه بقي ... الحكومه واخده العيش بتاع الشعب ومقسماه لقم لقم ... وحاتطه (لقمه) فزور كل مواطن ... مش حرام كده ده حتي ممكن المواطنين يزوروا ... واحنا مش هنسكت ... في برنامجنا الانتخابي الجاي هندي ازازة ميه معدنيه جايه من امريكا لكل مواطن ، عشان يبلع !

نانسي عجرم : المصري طول عمره راجل جدع وشهم وابن حلال وبيعدي الأزمات
انا : طب ايه حل المشكله ياست نانسي
نانسي : ممكن ناكل شوكولاته ... ايه رايك ؟

الشيخ في صلاة الجمعه : يجوز اخراج زكاة الفطر من العيش !


شيرين : انا عندي ليك مفاجئه يا ليكو
ايه يا ست شيرين انتي كمان
شيرين : ايه رايك اغير اغنيتي بتاعت مشربتش من نيلها واعملها مكلتش من عيشها ؟

مكلتش من عيشها ؟
طب جربت حشيشها؟
جربت فعز الحر
تقف في طابور وانت مروشها

وهتاخد علي راسك
من اهلك من ناسك
وكمان جيبك يتنفض
مالجنيهات اللي محوشها

طب اقولك على حاجه
خزن عيش في التلاجه
وبلاش تقعد تتأمر
وكٌله مأمّر واحمد ربك

في غيرك مش طايل
اسكت عالحال المايل
وبلاش تصرخ تتبتر
كان غيرك اشطر ... خبي فقلبك

مكلتش من عيشها ؟
طب جربت حشيشها؟
جربت فعز الحر
تقف في طابور وانت مروشها

وهتاخد علي راسك
من اهلك من ناسك
وكمان جيبك يتنفض
مالجنيهات اللي محوشها

-------------------

ليكوريكا

ومازال البحث جاريا عن رغيف العيش

هناك 12 تعليقًا:

لست أدرى يقول...

جيت على الجرح يا نبيل والله
انا عملت موضوع فى مدونتى عنه بس النت فصل قبل ماعمل نشر
بس هقولك معلومه خاصه
احنا من الناس اللى فضلت الاسبوع اللى فات كله مش عندنا عيش
ولا حتى الرغيف ابو 30 قرش لاقيناه
تخيل انت بقى

ليكوريكا يقول...

لا الحمد لله احنا عندنا العيش كتير

وبعدين العيش مش مشكله يا ايوان

كلوا شكوكولاته :)

no4denmark يقول...

احنا عاملين مشكله ليه
ما نقضيها ارز زى الصين
واحنا اساسا اكبر دوله مصدره للأرز فى العالم
.. سهلة خالص يعنى
الحل اننا نغير عادات شعب ياحاج
صدقنى اسهل من اننا نطالب الحكومه بحل مشكلة العيش :))

ليكوريكا يقول...

هوا كيلو الرز بكام يا ناو ناو
:)

والاطفال الصغيره والناس الكبار

هياكلوا برضو رز

طب والفراخ والديوك ؟؟؟؟؟؟

no4denmark يقول...
أزال المؤلف هذا التعليق.
no4denmark يقول...

ياحاج نبيل انت ليه مصر على المواجهه :)

ما بقولك من الأخر نغير عادات الشعب
اطفال صغيره وناس كبار
الصين مليار ونص وما بتاكلش عيش
هو ده الحل العملى
وكفى الله المؤمنين شر القتال

sara يقول...

العيش مشكلة الكل بس احنا هنا في المغرب مش بناكل عيش احنا كل واحد بيخبز الخبز في بيته تقريبا

بس تعرف يا حج ان الي قالته نانسي فكرة كويس الشكولا كمان حل وانا معاها :D

ولا الواحد يغير وياكل ارز زي مقال نو

ليكوريكا يقول...

وماله شوكولاته شوكولاته يا ساره

فين بونتو تيجي تشبط في الموضوع ده

منوراني كالعاده يا ساره

اوعي تزهقي مننا :)

smska يقول...

ههههههههههههه .. حلوة اوي الاغنية .
انت تاعب اعصابك ليه ؟؟
وهو مفيش غير العيش في مصر ؟؟
وبعدين لو الناس اتمسكت بدينها كويس
أكيد ربنا هيفك ضيقتها
..:)))))

غير معرف يقول...

تي زمان على امتي يحبون خمس و ينسون خمس.......
يحبون الدنيا و ينسون الآخره
يحبون المال و ينسون الحساب
يحبون المخلوق و ينسون الخالقيحبون القصور و ينسون القبور
يحبون المعصيه و ينسون التوبه
فإن كان الامر كذلك ابتلاهم الله
بالغلاء و الوباء والموت فجأه و جور الحكام

ليكوريكا يقول...

Anonymous smska said...

ههههههههههههه .. حلوة اوي الاغنية .
انت تاعب اعصابك ليه ؟؟
وهو مفيش غير العيش في مصر ؟؟
وبعدين لو الناس اتمسكت بدينها كويس
أكيد ربنا هيفك ضيقتها
..:)))))

--------------------------------

منوره يا ساره كالعاده
بس العيش ارخص حاجه فمصر
وعشان كده الازمه كبيره لان ده قوت الفقرا

وفعلا لو كل الناس اتقت ربنا

كل المشاكل هتتحل باذن الله

منوره مره تانيه :)

ليكوريكا يقول...

Delete
Anonymous Anonymous said...

تي زمان على امتي يحبون خمس و ينسون خمس.......
يحبون الدنيا و ينسون الآخره
يحبون المال و ينسون الحساب
يحبون المخلوق و ينسون الخالقيحبون القصور و ينسون القبور
يحبون المعصيه و ينسون التوبه
فإن كان الامر كذلك ابتلاهم الله
بالغلاء و الوباء والموت فجأه و جور الحكام

-------------------------

وكل ده والحمد لله حصل

ربنا يرحمنا برحمته

----------------


شكرا ايها الانونيموس على ردك الجميل :)

مش مهم اللي فات - سيبوني احلم باللي جاي