التسميات

الجمعة، 7 مارس، 2008

منتهى الكرم




هل لديك طيور في سطح منزلك ؟

اكرر ...

بتربو فراخ علي سطوح بيتكم ؟

نقول كمان ...

العشه اللي فوق دواركم فيها فراخ ؟

ايه يا بني آدم ... مترد عليا ...

اممممممممممممممممم

تكونش خايف اكون من وزارة الصحه وجاي عشان انفلوانزا الطيور؟

لا لا انا ليكوريكا ... واحد كده لسه في تالته صيدله ... اعذب ويعول ... ولن يشارك في الاساس

وجاي اسألك كام سؤال كده عمالين يتفططوا جوا راسي ...

ها اتطمنت ولا لسه ؟

تحب اجيبلك شهادة معاملة العيال بتاعتي ؟

تويب طالما انت اتطمنت بقي ... قولي يا سيدي ... الفراخ اللي فوق سطوح دواركم فيهم ديوك ؟

ايون ديوك من اللي بتقول كوكو كوكو في الفجر دي ؟

مش عارف انت مستغرب ليه ... حاسس اني بكلمك يوغوسلافي ... خليك مصحصح كده وجاوب وانت ساكت ...

المهم يا سيدي الديوك دي ايه اخبار علاقتها مع المزز ؟

يعني مثلا الديك ابو شعر كنيش والديك اللي بيحط جيل علي دماغه والديك العجوز اللي بيصبغ شعره مين اللي موقف فيهم المزز علي رجل ؟

بتقول الديك ابو شعر كنيش هوا اللي مسيطر عالعشه والعشش المجاوره ؟

طب ايه رد فعل الديوك الاخري ... ؟

عارف ان الاسئله غريبه بس جاوب بس وهجيبلك مصاصه في آخر اللقاء ...

وبعد ابتسامه عريضه قاللي :

الديك من دول يقف بعيد ويصرخ بعلو صوته ... كوكو كوكو كوكو ... لكن علي مين ... هما يقولوا كوكو كوكو من هنا والديك ابو شعر كنيش شغال تظبيط من هنا ... حقه ياعم ... يعني هيا كوكو كوكو بتاعتهم دي يعني هتعمله ايه ... مهو لو كل ديك منهم مسكه واداله ضربه فراسه بمنقاره كان قال ان الله حق ... وساب لكل واحد كام فرخه يمشي بيهم حاله :))

امممممممممم ... تشكر يا عمونا ... وآدي المصاصه اللي وعدتك بيها ...

المهم خرجت من عند آخينا وقلت اطلع اعاين العشه بنفسي ... اشوف الديك المفتري ده ...

ووانا طالع عالسلم بقي الاقيلكم خناقه لرب السما بين راجل ومراته ...

معلش يا جماعه انا عارف ان البيوت اسرار بس لازم احكيلكم عليها عشان نتعظ ونعرف ان الجواز هيا الغلطه الوحيده اللي الراجل بيدنه يدفع تمنها لحد ميموت ...

الراجل صوته كان مودي لاخر العماره والعمارات المجاوره ... واليكم نص الخناقه :

الراجل : جرا ايه يا هانم ... ميت مره اقولك متاخديش فلوس من جيبي من غير متقوليلي
مراته : صمت تام ...
الراجل : مبترديش ليه هوا انا بكلم الحيطه ؟
مراته : لا تزال صامته :)
الراجل : متجننينيش وردي عليا ، خدتي الفلوس ليه من جيبي
مراته : واضح انها بتلعب يوجا في القوضه وقفلت علي نفسها بالمفتاح ...
الراجل : لقيته طالع من باب البيت وعفاريت الدنيا بتتنطط قدامه ...

وآدي جزاة اللي يحط فلوس فجيبه !

المهم طلعت العشه ونزلت وقلت اما اروح بقي واقعدلي شوية نت

فتحت الكمبيوتر واديتها مواقع وبلوجات ومنتديات

الكل بيتكلم عن الرسوم المسيئه ، الكل بيقول الا رسول الله ، الكل بيصرخ بعلو صوته زيه زيه الديوك وزي الراجل اللي مراته حكماه بالظبط

حاجه غريبه فعلا ، احنا فعصر عجيب بجد ... فعصر من حقك تكوكو زي متحب ولو حبيت تكوكو حتي في التيليفزيون فده حقك ودي حريتك

من حقك انك تاخد علي دماغك ... وبرضو من حقك تقول أي وكمان تبوس الواوا

من حقك تشجب وتدين ومن حقك تعمل مظاهره ... ومن حقهم يسمعوا وينفضوا

زمان كان الوضع غير كده ... مكنش في فضائيات نصوت فيها ... ومكنش في زوم ومزيكا عشان نعمل الضمير العربي ... ومكنش في صحف قوميه ومعارضه بعدد شعر راس الديوك حبايبنا ... مكنش في كل ده

زمان كانت صرختنا مكتومه جوانا ، كانت دموعنا بتدبحنا قبل متنزل ، وعشان كده كنا بنقدر نثور وكنا بنقدر نحارب وكنا بنقدر نقف قدام اي ظلم ، لاننا مش قادرين نستحمل صوت الصراخ اللي جوانا ، مش قادرين نكوكو زي اليومين دول .

هوا ده وضعنا دلوقتي ، اساءه لاغلى حاجه عندنا ... واحنا نقول لا ... ونصرخ ... ونعمل مظاهرات ... ونستريح ... وبعدين ننتشتم تاني ... ونصرخ ... ونعمل مظاهرات ... ونستريح !

هوا ده وضغنا دلوقتي ، احنا حاكمين بيوتنا زي الراجل اللي فوق ، بنزعق وبنثور ... لكن عدونا ودن من طين وودن من عجين ... وعمال يلعب يوجا في قواعده العسكريه في ارضنا !

دلوقتي اعدائنا بيقولولنا

احنا بنهينكم ، احنا بنكرهكم ، وبنكره نبيكم ، وبنكره دينكم ، وبنكره اخلاقكم

احنا محتلينكم ... وبنقتل اولادكم ... وبنسرق ارضكم

عاوزينكم تضعفوا ، عاوزينكم تقتلوا فبعض ، عاوزينكم وعاوزينكم وعاوزينكم ...

بس ده كله مع العلم انكم تقدروا تكرهونا ... وتقدروا تدينونا ... وتقدروا تصرخوا وتصوتوا وتولولوا وتعملوا مظاهرات واغاني وتقاطعونا كام شهر وترجعوا تشتروا حاجاتنا تاني ، وتبيعولنا بترولكم وكمان نديكم معونه !

اعدائنا اليومين دول سبور علي الاخر ... عارفين ان ادوية الاكتئاب غاليه فمش مخليين حد فنفسه حاجه ... اللي عاوز يقول حاجه بيقولها طالما ده هيريحه ويبعد عنه الاكتئاب الوحش :(

هما دول اعدائنا ... وهيا دي خيبتنا ... من حقنا نتضرب علي قفانا ... وكمان نقول أي ... منتهى الكرم :(



هناك 4 تعليقات:

غير معرف يقول...

ايه الحل فرأيك ؟

ليكوريكا يقول...

الحل انا قلته للديوك فوق

لو كان كل واحد منهم نقر الديك الكبير نقره ... كان عرف ان الله حق

انا مش عاوز الناس تصرخ عشان تستريح

ومش عاوز نشجب وندين عشان منظرنا قدام العالم

عاوز الناس كلها تعرف ان ربنا كده عمره مهيرضى عننا

عمره مهينصرنا

عمره مهيساعدنا

الحل اننا نعرف قد ايه قدر الاهانه ، ونعرف ان رد فعلنا ميبقاش مجرد صراخ وعويل مينفعش غير للستات وبس ، لان صراخنا ده بيقويهم وبيديهم الحق يهينونا كمان وكمان

لست أدرى يقول...

ممكن تقولى يا نبيل ايه الفرق بينا وبين الديوك دى ؟؟؟؟؟؟؟؟انت زيهم واحنا زيهم , ولا ايه؟ استفدنا ايه لما اتكلمنا ؟ وانت غيرت ايه لما اتكلمت ؟؟؟؟كله كلااااااااااااااام

ليكوريكا يقول...

ممكن تقولى يا نبيل ايه الفرق بينا وبين الديوك دى ؟؟؟؟؟؟؟؟انت زيهم واحنا زيهم , ولا ايه؟ استفدنا ايه لما اتكلمنا ؟ وانت غيرت ايه لما اتكلمت ؟؟؟؟كله كلااااااااااااااام

-------------------------------

في فرق لما يبقي كل كلامنا ولوله وصراخ ونشجب وندين ونقول لا للاهانه وغيره ...

ولما نسيب ده كله ونفكر ازاي هنطلع من اللي احنا فيه

انا لما كتبت الموضوع كان هدفي اني اشيل الغشاوه من على عنيا وعنين ناس كتير زيي
ناس بيصرخوا ويكوكوكووو زي الديوك وللأسف محدش بيسمعهم وبعد ميصرخوا ويطلوا اللي جواهم بيستريحوا وبينسوا الاهانه والذل اللي هما فيه
كتبت الموضوع عشان ارفض كل اللي انا شايفه غلط ، عشان ميجيش يوم واندم علي اني مقلتش اللي جوايا ، وجايز اللي جوايا ده يغير في يوم من الايام حاجه جوا اي حد فينا !

مش مهم اللي فات - سيبوني احلم باللي جاي