التسميات

الثلاثاء، 22 ديسمبر، 2009

اسمه : ملل !


اسمه :
ملل !

عنوانه :
نفس عنوان الحياه
زي اللي ماشي ... لكنه تاه
وملوش عمل .

اسمه ... ملل !

لونه :
رمادي ...
زي التراب

ريحته بتخنق ...
زي الهباب

وملوش طريق
نروحله بيه
او نيجي منه

موجود بكيفه
او غصب عنه

وكأنه بيت ...
ملهشي باب !

وكانه حلم
من غير أمل !

اسمه : ملل !



الدنيا بتلف الدواير
فوق سطورنا ...
نقف طابور
نستنى دورنا ...

فرصه تيجي
فرصه تمشي
حلم ضاع ...
لكن صبرنا !

دايره واسعه وضيقه
زي حياتنا وعمرنا
قلوبنا ليه عايزه لؤى
والفراق بيضمنا


اول السطر
حِلمنا

آخر السطر
حِلمنا

والحقيقه تايهه

بين حلم قادر ينتصر
وحلم مش قادر يعافر
وحلم قاعد ينتظر
وحلم تاني خلاص مسافر

وحلم عالسطر اتقتل

جاله ملل !

طريق طويل
وكاننا ...
فمكاننا من مليون سنه

بين ليل وليل
قمرنا خايف يترسم
والقلب خايف يبتسم
والدنيا عماله بتضحك
وكانها ...
فرحانه في اللي حصلنا

وفي النهار
نفس الحوار
الشمس لسه حر نار
والبحر بيبوس المحار
والارض دايما تحتنا

شباب
فحضنه نفسه تنام وتحلم ...
اجمل حوريه

نفسها منه
دفاها منه
وحته منها
وحته منه ...
تكون فيوم شباب جديد
فحضنه نفسه تنام وتحلم ...
اجمل حوريه !

والدايره برضو هيا هيا
في الوسط شاب ... معاه حوريه
طريق طويل
بين ليل وليل
في النهار نفس الحوار
الشمس لسه حر نار
والبحر بيبوس المحار
والارض دايما تحتنا

في الدنيا ايه هيهمنا ?

غير بكره يبقى لسه نونو
الفرحه والحب فجفونه
والشوق بشوق يملا عيونه
وكانه بدر واكتمل !

اسمه : أمل !

محمد نبيل الدمرداش .
20-12-2009

هناك 12 تعليقًا:

بسنت يقول...

السلام عليكم يا محمد
كل سنه وانت بخير
وكويي انك قلتها فى الاخر
اسمه الامل
بس دايما هو بعينه بردوا كله ملل
لان طول البال للامل يولد ملل فعلا
الافضل ان نحلم بس بفعل شئ يقرب البعيد
ولو حتى شئ بسيط جدا
خطوه خطوتين نوصل لاول الطريق

عوده حميده
ودمت بخير

قلب ينبض لله يقول...

ربنا يحققلك املك وحلمك
ويبعد عنك الملل وكمان الكسل


الدنيا حلوة والله حلوة مش ضاحكة علينا وخداعة :) دا كلام انغام

لو اننا نتظر شيئا سعيدا في حياتنا سنسعي لتحقيقه وسيتحقق :) قول يارب

Sometimes يقول...

اسمه وعنوانه ولونه وريحته
انت تعرفه منين؟
هو قالك الكلام ده؟
لالالا انا معرفوش
ولما بيفكر يجيلى بموته:D
يبقى احسنله يبعد عنى علشان مصلحته هههههههههه



جميلة كالعادة
ربنا يبارك فيك
بحب احساسى وانا بقرا كلامك


يا ترى اخبار ايه بقى؟

حياه وبنعشها يقول...

كلام جميل جدا جدا جدا واكثر من راااااااااائع

just me يقول...

زى كل مره كلامك كأنه طالع مننا
بجد روعه

أحسن تـستاهـل يقول...

كل سنة وانت طيب
ليكوريكا.. فينك؟؟

مها ميهوووو

Eman.H.H. يقول...

Are you bored with life? Then throw yourself into some work you believe in with all your heart, live for it, die for it, and you will find happiness that you had thought could never be yours.

"Dale Carnegie"

D:

حول الملل لأمل بالحلم

I'm The CraZy One يقول...

bgdddddddd tooooo7fa me3adeya

ta7eyaii

كيكى عوووووو يقول...

جميله الحاله الى بديت بيها ونهتها بكلمة ريحت قلوبنا
اسمة امل!!!

EMMY BABY يقول...

الله عليك يا ليكو

ملل وامل

هذه هى الحياة تتأرجح بين الحزن والفرح بين الحب والجراح بين السعادة والشجن
بين الدموع والضحك

بس اهم حاجة ان الانسان يعرف ان هى دى الحياة لا ييئس ويقول خلاص انتهت ولا يفرح ويقول خلاص مش هتبوظ تانى

تحياتى لقلمك

ايمى

غير معرف يقول...

حلوة جدا يامحمد
لكن
تفاءلوا بالخير تجدوه

nour shahen يقول...

من كتر ما عجبنى البوست غنيته والله
اتقطع نفسى والفت الحان عجب بس حبيته كدا يتقرى كدا بجد روعه

الأمل والملل
الليل والنهار
الحياه والموت
بدايه ونهايه
ولكل بدايه نهايه وبعد النهايه بتبدأ بدايه جديده
بيقولو طولت البال توصل للمحال لكن مين فينا حقق المحال
طيب خلينى اقول تانى دوام الحال من المحال مش دى ابسط الاشياء بس مش بتمر بينا ايام تبقى شبه بعضها وسنين تبقى هى نفسها اللي مرت بينا قبل كدا دا مش حال دايم يبقى قدرنا نحقق المحال يبقى نصبر ونلاحق الأمل منغير ملل
وتحت ستار الحياه ليس هناك تعريف لكلمة مستحيل عملنا كل شىء كان فى نظرنا مستحيل
بس انا هكتفى رغى ولغبطه
تحياتى ليك علي الاستماع بالكلمات الروعه دى

مش مهم اللي فات - سيبوني احلم باللي جاي