التسميات

الثلاثاء، 30 سبتمبر، 2008

عيد سعيد ... فكر جديد !

كل سنه وانتو طيبين وبالحب عايشين ... كل سنه والدنيا حلوه فعنيكم ، كل سنه وانتو محققين كل امانيكم ، كل سنه وانتو بخير وسلام وامان ، كل سنه واحلامكم جميله ونفوسكم صافيه ونبيله ، كل سنه وانتو ناجحين في حياتكم ، كل سنه وانت محققين ذاتكم وقريبين من كل اللي بتتمنوه ...

العيد السنادي بالنسبالي مختلف عن كل الاعياد اللي قبل كده ، حاسس اني قادر أكون اللي انا بحلم بيه ، حاسس انه عيد زي كل يوم بيعدي عليا بعد مقدرت اخرج من اصعب فترات
حياتي ، بعد مبقيت اقوي بكتير من الأول ، بعد مبقت شهرتي ليكوريكا الكئيييييييب ، بعد مخلصت الجزئين بتوع الرباعيات بتوعي (دعوه للحياه) ... الحياه اللي علي قد مهيا بقت صعبه اوي علي قد مهيا مبقتش فارقه معايا خالص .

انا حاسس براحه الحمد لله لاني لأول مره قريب من ربنا صحيح محتاج مساعدة ربنا اني اكون اقرب واقرب ومحتاجه جدا انه يثبتني علي اللي انا فيه .
العيد عيد بجد لاني قدرت أحب ، أحب نفسي واحب كل اللي حواليا ، حتي اللي ظلموني حتي اللي مكنوش قد ثقتي فيهم ، حتي اللي فعز مكنت بموت مكنوش حاسيين بيا ، حتي اللي كنت بحبهم وهما ولا هنا ، بحب الكل لاني عرفت ان الحب هوا الحياه وان الحياه هتبقي سعيده بس لو فيها حب !

انا محتاج ربنا يساعدني في الفتره الجايه خصوصا اني في اصعب سنه في كلية صيدله والامتحانات صعبه والعملي بتاعي كان وحش الحمد لله ، ووللأسف انا مش مذاكر كويس ولا مستعد كويس ، بس انا بدعي ربنا يقدرني اعمل اللي عليا واتمني من ربنا انه يهديني للصح ويوفقني في اصعب شهر هيمر بحياتي ، لاني متخيل اني لو عديت الشهر ده علي خير ، هبقي فعلا قدرت اني اقف علي رجلي من تاني ، وابقي فعلا (ليكوريكا متفائل ايديشن) عن جداره واستحقاق :)

انا النهارده كتبت الموضوع ده عشان افضفض ليكم وعشان اغير الفكره اللي الناس خدتها عني خصوصا ان العيدين اللي فاتو كتبت موضوعين اكئب من بعض (عيد بأي حال عدت يا عيد) ... (حد شاف عيد) ... واللي لما بصيتلهم النهارده ابتسمت بسمه حزينه ... بسمه مستغربه ، مستغربه من حالي زمان ، ومن حالي دلوقتي !


انا النهارده بقول لكل واحد حاسس ان في فقلبه حزن ، حاسس انه خايف ، او حتي قلبه مجروح ، كل واحد البسمه بعيده عن عينيه ، كل واحد مش حاسس ان بكره عيد ، وبيقول زي المتنبي – عيد بأي حال عدت يا عيد - ، واللي بيندم علي حاجات جميله ماتت في الناس من حواليه ، كل واحد قافل نفسه علي ذكريات الماضي ، كل واحد يأسه قتله وخلاه عايش ميت ، كل واحد حزين علي امته وعلي الحال اللي وصلت ليه ، كل واحد بعيد عن ربنا وبعيد عن الحياه وعن الحب ...

بقولهم بكره فرصتكم ... فرصتكم انكم تقربوا من نفسكم أكتر، انكم تحيوا قلوبكم اللي ماتت ، وتقتلوا ياسكم بصبركم وكرهكم بحبكم ... بكره فرصتكم عشان تجددوا رخصة حياتكم وتقولوا لأ للشيطان ولأ للكره ولأ للياس ولأ للضعف ولأ لأي حاجه بتسرق الفرحه ولأ لأي حاجه خلتنا منقدرش نحقق أحلامنا ... بكره فرصتكم انكم تحبوا بجد ...

بكره الصبح اصحي مع الشمس وروح صلي العيد ، قول الله أكبر كبيرا والحمد لله كثيرا ، قولها بقلبك ، وافتكر قد ايه نعم ربنا عليه وقد ايه انت بقالك كتير مشكرتهوش علي اي نعمه من نعمه وعلي الرغم من كده هوا بيرزقك ويساعدك ويقف جنبك ، سلم علي جيرانك قرايبك اصحابك ، حتي اللي حسيت انهم سبب تعاستك وسبب كل الجراح اللي انت فيها ، روح وابتسم في وشهم من قلبك ، حبهم ... ايوه حبهم ، جايز اللي مقدرش يصلحه كرهك ليهم يصلحه الحب :)

ولو هتروح تزور قرايبك اعرف انك كدا بتعمل شيء عظيم وبتصل رحمك وخلي مرواحك ليه بنية انك تقرب اكتر من ربنا وصدقني انت متعرفش الفرحه اللي بتدخل في قلب اي مسلم لما بيزوره قرايبه ... وافتكر انت بتبقي حزين قد ايه لما بتبقي قاعد في البيت ومحدش بيسأل عليك ...

لو عندك اخوات صغيرين يبقي لازم تجيبلهم هدايا ، صدقني مجرد نزولك الشارع وفرجتك علي الالعاب وتقعد تنقي لاختك الصغيره عروسه واخوك مسدس او بمب ، كده انت مش بتقلل من نفسك ولا بتعمل حاجه هايفه ... انت بتهدي ليهم الفرحه ... واذا كان طباخ السم بيدوقه ... ايش حال بقي اللي بيهدي الفرحه للناس ؟!

متنساش تصلي ركعتين شكر لله علي كل شي ، ركعتين شكر علي انك بتشكره دلوقتي ، علي انه ادالك الفرصه انك تفرح ، واداك قلب تحب بيه غيرك ، شكر علي نعمه الكتير عليك ، وادعي ربنا يقويك علي مصاعب الحياه ، وادعيله ينسيك الهموم والدنيا من حواليك ، ادعيله يغفرلك ذنوبك واتأكد انه هيغفرهالك مهما كانت كبيره او عظيمه ، بس اهم حاجه انك تسجدله بقلبك ولو قدرت تبكي ابكي وصدقني هتحس براحه ما بعدها راحه ...

ولو لسه والدك ووالدتك موجودوين ، روح وعيد عليهم ، وميكنش كل همك انك تاخد العيديه وبس ، روح وهززر معاهم ولو مكسوف تهزر ، روح واقعد معاهم وبص فعنيهم ، لان مجرد نظرك ليهم صدقه ... تخيل ؟! ... صدقني الاب والام نعمه مبنحسش بيها الا بعد مبتضيع مننا ، ربنا يخليهملك وميحرمكش منهم ابدا ...


آخر حاجه لو خرجت مع اصحابك حاول تبعد عن اي حاجه تبعدك عن ربنا ، حاول يكون شكرك لربنا علي الفرحه اللي وهبها ليك بطاعته والبعد عن معاصيه ... وربنا يهدي شباب المسلمين ويبعدهم عن الحرام والضلال ...

في النهايه انا هكتبلكم جزء من الرباعيات اللي انا كاتبها واتمني انها تكون هديه مقبوله مني ليكم كلكم في العيد ويارب اكون قدرت اقول حاجه في الموضوع ده تغير في اي حد فينا اي حاجه ...

إحلم يكون الخير في الدنيا من حواليك
وارسم سما للطير وسحابه راح ترويك
واما القلوب تدبل ... اسقيها كلمة حب
ده الحب لو كلمه ... لوحدها تكفيك !

الضحكه ليه تخبيها مع انها بتحييك
والدمعه ليه مخليها محبوسه جوا عنيك ؟!
مالحب ليه خايف ده الحب خلاني ...
أعرف خبايا الكون وآجي اقولها ليك !

ارسمني وش ... وخلي فيه البسمه باينه
واهديني ليك ... واحضني لو حتي ثانيه
ولو السعاده جت فقلبك ... يبقي تقدر
ترسمني ... كل يوم رسمه تانيه !

غني يا قلبي كمان ... سمعني غناويك
واهدي لكل الكون ... الحب لو فيك
وان كان في حبة حزن ... اوعاك تغنيلي
ده الحزن لو غنوه ... تبقي الجراح مزازيك !

نصيحتي ليا وليك ... متخفش من بكره
ولو الدموع فعنيك ... خلي الدموع ذكرى
وحب كل الناس ... الدنيا هتحبك
ده اللي يدوق الحب ... مستحيل يكره !


من رباعيات ليكوريكا ج1 & ج2
------------------------------------------

الموضوع ده يا جماعه هوا هوا الموضوع اللي كتبته العيد اللي فات ، مختلفش كتير عن دلوقتي ، يمكن حصل السنادي زي السنه اللي فاتت بس بجرعات مكثفه ، وزي مقلتلكم قبل كده خلاص بقيت باخد الصدمه واسكت في انتظار اللي بعدها ... لكن في نفس الوقت بعيش اللحظه واما بفرح بحاول افرح بجد

يارب يبقي عيد سعيد علي كل المسلمين ، وكل واحد حابب انه يفرح بجد

كل سنه واحنا كلنا بنحب بعض ... كل سنه واحنا كلنا بنحب بجد :)


ليكوريكا

هناك 33 تعليقًا:

EMMY BABY يقول...

اولا حمد الله على السلامة

ثانيا كل سنة وانت طيب

بجد والله البوست طالع منه فرحة كفيلة تملى القلوب وتخلى الوشوش تبتسم

الكلام طالع من قلبك اوى فعلا

بجد والله بوست جميل فعلا حاجات كتير اوى هتتغير لو كلنا عملنا بيه

الرباعيات بجد بجد تحفة والله كلامها جميل اوى بجد

بس احنا فى عيد الفطر عيد الكحك مش عيد الاضحى ههههههههههه

بدعى ربنا انه يثبتك بجد وتفضل ليكوريكا المتفائل

وبالمناسبة دى تعالى خد تاج من عندى

تحياتى

ايمى

princess يقول...

الكلام صادق جدا وبجد كله نصائح جامدة جدا
ربنا يقدرنا ونعمل بيها ان شاء الله:)
كل سنة وانت طيب

سفروتة يقول...

كل سنة وانت طيب يا ليكو
وحمد الله علي سلامتك
وافرح كده وفرفش
وخليك دايما وعلي قد ما تقدر
ليكوريكا متفائل ايديشن

Habiba يقول...

ازيك ياليكو
كل سنه وانت طيب
عيد سعيد عليك
وانسى الهم
تعرف
انا بقيت احس ان مفيش حد عايش بحقيقه واحده
كل واحد بقى له الف شخصيه
الزمن والظروف بتخلى الواحد مش مستقر على حال واحد ولا شخصيه واحده

سيبك انت
كل عيد وانت سعيد يارب

نهر الحب يقول...

اللهم زد هـــــــذا الوجه نورا
واجعله دائـما مأجورا
وبلغه العيد مسرورا
امين يارب العالمين
عيد سعيد

Eman يقول...

كل سنة وانت طيب
وعيد سعيد ان شاء الله

smska يقول...

هيييييييه هييييييييه
ليكوريكا متفائل ايديشن از بااااك :)
كل سنة وانت طيب يا جدو ..
وخد الدعوه دي من حفيدك مصطفى ..::
ياااارب ياااااارب تفضل متفائل كده على طول يا جدي ..
عيييييدك سعيييييييييد :)

Mohamed Dawod يقول...

كل سنه وانت طيب يا ليكوريكا متفائل ايديشن. يمكن السنه اللى فاتت مكنتش اعرفك ومدعيتلكيش. فخلينى السنه دى بقى ادعيلك.(أشمر كمى وارفع ايديا للسما واقولك) ربنا يارب يا ليكوريكا يحقق لك كل اللى تتمناه فى كليتك ورباعياتك وحياتك الخاصه...امين.
ابقى قولى بقى نتايج دعوتى....خالص تحياتى وشكرا

قلب ينبض لله يقول...

أنا حاسة كل كلمة وكل حرف أنت كتبته
لأن أنا ميت بالظروف والحالة اللي أنت فيه
وقربت من ربنا أوي وكانت من أجمل الفترات في حياتي علي الرغم من صعوبتها لأني كنت فيها قريبة من ربنا

مبسوطة جدا بكلامك وبالروح الحلوة اللي جواك
ومبسوطة أكتر بالعيديه بتاعتك
ومن غير مجاملة دي أحسن هدية أخدتها النهاردا

ربنا يرزقك الخير كله ويكرمك من فضله

no4denmark يقول...

ربنا يثبتك يا محمد يارب
ويهدينى

ومعلش فى توضيح بسيط

لا توجد في الشريعة ركعتان خاصتان بالشكر فيما نعلم، وإنما يوجد فيها سجود الشكر

enjy يقول...

والله وحياة ربنا كلامك دة يخصنى بشدة انا موجودة فى البوست دة وهعمل زى ما انت قلت....... الرباعيات حلوة قوى والله بجد كلمات حساسة جدا ومكثفة

الله...الوطن...أما نشوف يقول...

أهلا بيك زائرا كريما على مدونتي...وياريت تنورني دايما...ومتشكرة على مداخلتك المتزنة في شأن السنة والشيعة...ياترى صورة إيه اللي كنت بتدور عليها؟يعني كانت الkeyword اللي كنت بتدور عليها؟ حيرتني!:) على العموم دي فرصة كويسة عشان تشرفني...كل سنة وانت طيب:)

Sometimes يقول...

والله كنت هقولك عيد اضحى ايه؟
الكلمات حاسه انها طالعه من قلبك
يارب يكون حالك كويس
كل سنة وانت طيب وبخير

الصمت يقول...

الكلام صادق جدا وبجد كله نصائح جامدة جدا
ربنا يقدرنا ونعمل بيها ان شاء الله

وكل سنه وانت طيب

بس احنا مش واخدين على التفاؤل ده

ربنا يستر

انا ميسرة يقول...

كل سنة وانت طيب يا حبى الوحيد ..... يا خوفى عليا من بعدك يا جملى .......ههههههه
اهم حاجة فى العيد تفرح ......تفرح

hager za3bal يقول...

ربنا معاك ياجميل
ان شاء الله السنه دي تعدي علي خير :)

الرباعيات جميله اوي
دمت مبدع :)

كل سنه وانت طيب
ان شاء الله يكون عيد سعيد علينا كلنا

نعكشة يقول...

اولاُ كل سنة و حضرتك طيب
ثانياً احساس جميل لما الواحد وهوه بيقرا وهوه متجهم فجأة تلاقي عينيه ابتسمت و بعدة شفايفة
انا مبسوطة بفرحة حضرتك
ربنا يقويك و يعزك كمان و كمان
و يدخل الحب و الفحة في قلبك دايما
ربنا يوفقك في آخر شهر دة و تقف علي رجلك كدة و تبقي افضل مما في بالك

عندك حق في اللي قولته مع اني معملتوش بس ربنا يكرمك وي ثبتك

بالنسبة للرباعيات انا قريت اول حتة منها بس
وجميلة ماشاء الله
هروح و لما هرجع هقرا الباقي باذن الله

ربنا يكرمك يا رب
كل سنة و حضرتك طيب

نعكشة يقول...

عدنا

انا عجباني اصلا الرباعية اللي حضرتك كاتبها فوق
مع الرسمة خطيرة صراحة


و التانية اللي هيا

نصيحتي ليا وليك ... متخفش من بكره

هما كلهم عاجبني صراحة
بس اقل واحدة عجبتني دية

غني يا قلبي كمان ... سمعني غناويك


وربنا يوفقك في رباعياتك يا رب
كل سنة و حضرتك طيب

kochia يقول...

كل سنة وانت طيب
واحلي ما في البوست روحه
اللي فيها تفاؤل وابتسامة

تحياتي

احلام اليقظة يقول...

الله عليك

كلامك حقيقى اوى ومن جواك
ربنا يسعدك
وتحقق كل امانيك

وكل سنة وانت طيب
وعيد سعيد عليك وعلينا

إحلم يكون الخير في الدنيا من حواليك
وارسم سما للطير وسحابه راح ترويك
واما القلوب تدبل ... اسقيها كلمة حب
ده الحب لو كلمه ... لوحدها تكفيك

جميلة اوى ومن القلب اوى

دام قلمك

habiba يقول...

ازيك ياليكو
الدعوه جتلى كده اللى تحت دى
اقراها وياريت تلبيها

habiba يقول...

الزميل المدون المحترم
بعد التحية
ندعوكم لحضور ملتقى مدوني الشرقية الأول
يوم الأحد 5/10 الساعة الرابعة مساءً
مقر النادي الإجتماعي الخاااص بشركة مطاحن شرق الدلتا
أمام مقر الوفد بشـــــارع مدير الأمن - ميدان القومية - الزقازيق - محافظة الشرقية

و كل المدونين من كل حتة ف مصر مدعوين

وللمزيد من التفاصيل يرجي زيارة اللينك التاااااالي
http://goharyblog.blogspot.com/

لكم جزيل الشكر و كل عام و أنتم بخير

nour shahen يقول...

كل سنه وانت طيب يا اطيب واجمل ليكو

وبعدين يا قمر دا عيد الفطر ومش عيد الاضحى

كتبت رباعيات هايله بجد وبتعلن عن التفائل بكلماتك الجميله اللي خارجه من قلب صادق
ربنا يثبت قلبك وقلوبنا علي الحق يا رب
ويرزقك كل الخير ويكفيك شر الشيطان والدنيا والناس ونفسك

كل عيد وانت طيب وقلبك فرحان عامر بذكر الله وقلمك شديد بقوة مستمدها من نور الحق وأجمل كلمه قولنها اننا نشكر الله . ربنا يبارك فيك ويكرمك
اللهم لك الحمد كما ينبغى لجلال وجهك وعظيم سلطانك
لك الحمد حتى ترضى ولك الحمد اذا رضيت ولك الحمد بعد الرضا

خالص تحياتى وأحترامى

e_emy يقول...

الرباعيات رائعة بجد
ربنا يزيدك

انا معاك ف اننا نعيش اللحظة وننسى الهموم ونفرح ....

وكل سنة وانت طيب وبخير يارب

Taha يقول...

كووووووووول سنه وانت طيب يا محمد .. وعيد سعيد عليك وعلينا ..

وزورنى بعد كده فى http://becuphalus.blogspot.com/

كيارا يقول...

انا حاسس براحه الحمد لله لاني لأول مره قريب من ربنا صحيح محتاج مساعدة ربنا اني اكون اقرب واقرب ومحتاجه جدا انه يثبتني علي اللي انا فيه .

-------------

بجد فرحااااااااااانه اوي للكلام ده

----------


ولو لسه والدك ووالدتك موجودوين ، روح وعيد عليهم ، وميكنش كل همك انك تاخد العيديه وبس ، روح وهززر معاهم ولو مكسوف تهزر ، روح واقعد معاهم وبص فعنيهم ، لان مجرد نظرك ليهم صدقه ... تخيل ؟! ... صدقني الاب والام نعمه مبنحسش بيها الا بعد مبتضيع مننا ، ربنا يخليهملك وميحرمكش منهم ابدا ...

-----------

تمااااااااااااام وياريت فعلا الكل ينفذ الكلام ده
---------


ارسمني وش ... وخلي فيه البسمه باينه
واهديني ليك ... واحضني لو حتي ثانيه
ولو السعاده جت فقلبك ... يبقي تقدر
ترسمني ... كل يوم رسمه تانيه !

----------

الللللللللللللللله بجد الله عليك

كل سنه وانت طيب

عيد سعيد

MaGn0liA... يقول...

كميه السعاده و الامل و التفاؤل حلوه جدا

بس للاسف انا مش حاسه بولا كلمه

بجد الحزن جوايا اثر فى حاجات كتير

هحاول اقرا البوست كذا مره ممكن اتعدى

ربنا يسعدك

سلامات :)

قلب مصرى يقول...

ليكوريكا
كل سنة وانت طيب ويارب يحقق كل أمنياتك

no promises يقول...

كل سنه وانت طيب يا نبيل

بجد اجمل حاجه قلتها ان الانسان يصفى قلبه ناحيه كل الناس وبجد بتفرق حتى مع الانسان نفسه

----------------------
بالنسبه لاجتماع المدونين فشكلى احتمال اروح مع انى مش بعتبر نفسى من المدونين
لانى طبيعى نازله الجامعه بكره
فيارت انت كمان تحضر لانى معرفش حد غير سيادتك وباعتبارك مدون مخضرم

قلب شاعره يقول...

كلام جميل ونصائح غاليه .. تسلم ايدك وكل سنه وانت طيبه ..

بسنت يقول...

عيدك سعيد ان شاء الله ىيا ليكوريكا
البوست دا جميل حقيقى خلانى افتكر حاجات كتيره كويسه الصراحه
وبردوا حاجات حزينه
بس دايما نقول الحمد لله
العيد السنه دى كان حلو معايا
دمت طيب دايما ومتفاءل

kemet يقول...

السلام عليكم ورحمة الله وبركاته

الحمد لله علي سلامة قلبك وربنا يرزقك حبه وحب من احبه وحب كل عمل يقربك اليه

ابياتك اكثر من ممتازة
تحياتي
الي اللقاء

will يقول...

情趣商品,情趣用品,情趣用品,情趣,情趣,情趣用品,情趣商品,情趣用品,情趣,情趣,情趣用品,情趣商品,情趣用品,情趣,情趣,情趣用品,情趣用品,情趣用品,情趣用品,情趣用品.情趣,情趣,情趣,情趣,視訊聊天室

麻將,台灣彩卷,六合彩開獎號碼,運動彩卷,六合彩,遊戲,線上遊戲,cs online,搓麻將,矽谷麻將,明星三缺一, 橘子町,麻將大悶鍋,台客麻將,公博,game,,中華職棒,麗的線上小遊戲,國士無雙麻將,麻將館,賭博遊戲,威力彩,威力彩開獎號碼,龍龍運動網,史萊姆,史萊姆好玩遊戲,史萊姆第一個家,史萊姆好玩遊戲區,樂透彩開獎號碼,遊戲天堂,天堂,好玩遊戲,遊戲基地,無料遊戲王,好玩遊戲區,麻將遊戲,好玩遊戲區,小遊戲,電玩快打

情趣用品,情趣,A片,AIO,AV,AV女優,A漫,免費A片,情色,情色貼圖,色情小說,情色文學,色情,寄情竹園小遊戲,色情遊戲,AIO交友愛情館,色情影片,情趣內衣,情趣睡衣,性感睡衣,情趣商品,微風成人,嘟嘟成人網,成人,18成人,成人影城,成人圖片,成人貼圖,成人圖片區,UT聊天室,聊天室,豆豆聊天室 ,哈啦聊天室,尋夢園聊天室,聊天室尋夢園,080苗栗人聊天室,080聊天室,視訊交友網,視訊

借錢,黃金,黃金回收,黃金價格,黃金買賣,當舖

A片,A片,成人網站,成人影片,色情,情色網,情色,AV,AV女優,成人影城,成人,色情A片,日本AV,免費成人影片,成人影片,SEX,免費A片,A片下載,免費A片下載,做愛,情色A片,色情影片,H漫,A漫,18成人

a片,色情影片,情色電影,a片,色情,情色網,情色,av,av女優,成人影城,成人,色情a片,日本av,免費成人影片,成人影片,情色a片,sex,免費a片,a片下載,免費a片下載,成人網站,做愛,自拍

مش مهم اللي فات - سيبوني احلم باللي جاي