التسميات

السبت، ١٢ يوليو ٢٠٠٨

وقفه مصريه !


في البدايه بس يا جماعه انا عاوز اعتذر للناس كلها علي اني مقصر في الزيارات والردود ، بس بجد والله يا جماعه بسافر كل يوم وظروف قعادي في البيت بقت مش بايدي خالص ، اتمني تعذروني وباذن الله هحاول علي قد مقدر اكون عندكم في اقرب وقت

ليكوريكا




سمعتوا اخر خبر ؟

اعلنت دار الافتاء المصريه

عن ان غدا الموافق مش عارف كام

هو متتم شهر اي حاجه

وان غدا برضو هو وقفه عيد معرفش ايه

وهيقف كل المصريين علي رجليهم طول النهار والليل

هذا وننقل اليكم تهاني السيد الرئيس للشعب المصري علي وقفته الجامده

مؤكدا علي ان الوقفه احسن من القعده ، وان الجلوس مضر جدا بالصحه ويسبب الوفاه

شعارنا :

ليه تقعد لما ممكن تقف ؟

اهداف الوقفه :

1- الوقفه رياضه (مش احياء ولا تاريخ ) واخدينلي بالكم انتو ؟ :)

2-يا بخت من وقف رجلين في الحلال .

3-آل يا واقفين يكفيكم شر القاعدين :)

4- وقفت فوق السطوح هز الهوا كمي ... كل العيال اتجوزوا وانا (واقفه) جنب امي

5-يا واقفه علي باب الحمام وكل خد عليه (ميك اب) ... ميك اب ميك اب ميك اب

6- ياعالم بكره يا قاعد مخبيلنا ايه ... يا خوفي بكره يا قاعد متقفشي فيه (اليسا)


الراعي الرسمي للوقفه :

سيراميكا كليوباتر ... معمول عشان (تقف) عليه !

سبرايت : وقـــــــــــــــــف عطشك !

تكاتك المحروسه --- انت تشاور واحنا (نقفلك) --- :)

كفايه بقي مقدمات يا اوسطي ليكو

انزل بالتتر يا ولد :

وقفه مصريه ... made in egypt

***** قبل منزيد مولود ... نتأكد ان حقه علينا موجود ******

-------نحكم عقلنا ... نشبع كلنا (يا شعب جعانين) ----------

-------نحكم عقلنا...نتعلم كلنا (يا شعب ........ ) -----------

-------نحكم عقلنا...نشرب كلنا(ميه ساقعه مشبره ... ) -------

-------نحكم عقلنا...نشتغل كلنا (اكيد مش هنشتغل نفسنا)-------


يا سلام يا بلوجرز يا ولادي

شايفين الكلام الدافي

شايفين السجع والجناس والكنايات والاستعارات

حاسيين معايا المجازات المرسله

(مع ان الشبكه واقعه اثاثا )

والله هعيط ... لا لا سيبونيييييييييي اعيييييييييييييط

انا عيتط خلاص

واااااااااااااااااااااااااااااااااااااااااااااااااااااااااااااااااااااااااااااااااااااااء

وكمااااااااااااااااان

واااااااااااااااااااااااااااااااااااااااااااااااااااااااااااااااااااااااااااااااااااااااء

وبما اني بقيت رايح جاي علي بنت المعز افندي

لاحظت وجود اللافتات الجميله دي في كل حته في مصر المحروسه

وقفه مصريه

ولان زي منتو عارفين

ان زيكا بلد ليكوريكا

انا شفت اليفط دي انبهرت

امال ايه بس ...

احنا حدانا (حلوه حدانا ديه)

في بلدنا مفيش غير وقتين

وقفة العيد الصغنن ووقفه العيد الكبير

انا عارف ان لسه الجيل التالت من الاعياد لسه موصلش بلدنا

مع اني بحوش من وانا عندي عشر سنين عشان اجيب موبايل 3G وموش عارف :((

بس مش ذنبنا يا مصر ... من حقنا نقف معاكم

اه والله من حقنا نقف معاكم ... وبعدين الكلام اثر فيا اوي

حتي الدموع عماله تنزل اهو ... :(((

وبما اني لساني طويل ... وبما ان التدوين حق مكفول لكل المواطنين

تعلن مدونات ليكوريكا البيان التالي :

ندين ونشجب ونطعن في الوقفه المصريه ، لانها وقفه عنصريه لابناء القاهره بنت المعز افندي

ولانها ايضا تثير الضغائن وتؤرق السرائر وتنشر الفتن

ولاننا (رجاله) وجدعان اووووووووووووي ونقدر نقف في الحديد زي مبيقولوا

ونهيب بالساده المسئولين احد الامريين التاليين :

اما تعميم الوقفه علي جميع بلدان كفر مصر المحروسه

واما تدوني قرشين امشي بيهم حالي وانا اوعدكمن هسسسسسسسسسسكت خالص ومش هدون تاني

ومتقلقوش الناس اللي بيدخلوا عندي (هيتشردوا هيتشردوا)

امال ايه ... ليكوريكا بيبيع في اول ورقه خضرا :)


--------------------------------------------------------------

نتكلم بجد شويه

مش عارف اقول ايه ، وقفه مصريه للمصريين ، عاوزين نحد من المشكله السكانيه

عشان نشتغل ونتعلم وناكل ونشرب

كلام جميل ...

بس الاجمل منه نشوف احنا بقينا فين دلوقتي

ونشوف هل فعلا حمله زي دي هيا الحل لمشاكل كتير زي اللي مكتوبه عاليفط ؟

هل فعلا الشباب دلوقتي لاقي يأكل نفسه عشان يتجوز ويخلف مره واتنين وتلاته ؟

يااااااااااااااه علي الشقق المرميه فكمل حته وعالوظايف اللي بقت مغرقانا

نسيتوا (الحق القطر ... البلد بتتحرك ؟ )

يعني هوا الناس هتخلف وهيا في القطر ؟

انا مش عارف والله التفكير بقي ازاي

طب معندكوش احصائيات العنوسه ؟

اه العنوسه ...

يعني بمتهي البساطه بنت حلمها الاول والاخير انها تلاقي راجل يحبها ويحميها ،

ويحققلها حلمها انها تكون ام بحلال ربنا

لكن للأسف مفيش راجل وميش حب ومفيش ام ... بس الحمد لله لسه فيه ربنا الحمد لله .

انا خجلان اوي من نفسي ومن بلدي والاحصائيات دي بقت فكل حته

وبقي كل همنا اننا نقل ... مش نستغل ثروتنا البشريه

بس انا عاوز اوجه رساله لكل اللي يهمه الامر

متقلقوش الموضوع مش محتاج يفط وحملات ودعايا

للأسف خلاص غصب عننا هنشوف بناتنا وولادنا مش قادرين يتجوزوا ولا يخلفوا

وحتي لو الاحصائيات بتقول غير كده وبتقول ان مواليدنا بيزيدوا

فانا بقول علي الي شايفه ولامسه بايديا

الاحصائيات مبتأكلش عيش ، ولا اليفط بتغير حاجه

وقفه مصريه يمكن

تجيب نتيجه جايز

لكن تبقي هيا الحل ... مستحيل !

------------------------------

ليكوريكا

من قاهرة المعز

تحت يفط وقفه مصريه

(احلام مع ايقاف التنفيذ)

------------------------------------

روح شوف

(كلمه واحده)

اكيد في بلوج المشاعرجيه

من ليكوريكا وبثـــــــ

http://just-afeeling.blogspot.com/

هناك ٢٥ تعليقًا:

just me يقول...

عارف
لما كنت من اسبوعين فى قاهره المعز كنت هتشل بجد
كل 5 سم الاقى وقفه مصريه
وقفه مصريه
وفى التليفزين
يا بلدينا وقفه مصريه
يا دكتور واقفه مصريه
يا انسه واقفه مصريه

وبكون نفسى اقولهم ان الناس اصلا على طول واقفه واقفه مش مصريه خالص
واقفين طول اليوم على طوابين العيش
واللى واقفين فى طوابير المرور
واللى واقفين فى كب حته
يا عالم الناس واقفه
كنتم توفرو فلوس الاعلانات دى
فى ناس vip محتاجه الفلوس دى
ماتخافوش الناس كمان بتجرى وهى واقفه
بتجرى علشان تلحق الاوتوبيس
اللى بتقف وقفه مصريه فيه طبعا
وبتجرى علشان تلحق تكون نفسها
وبتجرى وبتجرى

مش هتكلم خلاص كفايه كده
على رأيك انا بقى عندى 22 سنه والضغط بقى والسكر

بس تفتكر اقعد استريح
ولا هيقولولى اقفى انتى كمان وقفه مصريه؟؟؟؟؟؟؟

معلومه
-----
انا كنت هعمل موضوع عن الوقفه العظيمه دى بس انت الحمد لله لحقتنى
لانى لو كنت عملته ولا بلاش

زفته وقطران يقول...

بلاش تشاؤم
خلي في امل
يعني حنفترض
ان الوقفه حتجيب نتيجه
اهوه نقف وخلاص
جابت جابت
مجبتش
يبقي الحال علي ما هو عليه
عاااااااااااااااااااااااادي
الشعب المصري مش حيتاثر
ياخويا حيتاثر اكتر من كده ايه

Mohamed Dawod يقول...

يااااااااه هو الموضوع وصل لكده دلوقتى.....المشكله بقى ان الحكومه الفاضله بتاعتنا من واقع كل التصريحات والكلام اللى بيتسرب بيداروا خيبتهم قدام الراجل الكبير بحجة الزياده....يجى يسألهم يا عم الوزير الفلانى ليه الخطه العلانيه ماجبتش نتيجه يقولوه اصل الزياده السكانيه أفشلتها ياريس.....الله أعلم هو مصدقهم بمزاجه ولا مش بمزاجه بس فى الاخر التوجيهات العليا لأجهزة البلد كلها انها تحارب الزياده فى السكان(قال يعنى بنزيد بجد) مع ان لو حد عنده عقل فكر شويه حيلاقى الهند أكتر مننا والصين اكتر بكتيييييييير والاتنين زى الفل. فى الخليج مثلا الناس فاهمه قوى يعنى ايه ثروه بشريه وبيحسدونا على ثروتنا البشريه. بس نقول ايه بقى اهى ثروه من ضمن الثروات اللى فى مصر ومش لاقيه حد يستغلها. حد يبقى عنده شعب بالأجتهاد ده والصبر ده والذكاء ده والفهلوه دى وخفة الدم دى وميعرفش يستفيد منه......بجد يبقى العيب فيهم مش فينا ومسير يوم يجى حد يعرف يستفيد من الثروه دى.....رأيى اننا نفضل نزيد براحتنا لجد ما الحد ده يجى......تحياتى وشكرا

Unknown يقول...

انا ماشفتش اليفط لانى مش من القاهرة لكن سمعت عنها فى كل حتة بس انا رايى ان احنا اتعودنا على يفط التهجيص يعنى يفط الوقفة ويفط الحزب الوطنى ويفط الدعاء للريس فى عيد ميلاده ويفط انتخابات المحليات ويفط الاخوان المسلمين ...........كل دى يفط فشينك واحنا عارفين انها فشينك يبقى كمان يفط الحملة فشينك بس هم لقوا معاهم شوية فلوس زيادة قالوا يعملوا بيهم يفط .............مسخرة حقيقية

دعوة للأمل يقول...

اهداف الوقفة عجبتنى اوى و مؤترة جدا و انا اللى هعييط هههههه
بوست جميل و ربنا يوفقك

فارس بلا جواد يقول...

السلام عليكم ورحمة الله وبركاته
دى اول زياره ومش هتكن الاخيره ان شاء الله
مدونتك حلوه بجد
تحياتى

كيكى عوووووو يقول...

عووووووووووووووووووووووووو
انا جيت اتخديت
.........................
وقفة مصرية
......................
احلى نكتة بجد...........
بجد..مش عايزة اكلم اكترررررررررررر من كدة
لاننا كدةكدة مفروسين
........................
وسلاااااااااام علشان الحق احجز فى مدنتىىى
........................
عوووووووووووووووووووو

Oss يقول...

ليكوريكا
آه
لازم كلنا نقف وقفه ونطبع مفروشات
ازاى مش عارف
طب هما بيقفوا فين ؟؟

Blue Nile يقول...

انا ول ما شفت الاعلانات في الشارع افتكرتها حركة جديدة زي كفاية كده
متوقعتش انها تكون من الحكومة

Eman Henaish يقول...

انا نفسي أفهم فعلا زيادة سكانية

مستمرة ازاي وأصلا الناس مش لاقية تاكل؟؟؟؟؟؟؟؟؟؟؟؟؟؟

تحياتي علي البوست

غير معرف يقول...

نياهاهاهاهاهاااااااااااا

عن اذنك بئى رجلي وجعتني اقعد شوية

بس في وقفه نسيتها .. الوقفه اللي بتكون في المحاضرات عمري مابقعد خالص بالكتير ربنا بيكرمني والائي حتة فاضية فالحيطة اسند عليها وكمان ساعات اسمع كلمة عجيبة
لأ الحتة دي محجوزة

حتى الوقوف بئى بالحجز

لألألألأ هعيط انا كمان

عاااااااااااااااااااااااااااااااا

غير معرف يقول...

حلوة حكاية الواقفة دى .. انتا بلورت كل الوقفات بس نسيت وقفة الخميس .. بتكون واقفة جامدة .. وخاصا للناس اللى فتحوا بيوت واتجوزوا ..
__________________________________
والله يا ليكوا يبنى انتا عندك حق .. بس كنت عايز اقول حاجة لكل الشباب والشبات اللى بيموتوا دول ..
لية بنفكر فى المستقبل واحنا اساسا مضيعين حاضرنا ..
يعنى مثلا يا عم ليكوا يرضيك الشاب من دول او البنت من دول يسقطوا كل سنة .. بلاش دى علشان هتقولى الدكترة والامتحانات وبلاوى تانية ..
طيب والشباب اللى مستغلش وقتة واعد على القهاوى .. هتقولى مزاج .. بلاش دى
البنات اللى ليل نهار سرحنين فى الحب والهيام .. بلاش دى
النت اللى احنا اعدين علية ؟؟ علشان نخرج همنا .. ندون بكلام وبس ..
تعرف ؟؟ صدق كلمات الشاعر وهو بيقول نعيب فى زماننا والعيب فينا ..
انا كنت خايف برضو وقرفان برضو من اليفط والكلام دة .. بس لقيتنى بقول لية هربط نفسى بمستقبل بلدى .. لية مربطش نفسى بمستقبل نفسى واعرف قدرات نفسة واوجها فى الطرق الصح ...
احنا كشباب بحس ان احنا مستنين غلط من اى حتة فى مصر علشان نقول : اهوة .. اهوة .. ناس بتاكل فى البلد .. يعنى من الاخر مستنين اى حاجة نرمى عليها عيوبنا ...
__________كلمة اخيرة ..
رد مرة علية واعمل معجزة وخش مدونتى ..
وانا هروح على طول مفرق ساقع على كل الوقفين

radwa يقول...

لخبطتنى يا ليكو

هقرأ تانى يمكن اللى اتلخبط يتصلح

دعاء مواجهات يقول...

والله ياد ياليكو

انت زى العسل زى ما بقول من يوم ماعرفتك بجد

بتلف اة وبتدور بس عندك عمق معمووق اخر معمقة فى تناول لا مش اكل تناول اى عرض

المواضيع وتفنيطها

ومع كل دة بتضحكنا وتغمنا كمااااااااان


لالا بصراحة انت مبقيتش مخلينا محتاجين حاجة خاااالص

بييييييس

forbidden zone يقول...

ربنا مع كل المصريين،ربنا يكون في عونكم
سلام
إسراء

كاميليا بهاء الدين يقول...

هههههههه

إنت ناسى إن أشهر أغنية هى

قوم يا مصرى .. مصر دايما بتناديك

اهو من ساعة ما قام وهو مش عارف يقعد خالص

المهم
نتكلم جد

انا عاوزة أبدأ بشعار

وقفة ضمير ..

بعدها كل حاجة هاتكون ممكنة


احييك على هذه التدوينة
اخدتنا وجبتنا بين الجد والضحك
ووضعتنا أمام المعاناه بمنتهى الرقة واللطف


تحياتى واحترامى

غير معرف يقول...

محدش يجيب سيرة الوقفة،، كفاية اللي بشوفه في المترو
المترو يا ناس المترو،، ارحموني بأه
انت عمال تتكلم وتقول الوقفة ونقف ووقفوا وانا عمالة افكر في واقفة المترو والزحمة والناس اللي بتركن على الناس آااااااااااااااه على خناقتي في المترو النهارده
اسكت اسكت خليني ساكتة

حححححححححححح
وانت ازيك كده يا سي عبعال؟؟
:)

مها ميهوووو

عاشقة القمر يقول...

والله يا ليكوريكا يابني انا الايام اللي فاتت كلها كان ربنا راحمني من النزول وماكنتش شوفت اللافتات دي خااااااالص كان كل اللي بيني وبينها هو السمع عنها .. بس اسسسسسسسسسسكت نزلت من يومين بس وشوفتها .. نحكم عقلنا مش عارفه هيحصل لنا ايه كلنا .. نحكم عقلنا هيجرالنا ايه كلنا نحكم عقلنا ....... الى اخره .. وتحت كل نحكم عقلنا من دول .. قبل منزيد مولود ... نتأكد ان حقه علينا موجود .. انا اول ما شوفت الافتات دي واللي لحسن الحظ وقف عندها الطريق بتاع عشر دقايق والميه الفظيعه والعيش الخرافي وعمو المنشكح اوي اللي في الصور ده .. اول حاجة جت في بالي يعني هو الحوار ده كله معمول عشان المولود ده وحقه عليناوانه المفروض ما يجيش عشان يحصلنا كل حاجة كويسه كلنا ؟ طب يا جدعان حتى لو ماجاش المولود ده طب والناس الموجوده بقى ؟ خير يعني فين من الحوارات دي .. يعني الناس خلاص كلها حكمت عقلها وماجابتش مواليد تاني خلاص الموجودين بقى هتتحل مشكلتهم ازاي بقى ويشتغلوا ازاي .. ولا ده تبع الصفحه الجديده يعني الناس دي هيتقفل عليهم وتتفتح صفحه جديده فاضيه من غير ناس ولا مواليد .. ايه الرغي ده كله انا رغيت كتير كده ليه .. ماهو لو نحكم عقلنا هنتكتم كلنا :)

عيله مفتريه سابقا يقول...

بص يا ليكو

انا اتخنقت اساسا

وانا اقول الاعلان بتاع وقفه ده برنامج جديد؟

اتبن الوقفه دى مش وقفة العيد دى واقفه بس لأيه ؟

هل بالوقفه دى هيأكلونا؟
هل هيجوزونا؟
هل هيشغلونا؟
ماحنا اهو ...مش كفاية ساكتين
كمان بيقلبوا المواجع

والله يا شيخ معارفه ارد

ربنا لا تؤاخذنا بما فعله السفهاء منا

وانت اكيد عارف مين السفهاء

سلامى

غير معرف يقول...

انا من رايى ان احنا لازم نصلح نفسنا الاول وبعدين نقف مع بعض كلنا وبعدين نصلح انما شغل الرسميات والرسم والكلام اللى مش جايب همه ده مبحبوش

عروسة ننوسة يقول...

انتى ما حصلتش بجد....ايه البوست التحفة ده....لا دمك سكر واللهى

r يقول...

تصدق بقى يا ليكو انا اول مره اعرف هما هيقفوا ليه
مش متابعه التى فى تقريبا خالص
بسمع وقفه مصريه بس ما بكمل الاعلان
بس كويس بردوا الوقوف كله نشاط فعلا
وعادى اوى حكايه اليفط دى لو تفتكر موضوع او مشروع الضرايب والاعلانات اللى وصلت للقنوات الفضائيه الغير مصريه اصلا
عادى جدا فلوس ومش عارفين يرموها ولا يعملوا اعلانات ويفط
اكيد اليفط احسن ولا ايييه؟
بس فكره الاعداد الكبيره للمواليد دى حقيقه انا شيفاها تقريبا نادرا ما بشوف اسره سواء شباب لسه متجوزيين من 3 سنين مثلا وكبار شويه عندهم اقل من 3
دا فعلا حقيقى بيشتكوا من المصاريف وبردوا ما فيش فايده
الموضوع دا فكرنى بمحو الاميه قدامنا الجيل التالت على رأيك علشان المتعلمين
مش الجهله يفهوا اصلا الرساله
ليكو مدونتك دمها اخف دم شفته فى التدوين الصراحه
سلمت

كلام وخلاص يقول...

دمك خفيف جدااااااااااااا
احلى حاجة انك تكبر دماغك ماتركزش معاهم كتير التركيز يجيب الضغط والسكر والوقفة الكتير تجيب الدوالى وبعدين كل واحد ومصره هما بيكلموا عن مصر تانية غير بتاعتنا
بالنسبة لاحلام وقف التنفيذ اتعودنا عليها
no expectation no disopiontment
سلام

سفروتة يقول...

انا قرفت من الاعلانات دي خلاص


طب يعني طالما هما نيتهم حسنة كده وعندهم النية انهم يصلحوا...مش يشوفوا اس البلاوي دي كلها ايه وبعد كده يبقوا يخلونا نقف براحتهم ..


كلنا بندور في دايرة مغلقة

ومش هنوصل لمركز الدايرة دي الا بتغيير من كل النواحي وفي وقت واحد


...................

ليكو الواجب بتاعك عندي روح خده من مملكة السفاريت عشان تحله

يللا انت لسة مروحتش؟؟؟؟

بث تجريبي يقول...

السلام عليكم
بص دا ظلم بين بقى وتفرقة عنصرية بين المحافظات اشمعنى بقى قارهة المعز هى اللى فيها اليافطات دى والوقفات دى اشمعنى احنا مش عندنا غير يافطتين فى بلدى واحده على اول البلد والتانية على اخر البلد اللى على اول البلد لبابا حسنى وهو بيرحب بالزوار زى مايكون بيقولهم شايفكوا والتانيه على اخر البلد لبابا حسنى بردو بيشاور زى ما يكون بيقولهم فى داهبة


.........
نجى بقى للجد زى مانت قايل
هل اليافطات دى ممكن تأثر فى حد وايه اقصى نتيجة ممكن تجيبها يافطة على ما اظن اليافطات دى كانت ممكن تجيب نتايج رهيبة لو الناس شايفة نتايج ملموسة فى الواقع لكن الناس محطبة ومش عندها ثقة فى اى حاجه
..............

والنبى حد من بتوع قاهرة المعز يتبرع بانه يبعت لينا كام يافطة من دول وفى المقابل هنديه الصورتين اللى عندنا:ي

سلاموز

مش مهم اللي فات - سيبوني احلم باللي جاي