التسميات

الأحد، 20 أبريل، 2008

I have been tagged !


النهارده يا جماعه حدث تاريخي للتدوين العربي كله

حدث هيزلزل صاحبة الجلاله

في الطبعه الاولي والتانيه والتالته والمكيف كمان

انا النهارده ولأول مره جالي تاج

من

بنوته لاااااااااااااسعه

يعني

ساروره

يعني ابنة النهرين وكما تحب ان يقال لها : غزال الرافدين

في البدايه احب اشكرها وفنفس الوقت انا عاوز اطبق في زمارة رقبتها

لان التاااااج ده طلع صععععععععععععععب جدا

واصعب حاجه فيه انك مطلوب منك تتكلم عن 10 حاجات عن نفسك ودي قمة الصعوبه بجد

المهم عشان مطولش عليكم ندخل في التاج

- اذكر 10 اشياء عن نفسك


نمبر وان : اولا وعشان نبقى متفقين انا ليكوريكا (محمد نبيل) ، فاضلي شهر و16 يوم ويبقى عندي 21 سنه بالتمام والكمال وهبقى بالغ عاقل راشد تصح ملكية العقارات والحسابات البنكيه ان تقيد باسمي ،
ومش محتاجين طبعا اقولكم ان يوم 6-6-2008 يوم تاريخي بيتكرر كل سنه وهوا عيد ميلادي ، واضح من التاريخ قد ايه علاقتي بالجنس الاخر كويسه ، وده اللي كل سنه لازم انفيه نفيا باتاً وبجدد بيعة العداء بيني وبينها ... وكل سنه في نفس المعاد لازم اقول برضو اني بستقبل الهدايا الماديه والعينيه ولا اقبل الهدايا المعنويه علي الاطلاق ، امال ايه ده كيلوا المكرونه بقي ب 4 جنيه :)



نمبر تو : انا اعذب واعول ، اعذب يعني غير مرتبط على الاطلاق لا نفسيا ولا عاطفيا ولا بتنجانيا حتى ، واعول دي يطول شرحها ، لاني بعول اسرتين في الجامعه ، وبعول هموم ربنا وحده اللي عالم بيها الحمد لله ، وبعول مشاكل زمايلي اللي مبتنتهيش ، زائد اني عندي 4 بلوجات زي الفل بعولهم برضو :) ، وعندي عالفيس بوك 3 ولاد (سلمى وندي وطمطم ) ... اظن انا كده محتاج اعانه اجتماعيه :)


نمبر ثرى : الحمد لله انا صيدلي تحت الانشاء ، وطموحي كبير اوي في الدراسه والشغل ، دخلت الكليه برغبتي الحمد لله ، ومندمتش ابدا اني دخلتها وكل املي ان ربنا يجعلني وسيله اخدم بيها امة الاسلام يارب

نمبر فور : ساعات بحب الهدوء اوي ، وساعات مبقدرش اعيش فيه ، ساعات ببقي نفسي اكون لوحدي ، وساعات بموت لو قعدت لوحدي ، اصحابي كتير الحمد لله من كل جنس وصنف ولون وعمر ، بتمنى ميكونش حد زعلان مني منهم حتى لو انا عملت حاجه تضايق في يوم من الايام ... على فكره انا برج الجوزاء يعني (2 في 1) شخصيه مزدوجه حزينه سعيده ، اجتماعيه انطوائيه ، وبجمع كل التناقضات اللي ممكن تكون موجوده فحد .


نمبر 5 : كتير بيقولو عليا كئيب ، وفقر ونحس ، بس كل الناس بتقول عليا طيب ، المشكله اني لا كئيب ولا فقر ولا نحس ولا حتى طيب ، المشكله كلها اني بعمل كل حاجه بزمه وضمير ، لما بزعل بزعل لان في حاجه جرحتني بجد وباخد الموضوع علي اعصابي اوي وممكن مصفاش بسرعه ، ولما بفرح بفرح برضو بجد ، بس المشكله ان الفرح بقى قليل قوي عشان كده مبقتش ابان غير كئيب ... اما بقى النحس الليكوريكي فيمكن عندهم حق ، بس هيا مواقف لذيذه بتحصل ومليش اي ذنب فيها والله:)


نمبر 6 : احلامي ملهاش حدود ، وفنفس الوقت بسيطه اوي ، وفكل الأحيان (مع ايقاف التنفيذ) ... الحمد لله :(




نمبر 7 : ساعات بحس اني اقدر اعرف الانسان من اول نظره ، وساعات بحس اني (اهبل) ودايما بنخدع في الناس من مظاهرهم ... اعتقد اني (اهبل) في معظم الاحيان

:)))


نمبر 8 : انا اخ ل ولد وبنت وخال ل ولد وبنتين ... وابن لاطيب اب وام ... ربنا يخليهملي يارب وربنا يقدرني ارد اي شيء من افضالهم عليا .


نمبر 9
: اتمنى ربنا يكون راضي عني ، واني ابعد عن اي شيء في معصيه او بعد عن سراط ديننا الاسلامي المستقيم




نمبر 10 : دلوقتي اقدر ادعي علي ساروووووووووووره من قلبي :)))



2- اختر 5 اشخاص تهدى لهم التاج


اممممممممممم اختار مين ياربي :

المشكله اني اتأخرت في التاج وكل الناس اختاروا بعض

المهم اللي وقع عليهم الاختيار هما :

1-درش ... (مدونه) دوشه ولابد منها

2-حسناء ... (مدونة) شوية شخبطه

3- نو فور دانيمارك

4-آخر العنقود (انا اتخنقت)

5-يسري (ابتسم تبتسم لك الحياه)

كل واحد يهدي التاج ل 5 اشخاص ويبلغ صاحب التاج بانه نزل

بثـــــــــــ خلاص

هناك 18 تعليقًا:

لست أدرى يقول...

المشكله اني لا كئيب ولا فقر ولا نحس

--------------------------

بلاش هزار

دا انا شفت بعينى محدش قال

كل الناس اتكلمت على النحس الليكوريكى حتى انت وانا مصدقتش لغايه ما جربت

فاكر يا نبيل يوم عصير الفراوره؟؟؟؟؟؟؟؟

ليكوريكا يقول...

المشكله اني لا كئيب ولا فقر ولا نحس

--------------------------

بلاش هزار

دا انا شفت بعينى محدش قال

كل الناس اتكلمت على النحس الليكوريكى حتى انت وانا مصدقتش لغايه ما جربت

فاكر يا نبيل يوم عصير الفراوره؟؟؟؟؟؟؟؟

--------------------------

لا موش فاكر

وحتى لو فاكر هعمل نفسي موش فاكر

طب وانا مالي انا انك موش عارفه تمسكي الكوبايه وتوقعي علي نفسك
وبعدين منتي اللي استفزيتيني ساعتها

وآدي جزاة اللي ميسمعشي كلمه ليكو يقولها :)

سارورة يقول...

ههههههههههههه

بالنسبة لفقرة العيد ميلاد فانا تقريبا ماعرفش ليه يا ليكو عينى نغمشت وما شفتهاش احم احم

بالنسبة للنحس علشان خاطرك هعمل نفسى ماشوفتهاش ههههههههههه

بجد استمتعت باجاباتك جدا تسلم ايدك يا ليكو وكل تاج وانت طيب يا باشا

ليكوريكا يقول...

بالنسبة لفقرة العيد ميلاد فانا تقريبا ماعرفش ليه يا ليكو عينى نغمشت وما شفتهاش احم احم


----------------------------

وماله يا ساره

نقول كمان

الجمعه
6-6-2007
عيد ميلاد ليكوريكا الواحد والعشرون باذن الله

تقبل الهدايا الماديه والعينيه ولا تقبل الهدايا المعنويه على الأطلاق :)

اظن كده مفييييش حجه

آل عنيكي نغمشت آل

--------------------------

نورتي البلوج يا ساره وخليها المرادي علينا ، التاج الجاي لازم انا اللي ابعتهولك عشان انتقم انا بقى :)))

Yossry يقول...

انا مش فاهم اي حاجة:)

ليكوريكا يقول...

مش فاهم حاجه ليه يا يسري

الموضوع بمنتهي البياطه حاجه اسمها تاج

زي اسئلة كرسي الاعتراف كده

بيبعتها المدونين لبعض وبيجاوبوا عليها ويهدوها لغيرهم

يللا يا يوبي

مستني اجاباتك علي مدونتك المتفائله

ابتسم تبتسم لك الحياه :)

mostafarayan يقول...

مبروك التاج يا عم

ليكوريكا يقول...

الله يبارك فيك يا مصطفي

منور البلوج

يارب متكونش آخر مره :)))

Amany يقول...

الحمد لله.. اخيرا فهمت موضوعك:)

عموما متشكرة على اختيارك و انا كتبت العشرة نقط في بلوج صغنتوت شكلي هقلبه بعد كده مذكراتي...شكلها كده

يارب بس اكون فهمت الموضوع المرة دي صح

ليكوريكا يقول...

الحمد لله.. اخيرا فهمت موضوعك:)

عموما متشكرة على اختيارك و انا كتبت العشرة نقط في بلوج صغنتوت شكلي هقلبه بعد كده مذكراتي...شكلها كده

يارب بس اكون فهمت الموضوع المرة دي صح

-------------------------------

انا بقى اللي مبقتش فاهم حاجه فحاجه

موضوع ايه يا اماني

وبلوج ايه تاني

؟؟؟؟؟؟؟؟؟؟؟؟؟

Amanyِِ يقول...

لا انت اكيد بتهزر...انا قعدت النهاردة كله افهم..و الله العظيم اني كنت بفكر قبل امتحان الصيدلانيات على طول...و يوم ما اقول فهمت

اطلع ما فهمتش!!!

طب معلش خلليها عليك...انا اخدت تاج صح؟

ماله التاج ده بقى؟؟؟

ليكوريكا يقول...

لا انت اكيد بتهزر...انا قعدت النهاردة كله افهم..و الله العظيم اني كنت بفكر قبل امتحان الصيدلانيات على طول...و يوم ما اقول فهمت

اطلع ما فهمتش!!!

طب معلش خلليها عليك...انا اخدت تاج صح؟

ماله التاج ده بقى؟؟؟

------------------------------

اها يعني انتي مكنتيش فاهمه يعني ايه تاج

ودلوقتي فهمتي

وعملتي بلوج مخصوص للتاج ده

انا كده فهمت :)))

طب ايه لينك البلوج ده ؟؟؟

Monitor de LCD يقول...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Monitor de LCD, I hope you enjoy. The address is http://monitor-de-lcd.blogspot.com. A hug.

ليكوريكا يقول...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Monitor de LCD, I hope you enjoy. The address is http://monitor-de-lcd.blogspot.com. A hug.

-----------------------

u re surely welcomed in my small blog :)

thanks alot

Amanyِ يقول...

طب الحمد لله...هو ده لينك المدونة اللي عليهم العشرة بتوعي

و شكرا تاني عالتاج

http://zooom-in.blogspot.com/

ليكوريكا يقول...

العفو يا اماني

تمام كده :)

بنت مصريه يقول...

على فكره يا حماده
انا استشاريه نفسيه واسمحلى اتكلم عنك من خلال كلامك ده
اولا انت شخص شفاف قوى ملكش فى اللوع ولا امور النفاق والكزب عشان كده بتقول على نفسك اهبل شيل الفكره دى من مخك لانك طيب جدا وانت الصح صدقنى
ثانيا شاغل نفسك باللى حواليك وده ان دل يدل على انك مش انانى بالعكس انت غيرى بس نصيحه اهتم بنفسك شويه ان لنفسك عليك حق
يهمك رضاء ربنا ووالديك عنك
وده ف حد زاته ايمان بالله عز وجل وتقدير لدور من لهم افضال عليك
يعنى نقدر نقول مش ناكر للجميل

واخيرا وليس اخرا مش معنى ان فيك حزن وفرح انبساط وانطواء ان دى ازدواجيه بالعكس دا قمه الاتزان
لان اللى بيبقى فرحان وسعيد عالطول ومش على بعضه ف ده فى الغالب بيبقى هوس
اما اللى بيبقى عالطول منطوى وحزين فغالبا بيكون مكتئب
وعموما انا احييك لانك قدرت تتكلم عن نفسك ودى ف حد زاتها مهاره

ليكوريكا يقول...

على فكره يا حماده
انا استشاريه نفسيه واسمحلى اتكلم عنك من خلال كلامك ده
اولا انت شخص شفاف قوى ملكش فى اللوع ولا امور النفاق والكزب عشان كده بتقول على نفسك اهبل شيل الفكره دى من مخك لانك طيب جدا وانت الصح صدقنى
ثانيا شاغل نفسك باللى حواليك وده ان دل يدل على انك مش انانى بالعكس انت غيرى بس نصيحه اهتم بنفسك شويه ان لنفسك عليك حق
يهمك رضاء ربنا ووالديك عنك
وده ف حد زاته ايمان بالله عز وجل وتقدير لدور من لهم افضال عليك
يعنى نقدر نقول مش ناكر للجميل

واخيرا وليس اخرا مش معنى ان فيك حزن وفرح انبساط وانطواء ان دى ازدواجيه بالعكس دا قمه الاتزان
لان اللى بيبقى فرحان وسعيد عالطول ومش على بعضه ف ده فى الغالب بيبقى هوس
اما اللى بيبقى عالطول منطوى وحزين فغالبا بيكون مكتئب
وعموما انا احييك لانك قدرت تتكلم عن نفسك ودى ف حد زاتها مهاره

----------------------------

بجد يا بنت مصريه انا مش عارف اقولك ايه

انا سعييييييييييد جدا جدا بتحليلك ده

صحيح ياريت يبقي فيا ربع الكلام اللي انتي قلتيه عليا

بس برضو سعيييييد جدا واتمنى متكونش اخر زياره ولا اخر تحليل في البلوج هنا يارب

اشكرك مره تانيه وبالتوفيق باذن الله :)

مش مهم اللي فات - سيبوني احلم باللي جاي