وعدي النهار ، النهار اللي بيزورنا كل فين وفين ، اللي بيجينا بس واحنا فرحانين ، بس من امتي واحنا بنفرح ، ولو فرحنا بنفرح قد ايه ؟
كنت واخد عهد علي نفسي مكتبش حاجه حزينه او كئيبه تاني ، كنت واخد عهد علي نفسي اكون اقوى من نفسي ومن الظروف ومن المشاكل ، بس للأسف طلعت ضعيييييييف أوي ، والدنيا اهي هناك شايفها بتبصلي وبتضحك ... ضحكة المنتصر ... الضحكه العطشانه اللي بترويها بدموعي !
مش عارف واضح اني زي مبيقولوا عليا ، هعيش واموت كئيب ، بس صدقوني يا جماعه مش بمزاجي ، والله مبمزاجي ، يعني هوا في حد يحب يكون كئيب؟
ومين في الدنيا دي بيهوى الدموع
ومين بيرحل ومين بيستني الرجوع
ومين بيرسم وش حزنان اوي ...
الا وكان تعبان وقلبه كان موجوع ؟
رباعيات ليكوريكا ج- 3
مش عارف في ايه ... وليه ده كله ... صحيح احنا مش في جنه ... وصحيح الدنيا يوم حلو ويوم وحش ، بس مش عارف ... حاسس اني مش قادر ... مش قادر حتي ارفع راسي ... مش قار افضفض واقول باي حاجه ، حاسس اني كل مبتكلم بزود الجرح اكتر ، بحب ان الجرح ده عامل زي الجثه ولازم محدش يعرف مكانها غيري ، عشان بعد مدفنها تتنسي للأبد ... بس انا حاسس ان من كتر الجراح والاحزان ... معدش في مكان عالارض ادفنها فيه ... واملي الوحيد ان ربنا وحده اللي يساعدني اني ادفته للأبد ...
سرحت مع نفسي لحظه ، جالي هاتف اني اكتب موضوع عنوانه (الهروب الي الموت) ... بس منعت نفسي اني اكتب حاجه بالمعني ده ، مع اني فعلا بحس الاحساس ده وبستغفر ربنا واقول يارب ثبتني
كراهية تمني الموت لضر نزل بالإنسان:
لا يدعون أحدكم بالموت لضر نزل به ولكن ليقل : اللهم أحيني ما كنت الحياة خيراً لي ، وتوفني إذا كانت الوفاة خيراً لي
متفق عليه
انا دخلت عالبلوج وكتبت اللي جوايا ومش عارف انا بكتب ايه ولا بكتب ليه ، بس جايز ارجع بعد كام يوم
واقول الحمد لله اللي خرجني من اللي انا كنت فيه ده ...
بس انا عندي رجاء علي كل واحد يدخل الموضوع ده ... انه يدعيلي من قلبه ، يدعيني ربنا يهديني للخير في اي وقت واي مكان ، يدعيلي من قلبه ويدعي لكل شباب المسلمين
-------------------------------------------------------------------
عدّى النهار .. و المغربية جايّة
تتخفّى ورا ضهر الشجر
و عشان نتوه في السكة
شالِت من ليالينا القمر
و بلدنا ع الترعة بتغسل شعرها
جانا نهار مقدرش يدفع مهرها
يا هل ترى الليل الحزين
أبو النجوم الدبلانين
أبو الغناوي المجروحين
يقدر ينسّيها الصباح
أبو شمس بترش الحنين؟
أبداً .. بلدنا ليل نهار
بتحب موّال النهار
لما يعدّي في الدروب
و يغنّي قدّام كل دار
و الليل يلف ورا السواقي
زي ما يلف الزمان .. و على النغم
تحلم بلدنا بالسنابل و الكيزان
تحلم ببكرة .. و اللي حيجيبه معاه
تنده عليه في الضلمة و بتسمع نداه
تصحى له من قبل الأدان
تروح تقابله في الغيطان
في المصانع .. و المعامل .. و المدارس .. و الساحات
طالعة له صحبة .. جنود
طالعة له رجال .. أطفال .. بنات
كل الدروب واخدة بلدنا للنهار
و احنا بلدنا ليل نهار
بتحب موال النهار
لما يعدي في الدروب
و يغني قدّام كل دار
هناك ٣ تعليقات:
ربنا يكرمك يارب ان شاء الله ويهديك للخير دايما يلا ياسيدي مش خساره فيك الدعوه دي بس من قلبي والله متقلقش يعني ويارب يهدي كل شباب وبنات المسلمين في كل مكان يارب (امين يارب العالمين
يارب يكرمنا جميعا ... ويهدينا يارب ... يارب الخير دايما للمسلمين ... منور او منوره البلوج :)
انت مش كئيب والله يا ليكو انت ليه بتقول على نفسك كده .. انا مش عيزاك تكتب مواضيع كده تاني انت ناسي انك ليكوريكا متفائل ايديشن .. عموماً انت ان شاء الله هتبقى انسان ناجح وربنا يكرمك ويوفقك ويهديك للي فيه الخير ان شاء الله .. انا دي مش اول مرة ادعيلك من قلبي وان شاء الله ربنا يستجيب وتنسى بقه الأفكار دي علشان انت مش كئييييييييييب !!!
إرسال تعليق