التسميات

الخميس، 3 يناير، 2008

تحت اللحاف !



كل سنه وانتو طيبين والفين وتمانيه سعيده عليكم ومبتقاش زي الفين وسبعه خالص ، المهم احنا كل سنه بنقول يارب السنه اللي جايه تبقي احسن من السنه اللي فات ،وده حقنا ... حقنا اننا يبقي عندنا امل فبكره واننا نحلم انه هيبقي احسن ، لكن الواقع بيقول اننا ماشيين من سيء لأسوأ ، واللي بينكسر مبيتصلحش واللي بيتاخد مننا سواء اوطان او قيم ومباديء او احلام لسه متولدتش ... للأسف مبيرجعش ... بس برضو بنحلم وبندعي ... جايز احلامنا تتحقق وجايز دعانا يستجاب ...!

السنادي بدأت في غفله مني (حلوه في غفله دي) ، لاني كان عندي امتحان يوم 2/1 ... امتحان فارما وما ادراكم ما الفارما ، عرفت ان السنه خلصت لما بعتلي واحد من صحابي مسج عالموبايل وقاللي كل سنه وانت طيب وحط بعديها بين قوسين (ذاكر كويس يا ليكو عاوزين امتياز) ... طبعا يا جماعه هوا كان بيكلم (ليكو) ... وانا مليش دعوه بموضوع الامتياز ده خالص ... ساعتها بقى وكعادة كل سنه ببقي قابع (تحت اللحاف) وحاتط ايدي علي خدي والمذكرات بتبقي قدامي وتحت السرير وعلي الارض وعالمكتب اللي مبقعدش عليه خالص ده ، يعني هيا بتبقي فترة بيات شتوي لمدة شهر (تحت اللحاف) ، ويا سلام علي الاحساس بالدفا وكل اللي حواليك متلجين ... ولا منظري لما مامتي بتصحيني الساعه تلاته ولا اربعه وتقوللي قوم اقلع النضاره وشيل الكتب من حواليك وادخل نام ... او لما مامتي بتيأس مني وبتعمل الحاجات دي كلها وبتسبني نايم زي منا برضو (تحت اللحاف) :)

بس الغريب بقي في موضوع اللحاف ده اني مش أنا لوحدي اللي ببقي قابع تحت اللحاف ... وعلي غرار فيلم عمارة يعقوبيان -احنا مش لوحدنا ... احنا كتير أوي- (تحت اللحاف يعني) ... ولقيت كتير من زمايلي بيذاكروا تحت اللحاف وبيناموا تحت اللحاف وبيتكلموا في التيليفون برضو تحت اللحاف ... ومش زمايلي بس ده كمان عالنت لما عملت سيرش علي تحت اللحاف ... لقيت حاجات غريبه ...

اول حاجه لقيت ناس كتير كاتبين مكان اقامتهم في المنتديات (تحت اللحاف) ... ولقيت موضوع تاني ... (هل يختنق الحب تحت اللحاف ! ) ... مش بس كده ... دنا لقيت اسرائيل برضو ليها في موضوع (اللحاف) ده ... وكأنها ورانا ورانا حتي (تحت اللحاف) ... وكان عنوان الموضوع – فلسطين لاتحزني فكلنا (تحت لحاف) اسرائيل- ... ولقيت موضوع ادبي اسمه (تحت لحاف الليل) وموضوع كمان اسمه (تحت لحاف) اللهفه ! ...ومقال سياسي عن العراق اسمه (الي مناضلين تحت اللحاف) ... !

بجد يا جماعه انا مكنتش متخيل اساسا اني هلاقي نتايج خالص عن (اللحاف) ... وكنت فاكر انا بس اللي (اللحاف) حاجه مهمه بالنسبالي ... لكن ده طلع في ناس كتير متقدرش تعيش من غير اللحاف ... أو خلينا نقول في ناس مبتقدرش تعيش غير تحت اللحاف !

بص حواليك كده وشوف نفسك في المرايه ، واسأل نفسك سؤال سهل خالص (مش زي اسئلة الفيتو) ... انت عشت قد ايه تحت اللحاف ؟ ... وكام واحد تعرفهم عايشين تحت اللحاف ... ويا تري ايه نوع اللحاف بتاع جنابك ... يا تري لحاف قطن ولا فيبر زي بتاع تميمه ولا لحاف الليل زي بتاع الموضوع الادبي ولا لحاف لهفه وشوق زي الموضوع التاني ولا لحاف اسرائيل ولا لحاف شاش حتي وانت تحته عريان ومحتاج غطا !

بص حواليك هتلاقينا كلنا عايشين تحت اللحاف ، حتي المعارض واللي كاتب في صفحة حياته الاولي (لا للحاف) ... هتلاقيه في بيته بينام تحت اللحاف وبياكل تحت اللحاف ويمكن كمان فاتح شركه ومسميها (لحافكو للسياحه) ... !

بس الجميل ان لسه في ناس حوالينا مش عايشين تحت اللحاف ، ويمكن كمان ميعرفوش شكله ، الناس دول هما اللي بنقول عليهم فقرا ... او زي مبيقولوا المهندسين (تحت خط الفقر ... والسعاده عامله معاهم زاويه منحرفه) ... الناس اللي بيقول عليهم الصيادله اللي زيي ( عنده جفاف اديله محلول) ... وهما نفس الناس اللي بيدخلوا المستشفيات الحكومي وبيعاملهم الدكاتره (اللي عندهم ضمير وأكيد معندهمش لحاف) أحسن معامله ... وياريتها تيجي عالمعامله بس ... وياريتهم حتي بعد ميطلعوا يروحوا ويبقوا زي غيرهم تحت (اللحاف) ... للأسف هما بيطلعوا متغطيين عالجاهز ... بس مش بلحاف ... بيبقوا متغطيين بكفن وسايبيين (اللحاف) لأهل اللحاف !

والله يا جماعه انا فكرت ابعت طلب للريس واقوله ينزل (لحاف) لكل مواطن في الدعم نظرا للأهميه القصوى (للحاف) في البيت المصري !

بس رجعت فكلامي وقلت الريس مش ناقص هموم والله ، وبعدين يعني هنجيب منين قطن يكفي 70 مليون لحاف ... يللا بقي مش مشكله حكاية الدعم دي ... المواطن برضو لازم يعتمد علي نفسه ويجيب (لحافه) بعرق جبينه ... مهو علي رأي المثل الليكوريكي القديم ...

(اللحاف بيقولك اتصرف) !

كل سنه وانتو متغطيين ونايمين في العسل ... كل سنه وانتو تحت اللحاف !

وكالعاده هقرفكم برباعيات شاب تجاوزت خيالاته السحاب (حاسب يا ليكو لتخبط في القمر) ... يارب تعجبكم ...

-------------------------------------

في فجر كل صباح في ناس كتير نايمه

وفعز عز اليل في ناس كتير قايمه

وفي بشر نايمين من يوم منزلوا الأرض ...

وفي بشر صاحيين بس القلوب نايمه !

---

تحت اللحاف جايز يكون حبة دفا

واللي يخاف بكره هيــاخد بالقفا

واللي هيفضل طول حياته تحت اللحاف

ياريته مات أو حتي مالدنيا اتنفى !

هناك 4 تعليقات:

غير معرف يقول...

ياه فكرتني باللحاف يا ليكو ... ليه تعمل فينا كده يبني ... احنا اساسا نايمين من غير اللحاف ... تصبح علي خير

واحد صاحبك يقول...

مدونه جميله يا ليكوريكا ... بالتوفيق ان شاء الله

غير معرف يقول...

جميلة طبعا يا حج زي كل مرة وعندك حق الكل حاتلاقيه تحت اللحاف دلوقتي وهو بيزاكر وهو بياكل وغير كدة طبعا

ليكوريكا يقول...

شكرا ليكو يا جماعه ... كان نفسي كل واحد يكتب اسمه كنت هفرح بيه اكتر ... عموما نورتوني واتمني دايما تفضلوا منورني

مش مهم اللي فات - سيبوني احلم باللي جاي