التسميات

الأحد، 28 نوفمبر، 2010

مرفوض !




نفس القلم
ايام تعدي
شهور تفوت
ناس تعيش
ناس تموت
ولسه فيه طعم الالم

حسيت بوحده
رحت ليه
مع دمع عيني
جريت عليه

مبقتش عارف تفرق ايه
ويفيد بايه كل الندم .

نفس القلم - مليان ألم !

----------------------

وآدي الحكايه كلها
صحيت لقيتني بحبها
وباختصار - هرغي معاكم
واحكيلكوا عني وعنها !

انا شاب عمري
-نص يوم-
يدوب ده وقت فرحتي
والبحر ومعاه النجوم
تملي شايفين دمعتي !

مرفوض ...

مع اني من طين والعجين
مخبوز بشمس الصبح برضو

جوايا صافي ...
والقلب دافي ... مليان حنين
والموجودين ..
ياريت بامر وجودي يرضو !

مفروض بامر من السما
علي دنيا -حلوه-
حلاوه مُره !

بحلم ب-فرحه- انما
الفرحه خايفه تجيني مَره !

فوق السحاب -حلمي- الجميل
والمستحيل ... جنبي هنا !

قمرنا غاب -والليل طويل
ومفيش دليل ... علي حبنا !

مخنوق ياناس
مخنوق يا اهلي وصحبتي
مخنوق يا فرحي ودمعتي
مخنوق ...
يا كل حد رافض ...
انه يسمع قصتي !

او حتى حابب ...
يسمع انين عمري الحزين
ويواسي فيا !

هيفيد بايه
مالدنيا برضو هيا هيا

تملي -حلوه-
حلاوه مُره !

تيجي فوشي وتبتسم
اقوم اوام عليها واسال
امتى هيخلص الالم ...
تقوللي ابدا مش هيحصل !

قصه عناد بيني وبينها
والبعد زاد بيننا الجفا
انا منّي منها - اطردني منها
وتقول ده كان -شيء- واختفى !

لكني باقي مفيش مفر
وكل واحد فينا حر
اللي مرفوض يترفض
واللي رافض ...
ميحاولش انه يقبل

منا لما اشوفها بتبتسم ...
اروح اوام عليها واسال
امتى هيخلص الالم ؟
تقوللي ابدا مش هيحصل !

----------------------

اما هي ...

بحري الكبير
دايما بعيده قريبه
تبقي في ايدي ومش معايا

قاسيه عليا وطيبه
تصرخ في وشي ...
وتقول ده -طيب- من ورايا !

شمس الشروق
اللي بيها بشوف تملي -حلمي الجميل-
شمس الغروب
اللي بتمحي -المستحيل-

زي القمر
لأ ده القمر ...
هوه اللي يحلم انه يبقي زيها
ورقة شجر ...
تحضن خدودي واضمها

نسمة هوا وقت العصاري
رعشة ايدين من الكسوف
ورد الربيع فوق القصاري
صمت الكلام - نبض الحروف !

هي الامل .


-----------------------

تخيلوا ...
اما الامل يرفضني برضو ؟

شايفين شماته دنيتي !

قالتلي قابله قلتلك
-مش هيحصل- !

معاكي حق يا ست دنيا

لكني باقي مفيش مفر :(
وكل واحد فينا حر ...

اللي مرفوض يترفض
واللي رافض ...
ميحاولش انه يقبل .

مرفوض ...

مع اني من طين والعجين
مخبوز بشمس الصبح برضو

جوايا صافي ...
والقلب دافي ... مليان حنين
والموجودين ..
ياريت بامر وجودي يرضو !

محمد نبيل .
28-11-2010

الأحد، 14 نوفمبر، 2010

بلاش تهرب !









جت فجأه

رسالة حب
بلون الورد مكتوبه
ومش عارف ...
منين جتلي كده فجأه !

رسالة حب
بدون عنوان ...
ومن مجهول ؟

ومكتوب اسمي بالكامل ...
وعنواني ...
وافراحي واحزاني ...
حاجات فاتت ...
حاجات محفوره فكياني
وسايبنلي مكان فاضي ...
عشان امضي ...
وانا المسئول !

انا خايف ...
اجيب نضارتي واقراها
ومعرفشي ...

منا عقلي
في درس الحب والغرام بالذات
بيتهجى ...
حروف اسمه وبالعافيه بيترجى ...
من القلب يبطل دق
ومن وشه ميفضحهوش ...
ولا يعرق !

كما التلميذ انا قلقان ...
وخايف اقرا أول سطر ...
اضيع في البحر ...
وأموت غرقان !

ومش عارف ...
اسيب الفصل ... في اول درس
وافط السور اوام واهرب ؟

ولا عارف هروح علي فين ...
منا هرجع ...
واقول اقراها مش يمكن
تفرحني وقلبي حزين ؟

خلاص هقرا ...
وهفتح للهوا بابي
واكون مشغول
ويزعل مني اصحابي

واضيع مني
واروح لبعيد ...

وهتعذب ...
وانا نفسي فعذاب أكتر
دي نار الحب بتطهر
وبتبكي وبتسهر
وبتخليك كما المحتار
في نفس الوقت ...
حزين وسعيد !

بديت اقرا في اول سطر
لقيت مكتوب ...


--------------------

سلام من قلبي علي قلبك
واحشني حتى وانا جنبك
ومش هقدر اقول اسمك
لكني هقول ...

بحبك ...
بحبك ...
بحبك ...

بحب الصدق والطيبه
وببعت للهدوء نسمه
يافرحه بعيده وقريبه
يا أجمل حرف في الكلمه !

بحبك ...

بحب الجد قبل الود
بحب الورد ...

بحب الورد لو منك
ولو حتى مهوش منك ...
بحب الورد لو مني ...
عشان بكره يكون منك !

بحبك ...

بحب الحب عشان احساس
جمعني بيك يا اغلى الناس
بحبك ... ياللي فوق عالى
حقيقه عايشه فخيالي
يانجمه مستحيل تنداس !

بحبك ...

بلاش تهرب

دي نار الحب بتنور
طريق العمر لقلوبنا
تدفينا ...
تشوقنا ...
تقربنا !


بلاش تهرب
انا نفسي اكون جنبك
بلاش تهرب
بلاش تقسى علي قلبك
بلاش تهرب
بلاش بالخوف تعذبنا !


انا بكتب ومين عارف
كلامي مصيره لفين ؟
لقلبك ...
لأحلامك ...
ولا ...
يدوب للعين ؟!



--------------------

قريت ...
ولقيتني مش عارف ...
انا فرحان ؟
انا زعلان ؟
انا خايف ... !

انا بهرب ...
وقلبي شايفه بيقرب

كلام مسحور
رساله ...
والحروف من نور

كلام خلاني مش عارف ...
انا فرحان ؟
انا زعلان ؟
أنا خايف ... !

انا محتار
لقيت الجنه وسط النار

ومبعوتلي رساله
بلون الورد مكتوبه
وفيها رجاء ...
بلاش تهرب :( !

----------------------

محمد نبيل

مش مهم اللي فات - سيبوني احلم باللي جاي