التسميات

الأحد، ٢٨ نوفمبر ٢٠١٠

مرفوض !




نفس القلم
ايام تعدي
شهور تفوت
ناس تعيش
ناس تموت
ولسه فيه طعم الالم

حسيت بوحده
رحت ليه
مع دمع عيني
جريت عليه

مبقتش عارف تفرق ايه
ويفيد بايه كل الندم .

نفس القلم - مليان ألم !

----------------------

وآدي الحكايه كلها
صحيت لقيتني بحبها
وباختصار - هرغي معاكم
واحكيلكوا عني وعنها !

انا شاب عمري
-نص يوم-
يدوب ده وقت فرحتي
والبحر ومعاه النجوم
تملي شايفين دمعتي !

مرفوض ...

مع اني من طين والعجين
مخبوز بشمس الصبح برضو

جوايا صافي ...
والقلب دافي ... مليان حنين
والموجودين ..
ياريت بامر وجودي يرضو !

مفروض بامر من السما
علي دنيا -حلوه-
حلاوه مُره !

بحلم ب-فرحه- انما
الفرحه خايفه تجيني مَره !

فوق السحاب -حلمي- الجميل
والمستحيل ... جنبي هنا !

قمرنا غاب -والليل طويل
ومفيش دليل ... علي حبنا !

مخنوق ياناس
مخنوق يا اهلي وصحبتي
مخنوق يا فرحي ودمعتي
مخنوق ...
يا كل حد رافض ...
انه يسمع قصتي !

او حتى حابب ...
يسمع انين عمري الحزين
ويواسي فيا !

هيفيد بايه
مالدنيا برضو هيا هيا

تملي -حلوه-
حلاوه مُره !

تيجي فوشي وتبتسم
اقوم اوام عليها واسال
امتى هيخلص الالم ...
تقوللي ابدا مش هيحصل !

قصه عناد بيني وبينها
والبعد زاد بيننا الجفا
انا منّي منها - اطردني منها
وتقول ده كان -شيء- واختفى !

لكني باقي مفيش مفر
وكل واحد فينا حر
اللي مرفوض يترفض
واللي رافض ...
ميحاولش انه يقبل

منا لما اشوفها بتبتسم ...
اروح اوام عليها واسال
امتى هيخلص الالم ؟
تقوللي ابدا مش هيحصل !

----------------------

اما هي ...

بحري الكبير
دايما بعيده قريبه
تبقي في ايدي ومش معايا

قاسيه عليا وطيبه
تصرخ في وشي ...
وتقول ده -طيب- من ورايا !

شمس الشروق
اللي بيها بشوف تملي -حلمي الجميل-
شمس الغروب
اللي بتمحي -المستحيل-

زي القمر
لأ ده القمر ...
هوه اللي يحلم انه يبقي زيها
ورقة شجر ...
تحضن خدودي واضمها

نسمة هوا وقت العصاري
رعشة ايدين من الكسوف
ورد الربيع فوق القصاري
صمت الكلام - نبض الحروف !

هي الامل .


-----------------------

تخيلوا ...
اما الامل يرفضني برضو ؟

شايفين شماته دنيتي !

قالتلي قابله قلتلك
-مش هيحصل- !

معاكي حق يا ست دنيا

لكني باقي مفيش مفر :(
وكل واحد فينا حر ...

اللي مرفوض يترفض
واللي رافض ...
ميحاولش انه يقبل .

مرفوض ...

مع اني من طين والعجين
مخبوز بشمس الصبح برضو

جوايا صافي ...
والقلب دافي ... مليان حنين
والموجودين ..
ياريت بامر وجودي يرضو !

محمد نبيل .
28-11-2010

هناك ٥ تعليقات:

صمت المشاعر يقول...

بص بجد انا مش عارفه اقولك ايه

كلماتك فوق فوق فوق الرااااااااااااااائعه دا اول زياره للمدونه بس مش هتكون الاخيره باذن الله


بحييييييييييييييك بجد

Maha Shahen يقول...

كالعاده روعه يا ليكو
متفوق والله بتقول كلام يعجز اللسان عن وصفه وتقييمه بس هو اكبر من اى تقييم
بس الي بيعجبنى انى اقدر اغنيه ههههههه
مهو علشان استمتع وانا بقراه لازم اغنيه واتفتت فى الوقفات اللي تعجبنى ان مكنش كل وقفه روعه اصلا وحبتها جدا
خالص تحياتى لقلم مبدع بأفكار مريره بس جميله

إنسان || Human يقول...

بسيطة ..... وجميلة جداً

توهة يقول...

السلام عليكم كيفك اخ محمد
انا اعرفك من زمان انا شبح من ماضي قديم مش قديم قوي يعني : )
انا اول مره اعرف انك بتكتب وبتكتب حلو

الجزء الأولاني خالص حلو انا حاولت اعمله كوبي باست عشان اكتبه في التعليق طليعلي امن الدوله والتهديد والوعيد ايه يا سيدي جايبنا ترعبتا : )
علي العموم انت مش فاكرني اكيد
خليك بحرتك كده
اتمني انك تواصل كتابه لان البلوجات بقت فقرانه اليومين دول ونفسي اتابع كام بلوج حلو كده

تحياتي

Mona Shereif يقول...

امتى هيخلص الالم ؟
تقوللي ابدا مش هيحصل !




اه منها هى دايما كده


وحشنى الكلام الجميل بتاعك
تسلم ايدك

مش مهم اللي فات - سيبوني احلم باللي جاي