التسميات

الأحد، 14 نوفمبر، 2010

بلاش تهرب !









جت فجأه

رسالة حب
بلون الورد مكتوبه
ومش عارف ...
منين جتلي كده فجأه !

رسالة حب
بدون عنوان ...
ومن مجهول ؟

ومكتوب اسمي بالكامل ...
وعنواني ...
وافراحي واحزاني ...
حاجات فاتت ...
حاجات محفوره فكياني
وسايبنلي مكان فاضي ...
عشان امضي ...
وانا المسئول !

انا خايف ...
اجيب نضارتي واقراها
ومعرفشي ...

منا عقلي
في درس الحب والغرام بالذات
بيتهجى ...
حروف اسمه وبالعافيه بيترجى ...
من القلب يبطل دق
ومن وشه ميفضحهوش ...
ولا يعرق !

كما التلميذ انا قلقان ...
وخايف اقرا أول سطر ...
اضيع في البحر ...
وأموت غرقان !

ومش عارف ...
اسيب الفصل ... في اول درس
وافط السور اوام واهرب ؟

ولا عارف هروح علي فين ...
منا هرجع ...
واقول اقراها مش يمكن
تفرحني وقلبي حزين ؟

خلاص هقرا ...
وهفتح للهوا بابي
واكون مشغول
ويزعل مني اصحابي

واضيع مني
واروح لبعيد ...

وهتعذب ...
وانا نفسي فعذاب أكتر
دي نار الحب بتطهر
وبتبكي وبتسهر
وبتخليك كما المحتار
في نفس الوقت ...
حزين وسعيد !

بديت اقرا في اول سطر
لقيت مكتوب ...


--------------------

سلام من قلبي علي قلبك
واحشني حتى وانا جنبك
ومش هقدر اقول اسمك
لكني هقول ...

بحبك ...
بحبك ...
بحبك ...

بحب الصدق والطيبه
وببعت للهدوء نسمه
يافرحه بعيده وقريبه
يا أجمل حرف في الكلمه !

بحبك ...

بحب الجد قبل الود
بحب الورد ...

بحب الورد لو منك
ولو حتى مهوش منك ...
بحب الورد لو مني ...
عشان بكره يكون منك !

بحبك ...

بحب الحب عشان احساس
جمعني بيك يا اغلى الناس
بحبك ... ياللي فوق عالى
حقيقه عايشه فخيالي
يانجمه مستحيل تنداس !

بحبك ...

بلاش تهرب

دي نار الحب بتنور
طريق العمر لقلوبنا
تدفينا ...
تشوقنا ...
تقربنا !


بلاش تهرب
انا نفسي اكون جنبك
بلاش تهرب
بلاش تقسى علي قلبك
بلاش تهرب
بلاش بالخوف تعذبنا !


انا بكتب ومين عارف
كلامي مصيره لفين ؟
لقلبك ...
لأحلامك ...
ولا ...
يدوب للعين ؟!



--------------------

قريت ...
ولقيتني مش عارف ...
انا فرحان ؟
انا زعلان ؟
انا خايف ... !

انا بهرب ...
وقلبي شايفه بيقرب

كلام مسحور
رساله ...
والحروف من نور

كلام خلاني مش عارف ...
انا فرحان ؟
انا زعلان ؟
أنا خايف ... !

انا محتار
لقيت الجنه وسط النار

ومبعوتلي رساله
بلون الورد مكتوبه
وفيها رجاء ...
بلاش تهرب :( !

----------------------

محمد نبيل

هناك 6 تعليقات:

غير معرف يقول...

مهما هقول مش هديلك حقك فيها
حلوة اوي يا محمد كلمات واحساس وتعبير
ربنا يباركلك ويباركلك في موهبتك

غير معرف يقول...

كلام اكتر من رائع واحساس يوصل للقلب عل طول
مشاء الله عليك يا محمد
عيد سعيد عليك وكل سنة وانت طيب

ليكوريكا يقول...

وانت طيب ...

مين معايا بقى ؟! :)

غير معرف يقول...

انا اول كومنت
ياسمين ابوالدهب :)

غير معرف يقول...

أكيد تعلمت اللعة العربية عند شاعر قدير 00 مش كده ولا أيه من الشيخ جاد الحق

ليكوريكا يقول...

علي فكره - دي عاميه مصريه :) - نورتوني .

مش مهم اللي فات - سيبوني احلم باللي جاي