التسميات

الأحد، ١٤ ديسمبر ٢٠٠٨




مبقتش حاسس بالحياه
مبقتش عايش دنيتي
والآه بقت ألف آه
والحزن مالي خطوتي !

اما السبب
يادي العجب !
مليون سبب
مقدرش اقول منهم سبب !!!

احساسي اني
ضعيف قاتلني
وهعمل ايه ؟

دنا حتى بفرح
غصب عني
وفرحتي مُرّه ليه ؟

بحلم ببكره
وخوفي خلى الحلم وهم
والفرح ذكرى
ومعدشي فاضل الا همّ.

اما السبب
يادي العجب !
مليون سبب
مقدرش اقول منهم سبب !!!

حتى لأخويا
حتي لحبيبي
حتي لأقرب حد ليا ...
اصل السكوت قدري ونصيبي .

واديني عايش وسطكم
بفرح عشان فرحكم
وازعل لحزني وحزنكم
واشتاق لنومه فحضنكم
ومسيري ابعد عنكم
واروح بعيد ...
وانساني وانسي اسمكم .

اما السبب
يادي العجب !
مليون سبب
مقدرش اقول منهم سبب !!!

:(
(مقدرش اقول ... ليكو 2008 )




---------------------------------------------------

سالني واحد زميلي

لأ مش زميلي --- اكتر بكتير من اخويا ---

ايه اللي مضايقك ؟

معرفتش ارد عليه

سالني عن حاجات كتير ... فعلا مضايقاني

بس مش كانت هيا سبب الحاله اللي انا فيها

والسبب الحقيقي مينفعش اقوله لاي بني آدم علي وجه الارض

حسيت انه اتضايق مني ... وعنده حق

خصوصا لما قاللي خليك براحتك وسالني يعني انت عاوز الناس يكونوا معاك ازاي ؟

بصراحه مش عارف

بس كل اللي محتاجه ان الناس اللي بتحبني بجد تكون جمبي

وتدعيلي ربنا يقضيلي حاجتي اللي ميعرفهاش غيره

اتمني كلنا ندعي لبعض من قلبنا

واتمني محدش يزعل مني بجد .

ليكوريكا


14-12-2008

هناك ١٥ تعليقًا:

just me يقول...

احسن حته عجبتنى وزعلتنى برضه

ومسيرى ابعد عنكم
واروح بعيد
وانسى كمان اسمكم


وربنا يخليلك صحبك او اخوك اللى هو يسرى وتفضلو اخوات طول عمركم

EMMY BABY يقول...

هى بجد تحفة

بس برضه مش قادرة استحمل كلماتها بجد مش عارفة ليه

لعلمك والله انا مريت بنفس حالتك وكنت بعانى من حاجة مقدرش اقولها لاى حد فعلا بس ياما تقدر تتغلب عليها لوحدك ياما تقول لحد بتثق فيه جدا علشان يساعدك او لجرد الراحة

وصارح نفسك وشوف انت مش عايز تحكى ليه هل لانك كنت فيها غلط او لانك خايف تخسر حد لو اكلمت او لاما هتخسر نفسك لو اكلمت

بس احب اقلك حاجة بلاش تفكر كدة وفكر ان الناس كلها ممكن تمر بنفس حالتك

ياريت تدخل مدونتى ولو دقيقيقة

تحياتى
ايمى

Yossry يقول...

فعلا يا ليكوريكا زي ما قولتلك قبل كدة وكمان زي ما ايمي قالت

لازم تحاول تحكي لأي حد وصدقني بجد هترتاح اوي

ربنا يريح بالك ويحققلك امنيتك وكل امنياتك

(علي فكرة يا جماعة انا كنت بقولو كدة علي ما اعتقد:))

تحياتي يا ليكو الغامض

kmt يقول...

السلام عليكم ورحمة الله وبركاته

عارف ايه اكتر حاجة بتخليني ديما ازور المدونه دي انك بتكلم بلساني

اللهم طمن قلبه وأرح باله
آمين

تحياتي
الي اللقاء

Eman Henaish يقول...

ربنا يقضيلك حاجتك

صعب أوي انك تكون مشحون بحاجات مضيقاك

وفي نفس الوقت مش عارف تشارك حد فيها

وبتحتفظ لنفسك بأحزانك

ربنا معاك

غير معرف يقول...

ياه يا ليكو

كلمات جميله اوي

صحيح حزينه بس عجبتني اوي ومستني اوي يمكن عشان دي حالتي اليومين دول وطبعا عشان احساسك العالي خلاها توصلني اوي

عجبتني اوي الكلمات دي::

احساسي اني
ضعيف قاتلني
وهعمل ايه؟؟

انا حتي بفرح
غصب عني
وفرحتي مره ليه؟؟

الله عليك وعلي قلمك بجد

بجد دمت مبدع يا ليكو


بس بلاش ومسيري ابعد عنكم وانسي كمان اسمكم
دي مش حياه يا ليكو

حاول تخرج من همومك ومشاكلك
وتندمج وسط الناس
يمكن تلاقي وسطهم حضن يدفيك
ولا حتي حد يخاف عليك

وياااااااااااااارب يفرج كربك
ويسعدك يا ليكو
:)

تحياتي

نـــــور يقول...

:((

زعلتنى اوى على فكره
مش هقولك ليه كده لانك مش هتقول
انما اللى عايزة اقولهولك ربنا يقضيلك حاجتك يارب ويسعد قلبك

زيارتك خلتنى افرح انك لسه بتتابع وموجود لانى مكنتش بحب ادخل مدونتك وانا حاسه انك هاجرها :(

ربنا يفرج همك يارب
كل سنه وانت طيب

حاسوباتيه يقول...

كلماتك صعبه وربنا معاك وتتحقق الحاجه الي نفسك فيها يارب

princess يقول...

مش كل الحاجات اللى جوا الانسان تتقال حتى لاقرب القربين
مش عشان موضوع ثقة بس ساعات الواحد بيقى مش عارف يعبر او مش عايز يتكلم
او حاجة خاصة جدا جدا مينفعش غير الانسان نفسه يعرفها
مطلوب من الناس القريبة انها تدى سبورت حتى لو مش عارفى حاجة
كفاية وجودهم
تحياتى

ANGHAM ALLAM يقول...

كلمات جميله اوي رغم الحزن اللي موجود فيها

بجد جيت عالجرح يا ليكوريكا

كلمات في منتهي الروووووووووووووووعه


دمت مبدع
يا جميل

تحياتي

بنت مصريه يقول...

انتكده على فكره قلقتنى عليك
الشعر حلو قوى
بس معناه صعب قوى مالك يابنى
فيه ايه
ربنا معاك ف ازمتك
ويقضيلك حاجتك اللى ميعرفهاش غير ربنا بس نصيحه منى حاول تفضفض لحد عشان تريح نفسك

قلب ينبض لله يقول...

ماهو لو مليون سبب انت ممكن تقول منهم شوية للناس اللي بيحبوك
لكن الحاجة اللي مدايئاك وماحدش يعرفها غير ربنا فا أن شاء الله هايقضيهالك وهايخرجك من اللي انت فيه طول ما انت بتدعيه
وانا معاك في اللي قولته اننا كلنا ندعي لبعض بظهر الغيب وربنا يفرج كرب المسلمين وكرب كل الناس

انما بئي بالنسبه للشعر اللي انت كتبه
فهو فعلا شعر ليكو
بجد شعر جميل اوي وبيوصل بسرعة كعادة كل اشعارك:)

Maha Shahen يقول...

ربنا يصلح ليك الحال وييسر لي الامور
ادعى لله وقول
اللهم آنسنى بقربك واغننى عن العالمين ومش معناها زي ما ناس كتيره فاهمه اننا بندعى بالموت ابدا
بس في القرب من ربنا خير كتير وراحة نفس وسكينه ومش من السهل اننا نلاقيها
بس سهل جدا نقرب لله او علي الاقل نحاول

ومتزعلش من صاحبك لأنه لو بيحبك يبقى دا رد فعل طبيعى منه لأنه عايز يطمن عليك ويطمن قلبه كمان

ولا المفروض صاحبك يزعل منك لأن حالك كتير بيحصل لكل حد فينا في يوم
تبقى زعلان وبرغم ملايين الهموم متلاقيش ولا هم تعلق عليه سبب الخنقه اللي صيباك
ألجأ لله مفيش غيره هيقعد يساعدك بجد ولا صديق ولا حبيب ولا قريب راح ينفع مفيش الا الله فى الحاله دي
هو الأول والاخر فعلا واحنا مجرد بنساند بعض علشان نكمل الطريق بس هو الاساس سبحانه وتعالى
بندعيلك من كل قلوبنا ربنا يسعدك ويرضا عنك ويوفقك
والكلمات رائعه وجميله بس عمرنا ما هننساك حتى لو بطلت تسمعنا او نستنا

بنت الماضي يقول...

نبيل
حبيت بس احييك على كتاباتك الاخيره كلها بلااستذناء حساسه اوي اوي بجد تفوقت على نفسك ماشاء لله
تاني حاجه بقى اخر جزء بتاع مجروح ومش عارف احكي
اعتقد ان الحكاوي نص الطريق للراحه
احكي ومتخفش ومتتكسفش وماتتهزش وما تتألأمش
ومش عيب تبان ضعيف ولا مكسور ولا مجروح ولا حتى قليل الحيله قدام صحابك
متخفش واتكلم
اتكللللم

غير معرف يقول...
أزال أحد مشرفي المدونة هذا التعليق.

مش مهم اللي فات - سيبوني احلم باللي جاي