التسميات

الأحد، 14 أكتوبر، 2007

عيد سعيد ... فكر جديد !


كل سنه وانتو طيبين وبالحب عايشين ... كل سنه والدنيا حلوه فعنيكم ، كل سنه وانتو بخير وسلام وامان ، كل سنه واحلامكم جميله ونفوسكم صافيه ونبيله ، كل سنه وانتو ناجحين في حياتكم ، كل سنه وانت محققين ذاتكم وقريبين من كل اللي بتتمنوه ...

العيد السنادي بالنسبالي مختلف عن كل الاعياد اللي قبل كده ، حاسس اني قادر أكون اللي انا بحلم بيه ، حاسس ان بكره عيد مش عشان بس الحج والأضحيه وغيره ، حاسس انه عيد زي كل يوم بيعدي عليا بعد مقدرت اخرج من اصعب فترات
حياتي ، بعد مبقيت اقوي بكتير من الأول ، بعد مبقت شهرتي ليكوريكا الكئيييييييب ، بعد مخلصت الجزئين بتوع الرباعيات بتوعي (دعوه للحياه)

انا حاسس براحه الحمد لله لاني لأول مره قريب من ربنا صحيح محتاج مساعدة ربنا اني اكون اقرب واقرب ومحتاجه جدا انه يثبتني علي اللي انا فيه ، العيد عيد بجد لاني قدرت أحب ، أحب نفسي واحب كل اللي حواليا ، حتي اللي ظلموني حتي اللي مكنوش قد ثقتي فيهم ، حتي اللي فعز مكنت بموت مكنوش حاسيين بيا ، حتي اللي كنت بحبهم وهما ولا هنا ، بحب الكل لاني عرفت ان الحب هوا الحياه وان الحياه هتبقي سعيده بس لو فيها حب !

انا محتاج ربنا يساعدني في الفتره الجايه خصوصا اني في اصعب سنه في كلية صيدله والامتحانات صعبه والعملي بتاعي كان وحش الحمد لله ، ووللأسف انا مش مذاكر كويس ولا مستعد كويس ، بس انا بدعي ربنا يقدرني اعمل اللي عليا واتمني من ربنا انه يهديني للصح ويوفقني في اصعب شهر هيمر بحياتي ، لاني متخيل اني لو عديت الشهر ده علي خير ، هبقي فعلا قدرت اني اقف علي رجلي من تاني ، وابقي فعلا (ليكوريكا متفائل ايديشن) عن جداره واستحقاق :)

انا النهارده كتبت الموضوع ده عشان افضفض ليكم وعشان اغير الفكره اللي الناس خدتها عني خصوصا ان العيدين اللي فاتو كتبت موضوعين اكئب من بعض (عيد بأي حال عدت يا عيد) ... (حد شاف عيد) ... واللي لما بصيتلهم النهارده ابتسمت بسمه حزينه ... بسمه مستغربه ، مستغربه من حالي زمان ، ومن حالي دلوقتي !


انا النهارده بقول لكل واحد حاسس ان في فقلبه حزن ، حاسس انه خايف ، او حتي قلبه مجروح ، كل واحد البسمه بعيده عن عينيه ، كل واحد مش حاسس ان بكره عيد ، وبيقول زي المتنبي – عيد بأي حال عدت يا عيد - ، واللي بيندم علي حاجات جميله ماتت في الناس من حواليه ، كل واحد قافل نفسه علي ذكريات الماضي ، كل واحد يأسه قتله وخلاه عايش ميت ، كل واحد حزين علي امته وعلي الحال اللي وصلت ليه ، كل واحد بعيد عن ربنا وبعيد عن الحياه وعن الحب ...

بقولهم بكره فرصتكم ... فرصتكم انكم تقربوا من نفسكم أكتر، انكم تحيوا قلوبكم اللي ماتت ، وتقتلوا ياسكم بصبركم وكهرهكم بحبكم ... بكره فرصتكم عشان تجددوا رخصة حياتكم وتقولوا لأ للشيطان ولأ للكره ولأ للياس ولأ للضعف ولأ لأي حاجه بتسرق الفرحه ولأ لأي حاجه خلتنا منقدرش نحقق أحلامنا ... بكره فرصتكم انكم تحبوا بجد ...

بكره الصبح اصحي مع الشمس وروح صلي العيد ، قول الله أكبر كبيرا والحمد لله كثيرا ، قولها بقلبك ، وافتكر قد ايه نعم ربنا عليه وقد ايه انت بقالك كتير مشكرتهوش علي اي نعمه من نعمه وعلي الرغم من كده هوا بيرزقك ويساعدك ويقف جنبك ، سلم علي جيرانك قرايبك اصحابك ، حتي اللي حسيت انهم سبب تعاستك وسبب كل الجراح اللي انت فيها ، روح وابتسم في وشهم من قلبك ، حبهم ... ايوه حبهم ، جايز اللي مقدرش يصلحه كرهك ليهم يصلحه الحب :)

ولو هتروح تزور قرايبك اعرف انك كدا بتعمل شيء عظيم وبتصل رحمك وخلي مرواحك ليه بنية انك تقرب اكتر من ربنا وصدقني انت متعرفش الفرحه اللي بتدخل في قلب اي مسلم لما بيزوره قرايبه ... وافتكر انت بتبقي حزين قد ايه لما بتبقي قاعد في البيت ومحدش بيسأل عليك ...

لو عندك اخوات صغيرين يبقي لازم تجيبلهم هدايا ، صدقني مجرد نزولك الشارع وفرجتك علي الالعاب وتقعد تنقي لاختك الصغيره عروسه واخوك مسدس او بمب ، كده انت مش بتقلل من نفسك ولا بتعمل حاجه هايفه ... انت بتهدي ليهم الفرحه ... واذا كان طباخ السم بيدوقه ... ايش حال بقي اللي بيهدي الفرحه للناس ؟!

متنساش تصلي ركعتين شكر لله علي كل شي ، ركعتين شكر علي انك بتشكره دلوقتي ، علي انه ادالك الفرصه انك تفرح ، واداك قلب تحب بيه غيرك ، شكر علي نعمه الكتير عليك ، وادعي ربنا يقويك علي مصاعب الحياه ، وادعيله ينسيك الهموم والدنيا من حواليك ، ادعيله يغفرلك ذنوبك واتأكد انه هيغفرهالك مهما كانت كبيره او عظيمه ، بس اهم حاجه انك تسجدله بقلبك ولو قدرت تبكي ابكي وصدقني هتحس براحه ما بعدها راحه ...

ولو لسه والدك ووالدتك موجودوين ، روح وعيد عليهم ، وميكنش كل همك انك تاخد العيديه وبس ، روح وهززر معاهم ولو مكسوف تهزر ، روح واقعد معاهم وبص فعنيهم ، لان مجرد نظرك ليهم صدقه ... تخيل ؟! ... صدقني الاب والام نعمه مبنحسش بيها الا بعد مبتضيع مننا ، ربنا يخليهملك وميحرمكش منهم ابدا ...

آخر حاجه لو خرجت مع اصحابك حاول تبعد عن اي حاجه تبعدك عن ربنا ، حاول يكون شكرك لربنا علي الفرحه اللي وهبها ليك بطاعته والبعد عن معاصيه ... وربنا يهدي شباب المسلمين ويبعدهم عن الحرام والضلال ...

في النهايه انا هكتبلكم جزء من الرباعيات اللي انا كاتبها واتمني انها تكون هديه مقبوله مني ليكم كلكم في عيد الأضحي ويارب اكون قدرت اقول حاجه في الموضوع ده تغير في اي حد فينا اي حاجه ...

إحلم يكون الخير في الدنيا من حواليك
وارسم سما للطير وسحابه راح ترويك
واما القلوب تدبل ... اسقيها كلمة حب
ده الحب لو كلمه ... لوحدها تكفيك !

الضحكه ليه تخبيها مع انها بتحييك
والدمعه ليه مخليها محبوسه جوا عنيك ؟!
مالحب ليه خايف ده الحب خلاني ...
أعرف خبايا الكون وآجي اقولها ليك !

ارسمني وش ... وخلي فيه البسمه باينه
واهديني ليك ... واحضني لو حتي ثانيه
ولو السعاده جت فقلبك ... يبقي تقدر
ترسمني ... كل يوم رسمه تانيه !

غني يا قلبي كمان ... سمعني غناويك
واهدي لكل الكون ... الحب لو فيك
وان كان في حبة حزن ... اوعاك تغنيلي
ده الحزن لو غنوه ... تبقي الجراح مزازيك !

نصيحتي ليا وليك ... متخفش من بكره
ولو الدموع فعنيك ... خلي الدموع ذكرى
وحب كل الناس ... الدنيا هتحبك
ده اللي يدوق الحب ... مستحيل يكره !

ليكوريكا

هناك 4 تعليقات:

غير معرف يقول...

وهوا في حاجه دلوقتي اسمها عيد ؟! ... كل سنه وانت طيب يا ليكو

غير معرف يقول...

بموت فكأبتك يا نبله
بس هو انت طول عمرك شحنت قبل كده يا شحاات يا كئيب

no4denmark يقول...

بموت فكأبتك يا نبله
بس هو انت طول عمرك شحات
بتشحن امتى ده ...مش انا اللى علطول بحولك رصيد :)
يا شحات يا كئيب
بس بدايه جامده وكئيبه من شخص يتمتع بجينات كئابه متطوره
بس تعرف ان البلوج ده هيبقى جامد جدا قدام وهيبقى من احسنها والله لو نزلت فيها كل حاجه خاصه بيك


بكبك يا كئيب والله العظيم برغم انك بتبقى واطى ساعات وندل ساعات تانيه بس بردو بحبك معرفش ليه...وبرغم انك عاوز تعلم عليا .." الكلمه دى اللى مش هديهالك طول منا عايش يا زباله " الا انى بردو ما اقدرش على بعدك يا حووووبى :)

ليكوريكا يقول...

شكرا يا محمد وشكرا لكل اللي ردوا ... منورين البلوج

مش مهم اللي فات - سيبوني احلم باللي جاي