التسميات

الثلاثاء، ١٧ نوفمبر ٢٠٠٩

يا مصر قرفنا -بس- بنحبك !




لا اعرف اهو شعور جميل ام شعور باللا شعور !

فبعد عملية "استصال قلبك"

كيف يمكنك ان تقول

"انا زعلان "

او حتي

"انا هطير من الفرحه"


مجرد استهلال -

او فلتسميه ان شئت : استهبال :)


----------------------------------------------

حينما يسألك احدهم سؤالاً ... حتى وان كان غبياً "اقصد السؤال طبعا" :)

فلابد ان يكون هناك اجابه ... وطالما ان هناك اجابه ... فعلى ما اعتقد ... لابد ان تقال !

تخيلوا معي ان مقابله شخصيه مع دكتور محترم في شركة ادويه كبيره

ويسألني ... انت الانجليزي بتاعك كويس ؟

"طبعا محدش ضامن حاجه اليومين دول ومن حقه يطمن عليه ليكون عنده انفلونزا الحروف ولا حاجه"

ارد في ثقه : الحمد لله .

يستطرد وبكل برود : طب سبيل "تهجي" ... بايسيكيل "عجله" !!!

تهجيت الكلمه المذكوره بكل ثقه مبرهنا بان انفلونزا الحروف كلها اشاعات واهيه هدفها "بلبلة" الرأي العام

بل وبعد ان انتهيت قلت له وبكل لماضه " علي فكره يا دكتور ... بيدلعوها وبيقولولها "بايك" :)

-----------------------------------------------------------

معلش يا جماعه دول كلمتين كنت مزنوق فيهم ولازم كنت اقولهم قبل مبتدي الموضوع

الموضوع موضوعي - واللي مش عاجبه يشتكي للفيفا ... هه بقى !

------------------------------------------------------------

انا متضايق !

اه والله العظيم متضايق !

مهو يا اما احنا شعب عنده شيزوفرينيا

لاما ولا مؤاخده احنا شعب اهبل

لاما بقى هيا تكون عاملالنا عمل !

مهو مش معقول بعد كل اللي بيحصل ده

من اول الحدث الاكبر طبعا وهوا كوني لحد دلوقتي بشتغل"عاطل"

لحد بقى طابور العيش

وانفلونزا الخنازير اللي اول مجتلنا خفنا عالخنازير فموتناهم ... عموما هما اكيد استريحوا من القرف اللي هما كانوا عايشين فيه !

وانفلونزا الطيور "ولا عزاء للبغبغانات اللي بينشوفهم في الفضائيات"

ولا القطارات اللي لو ناوي تركب واحد مهم يبقي لازم لازم ... تبعت ماسج للجيرل فريند بتاعتك وتقولها انك كنت بتخونها مع مراتك !

معلش يا جماعه محدش ضامن عمره :)

ومحكيلكمش بقى عالمواصلات ولا علي ازمة الزبالين

ولا على ساعة "البلاي ستاشن" - تخيلوا ساعة البلاي ستاشن في "اكشن" علي الاجهزه الجديده بقت ب "خمسه جنيه"

يعني عادل امام كان عنده حق لما قال "الساعه بخمسه جنيه والحسابه بتحسب"

طب بزمة اهاليكم اللي قرفانين من شكلكم

واحد عاطل "غير مدخن" زيي يعمل ايه ؟

يروح يقعد في شيل اوت
"كافيتيريا فيها دور لغير المدخنين"
ويدفع في القهوه خمسه جنيه ... ولا يروح يلعب بلاي ستاشن برضو بخمسه جنيه !

اكيد دلوقتي عرفتوا سر الجروب اللي عالفيس بوك الي اسمه "الخمسه جنيه معدن ليه؟! "

اقولكم انا ليه :

فاكرين الربع جنيه ؟

اول منزل كان لسه ليكوريكا مولود ... واول مليكوريكا اتولد مقلش واء زي باقي البني آدمين

تؤتؤ ...

كان نازل بيغني وبيقول :

انا اسمي ليكوريكا متقولشي يعني ايه
دنا ولّدت الفرخه وخرمت الربع جنيه !

"ملحوظه الفرخه بتبيض :) "

بس واضح ان في مؤامره ضد ليكوريكا

بدأت بالجنيه المعدن والنص جنيه المعدن برضو

بس انا من هنا ... من علي الكي بور ببعت تهديد رسمي

ان لو الخمسه جنيه بقت معدن "هخرمها" ايوووون "هخرمها"

وقد اعذر من انذر بقى !

----------------------------


انا عارف اني رغاى

وانتو كمان عارفين اني رغاي

وبرغم كده انا مستمر في الرغى

وبرغم كده انتو مستمرين في القرايه

"قمة الرخامه المتبادله :) "


---------------------------------

المهم نرجع لموضوعنا

هوا كان ايه بس الموضوع ؟

اه ساعة البلاي ستاشن اللي بقت بخمسه جنيه ؟

وشيل اوت اللي القهوه فيه بخمسه جنيه برضو ؟

وشاب غير مدخن زيي ... عمره مدخن في حياته غير "غير السحابه السودا" يعمل ايه دلوقتي ؟

يتمشي في الشارع مثلا ؟

يا جماعه مينفعش

والله ياناس مينفع

مهو متحطش البنزين جنب النار وتقول غض بصر

وبعدين دحنا لو قلنا نظره اولي مش هنخلص ... زائد اساسا معدش في بنات وحشين !

ولو قلنا يا جواز "وبرغم ان العنوسه كترت" تلاقي الاب من دول بيتأمر علي ولاد الناس

طب ياعم الحاج وهوا هيجيب منين

يا اخي قدروا ظروف الناس

بقولكم ساعة البلاي ستاشن في اكشن ب"خمسه جنيه"

اصوت يا خلق زي الولايا ولا اعمل ايه ؟

طب فداهيه الشاب ده !

---------------------------

طب ايه الحل بقى في حصار المسلسلات التركي اللي ورانا ورانا

ونفسي الاقي مسلسل تركي بيخلص !

ومقولكوش بقى عالعواطف والمشاعر والاحاسيس والعياط والرومانسيه اللي بتبقى في كل مسلسل

حاجه تقطع القلب :( !

تخيلوا اطفال بيتفرجوا علي نور ومهند

ولا لميا وكينان !

ومش عارف في تقريبا مسلسل اسمع عاصم او جاد -مش فاكر الصراحه-

كتيييييييييييييير والله كتيييييييييييييييير :(

-----------------------------------------

طب بلاش التركي

خلينا في المصري ومشاكله اللي ملهاش حدود

خلينا في السكر ابو اربعه جنيه

خلينا في الاعلان اللي قريته في الجرنان

"اسكان الشباب"

سعر المتر يبدأ من 8000 جنيه !

نعم يا روح طنط ... يعني شقه 100 متر ب 800.000 الف جنيه ؟

ليه ... ده لو باع ترامادول عند المحطه عيني عينك مش هيجيب الفلوس دي !


-----------------------------------

المهم نيجي بقى للسؤال اللي مش لاقيله اجابه ؟

برغم اننا كلنا عايشين في ده

ودايقين المر مع كل كوباية ميه بنشربها من نيل "ماما مصر"

الا اننا بنحبها !

واما بنتنيل نسمع اغنيه وظنيه جسمنا بيقشعر !

واما كانت بتلعب كان هيجرالي حاجه لو متعب مجابش الجون التاني !

واما بيحصلها حاجه او بتخسر

بنموت من الاه لحد متقف علي رجليها تاني



ايييييييييييييييييييييييييييييه السر ؟

حد يفهمني ايه سبب انفلونزا الوطنيه اللي عندنا دي ؟

مش لكل فعل رد فعل مساوي له في الاكشن ومضاد له في الديركشن ؟

هتقولولي مصر ملهاش ذنب !

هقولكم امال مين السبب ؟

امي ؟

مهما قالولنا برضو واحنا عيال "مصر هيا امي"

-

-

-
يا مصر قرفنا -بس- بنحبك !

انت كمان ايه رايك ؟

يا ترى ايه السر ؟

وياترى لسه بتحبها ...

ولا خلاص قرفت ؟ :)
----------------------------


محمد نبيل 18-11-2009

هناك ٥ تعليقات:

Eman Henaish يقول...

ياااااه ده كله شايله :))

kmt يقول...

السلام عليكم ورحمة الله وبركاته

ليكوريكا
ياااااااااااااااااه عاش من شافك

شكرا ع البوست ده جدا
عارف ليه
لانك ببراعة قولت كل حرف جوايا

وسؤالك ده سالته لنفسي قبل كده
ليه ممكن نلعن البلد باللي فيها
بس لو حد جاب سيرتها من بعيد او قريب بناكله
عارف اكتر حاجه مستغربها
ان المصريين لحد دلوقتي معرفوش الجزائريين مقامهم صح
كل ده مراعيين الماتش الاخير
اول مرة اخد بالي ان الناس متحده من غير تنبيه
عارف اكتر حاجه بتدي نقطة نور في وسط العتمة اللي احنا فيها
اننا لو لقيقنا هدف يجمعنا وامنا بيه ولقينا سلطة تساعدنا وتنفذه معانا شباب مصر هايطلعوا بيها لاعلى قمم العالم - لا مش افرست :P- بجد بتكلم
احنا والله يجي منا بس........

يلا
تحياتي
الى لقاء

اقصوصه يقول...

كلنا نحبها :)

محاولة لكسر الصمت يقول...

امبارح قريت التدوينة دي وكان في دماغي كومنت طويل خالص بس للأسف النت فصل..

ولما دخلت النهاردة قررت أكتب كومنت برضه,بس مش هو بتاع امبارح...


مش باقي مني غير شوية حب جارحني...مش باقي مني غير شوية ضي في عينيا...

نفسي أعرف احنا ليه بيحصل فينا كده؟
عشان احنا مصريين ولا عشان إيه؟
والله تعبت يا مصر..

Maha Shahen يقول...

مش بقيت عارفه بين وبين مره اقول بحبها وبموت فيها مره اقول هخنوقه وههرب منها من بين ايديها ومره اقول لا خلينى هروح علي فين علي امريكا اما دى وقعه ولا عالصين حاجه بتخنق اما دى حيره اه يا دماغى
وسمعنى اغنية سلامتك يا دماغى هههههههه
اكيد مش هعرف بحبها ولا لا الا اما ابعد عنها ودا مستحيل
خالص تحياتى ليك الموضوع حلو جدا

مش مهم اللي فات - سيبوني احلم باللي جاي