التسميات

الأحد، ١١ أكتوبر ٢٠٠٩

حضرة الافندي المحترم !




حضرة الافندي المحترم
استاذ قلم ...

من غير مقولك
بلقى اللي بحس بيه
فوق شفايفك

واما تعاكس
صفحه بيضه من حياتي
ببقى شايفك !

ترسم الوهم الجميل
فوق الورق

والحقيقه
والأماني
والقلق !


تكتب الكلمه الجميله
تتسمع غنوه وحكايه

وتقول "بحبك"
من ورايا !

تقراها موجه
تعشق جمالها

وتدوخ وتسكر
معرفش مالها !

دوامه تكبر ...
وتاخدني ليها
وندوب ونغرق
في النهايه !


والاقيك كتير قاعد بتبكي
وبحراره ...
وادوق كلامك
ملقاش في حلقي
غير مراره !

واسكت وتتكلم بدالي
تقعد معايا بالليالي
تشكيلي همي ...
تحكيلي عاللي تاعبني
واللي ... حارقلي دمي

واللي لما راح بعيد
مفرقش لحظه
واللي حتى وهوا جنبي
شغلّي بالي !

حضرة الافندي المحترم
مبقتش قادر احكمك

مبقتش طوعي
من بين ضلوعي
تسرق الكلمه
اللي خايفه تتسمع

توجعلي قلبي
واللي يقرا ...
واللي يسمع ...
برضو زيي يتوجع !

طب ليه تقول ؟
خليك خجول ...
زي قلبي
واكتفي بالسكات

وبلاش تبوح بالاهات
والحاجات ...
اللي لما بتصحى فينا
بنلاقينا ...
صفحه صفرا
في كشكول الحياه
مكتوب عليها ...
ذكريات !


حضرة الافندي المحترم
تسمح لقلبي يسألك ؟

اسمك قلم ...
ولا ألم ؟

محمد نبيل
11/10/2009

هناك ٨ تعليقات:

kmt يقول...

السلام عليكم ورحمة الله وبركاته

د/ محمد
المفروض اقول تعليق
لكن لما الكلام يكون التعليق مش هايزيد على عمقه شيء
يبقى السكوت افضل تعليق:)

تحياتي

قلب ينبض لله يقول...

حضرة الأفندي المحترم لسانا علي الورق
مترجم المشاعر اللي جوانا

كلامك جميل
كالعادة دايما :)

محاولة لكسر الصمت يقول...

حضرة الافندي المحترم
تسمح لقلبي يسألك ؟

اسمك قلم ...
ولا ألم ؟

كما قالت كيميت..لا أملك إلا الصمت

تحياتي لشاعر متميز..

Eman Henaish يقول...

مافيش وصف أعمق من ده عن حضرة الأفندي المحترم :)

نـــــور يقول...

اسمه اى حاجه
بس تأكد انه هو الصديق الصدوق الاوحد الغير قابل للتغيير فى زمان بيعت فيه الضمائر

حب قلمك هو يستاهل يتحب :)

بنت النيل يقول...

اكيد ألم وألم كبير
وعشان نحسه محتاجين لكلام كتيير
عمرك ما تشوفه ولا حتى تحس بيه
غير لو في يوم كتبت عنه وعشت فيه
وهو دة وجه الشبه او الاختلاف
بين الألم والقلم

كلامك جميل جدا يا محمد
تسلم الايادي

نعكشة يقول...

ياااااااااااااااااااااا سلااااااااااام

أغيب أغيب و أرجع ألاقي حاجة على موجتي

مش عارفة اقولك اية بجد

بس من ثواني قبل ما ادخل مدونة حضرتك
مصادفة من على مدونة انجي

كنت بفكر في كلام الست احلام مستناغمي

فى وصفها لحبر القلم لما بيقابل بياض الورقة

صدفة صح
i like these kind of coincidences
...........................

اوك
وش واحدة حاطة ايدها على خدها و بتبتسم

ساعات كتير بحس ان القلم او ايدي يعني بتكتبلي حاجات عشان تسليني
وساعات عشان توريني نفسي
وساعات عشان هيا نفسها بتحب تكتب

بحب قوي اقرا كلامها

بس عندي مشكلة فظيعة

انى مبعرفش احكمها
و اخليها تقول بالظبط اللى جوايا

و اول ما ببقى رايحة موجهة ناحية الكشكول وانا عاوزة اكتب بحس بالخرس
بحس بالعجز

الافكار عادة بتجيلي فجأة
الحق اجري عشان اكتبها
قبل ما تضيع مع الضايعين


بجد

بجد

يسلم قلمك

اسعد الله يومك زي ما اسعدت يومي
اسعد الله كل ايامك

آمين

سلام عليك

انسان وبس ! يقول...

كلام يتسمع من سكاااااااااااااااات
ويعقبه
تسقيف حااااااااااااااااااااااااد

مش مهم اللي فات - سيبوني احلم باللي جاي