التسميات

الأربعاء، ١٥ يوليو ٢٠٠٩

خطوه وفاضل الف ميل ... :)



خطوه ...

وفاضل الف ميل !

حلمي الجميل ...

مشوار طويل ...

بتقول سنين هتغيره ؟

بتقول آهات هتكسره ؟

لأأأأأأأه ..... مستحيل !





خطوه

ونقدر نمشي الف

ده الحلم مهما يتوصف

مستحيل يتعرف

لازم تدوقه بفرحتك ...

لما تشوفه فدنيتك ...

برواز جميل ...

في معبد الامنيات

شهاده ان عمر فات

بقى طوق نجاح

مش وقت راح

وعدى عادي ...

نهار وليل !






خطوه

ولسه الصعب جاي

والسهل جاي

والحب جاي ...

والقلب مفروش بالامل

وهلال غرامنا هيكتمل

يبقى قمر ...

ملهش زي

يبقى قمر ...

جمال وضي !

وروح تروح ...

علي ورده تشرب الندى

ونحس شيء فينا ابتدى

باينه حب ...

باينه احساس بالرضا !

احساس يداوي جرحنا

ومهما ضاع من عمرنا

يكتب وداع ...

وبعد الوداع

يكتب بدايه ...

ونبتدي من جديد

طريق يارب يكون سعيد

اقدر بحبي امشي نصه ...

وبحبك انت امشي نصه ...

وعمر تعبي فيوم محسه

مهما كان ...

مشوار طويل !





ثانيه

وفاضل الف عام ...

وسط الزحام ...

ماشيين طريقنا مكملين

في حلم واضح عاليمين

وحلم مرسوم عالشمال ...

وعنينا تسأل 100 سؤال ...

هنروح لفين ؟

لانهي حلم ؟

مهما هيحصل ...

لا بد نوصل ...

بالحلم يكمل ...

احساس جميييييل !





نقطه

وفاضل الف حرف

كلام ولازم يتكتب

ويتنطق ...

نشوفه طفل عالورق ...

مره يضحك

مره يبكي

ومره خايف ...

ونفسه كلمه تطمنه

ومره محبوس ...

حالف سكوتنا ليسجنه

ودفتر العمر الكبير

مكتوب علي سطره الاخير

لسه كتيييير !

لسه أمل ...

لسه حاجات ومحتاجات

و100 سؤال هيتسئل

ولسه ...

هلال غرامنا هيكتمل

يبقى قمر ...

ملهش زي

يبقى قمر ...

جمال وضي !

وروح تروح ...

علي ورده تشرب الندى

ونحس شيء فينا ابتدى

باينه حب ...

باينه احساس بالرضا !

احساس يداوي جرحنا

ومهما ضاع من عمرنا

يكتب وداع ...

وبعد الوداع

يكتب بدايه ...

ونبتدي من جديد

طريق يارب يكون سعيد

اقدر بحبي امشي نصه ...

وبحبك انت امشي نصه ...

وعمر تعبي فيوم محسه

مهما كان ...

مشوار طويل !


------------------------------

نهاية مشوار كنت فاكر انه طويل ... 16 سنه دراسه ومذاكره ... فيهم الحلو وفيهم الوحش ... الحمد لله :).

دلوقتي الواحد في مفترق طرق ... نهايه وبدايه ... ربنا يوفقنا ويوفق الجميع لما يحبه ويرضاه

واتمنى ليا ولكل زمايلي اللي اتخرجوا او اللي لسه متخرجوش التوفيق في حياتهم

وربنا ميوري اي حد " الجيــــش " ابدا :) !

ص / محمد نبيل الدمرداش .

14-7-2009




هناك ١١ تعليقًا:

سفروتة يقول...

اول حاجة
الصورة حلوة اوي اوي اوي يا ليكو
بجد انا اول لما شفتها لقيتني ببتسم من غير ما احس وبعدين انتبهت اني مبتسمة


ثانيا
كلماتك بجد ليها سحر عجيب
والمعاني مش محسوسة وبس لا دي ملموسة

كل واحد فينا اكيد بيحلم وبيتمني بس فيه لحظة اسمها البداية
من اين ابدأ؟؟
لو كلنا عرفنا النقطة دي
يبقي مهما قابلتنا من صعاب هنقدر نخطيها لاننا عارفين من الاول احنا عايزين نوصل لايه وبدايتنا كمان كانت صح
يارب كل واحد يتحقق حلمه واللي بيتمناه

تحياتي لقلمك المبدع
دمت بخير
:)

Unknown يقول...

بص

انا تعليقى كان هيبقى اخر سطرين انت كتبتهم بس طبعا من غير الحتة بتاعة الجيش...بس لقيتك قلت خلاص

الكلام دة بجد محسوس اوى اوى لاى حد فعلا فى الموقف دة..عشان كدة حسيته فعلا

ربنا يوفقك ويوفقنا كلنا

سلام

kmt يقول...

السلام عليكم ورحمة الله وبركاته

:)

آآآآآآآآميييييييين

تحياتي
الى اللقاء

محاولة لكسر الصمت يقول...

مشوار طويل...

أولا مبارك عليك النجاح يا دكتور ... وعقبالي يا رب ما يتكتب قبل اسمي (ص) رسمي كده...

وربنا معاك في اللي جاي...وان شاء الله يكون احسن واحسن...

نـــــور يقول...

مبروك التخرج
يارب ايامك كلها فرح والوان بمبى وقلوب حمرا زى اللى فى الصوره :)

رحيق الحياة يقول...

كلام جميل و ملموس جدا و الخطوه هي طريق الألف ميل....

ربنا معاك و يوفقك إلي ما يحب الله و يرضي

تحياتي

رغده

Darsh يقول...

وربنا ميوري اي حد " الجيــــش " ابدا :) !
-----------

يا رب يا ابني يا رب

مش عدم وطنيةو الله

لكن ... مش عارف

--------------------
"هلال غرامنا هيكتمل

يبقى قمر ...

ملهش زي

يبقى قمر ...

جمال وضي !"
-----------

تصوير فظيييييييييييع

wafaa يقول...

جمييييييييييييييييييل جدا
انت بجد فظيع
ماتتخيلش عجبتنى اد ايه
ربنا يوفقك ف حياتك ومبروك التخرج

نـــــور يقول...

كل سنه وانت طيب ياليكو

انت فين بقى
رمضانك كريم:)

Mona Shereif يقول...

العنوان فظيع
هههههههههههههههههه
اما يبقى 16 سنة خطوة
امال هنخطى الالف ميل فى اد ايه؟؟؟
الف مبروك التخرج
كل سنة وانت طيب

غير معرف يقول...

كالعاده .. نفس الاحساس العالي .. نفس الكلمات الجميله .. نفس الموهبه الرائعه :)

مبروووووووووووووك التخرج :)
وربنا يوفقك

ورمضان كريم .. معلش حت متأخره شويتين :$

مش مهم اللي فات - سيبوني احلم باللي جاي