التسميات

الأربعاء، 30 أبريل، 2008

فاصل ثم نواصل

قصه جديده علي مجرد مشاعر


http://just-afeeling.blogspot.com/2008/04/blog-post_29.html

فاصل من المشاعر

ثم نواصل

احلام مع ايقاف التنفيذ !

الجمعة، 25 أبريل، 2008

بكره اجازه وبعده اجازه ويوم الحد نجيب حظاظه


في البدايه يا جماعه احب اقولكم كل سنه وانتو طيبين بعيد تحرير سينا

وشم النسيم وعيد العمال والاجازات الكتير دي

المهم انا عاوز اتكلم في موضوع مهم

(يؤرق الشباب من الجنسين يعني :)) من باب فذكر ان التذكره تنفع المؤمنين

الموضوع ده واللي انتشر بشكل فظيع اليومين دول

وهوا الحظاظات او ما يسمى في اللغه العربيه (التمائم)

للأسف يا جماعه دلوقتي الحظاظات بقت علي كل شكل ولون

وللولاد والبنات من غير اي فرق (ده من مبدأ المساواه) طبعا

تلاقي دلوقتي الحظاظات في ايدين الولاد علي كل شكل ولون

مره تلاقي حظاظه عليها شعار انديه رياضيه زي الاهلي ومانشستر وغير

ومره تلاقي عليها صورة جيفارا وغيره

مره تكون حظاظات زي الاسوره

ومره تلاقي شباب لابسين خواتم قماش في ايدهم

زائد الخرزه الزرقا والحمرا وغيره

والسلاسل الفضه والقطن السوده دي

يعني ماشاء الله بيرضوا كل الاذواق والافكار !

كل ده كويس وزي الصيني بعد غسيله

وانا عارف ان القطنه مبتكدبش

لكن لو قلتلكم ان الحظاظات دي نوع من انواع الشرك بالله ؟

ايون حته البتاعه القماش دي اللي بتلبسها عشان تجيبلك الحظ دي نوع من انواع الشرك بالله

يعني اكنك بتقول ان مفيش ربنا وزيك زي اللي بعبدوا البقر والنار وغيرهم

والكلام ده مش كلامي الكلام ده موجود في القرآن والسنه

وانا دلوقتي جايب معلومات عن التمائم وغيرها

علشان متبقاش في حجه ليا ولغيري بانهم مكنوش يعرفوا

-------------------------------------------------

تعريف التمائم :
هي جمع تميمة وهي كلُ ما علق من أجل دفع شر متوقع حصوله من مرض أو عين أو رفع شر وقع فعلا سواء كان المعلق خرزات أو أخشاب أو خيوط أو أوراق أو غير ذلك ।

التمائم في الجاهلية :

كان المذهب السائد عند أهل الجاهلية أن تعليق التمائم يدفع عنهم المقادير ويحميهم مما يتوقعونه من أخطار فتعلقوها لحماية أنفسهم ودوابهم من الأمراض وللتغلب على الأرواح الشريرة – بزعمهم – واتقاء الإصابة بالعين وغير ذلك من الأضرار .

التمائم في الإسلام :

لما كان اعتقاد الجاهليين في تعليق التمائم فيه من اللجوء إلى غير الله في جلب الخير ودفع الضر بما لم يجعله الله سببا شرعيا لذلك واعتقاد هذا جهل وضلال وإشراك بالله إذ لا مانع ولا دافع غير الله .

ولما في ذلك من تعلق القلوب والغفلة عن الله سبحانه ولمنافاة هذا العمل للتوحيد أنكره الإسلام عليهم وزجرهم عنه وشدد وغلظ في هذا الموضوع لما فيه من الشرك وهذه بعض الأحاديث الواردة في المنع من هذا الأمر :
- عن قيس بن السكن الأسدي قال : دخل عبدالله بن مسعود رضي الله عنه على امرأة فرأى عليها خرزا من الحمرة فقطعه قطعا عنيفا ثم قال : إن آل عبدالله عن الشرك أغنياء وقال : كان مما حفظنا عن النبي صلى الله عليه وسلم : إن الرُّقى والتمائم والتِّولة شرك .
رواه الحاكم وقال : صحيح الإسناد ووافقه الذهبي .
وذكره الألباني في الصحيحة برقم 331 .


* الأحاديث الدالة على حرمة تعليقها :

1- عن ابن مسعود - رضي الله عنه - قال : قال رسول الله صلى الله عليه وسلم : ( إن الرقى ، والتمائم والتولة شرك ) ( صحيح الجامع 1632 ) 0

وقصة الحديث آنف الذكر كما ثبت في صحيح سنن ابن ماجة للعلامة الشيخ محمد ناصر الدين الألباني – رحمه الله - : ( عن زينب ، قالت : كانت عجوز تدخل علينا ترقي من الحمرة ، وكان لنا سرير طويل القوائم 0 وكان عبد الله ، إذا دخل ، تنحنح وصوت 0 فدخل يوما ، فلما سمعت صوته احتجبت منه 0 فجاء فجلس إلى جانبي 0 فمسني فوجد مس خيط 0 فقال ما هذا ؟ فقلت : رقي لي فيه من الحمرة 0 فجذبه وقطعه ، فرمى به وقال : لقد أصبح آل عبدالله أغنياء عن الشرك 0 سمعت رسول الله صلى الله عليه وسلم ، يقول : ( إن الرقى والتمائم والتولة شرك ) قلت : فإني خرجت يوما فأبصرني فلان 0 فدمعت عيني التي تليه 0 فإذا رقيتها سكنت دمعتها 0 وإذا تركتها دمعت 0 قال : ذاك الشيطان 0 إذا أطعته تركك ، وإذا عصيته طعن باصبعه في عينك 0 ولكن لو فعلت كما فعل رسول الله صلى الله عليه وسلم ، كان خيرا لك وأجدر أن تشفين 0 تنضحين في عينك الماء وتقولين : ( أذهب البأس0رب الناس0اشف ، أنت الشافي0 لا شفاء إلا شفاؤك ، شفاء لا يغادر سقما ) " أخرجه الإمام البخاري في صحيحه - كتاب المرضى ( 20 ) – برقم ( 5675 ) ، وكتاب الطب ( 38 ، 40 ) - برقم ( 5742 ، 5743 ، 5750 ) " ) ( صحيح سنن ابن ماجة - 2 / 269 ) 0


2- وعن عقبة بن عامر - رضي الله عنه - قال : قال رسول الله صلى الله عليه وسلم : ( من علق تميمة فقد أشرك ) ( صحيح الجامع 6394 ) 0

3- وعن عقبة بن عامر الجهني - رضي الله عنه - قال : ( أقبل رهط إلى رسول الله صلى الله عليه وسلم فبايع تسعة ، وأمسك عن واحد ، فقالوا : يا رسول الله بايعت تسعة وتركت هذا ؟ قال : إن عليه تميمة ، فأدخل يده فقطعها ، فبايعه وقال : " فذكره " ) ( السلسلة الصحيحة 492 )

4- عن رويفع بن ثابت - رضي الله عنه - قال : قال رسول الله صلى الله عليه وسلم : ( يا رويفع ! لعل الحياة ستطول بك بعدي ، فأخبر الناس أنه من عقد لحيته ، أو تقلد وترا ، أو استنجى برجيع دابة ، أو عظم ، فإن محمدا منه بريء ) ( صحيح الجامع 7910 ) .

5- عن ابن مسعود - رضي الله عنه - قال : إن رسول الله صلى الله عليه وسلم : ( نهى عن الرقى ، والتمائم ، والتوله ) ( صحيح الجامع 6880 )

والمقصود هنا الرقى الشركيه بعيدا عن الرقةى الشرعيه

أما
* التوله : قال ابن منظور : ( بضم التاء وكسرها ، ضرب من الخرز يوضع فتحبب بها المرأة إلى زوجها ) ( لسان العرب - 11 / 81 ) .

--------------------------------------------------

اتمنى كل واحد قرا الموضوع ده يكون رسول في اهله واصحابه واي حد يشوفه لابس اي حاجه من الحاجات دي ، حتى لو كانت مجرد هزار او موضه

اللهم بلغت ... اللهم فاشهد



الأحد، 20 أبريل، 2008

I have been tagged !


النهارده يا جماعه حدث تاريخي للتدوين العربي كله

حدث هيزلزل صاحبة الجلاله

في الطبعه الاولي والتانيه والتالته والمكيف كمان

انا النهارده ولأول مره جالي تاج

من

بنوته لاااااااااااااسعه

يعني

ساروره

يعني ابنة النهرين وكما تحب ان يقال لها : غزال الرافدين

في البدايه احب اشكرها وفنفس الوقت انا عاوز اطبق في زمارة رقبتها

لان التاااااج ده طلع صععععععععععععععب جدا

واصعب حاجه فيه انك مطلوب منك تتكلم عن 10 حاجات عن نفسك ودي قمة الصعوبه بجد

المهم عشان مطولش عليكم ندخل في التاج

- اذكر 10 اشياء عن نفسك


نمبر وان : اولا وعشان نبقى متفقين انا ليكوريكا (محمد نبيل) ، فاضلي شهر و16 يوم ويبقى عندي 21 سنه بالتمام والكمال وهبقى بالغ عاقل راشد تصح ملكية العقارات والحسابات البنكيه ان تقيد باسمي ،
ومش محتاجين طبعا اقولكم ان يوم 6-6-2008 يوم تاريخي بيتكرر كل سنه وهوا عيد ميلادي ، واضح من التاريخ قد ايه علاقتي بالجنس الاخر كويسه ، وده اللي كل سنه لازم انفيه نفيا باتاً وبجدد بيعة العداء بيني وبينها ... وكل سنه في نفس المعاد لازم اقول برضو اني بستقبل الهدايا الماديه والعينيه ولا اقبل الهدايا المعنويه علي الاطلاق ، امال ايه ده كيلوا المكرونه بقي ب 4 جنيه :)



نمبر تو : انا اعذب واعول ، اعذب يعني غير مرتبط على الاطلاق لا نفسيا ولا عاطفيا ولا بتنجانيا حتى ، واعول دي يطول شرحها ، لاني بعول اسرتين في الجامعه ، وبعول هموم ربنا وحده اللي عالم بيها الحمد لله ، وبعول مشاكل زمايلي اللي مبتنتهيش ، زائد اني عندي 4 بلوجات زي الفل بعولهم برضو :) ، وعندي عالفيس بوك 3 ولاد (سلمى وندي وطمطم ) ... اظن انا كده محتاج اعانه اجتماعيه :)


نمبر ثرى : الحمد لله انا صيدلي تحت الانشاء ، وطموحي كبير اوي في الدراسه والشغل ، دخلت الكليه برغبتي الحمد لله ، ومندمتش ابدا اني دخلتها وكل املي ان ربنا يجعلني وسيله اخدم بيها امة الاسلام يارب

نمبر فور : ساعات بحب الهدوء اوي ، وساعات مبقدرش اعيش فيه ، ساعات ببقي نفسي اكون لوحدي ، وساعات بموت لو قعدت لوحدي ، اصحابي كتير الحمد لله من كل جنس وصنف ولون وعمر ، بتمنى ميكونش حد زعلان مني منهم حتى لو انا عملت حاجه تضايق في يوم من الايام ... على فكره انا برج الجوزاء يعني (2 في 1) شخصيه مزدوجه حزينه سعيده ، اجتماعيه انطوائيه ، وبجمع كل التناقضات اللي ممكن تكون موجوده فحد .


نمبر 5 : كتير بيقولو عليا كئيب ، وفقر ونحس ، بس كل الناس بتقول عليا طيب ، المشكله اني لا كئيب ولا فقر ولا نحس ولا حتى طيب ، المشكله كلها اني بعمل كل حاجه بزمه وضمير ، لما بزعل بزعل لان في حاجه جرحتني بجد وباخد الموضوع علي اعصابي اوي وممكن مصفاش بسرعه ، ولما بفرح بفرح برضو بجد ، بس المشكله ان الفرح بقى قليل قوي عشان كده مبقتش ابان غير كئيب ... اما بقى النحس الليكوريكي فيمكن عندهم حق ، بس هيا مواقف لذيذه بتحصل ومليش اي ذنب فيها والله:)


نمبر 6 : احلامي ملهاش حدود ، وفنفس الوقت بسيطه اوي ، وفكل الأحيان (مع ايقاف التنفيذ) ... الحمد لله :(




نمبر 7 : ساعات بحس اني اقدر اعرف الانسان من اول نظره ، وساعات بحس اني (اهبل) ودايما بنخدع في الناس من مظاهرهم ... اعتقد اني (اهبل) في معظم الاحيان

:)))


نمبر 8 : انا اخ ل ولد وبنت وخال ل ولد وبنتين ... وابن لاطيب اب وام ... ربنا يخليهملي يارب وربنا يقدرني ارد اي شيء من افضالهم عليا .


نمبر 9
: اتمنى ربنا يكون راضي عني ، واني ابعد عن اي شيء في معصيه او بعد عن سراط ديننا الاسلامي المستقيم




نمبر 10 : دلوقتي اقدر ادعي علي ساروووووووووووره من قلبي :)))



2- اختر 5 اشخاص تهدى لهم التاج


اممممممممممم اختار مين ياربي :

المشكله اني اتأخرت في التاج وكل الناس اختاروا بعض

المهم اللي وقع عليهم الاختيار هما :

1-درش ... (مدونه) دوشه ولابد منها

2-حسناء ... (مدونة) شوية شخبطه

3- نو فور دانيمارك

4-آخر العنقود (انا اتخنقت)

5-يسري (ابتسم تبتسم لك الحياه)

كل واحد يهدي التاج ل 5 اشخاص ويبلغ صاحب التاج بانه نزل

بثـــــــــــ خلاص

الجمعة، 18 أبريل، 2008

رايق أكيد ... منا شاري طقم جديد

كل سنه وانتو طبيبين

اولا واحشنني جدا

ثانيا واحشني اوي

ثالثا واحشني خالص


رابعا وخامسا وسادسا

انا الحمد لله اخييييييييييييييييييييييييييييرا رسييييت علي بر

كنت بمر بحالة غريبه اوي الايام اللي فاتت

مكنتش عارف انا صح ولا غلط ، او هما صح ولا انا غلط ، او محدش صح واحنا الاتنين غلط

بس اكتشفت اني مفيييييييييش حد صح ولا فييييييييييييييييييييييي حد غلط !

معلش يا بشر استحملوني شويه

اصلي انا في حالة روقان فظييييييييييييييييييييييييييييييييييييعه

واكيد السبب مش طقم الهدوم الجديده اللي انا جبته

واللي اتشررررررررررردت بسببه في كل حته في جمهورية زيكا الشعبيه

اروح الجامعه : مبروك الطقم الجديد ...

ايه النضافه دي كلها يا واد ...

يا تيشيرتاتك الجيده ياعم ...

لا ولا صلصه رفيق التيليفون الاول (التيليفونين عطلانين يا صلصه بقيت بكلم نفسي في البيت :( )

يقف (رادحاً) في وسط الكليه ... محمد نبيل جاب طقم جديد يا بشر

ويسري افندي رفع العلم ورفع صووووته كمان في وسط الشااااااااارع

(الله الله يا عم نبيييييييييييييييل ... تي شيرت جديد وبنطلون جديد ... وكوتشي جديد )

في ايه يا جدعان ... هوا انا كنت (معفـــــــــــــــــــن) اوي كده :)

هيا المسأله كلها اني

(مكنتش فاضي انزل اشتري هدوم)

واول مالامتحانات ابتدت تدخل فضيت ونزلت علي طول عملت (شوبنج) في ارقى مولات الشرقيه الفزيييييييييعه :)

المهم بقي السبب الحقيقي لحالة الروقان اللي انا فيها حاجات كتير اوي

اولها : ملجأ الايتام واليوووووووووووووم الجميل اوي اللي قضيناه هناك

ثانيا : زي مقلتلكم اني رسيت علي بر اخيرا والفضل لله وحده في اللي انا فيه ده

ثالثا : ان امبارح كان عيد ميلاد أجمل (دنيا) في الدنيا ، صحيح انا جبت هديه ب 20 جنيه عداً ونقدأ ، بس متغلاش عليكي يا دودو يا حبيبة قلب خالو :)

وطبعا منكرش ان (الطقم الجديد ليه دور في حالة الروقاني دي ::)) )

خلاص كفايه رغي بقى وعايزكم تدعولي حالة الروقاني دي تطول ولو نص ساعه كمان ، عشان بعد كده ورايا 3 امتحانات فظاع الاسبوع الجاي منهم امتحان عاوز مذاكره كتيييييييييييير جدا وطبعا النحس الليكوريكي غطي السكشن وسكشنا هيمتحن اول سكشن في الدفعه واصبحت ال 45 درجه مهدده بالضياع :( ، لانهم وكالعاده هيجربو فينا :(((

دعواتكم يا بشر الفتره الجايه ، وربنا يسعدكم كلكم وكل اللي قلوبهم صافيه من جوه ومبيشيلوش في (نفسيتهم) ومبيحقدوش في (مشاعيريرهم) ومبيشردونيش عشان جبت (طقم جديد) :)

ليكوريكا

الجمعة، 11 أبريل، 2008

المعارضه في مصر = صفر



فتاه اسمها اسراء

عمرها

28 سنه

ليسانس السن

هويتها السياسيه (حزب الغد المعارض)

عضو سابق بلجنة حقوق الانسان

وهي الآن معتقله بتهمة دعوتها للاضراب يوم

------------------------------------

الحكايه من البدايه مجرد مجموعه صغيره عالفيس بوك ، انشئتها اسراء ودعت الي فكرة اضراب ، لم تكن تتخيل ان تنتشر هذه الفكره هذا الانتشار في وقت كهذا ، ولم تتخيل ان يصل عدد مشتركين هذه المجموعه الي
७०
الف
مشترك
ولم تتخيل ان تصبح من المعتقلين الآن !

واسراء ايضا دعت الي اضراب آخر يوم
/مايو
القادم وكان هذا سبب اعتقالها الأخير !

ولن اتحدث عنها اكثر من ذلك ، لانها وما فعلته يجعلني افكر كثيرا في حال المعارضه في مصر ، ويجعلني افكر في مدى العشوائه والتخبط واختلاط الاهداف الذي وصلت اليه ،
فالمعارضون في مصر لا يعرفوا ما يريدون ، وان عرفوا فهم لا يعرفوا كيف يحققوه ...

فاحداث المحله خير شاهد علي كلامي ، والمحافظات التي لم تسمع وتشارك في الاضراب ايضا خير شاهد علي كلامي ،
فهل يعقل ان تدار اجندة جميع قوي المعارضه من الفيس بوك ،
وهل يعقل ان فتاه مثل اسراء توحد كل هذه القوي علي اضراب غير مدروس ،
ظهر كما راينا جميعا في المحله ولم يخرج حتي للنور في محافظات مثل الشرقيه وغيرها ؟!

الاضراب ليس انتفاضه شعبيه كما يزعم البعض ، والاضراب فشل في تحقيق أي شيء سوى انه اختبر قدرة اجهزتنا الامنيه على ادارة الأزمات ،
بالاضافه الي تدمير محلات ومصالح الكثير من المواطنين ، الذين ليس لهم ناقه ولا جمل في الاوضاع الحاليه ،
الاضراب لم يكن مظاهره سلميه نفخر بها ، او ثوره شعبيه نحترمها ،
الاضراب في وجهة نظري مجرد فوضى لم تكن خلاقه علي الاطلاق ولكنها كانت مدمره!

الاضراب كشف عراء المعارضه وتخبطها ، وانذرنا بمزيد من الخطر خصوصا وانهم يلعبون علي مشاعر الشعب الطيب، ويحركونها الي تيارات الغضب على نفسه ،
فتجدهم يكسرون المحلات ويحطمون المنشآت وكأننا في حرب علي انفسنا من أجل انفسنا ...
في الوقت الذي تختفي فيه هوية من يعارضون خلف احزاب واهيه ،
تفقد الدعم والمسانده من الشعب ، واخوان متخبطون لا يعرفوا ماذا يريدون ؟!

ليست اسراء البطله الشعبيه المنتظره ، ولكن ظهورها يدل علي ان القيادات المعارضه من (الشيوخ) قد اصابتهم امراض الزمان واصبحوا غير قادرين ان يكونوا لأنفسهم رؤيه محدده وان يصبحوا (قياديين) يستطيعون ان يغيروا اي شيء بل أن يفعلوا أي شيء !

اسراء وغيرها هم الشباب ، هم من اصبح لديه من الوعي والثقافه ما يؤهلله ان يغير الكثير وان تصبح اصواتهم أعلي بكثير من اصوات المعارضه الوهميه ،
اسراء وغيرها قد يكونوا هم الأمل في تصحيح الاوضاع الخاطئه في بلادنا ،
ولكن لسوء الحظ فان اسراء لجأت لمن يعارضون بعشوائيه ويصرخون بهمجيه ويتوارون خلف اهدافهم فتفضحهم وتجعلهم أكثر ضعفا ،
فبدل من ان تصبح فكرتها اعتراض مشروع علي اوضاع تؤرق الجميع علي حد سواء ،
اصبحت ثوره علي النفس واصبحت شوارع المحله وغيرها غزه أخري !
------------------------
ليكوريكا


الجمعة، 4 أبريل، 2008

اضراب عام ... يا سلام يا سلام




بيقولوا في اعتصام بعد بكره يا بشر

يوم الأحد 6/4/2008

وورايا بعد بكره برضو امتحانين في الكليه ؟

وورايا بعد بكره برضو 3 سكاشن !

وورايا بعد بكره برضو كورس؟

-----------------------------

طيب المهم سيبوكم مني انا

المهم دلوقتي ان بعد بكره اول اعتصام هتشهده مصر في تاريخها الحديث

وبغض النظر عن رأيي فيه

فهوا ظاهره صحيه جدا وبتدل ان المصريين لسه (بيحسو) علي دمهم

----------------------------

ونقول كمان :

اعتصام ماشي

مظاهرات سلميه ماشي

نقول لأه للظلم ماشي

بس ده يعمله اي حد الا الناس اللي لو اعتصموا هيتضر غيرهم

أوعى يا دكتور تعتصم

اوعي يا صيدلي تعتصم

اوعوا تقفلوا المستشفيات

اوعوا تبطلوا المواصلات

واللي بيقول غير كده ، تخيل ان مثلا مراتك حامل وعاوز تنقلها المستشفى

في التاكسي وفين المستشفى وفين الدكتور وفي الصيدلي ...

وقفه قدام الظلم آه ، لكن منظلمش غيرنا واحنا بايدينا ارواح ناس تانيه

اتمنى ربنا يوفق كل واحد في ايده خير البلد الطيبه دي

والشعب الطيب ده ...




مش مهم اللي فات - سيبوني احلم باللي جاي