التسميات

الأحد، ٢٧ يناير ٢٠٠٨

وفيها ايه لما يحاصروا غزه؟



هنعمل ايه ... محننا لازم نتكلم ونصرخ ونقول كل اللي جوانا

حتي لو كانت كلماتنا مجرد كلمات ومحدش بيسمعها غيرنا

مش هقول واغزاه ومش هقول كلنا من اجل غزه

لان مش المهم غزه

ايون مش المهم غزه ...

وافتكروا معايا كده ... من كام سنه

كان كل همنا فلسطين

وبعد كده كل همنا العراق

وكله بيضيع مننا وحالنا من سيء الي اسوأ الحمد لله

لو كلنا بلا استثناء عرفنا ان المهم هوا ديننا

المهم هيا راية الاسلام

المهم هوا اننا لما نقف بين ايدين ربنا يوم القيامه

نلاقي كلام نقوله ... نلاقي حاجه عملناها للاسلام

حاجه وفينا بيها نعمه واحده من نعم ربنا علينا

---------------------

انا كنت رافض اني اتابع اي اخبار سياسيه

يعني بحاول ابعد غن الاحباط اللي بحس بيه لما بشوف نشرة الاخبار

بحاول اهرب بعيد عن العالم اللي احنا فيها ... يمكن اقدر ارفع راسي

بدل منا شايف الكبير والصغير فينا مطاطي لكلاب

يمكن لما ابعد وزارجع ... الاقي الوضع اتغير للأحسن

ويمكن مستني لما الدور ييجي علينا ومش عاوز اشيل نفسي الهم من بدري!

لكن كالعاده ولأننا دايما بنولول علي حالنا

عرفت ان غزه محاصره وعرفت الاوضاء المهينه اللي احنا بقينا فيها فكل حتي في العالم

وفيها ايه يعني اما تكون غزه محاصره

المسلمين حصلهم الحصار ده قبل كده كتير وهجيبلكم مثال

-------------------------------


بعد أن فشلت جميع وسائل الإرهاب ، والحرب النفسية والدعائية ضدّ النبي ( صلى الله عليه وآله ) ومن آمن معه ، امتنع زعماء قريش ، وقرَّروا أن يقاطعوا أبا طالب وبني هاشم ، ومحمّداً وأصحابه ، مقاطعة اقتصادية واجتماعية ، وكتبوا عهداً بذلك وعلّقوه في جوف الكعبة .

ممّا جاء في تلك الصحيفة الظالمة : ألا يبايعوا أحداً من بني هاشم ، ولا يناكحوهم ، ولا يعاملوهم ، حتّى يدفعوا إليهم محمّداً فيقتلوه .

وتعاهدوا على ذلك ، وختموا الصحيفة بثمانين ختماً ، ثمّ حصرت قريش رسول الله ( صلى الله عليه وآله ) وأهل بيته من بني هاشم ، وبني عبد المطلّب في شعب أبي طالب ।

استمرَّ الحصار وطال حتّى أنفق أبو طالب والنبي ( صلى الله عليه وآله ) مالهما ، كما أنفقت خديجة أموالها الطائلة في هذه المحاصرة الظالمة .

وأشتدَّ خلالها الخطب على المسلمين ، وراحوا يعانون من الجوع والأذى ، ويأكلون نباتات الأرض ، ولم يكن يصلهم من الطعام شيء ، إلاّ ما كان يتسرّب سرّاً من بعض المتعاطفين معهم .

وحين اشتدَّ العسر والأذى ، وصبر المسلمون جاء الفرج ، وتدخّل النصر الإلهي ، فأرسل الله حشرة الأُرضة على صحيفة المقاطعة فأكلتها ، ما عدا ما كان فيها من اسم الله سبحانه ، فعندها هبط جبرائيل ( عليه السلام ) وأخبر محمّداً ( صلى الله عليه وآله ) بذلك ।

أخبر النبي ( صلى الله عليه وآله ) أبا طالب بهذا النبأ العظيم ، وأطلعه على ما حدث للصحيفة الظالمة ، فتوجّه أبو طالب مع باقي بني هاشم نحو البيت الحرام ، ليُحدّثوا طواغيت قريش بما أخبر به الله تعالى ، وليؤكّدوا لهم دليلاً آخراً على صدق نبوَّة محمّد ( صلى الله عليه وآله ) .

فجلس أبو طالب بفناء الكعبة ، وأقبلت عليه قريش فقالوا له : آنَ لك يا أبا طالب أن تذكر العهد ، وأن تشتاق إلى قومك ، وتدع اللُّجاج في ابن أخيك .

فقال لهم : يا قوم أحضروا صحيفتكم ، فلعلَّنا أن نجد فرجاً وسبباً لصلة الأرحام وترك القطيعة فأحضروها ، فخاطبهم أبو طالب : هذه صحيفتكم .

قالوا : نعم ، قال : فهل أحدثتم فيها حدثاً ، قالوا : اللَّهُمَّ لا .

فقال لهم : إنَّ محمَّداً أعلمني عن ربِّه ، أنّه بعث الأرضة ، فأكلت كلّ ما فيها إلاّ ذكر الله ، أفرأيتم إن كان صادقاً ماذا تصنعون ؟ قالوا : نكفّ ونمسك .

فقال : فإن كان كاذباً دفعته إليكم ، قالوا : قد أنصفت وأجملت .

وبدأت اللحظات الحاسمة ، فإذا بالأرضة قد أكلت كلّ ما في الصحيفة ، إلاّ مواضع اسم الله عزَّ وجلَّ ، فبُهِت الطغاة ، وأخذتهم العزّة بالإثم وقالوا : ما هذا إلاّ سحر .

لم يستطع كفّار مكّة مصادرة هذا الحدث العظيم بهذا الرد التافه ، بل راح الناس يتفاعلون معه ، فأسلم كثيرون ، وصدَّقوا هذه المعجزة ، وعلى أثر ذلك فُكَّ الحصار ، وخرج النبي محمّد ( صلى الله عليه وآله ) ومن معه من الشعب أعزَّة منتصرين .


----------------------------------------------

دي كانت قصه حصار المسلمين من اكتر
من
1400 سنه

انا اللي عاوز اقوله انمش مهم ان تكون غزه محاصره

ومش لازم يكون ده سبب حزننا

لازم يكون حزننا علي الحال اللي احنا وصلناله

علي كل شي ... علي اسلامنا اللي ضيعناه

انا مش بطلب منكم تروحوا تحاربوا ولا حتي بطلب منكم تدعوا

انا طلبي الوحيد اننا نبص لنفسنا

طب قولولي ازاي ربنا هينصرنا ويستحيب لدعاوينا وفينا ناس بتبيع ضميرها عشان شوية فلوس

وفينا ناس بتاخد اعدائنا بالحضن

وفينا بنات بتنزل الشوارع كاسيات عاريات

وعندنا سينيما شريفه ... بقت المشاهد الجنسيه فيها (بتخدم العمل الفني)

ومش بس كده دحنا بقى عندنا مسابقات لأجمل راجل في مصر واجمل ....... في مصر

وطبعا النقط دي هيتحط فيها واحده شريفه عفيفه محترمه لو دعت ربنا وقالت يارب انصر المسلمين أكيد هينصرنا !

وياريته بس علي كده دحنا عندنا كمان ناس بيتاجروا بالدين وممكن يقولوا اي شيء عشان شوية فلوس

انا مش بلوم لا حزب ولا حكومه كالعاده

لاني علي قناعه ان العيب مش فيهم

وان العيب فينا احنا ... احنا اللي بنسرق واحنا اللي بننهب واحنا اللي بنرتشي واحنا اللي بندخل الافلام اياها ونشجعه ينزلوا افلام تانيه واحنا اللي بنزل بناتنا الشارع كده واحنا اللي مبنصليش والحكومه يعني دايما هيا المظلومه

انا كان هدفي من الموضوع ده ان كل واحد فينا يراجع نفسه

وبلاش بقي نقف عند كل حاجه وننسي اللي قبلها

يعني النهارده غزه امبارح العراق بكره ايران

وبدل منقول واغزاه ... نقول
وا اسلاماه


-------------------

يا مسلمين ياللي التراب غطا عيونكم
متغممين بالخوف وليه مبقاش هاممكم
كل خوفي لنكون فيوم عبيد كُهين-واشكي لمين
منا حالي برضو زي حالكم... !

رباعيات ليكوريكا ... ج3



الجمعة، ٢٥ يناير ٢٠٠٨

كل يوم وانت قلبي ... ليكو...و...ريكا...ملحمة حب




ونواصل ليكو 2008

والمرادي اغنيه دويتو بين

ليكو ... و ... ريكا

اتمني تعجبكم ... ومستني رايكم اللي اكيد بيهمني

------------------
ليكو ... و ... ريكا

(ملحمة حب)

كل يوم وانت قلبي
---

ليكو :
كل يوم وانتي قلبي
كل يوم وانتي جنبي
كل يوم وانتي عندي
أغلي حتى من الحياه

ريكا :
كل يوم وانت ليا
روح حياتي ونور عنيا
مستحيل وانا جوا حضنك
اني احس بأي أه

ليكو :
كل يوم زيك بحبك
كل يوم زيك بدوب
كل يوم وانا جوا قلبك
راح تغير مني القلوب

ريكا:
كل يوم وانا ليك بغني
روحي منك وانت مني
أه بحُبك مش هاممني
أي شيء في الكون يغيب

ليكو-و-ريكا:

كل يوم بالحب نقدر
والأمل جوانا يكبر
كل يوم نحلم ببكره
يبقي فيه الحب أكتر

كل يوم بنعيشه عيد
اصلنا بنحب بعض
والغرام فينا يزيد
والهوى مبينا وعد



كل يوم وانتي قلبي
كل يوم وانت جنبي
كل يوم وانتي عندي
أغلي حتى من الحياه

ليكوريكا






الاثنين، ٢١ يناير ٢٠٠٨

معاد الحب !

دي يا جماعه تاني أغنيه في ليكو 2008 ... اسمها معاد الحب


ودي اهداء لكل الناس اللي لسه ملقوش نصهم التاني ... وبيدوروا عليه ومش عارفين ان الحب ليه معاد واكيد جاي فيوم من الايام ...

اسيبكم مع الاغنيه ... واتمني تعجبكم


------------------------------


معاد الحب !


سيب الهوى يصحيك ... متروحش تفتحله

هوا اكيد هيجيك ...وهتبقي من اهله

ده اللي بيجري وراه ... بيجيله علي مهله

واللي يسيبه ويرحل ... يلاقيه بيندهله


حاجات بنحلم بيها

وحاجات بتحلم بينا

واللي بنجري عليها

بنلاقي غيرها تجينا !


نحلم ببكره واللي جايبه معاه

والحلم يكبر والأمل وياه

ومهما يبعد حلمنا عنّا

هييجي يوم والقلوب تلقاه !


حاجات بنحلم بيها

وحاجات بتحلم بينا

واللي بنجري عليها

بنلاقي غيرها تجينا !


ده الحب ملهوش معاد ومكان

في قلوبنا بيعيش في اي زمان

يا حب ليه لسه مجاش يومك ؟

مع اننا فاتحين عشانك الاحضان!


دي حاجات بنحلم بيها

وحاجات بتحلم بينا

واللي بنجري عليها

بنلاقي غيرها تجينا !


يا حلمنا يا طيف وبيعدي

يا حب جاي بكره تزور قلبي

يا كلمه جوايا نطقتها غنوه

غنيتها لكن ... سمعتها لوحدي!


سيب الهوى يصحيك ...

متروحش تفتحله

هوا اكيد هيجيك ...
وهتبقي من اهله

ده اللي بيجري وراه ...

بيجيله علي مهله

واللي يسيبه ويرحل ...

يلاقيه بيندهله !


حاجات بنحلم بيها

وحاجات بتحلم بينا

واللي بنجري عليها

بنلاقي غيرها تجينا !




------------------------


ليكوريكا

السبت، ١٩ يناير ٢٠٠٨

غمضت عيني ... ليكو 2008


ليكو : ازيكم يا بشر ...

انا :(هما فين البشر دول يا ليكو-البلوج هو خالص-)

ليكو : (اسكت انت ملكش دعوه انا بكلم ناس انت مش شايفهم وهما أكيد سامعينني وشايفينني ... هسسسسسسسسسسسسسسسسسسس خالص )

انا : المهم النهارده يا جماعه جايبلكم اول اغنيه في ليكو 2008

لقيتني وانا بذاكر كده عمال بدندن كده كلمتين عجبوني

كتبتهم وكالعاده هقفرفكم بيها ... اتمني تكون بدايه موفقه للألبوم الجديد ...

الاغنيه قصتها اني غمضت عنيا وسرحت مع نفسي ومع اللي بحلم بيها ...

ليكو : اممممممممممممممم ماشي هعديهالك يا سي عبده ... اقصد يا سي ليكو

انا : انا مش قلتلك هس خالص ... المهم وقبل منتخانق انا وانا ... اسيبكم مع الاغنيه واتمني تقولولي رايكم ...

------------------------

(غمضت عيني)

غمضت عيني ... شفتها
لقيتني دبت فحبها
ضمتني جوا عنيها ... عشت فقلبها

وبيتنا كان فجنه عاليه فوق السحاب
وانا الامير وهيا ملكه فعرشها

غمضت عيني ... شفتها
لقيتني دبت فحبها

وحلمت بيا وانا بصلي جمبها
والصبح تدعيلي أكيد من قلبها
والحزن تمحيه بلمسة ايد وطيبه
في الدنيا عمري ملاقي يوم زيها

غمضت عيني ... شفتها
لقيتني دبت فحبها
ضمتني جوا عنيها ... عشت فقلبها

وبيتنا كان فجنه عاليه فوق السحاب
وانا الامير وهيا ملكه فعرشها

ويوسف ابني خد جماله منّها
لما ببوسه أكنني بست خدها
ولما ينجح ... فرحِنا واحد
تحضن وليدي وكانني انا اللي فحضنها

غمضت عيني ... شفتها
لقيتني دبت بحبها
ضمتني جوا عنيها ... عشت فقلبها

وبيتنا كان فجنه عاليه فوق السحاب
وانا الامير وهيا ملكه فعرشها

والحلم طال ... مرت سنين وانا جمبها
والوقت عدى ... بس لسه بحبها
وكل مره بشفها فيها بحس اني ...
نفسي اصرخ واقولها ... مشتاقلها

غمضت عيني ... شفتها
لقيتني دبت بحبها
ضمتني جوا عنيها ... عشت فقلبها

وبيتنا كان فجنه عاليه فوق السحاب
وانا الامير وهيا ملكه فعرشها

هيا الربيع وبيها بتنفس
زي الندي تلمسني بتونس
وفكل فجر هيا شمسي
ونورها فيا عمره مبيخلص

غمضت عيني ... شفتها
لقيتني دبت بحبها
ضمتني جوا عنيها ... عشت فقلبها

وبيتنا كان فجنه عاليه فوق السحاب
وانا الامير وهيا ملكه فعرشها

----------------------

ليكوريكا

الثلاثاء، ١٥ يناير ٢٠٠٨

عديت النجوم


بعد مسبت البلوج امبارح طلعت وقفت في البلكونه شويه ، ايوووووووون طلعت وقفت في البلكونه في الجو المتلج ده ، يعني عالساعه واحده ونص بالليل كده ، طبعا مش محتاجين احكيلكم عن المود اللي كنت فيه ... لان موضوع (وعدى النهار) كفايه عليكم أوي

المهم بقي لما طلعت في البلكونه وكانت درجة حرارة الجو متزيدش عن 5 درجات مئويه ... ودرجة حرارتي انا فوق الأربعين ... بجانب طبعا اني كنت برتعش:) ... بصيت للسما ولأول مره فكرت أعد النجوم ...

ايووووووووووووووووووون لأول مره ... منتو عارفين يا جماعه ليكوريكا (أعذب ويعول ... ولن يشارك في الاثاث)

وهكررها تاني ... لن اشارك في الاثاث وكفايه اوي عليها الشقه ... يا جماعه تعالوا عندنا الكليه (صيدلة الزقازيق مباني مهكعه وبنات متدلعه وولاد يعيني عليهم –رجاله مخستعه- ! )

وبجانب ده كله ان نسبتنا ولد لكل 5 بنات ... يعني لكل واحد اربعه وواحده احتياطي ... صحيح انا لسه في سنه تالته وعندنا بنات ماشاء الله حوامل ومتجوزين ومخطوبين ... لكن ده ميمنعش ان في كتيييييييييييييير والعياذ بالله مش لاقيين !

المهم مش هتكلم كتير في موضوع البنات ده لاني عامل معاهم هدنه اليومين دول ... انتو عارفين بقي ايام امتحانات والواحد موش فاضي ... نرجع بقي لموضوع النجوم تاني ، وانا واقف في البلكونه والجو متلج قررت لاول مره اني اعد النجوم جايز انسي اللي انا كنت فيه امبارح ... وابتديت العد ...

1 ... 2 ... 3........20...............36

وبس هما 36 نجمه اللي لقيتهم في السما ساعتها ... جايز الباقي راح مشوار ... او خلينا نقول كانو بردانين في الجو المتلج ده ، وخصوصا ان السما بحري وسبع مطارح وتلاقي كل نجم واخد عياله ومغطيهم بسحابه من اللي بيتباعوا في تميمه دول !

بس موضوع السحاب ده مدخلش دماغي وقررت أعد تاني

1.....2.....3....15....26

امممممممممممممم ... دول بقو 26 نجمه بس ... ايه يا جماعه الساعه لسه 1.30 ... وانا اعرف ان الامتحانات شغاله دلوقتي في السما ومفيش نجوم بتنام قبل الساعه 3 ... كده يقولوا عالنجوم كسلانين وبينامو فعز الليل ... ايش حال ان مكنتوش بتطلعوا غير كام ساعه في اليوم ... اومال لو كنتو قاعدين معانا في الارض وعايشين الاربعه وعشرين ساعه في الاربعه وعشرين ساعه ؟!

لا انا لازم اعد تاني ...

1...2.....3.......10......21 ..........29

لا لا لا ... كده بجد تهريج ... احنا هنلعب مع بعض ولا ايه ؟! ... شويه تقلوا وشويه تزيدوا ... انا مينفعنيش الكلام ده ... مهو انا واقف فنفس المكان ولابس نفس النضاره والسما هيا السما والارض هيا الارض وانا معايا اثبات من ممدرسة الشبان الملسمين الابتدائيه اني بعرف اعد ... ايه يا جماعه انتو هتشككوني فنفسي ولا ايه

ايووووووووووووووووووون بعرف اعد

1-2-3-4-5-6-7-8-9-10-11-12-13-14-15-16....

اهو والله بعرف اعد ... اممممممممممممممممم يمكن يكون الاكتئاب المزمن اللي عندي ده مأثر علي المراكز الحسابيه في المخ عندي ... امممممممم هوا انا اساسا عندي مخ ...

ايون المفروض ان كل البني آدميين عندهم مخ ... بس انا ايش ضمني ؟! ... مش يمكن الجمجمه فاضيه من جوا ؟

لا لا يا ليكو ... امال انت بتفكر ازاي ... وبتذاكر ازاى ... ودخلت صيدله ازاى ... لا انت اكيد عندك مخ ... مع ان مفيش حاجه اكيده في الزمان ده ...

وخصوصا ان انت تصرفاتك اليومين دول بقت مريبه ... مره تقول احنا كلاب ... ومره تقول انت مش كئيب ... ومره تقول رباعيات شاب تجاوزت احلامه السحاب وانت اساسا عمرك مطلعت سطوح بيتكم ... ومره الاقيك نزلت تحت الارض (اقصد تحت اللحاف) ... انت مالك ياض يا ليكو ... انت مكتئب ليه ... قولو قول انا زي صاحبك ... مكتئب ليه ؟!

احنا مش متفقين مفيش اكتئاب تاني ... والدنيا بيمبي بميبي ؟! ... ايه يعني شوية مشاكل حصلت وبتحصل كل يوم ... ايه يعني امتحانات زي الزفت ... ايه يعني مشاكل ملهاش اول ولا اخر ... ايه يعني محدش حاسس بيك ... ايه يعني الناس واخدين عنك فكره غلط ... ايه يعني اي حاجه ...

تكونش بتحب ياض ؟ ... تؤتؤ محنا متفقين ليكوريكا أعذب ويعول ... ولن يشارك في الاثاث :)

المهم وانا عمال اقول ايه يعني ايه يعني ... الاقيلكم الحاجه ماما ورايا في البلكونه وطبيعي السؤال المنطقي اللي يتسأل في الوقت ده وفي الموقف ده ... ايه اللي مطلعك البلكونه السعادي ... وبعدين ترجع تقول عندي برد وصداع ومش عارف اذاكر ... طبعا انا خدت الكلمتين في جنابي وسكت ... مهو مكنش ينفع ارد واقول

معلش يا ماما ... اصلي كنت بعد النجوم :)

----------------------------------------------

بصيت فيوم للسمـــــا ولقيت هنــاك نجمتيــــن

ونجمـــه تايهه بعيد والبــاقي متبسميـــــــن

أما اللي كانت تايــه زيي ... صعبت عليـــا

مديت ايديا ... بـس الايـديـن هتطـول لفيـن؟!

رباعيات ليكوريكا ... ج3

أنا حبيت أقولكم اني بقيت كويس ، ودعاويكم جابت نتيجه ... يارب دايما الفرح والتوفيق للكل ... ويارب اهدي كل شباب المسلمين للخير ...

ليكوريكا


الاثنين، ١٤ يناير ٢٠٠٨

وعدى النهار

وعدي النهار ، النهار اللي بيزورنا كل فين وفين ، اللي بيجينا بس واحنا فرحانين ، بس من امتي واحنا بنفرح ، ولو فرحنا بنفرح قد ايه ؟

كنت واخد عهد علي نفسي مكتبش حاجه حزينه او كئيبه تاني ، كنت واخد عهد علي نفسي اكون اقوى من نفسي ومن الظروف ومن المشاكل ، بس للأسف طلعت ضعيييييييف أوي ، والدنيا اهي هناك شايفها بتبصلي وبتضحك ... ضحكة المنتصر ... الضحكه العطشانه اللي بترويها بدموعي !

مش عارف واضح اني زي مبيقولوا عليا ، هعيش واموت كئيب ، بس صدقوني يا جماعه مش بمزاجي ، والله مبمزاجي ، يعني هوا في حد يحب يكون كئيب؟

ومين في الدنيا دي بيهوى الدموع

ومين بيرحل ومين بيستني الرجوع

ومين بيرسم وش حزنان اوي ...

الا وكان تعبان وقلبه كان موجوع ؟

رباعيات ليكوريكا ج- 3

مش عارف في ايه ... وليه ده كله ... صحيح احنا مش في جنه ... وصحيح الدنيا يوم حلو ويوم وحش ، بس مش عارف ... حاسس اني مش قادر ... مش قادر حتي ارفع راسي ... مش قار افضفض واقول باي حاجه ، حاسس اني كل مبتكلم بزود الجرح اكتر ، بحب ان الجرح ده عامل زي الجثه ولازم محدش يعرف مكانها غيري ، عشان بعد مدفنها تتنسي للأبد ... بس انا حاسس ان من كتر الجراح والاحزان ... معدش في مكان عالارض ادفنها فيه ... واملي الوحيد ان ربنا وحده اللي يساعدني اني ادفته للأبد ...

سرحت مع نفسي لحظه ، جالي هاتف اني اكتب موضوع عنوانه (الهروب الي الموت) ... بس منعت نفسي اني اكتب حاجه بالمعني ده ، مع اني فعلا بحس الاحساس ده وبستغفر ربنا واقول يارب ثبتني

كراهية تمني الموت لضر نزل بالإنسان:
لا يدعون أحدكم بالموت لضر نزل به ولكن ليقل : اللهم أحيني ما كنت الحياة خيراً لي ، وتوفني إذا كانت الوفاة خيراً لي
متفق عليه

انا دخلت عالبلوج وكتبت اللي جوايا ومش عارف انا بكتب ايه ولا بكتب ليه ، بس جايز ارجع بعد كام يوم

واقول الحمد لله اللي خرجني من اللي انا كنت فيه ده ...

بس انا عندي رجاء علي كل واحد يدخل الموضوع ده ... انه يدعيلي من قلبه ، يدعيني ربنا يهديني للخير في اي وقت واي مكان ، يدعيلي من قلبه ويدعي لكل شباب المسلمين

-------------------------------------------------------------------

عدّى النهار .. و المغربية جايّة

تتخفّى ورا ضهر الشجر

و عشان نتوه في السكة

شالِت من ليالينا القمر

و بلدنا ع الترعة بتغسل شعرها

جانا نهار مقدرش يدفع مهرها

يا هل ترى الليل الحزين

أبو النجوم الدبلانين

أبو الغناوي المجروحين

يقدر ينسّيها الصباح

أبو شمس بترش الحنين؟

أبداً .. بلدنا ليل نهار

بتحب موّال النهار

لما يعدّي في الدروب

و يغنّي قدّام كل دار

و الليل يلف ورا السواقي

زي ما يلف الزمان .. و على النغم

تحلم بلدنا بالسنابل و الكيزان

تحلم ببكرة .. و اللي حيجيبه معاه

تنده عليه في الضلمة و بتسمع نداه

تصحى له من قبل الأدان

تروح تقابله في الغيطان

في المصانع .. و المعامل .. و المدارس .. و الساحات

طالعة له صحبة .. جنود

طالعة له رجال .. أطفال .. بنات

كل الدروب واخدة بلدنا للنهار

و احنا بلدنا ليل نهار

بتحب موال النهار

لما يعدي في الدروب

و يغني قدّام كل دار

الخميس، ٣ يناير ٢٠٠٨

تحت اللحاف !



كل سنه وانتو طيبين والفين وتمانيه سعيده عليكم ومبتقاش زي الفين وسبعه خالص ، المهم احنا كل سنه بنقول يارب السنه اللي جايه تبقي احسن من السنه اللي فات ،وده حقنا ... حقنا اننا يبقي عندنا امل فبكره واننا نحلم انه هيبقي احسن ، لكن الواقع بيقول اننا ماشيين من سيء لأسوأ ، واللي بينكسر مبيتصلحش واللي بيتاخد مننا سواء اوطان او قيم ومباديء او احلام لسه متولدتش ... للأسف مبيرجعش ... بس برضو بنحلم وبندعي ... جايز احلامنا تتحقق وجايز دعانا يستجاب ...!

السنادي بدأت في غفله مني (حلوه في غفله دي) ، لاني كان عندي امتحان يوم 2/1 ... امتحان فارما وما ادراكم ما الفارما ، عرفت ان السنه خلصت لما بعتلي واحد من صحابي مسج عالموبايل وقاللي كل سنه وانت طيب وحط بعديها بين قوسين (ذاكر كويس يا ليكو عاوزين امتياز) ... طبعا يا جماعه هوا كان بيكلم (ليكو) ... وانا مليش دعوه بموضوع الامتياز ده خالص ... ساعتها بقى وكعادة كل سنه ببقي قابع (تحت اللحاف) وحاتط ايدي علي خدي والمذكرات بتبقي قدامي وتحت السرير وعلي الارض وعالمكتب اللي مبقعدش عليه خالص ده ، يعني هيا بتبقي فترة بيات شتوي لمدة شهر (تحت اللحاف) ، ويا سلام علي الاحساس بالدفا وكل اللي حواليك متلجين ... ولا منظري لما مامتي بتصحيني الساعه تلاته ولا اربعه وتقوللي قوم اقلع النضاره وشيل الكتب من حواليك وادخل نام ... او لما مامتي بتيأس مني وبتعمل الحاجات دي كلها وبتسبني نايم زي منا برضو (تحت اللحاف) :)

بس الغريب بقي في موضوع اللحاف ده اني مش أنا لوحدي اللي ببقي قابع تحت اللحاف ... وعلي غرار فيلم عمارة يعقوبيان -احنا مش لوحدنا ... احنا كتير أوي- (تحت اللحاف يعني) ... ولقيت كتير من زمايلي بيذاكروا تحت اللحاف وبيناموا تحت اللحاف وبيتكلموا في التيليفون برضو تحت اللحاف ... ومش زمايلي بس ده كمان عالنت لما عملت سيرش علي تحت اللحاف ... لقيت حاجات غريبه ...

اول حاجه لقيت ناس كتير كاتبين مكان اقامتهم في المنتديات (تحت اللحاف) ... ولقيت موضوع تاني ... (هل يختنق الحب تحت اللحاف ! ) ... مش بس كده ... دنا لقيت اسرائيل برضو ليها في موضوع (اللحاف) ده ... وكأنها ورانا ورانا حتي (تحت اللحاف) ... وكان عنوان الموضوع – فلسطين لاتحزني فكلنا (تحت لحاف) اسرائيل- ... ولقيت موضوع ادبي اسمه (تحت لحاف الليل) وموضوع كمان اسمه (تحت لحاف) اللهفه ! ...ومقال سياسي عن العراق اسمه (الي مناضلين تحت اللحاف) ... !

بجد يا جماعه انا مكنتش متخيل اساسا اني هلاقي نتايج خالص عن (اللحاف) ... وكنت فاكر انا بس اللي (اللحاف) حاجه مهمه بالنسبالي ... لكن ده طلع في ناس كتير متقدرش تعيش من غير اللحاف ... أو خلينا نقول في ناس مبتقدرش تعيش غير تحت اللحاف !

بص حواليك كده وشوف نفسك في المرايه ، واسأل نفسك سؤال سهل خالص (مش زي اسئلة الفيتو) ... انت عشت قد ايه تحت اللحاف ؟ ... وكام واحد تعرفهم عايشين تحت اللحاف ... ويا تري ايه نوع اللحاف بتاع جنابك ... يا تري لحاف قطن ولا فيبر زي بتاع تميمه ولا لحاف الليل زي بتاع الموضوع الادبي ولا لحاف لهفه وشوق زي الموضوع التاني ولا لحاف اسرائيل ولا لحاف شاش حتي وانت تحته عريان ومحتاج غطا !

بص حواليك هتلاقينا كلنا عايشين تحت اللحاف ، حتي المعارض واللي كاتب في صفحة حياته الاولي (لا للحاف) ... هتلاقيه في بيته بينام تحت اللحاف وبياكل تحت اللحاف ويمكن كمان فاتح شركه ومسميها (لحافكو للسياحه) ... !

بس الجميل ان لسه في ناس حوالينا مش عايشين تحت اللحاف ، ويمكن كمان ميعرفوش شكله ، الناس دول هما اللي بنقول عليهم فقرا ... او زي مبيقولوا المهندسين (تحت خط الفقر ... والسعاده عامله معاهم زاويه منحرفه) ... الناس اللي بيقول عليهم الصيادله اللي زيي ( عنده جفاف اديله محلول) ... وهما نفس الناس اللي بيدخلوا المستشفيات الحكومي وبيعاملهم الدكاتره (اللي عندهم ضمير وأكيد معندهمش لحاف) أحسن معامله ... وياريتها تيجي عالمعامله بس ... وياريتهم حتي بعد ميطلعوا يروحوا ويبقوا زي غيرهم تحت (اللحاف) ... للأسف هما بيطلعوا متغطيين عالجاهز ... بس مش بلحاف ... بيبقوا متغطيين بكفن وسايبيين (اللحاف) لأهل اللحاف !

والله يا جماعه انا فكرت ابعت طلب للريس واقوله ينزل (لحاف) لكل مواطن في الدعم نظرا للأهميه القصوى (للحاف) في البيت المصري !

بس رجعت فكلامي وقلت الريس مش ناقص هموم والله ، وبعدين يعني هنجيب منين قطن يكفي 70 مليون لحاف ... يللا بقي مش مشكله حكاية الدعم دي ... المواطن برضو لازم يعتمد علي نفسه ويجيب (لحافه) بعرق جبينه ... مهو علي رأي المثل الليكوريكي القديم ...

(اللحاف بيقولك اتصرف) !

كل سنه وانتو متغطيين ونايمين في العسل ... كل سنه وانتو تحت اللحاف !

وكالعاده هقرفكم برباعيات شاب تجاوزت خيالاته السحاب (حاسب يا ليكو لتخبط في القمر) ... يارب تعجبكم ...

-------------------------------------

في فجر كل صباح في ناس كتير نايمه

وفعز عز اليل في ناس كتير قايمه

وفي بشر نايمين من يوم منزلوا الأرض ...

وفي بشر صاحيين بس القلوب نايمه !

---

تحت اللحاف جايز يكون حبة دفا

واللي يخاف بكره هيــاخد بالقفا

واللي هيفضل طول حياته تحت اللحاف

ياريته مات أو حتي مالدنيا اتنفى !

أنا مش كئيب !


ازيكم يا جماعه ... واحشني كالعاده

النهارده انا جايبلكم حاجه جديده كنت اتكلمت عنها قبل كده

وهيا عباره عن زجل برد بيه علي كل الي بيتهموني ويقولوا اني كئيب ! ...

المفروض يا جماعه كنت القيتها بصوتي عشان تبقي في افضل صوره ليها ... عشان كل المعاني توصل زي منا عاوز ... لكن هنعمل ايه في النت بقي ... عموما تتعوض ان شاء الله ... أول مالنت يرجع أكيد هرفعهالكم :)

وبجد يا جماعه محتاج رايكم كلكم ...

أنا مش كئييب !!!

أنا مش كئيب يا خلق هوو ...
واللي قالوه - عنّي اشاعه مغرضه
بيقولوا اني بقالي دهر ...
أو ييجي يمكن ألف شهر ...
كئيب لكني مش كده !!!
أنا شاب زيي زيهم ...
أو جايز أحسن منهم ...
وان كنت أنا زعلان شويه
يبقي الكآبه طبعهم ...
هحكيلكوا عني وعنهم
وانتو تقولولي مين بقى فينا الكئيب ؟!

اناكنت نونو...
يعنى صغير..
وعشان يوماتى
كنت بغير...
جدو جابلي برباطوس....
معرفش كان جايبه منين!
وعدي يوم ...
أقصد يومين...
مبقتش ألبس برباطوس
بيقولوا اني...
آل ايه كبرت....
ولبسي لازم يكون رزين !
وهوا يعني عشان كبرت
ملبس حتي البرباطوس ?!
عالم غريبه يا أخي ...
وكأن لبس البرباطوس بقى حاجه عيب
قولولي بس مين بقي....فينا الكئيب ؟!

وشويه رحت المدرسه
واللي تعبني ... لما قالولي يا ليكو يبني ...
مصر ماما ... وماما أم كويسه !!!
قلت ماما ... ماما ايه ؟
أمال الحاجه فاطمه تبقى ايه ؟!
قالولي ماما تبقي برضو أم ماما ...
وماما التانيه برضو تبقي ماما !!!
تهت منهم وأما تهت ...
قالولي تبقى مين مامتك يا شاطر ؟!
قلت مصر تبقي ماما ... وماما تبقى بنت ماما !!!
والجواب كان شيء عجيب ...
قولولي بس مين بقي فينا الكئيب ؟!

وأما عدى العمر بيا ... سألت ماما ...
شايله ايه بس ليا ؟!
قالتلي ماما ... ان جدي كان عزيز ...
وأن أبويا كان عزيز ...
وأن انا مش شويـّــه
بصيت لنفسي في المرايه ... وقلت آه مش شويــّـه !
بس المرايه لقيتها صيني ...
والفرشاه اللي بنكش بيها شعري برضو صيني ...
والجيلّ صيني ...
والمكوه صيني ...
وهدومي صيني ...
حتى القلم اللي بيه بتعلميني
يا ماما برضو لقيته صيني !!!
بالذمه ده مش يبقى عيب ؟!
قولولي بس مين بقي فينا الكئيب ؟!

عدت سنين ... سبت المدارس والكتاب
في الجامعه كان كل الصحاب
وحياتي كان ليها بابين ...
باب تجاره ... وباب آداب :)

والغريب ... ان المباني برضو كئيبه
والبشر لسه عجيبه
والبنات حلويـــــــن أوي ... والولاد بقو حاجه خيـــــبه !

أما قلبي ... فجاب حموضه لمعدتي ...
مره يحلم بالقمر عند طب ...
وان راح علوم يقول يعيني عالنجوم !
ياعم قلبي وحياة أبوك ...
خليك معايا في صيدله !
طب وعلوم بكره يسبوك ...
وهتبقي ليله مقندله !
رد قلبي وهوا ماشي فهندسه ...
غلطان أنا ؟ ...
علشان بجيبلك مزه حلوه كويسه ؟!
وأما لقاها عند حقوق ! قلت خلاص يا ناس هروق ...
لكن خساره ... المزه طلعت من تجاره !
وعرفت ده لما (باعتني) من غير فلوس
والسبب ... قسمه ونصيب !!!
قولولي بس ليه بقي هكون كئيب ؟!

وكبرت حبــّـه ... وعرفت أن الدنيا دي ولا تسوى حبــّـه
اللي تحبه بيضيع فثانيه ... والصدق ضايع بين ألف كدبه !
قررت أعيش ...
وحدي معاهم ... بعيد وبينهم ... غريب ومنهم
ميهمنيش ...
قفلت بابي ... وواربت شيش ...
يمكن فيوم ييجي القمر عشان يآنس وحدتي ...
أو نجم تايه في السما يرسم معايا بسمتي ...
أو حتي صوت يهزم سكون الليل ويقتل غربتي ...
بس شباكي مبيجبش غير هوا مليان تراب !
ومن التراب كان البشر ... ومن البشر تعب التراب !
بالذمه ده مش شيء عجيب ...
قولولي ليه بس أنا هبقي كئيب؟
!

مش مهم اللي فات - سيبوني احلم باللي جاي